Tuu Atu i le Atua e Fetalai Mai ia te Oe i Lona Lava Taimi ma Lona Ala
Ona sa ou faamoemoe e maua faaaliga i se auala patino ma se taimi faatulagaina, sa ou misia ai ni taimi sa fetalai mai ai le Tama Faalelagi ia te a’u.
O a’u o se teineitiiti e fiafia i le mauaina o tali.
A o o’u laitiiti, sa ia te a’u ni fesili se tele. Sa ou fia iloa pe aiseā na lanumoana ai le lagi ma le mea sa i ai la‘u pusa tu’u meaai na leiloa. Ina ua o’o i le aoga maualuga, sa atili ai ona faigatā a’u fesili. O le a le aa faatafafa o le 347? O le a le mea e tupu pe a tatou moemiti?
E ala i aafiaga, sa ou iloa ai, afai e i ai sa‘u fesili, e mafai ona ou maua le tali e ala i se fua faatatau: o se fua faatatau o le numera, o se fua faatatau faasaienitisi. Sa ou lagonaina uiga o le lalolagi e ala i nei fua faatatau.
Ina ua faalauteleina a‘u fesili i tala atu o le faaletino ma i totonu o le faaleagaga, sa i ai nisi a’u fesili: Pe moni ea le Tusi a Mamona? O a’u ea o se afafine moni o le Atua? Pe tatau ea ona ou auauna atu i se misiona?
I lo‘u fiafia, sa ou aoaoina ai e mafai ona ou maua tali i fesili faaleagaga e ala i se isi fua faatatau! O le fua faatatau mo a’u na faapenei: tatalo, faaopoopo i le suesueina o tusitusiga paia, faaopoopo i ai ma le alu i le lotu, faaopoopo i ai ma le faalogo i perofeta e tutusa tali.
Sa ou fiafia i lenei fua faatatau! Sa faigofie ona mulimulita’i ma—o le mea e sili ona taua—sa aogā. O lenei fua faatatau na fesoasoani ou te iloa ai e alofa le Atua ia te a’u ma e moni le talalelei, ma sa ou mautinoa e mafai ona ou faaaogaina e maua ai tali. Ina ua valaaulia i tatou e Russell M. Nelson ina ia “faateleina ma faaleleia [lo tatou] tomai e faalogo ai ia te Ia,”1 sa ou manatu sa ou muamua i luma atu o le taaloga.
Ae peita’i i se taimi taua i lo‘u olaga, sa foliga mai na taofia le aoga o la’u fua faatatau.
Sailia o Faaaliga
O vaiaso a o le’i amataina la‘u misiona, sa suia faamalosia ai le misiona ou te galue ai ona o le KOVITI-19, ma sa ou fia iloa ai pe o le auauna atu o le mea lava lea e finagalo le Atua ou te faia. Sa ou tatalo, faitau a‘u tusitusiga paia, alu i le lotu, suesue i lauga o konafesi, ma … leai se mea. Na ou sauni e faia ni faaiuga e suia ai le olaga, ma ua aga’i ina leai se taimi!
E ui ou te le’i maua lava sa’u tali, ae sa ou oso i luga o le faatuatua ma amata la’u aoaoga i le NAF i luga o le initoneti. Na i’u lava ina ou alu i le Misiona, ae e le’i umi ae ou toe fo’i i le fale ona o nisi o tulaga patino tulagaese ma isi fesili e sili atu. Sa ou toe taumafaia la‘u fua faatatau, ma le naunauta’iga le taofiofia mo se faamalamalamaga, ae peita’i—e leai lava. Sa ou aumaia a‘u fesili i le konafesi aoao. Sa ou aveina i latou i le malumalu ina ua toe tatalaina. Sa ou faitau i tusiga o le Liahona . Sa ou taumafaia mea uma sa ou faalogo o faia e isi e su’e ai tali. Ae sa foliga mai ua tapunia le lagi.
Ae moni lava, sa le aluvale a’u taumafaiga. Sa mafai ona ou latalata atili atu i le Atua ma lagona atili le Agaga i lo’u olaga, ae ou te le’i mauaina le taunuuga sa ou moomoo i ai. Sa ou mafaufau pe na ou iloa moni lava pe faapefea ona ou faalogo ia te Ia.
Peita’i, i se tasi aso, sa ou maua ai se tali. E le’i tupu a o o’u tatalo, faitauina tusitusiga paia, po o le auai i le lotu, ae ou te talitonu sa ou mauaina lenei tali ona sa ou sailia o Ia i nei auala. Sa le’i faamalieina atoa e lenei tali la‘u fesili, ae sa ou iloaina afai e i ai lo’u faatuatua, o le a fafagaina a‘u e le Atua i “lea fuaitau i luga o lea fuaitau, ma lea mataupu i luga o lea mataupu” (2 Nifae 28:30), i Lana lava taimi ma i Lana ala.
O fesoota’iga fou e le’i mafaufauina i le lagi na amata ona oo mai i ni auala ou te le’i oo muamua lava i ai. A o mavae atu vaiaso, sa ou taumafai e tatala lo‘u loto e talia fesoota’iga mai le Atua i ni auala fou. Ma o le taimi lena na liua ai. A o faaauau pea ona ou sailia o Ia e ala i le tatalo ma le suesueina o tusitusiga paia, sa amata ona ou matauina le sasaa mai o le taitaiga mai le Atua. Na i’u lava ina tali a‘u fesili. O se vavega lava!
Sa ou iloaina ona sa ou faamoemoe e maua faaaliga i se auala patino ma le taimi faatulagaina, sa ou misia ni taimi sa fetalai mai ai le Tama Faalelagi ia te a’u. Atonu e lē oo mai faaaliga i se ala e tasi i taimi uma. E fetalai mai le Atua ia i tatou taitoatasi ma i Ona ala.
Aua Ne’i Faatapulaaina Lou Tomai e Faalogo Ai ia te Ia
Na aoao mai Peresitene Henry B. Eyring, Fesoasoani Lua i le Au Peresitene Sili: “O le ala e maua ai faaaliga mai le Atua e le’i suia lava mai aso o Atamu ma Eva. … E faia i taimi uma e ala i le faaaogaina o le faatuatua.”2
O nisi taimi atonu tatou te manaomia le faatalitali ma le onosa’i i le Alii mo ni tali. Ae a o tatou faia lena mea, e mafai ona faaauau pea ona tatou sailia auala e aumaia ai le Agaga i o tatou olaga. Taumafai e tatalo i se taimi ese. Suesue i tusitusiga paia e pei e te le’i faia muamua. Savalivali ma mafaufau loloto. Usu ni viiga. Auai soo i le malumalu. Fai galuega o talafaasolopito o aiga. Auauna Atu. Anapogi. Tusi i lalo ou manatu pe a uma se tatalo. Asiasi i nofoaga paia. Fai mea e faatumulia i le faatuatua e te latalata atili atu ai ia te Ia. E leai se mutaaga o auala e mafai ona fetalai mai ai le Atua ia te oe aua e leai se mutaaga o Lona mana.
A o tatou sailia ni auala faaopoopo e valaaulia ai faaaliga, e mafai ona faaauau pea ona tatou faamalosia lo tatou sootaga ma le Tama Faalelagi ma lo tatou gafatia e faalogo ia te Ia. Afai o loo e sailia faaaliga, ia e iloa o loo faatalitali mai o Ia e fesoasoani ia te oe ma o le a ofoina atu ia te oe tali i Lana lava taimi ma i Lana ala. Ma afai e te vaai totoa, e mafai ona e vaai ua uma ona Ia faia.