Ua Na’o Tusiga Faatekinolosi: Talavou Matutua
Liliuina o O’u “Aisea” i “E Faapefea”
I le taimi o se tasi o ou tofotofoga sili ona faigata, o le suia o la’u vaaiga na fesoasoani ia te a’u e faamalosia ai lou faatuatua.
Ina ua mavae ni nai vaiaso faigata o se faifeautalai fou i Ausetalia, sa amata ona ou manatu o le avea ma se faifeautalai e le mo a’u ma e tatau ona ou alu i le fale. Sa ou faailoa atu ou lagona o le popolevale i lo’u peresitene o le misiona, ma ina ua mavae le tele o mafaufauga ma tatalo, sa ia siitia atu au i se eria fou ma se soa fou. Sa vave ona ma fesootai ma lenei soa, ma na amata ona mou atu ou lagona o le atuatuvale ma le faanoanoa. Ae i le na o le fa masina o le galuega faafaifeautalai, sa ou lagona lava le pei o le a matuai faateleina le faigata mai lena taimi e agai atu i luma.
I se tasi aso, i le faaiuga o se fonotaga faaleitu, sa ma maua se asiasiga faateia mai le ma peresitene o le misiona. Sa ia tuuina mai lana telefoni ma fai mai o lo’u tina lea. Sa vave ona faanoanoa lo’u loto ma sa ou iloaina o loo i ai se mea o tupu. Na faatumulia o’u mata i loimata a o lei tauina mai e ia ua maua lo’u tuagane laitiiti, o Elliot, i le kanesa. Sa vave lava ona nutimomoia lo’u loto, ma i lena taimi, sa leai se isi mea na sili atu ona ou manao i ai nai lo le faatasi ai ma lo’u aiga. Ae ina ua faamafanafanaina au e lou tina, sa ia fai mai ia te au o lou faatuatua ma au tatalo o le a sili atu ona aoga i Ausetalia nai lo le toe foi atu i le fale.
Sa mafai ona ou valaau atu ia Elliot ma tau atu ia te ia lou alofa tele ia te ia. Sa i ai Elliot iina mo au i le tele o taimi i lou olaga atoa, ma sa ou matuai moomoo lava ina ia mafai ona ou i ai iina i ona tafatafa. Sa ou faaiuina la matou talanoaga i le tatalo mo ia i le gagana Samoa ma folafola atu o le a ou aoao atua ia te ia le gagana masani a lo matou aiga pe a ou toe foi atu.
Mulimuli ane i lena po a o ou tatalo, sa ou tagi atu i le Tama Faalelagi. Sa ou fesili atu i se fesili se tasi: “Aisea?” “Aisea o Elliot ai?” “Aisea ua toe tupu ai i lo matou aiga —?” Ua uma ona matou vaaia ma lagonaina le tiga o le kanesa ma taunuuga leaga o togafitiga, ma sa faatumulia lou mafaufau i le fefoifoiai i tauiviga umi a lo’u Tama ma le kanesa ma le tiga na ia oo i ai. “Aisea ua toe tupu ai lenei mea?” Sa ou fia iloa! Sa ou feagai ma ni fesili faapena lea na fesili mai ai tagata i taimi uma ia te au o se faifeautalai, ae e oo lava i tali autu o le talalelei ou te tuuina atu ia i latou sa le lava le lelei mo a’u.
A o ou tootuli i le tatalo i le tiga ma le le mautonu i lo’u loto, sa ou lagonaina le oo mai o se lagona toafilemu ia te a’u. Sa tonu ia te au ia toe tatalo. O le taimi lea sa ou fesili atu ai i le Tama Faalelagi, “E faapefea?” ae le o le “Aisea?” “E mafai faapefea ona ou faatagaina lenei tofotofoga e faamalosia a’u ma lou faatuatua?” “E faapefea ona aafia Elliot ma le aiga atoa i lenei tofotofoga?” “E mafai faapefea e lenei luitau ona fesoasoani ia te a’u e avea ai ma se faifeautalai lelei atu ma sili atu ona lelei?” “E mafai faapefea ona ou faaaogaina lenei taimi faigata e fesoasoani ai e aumai le filemu ia i latou e le iloa le talalelei po o le Togiola a Iesu Keriso?”
O le taulai atu i le “E Faapefea?” nai lo le “Aisea?” na fesoasoani ia te au e vaai ai i mea e ala atu i se vaaiga o le faatuatua. O lenei suiga o le taulai atu na toe faafouina ai foi lo’u agaga faafetai mo tali autu o le talalelei, ia o ni upumoni moni lava e faavavau. E alofa lava le Tama Faalelagi i ai tatou. O tofotofoga, tiga, ma le kanesa e le o ni faasalaga. Na saunoa mai Elder Jeffrey R. Holland o le Korama a Aposetolo e Toasefululua, “Ia faatauaina au avega faaleagaga [ma faaletino] ona o le a talanoa mai le Atua ia te oe e ala mai ia i latou ma o le a faaaogaina oe e fai ai Lana galuega pe afai o le a e tauaveina lelei i latou” (“O Le Mesia Faigata,” Ensign, Fep. 1984, 70).
Sa ou lagonaina le tele o le filemu ma le toafimalie ia Iesu Keriso i lenei taimi faigata. Sa ou iloa ua uma ona Ia lagonaina le faanoanoa lea sa ou lagonaina, faatasi ai ma mea uma lava o le a lagonaina ma mafatia ai Elliot i masina o i le lumanai. Sa ou maua foi le mafanafana sili mai tusitusiga paia, lauga o konafesi, ma lou peresitene alofa o le misiona ma soa. Ou te le mautinoa pe mata e faapefea ona ou taulimaina na tala e aunoa ma le iloaina o le ata tēlē atu ma le fuafuaga e faavavau a le Tama Faalelagi mo lo matou aiga.
O nisi taimi e foliga mai e faigofie atu ona fesili, “aisea?” ma tuuaia ai le Tama Faalelagi mo tofotofoga ia e oo mai i lo tatou ala. Ae e ala mai i lenei aafiaga ma isi na mulimuli mai, ou te iloa o le a faamanuiaina pea lava i tatou ma lagolagoina i o tatou tofotofoga pe afai tatou te faalagolago atu i Lona alofa le maluelue ma le poto e le iu (tagai i le Alema 36:3).
I le mavae ai o le tele o masina o togafitiga mo Elliot ma le leva ona ou toe foi mai i le fale mai la’u misiona, ou te toe mafaufau lava i lenei aafiaga i soo se taimi e oo mai ai luitau i lo’u olaga. Atonu ou te le iloa lava pe aisea na oo ai lo’u tuagane i lena tofotofoga, ae ou te iloa o le a i ai se aso o le a tatou maua ai tali ia tatou fesili uma. Ou te iloa i lena lava taimi ina ua suia la’u fesili i le Tama Faalelagi mai le “aisea?” i le “e faapefea?” Sa mafai ona ou faalagolago ia Iesu Keriso ma faatagaina lenei tofotofoga e fesoasoani ia te a’u e avea atili ai e faapei o Ia.