Sa Digital Lamang: Mga Young Adult
5 ka Kasiguroan niining usa ka Walay Kasiguroan nga Kalibutan
Kining lima ka mga kamatuoran makatabang kaninyo sa bisan unsa nga mga butang.
Ang kinabuhi panagsa ra kaayo mahisubay sumala sa plano. Puno kini sa mga paglimbag-limbag, mga liko-liko, ug mga surprisa alang sa tanan. Mao nga sa unsang paagi kita makaandam alang sa umaabut kon kita wala masayud unsay mahatag niini?
Swerte lang, adunay pipila ka mga butang nga kanunay natong masaligan. Ang mosunod nga mga kamatuoran dili gayud mausab. Sila mogiya sa atong mga desisyon ug moawhag kanato sa pagpadayon, bisan kon ang dalan sa unahan daw ngitngit ug walay kasiguroan.
Ang Langitnong Amahan nahigugma kaninyo.
Bisan unsay mahitabo sa kinabuhi, kamo gihigugma. Kamo bililhon kaayo ngadto sa Langitnong Amahan (tan-awa sa Doktrina ug mga Pakigsaad 18:10). Ang inyong bili sama sa daghang mga kalibutan!1
Mobati tingali kamo nga dili kaayo bililhon. Mobati tingali kamo nga masulub-on ug nag-inusara ug nahadlok. Mobati tingali kamo nga dili takus. Apan sa gipasabut ni Sister Joy D. Jones, Kinatibuk-ang Presidente sa Primary, ang bili ug katakus dili pareha.2 Bisan kon kita makasala, kita bililhon kaayo. Mao kana ang usa ka rason nganong ang Manluluwas mihimo sa Pag-ula (tan-awa sa Doktrina ug mga Pakigsaad 18:11–13). Tungod kay Siya nakaila ug nahigugma kaninyo, Siya mihatag og paagi alang kaninyo nga mahimong limpyo pag-usab.
Ang Langitnong Amahan adunay plano alang kaninyo.
Ania kamo dinhi sa yuta sa usa ka katuyoan: aron mahisama sa Langitnong Amahan ug ni Jesukristo ug aron mobalik sa pagpuyo uban Kanila. Mao kana ang tumong sa Dios alang kaninyo, ug Siya motabang kaninyo nga matuman kini!
Wala kana magpasabut nga ang mga butang kanunay nga sayon; kita mag-atubang gihapon og mga hagit. Apan makasiguro kita nga “[ang tanan nga] mga butang molihok alang sa ilang kaayohan nga naglakaw sa katarung” (Doktrina ug mga Pakigsaad 100: 15).
Ang Iyang plano alang sa inyong kinabuhi mahimong makita nga lahi gikan sa inyong plano, apan kamo makasalig nga ang Iyang plano alang sa inyong kaayohan ug mogiya ninyo ngadto sa walay katapusan nga kalipay. Basaha ang giya nga mga basahon sa kinabuhi: mga kasulatan, ang inyong patriyarkal nga panalangin, ug ang mga pulong sa mga propeta sa modernong panahon. Sila motabang kaninyo nga mas makasabut sa Iyang plano alang kaninyo.
Dayon sunda ang Iyang direksyon. Kon kita magmasulundon sa Iyang mga sugo, kita adunay kalinaw ug kauswagan (tan-awa sa Mosiah 2:22). “Pagmaya,” si Presidente Thomas S. Monson miingon. “Ang umaabut sama kahayag sa inyong hugot nga pagtuo.”3
Ang labing mahinungdanon nga tumong mao ang kinabuhing dayon.
Samtang ang atong dalan sa kinabuhi tingali walay kasiguroan, ang atong padulngan klaro. Samtang kita mohimo og desisyon, kita makapangutana, “Unsa ang sangputanan niini?”4 Kon kini mopalayo kaninyo sa dalan sa kinabuhing dayon, kini dili ang husto nga pagpili.
Usahay kita magpunting lang sa ginagmay nga mga desisyon, sama sa homework o unsay kan-on sa paniudto. Kita makalimot sa tinuod nga katuyoan sa kinabuhi—nga mahisama sa atong langitnong mga ginikanan. Tinuod, kon kita padulong niana nga tumong, ang tanan mamaayo ra. Mao nga pagbaton og mahangturon nga panglantaw.
Ang kinabuhi tingali dili mahitabo sama sa atong giplano. Sa pagkatinuod, kini siguradong dili. Apan ang atong padulngan mao ang labing mahinungdanon sa tanan. Siguroa nga kamo nagpadulong sa hustong direksyon, ug uban sa tabang sa Ginoo, ang tanan mamaayo ra. Siya mogiya kaninyo.
Kamo adunay kabubut-on.
Samtang ang Langitnong Amahan mogiya sa atong dalan, Siya dili mosulti kanato sa tanang butang nga kinahanglan natong buhaton. Siya mihatag kanato og kabubut-on, ug Siya naglaum nga ato kining gamiton.
Sa giingon sa Ginoo, “Kini dili maayo nga Ako magsugo diha sa tanan nga mga butang; …ang mga tawo kinahanglan nga matinguhaon nga moapil diha sa usa ka maayo nga katuyoan, ug mobuhat og daghan nga mga butang diha sa ilang kaugalingon nga gawasnon nga kabubut-on,”(Doktrina ug mga Pakigsaad 58: 26–27). Niini nga sitwasyon, ang matinguhaon nga moapil nagpasabut nga kugihan ug mapahinunguron.
Usahay, ang pagbaton og kabubut-on mahimong dili mabati nga usa ka haruhay. Usahay kita tingali ganahan lang nga sultihan kon unsa ang buhaton. Apan sa pagkatinuod, ang kabubut-on usa ka dakong panalangin. Usa kini ka gasa gikan sa Dios ug usa sa mga butang nga naghimo kanato nga sama Kaniya. Maghatag kini kanato og gahum.
Unya unsay imong gusto nga buhaton?
Ang Langitnong Amahan gusto nga kita molambo.
Usa niadtong maayong mga kawsa nga buhaton mao ang atong kaugalingong personal nga kalamboan. Aduna gayuy mga butang nga atong mapalambo mahitungod sa atong kaugalingon, mga butang nga atong makat-unan, ug mga kahanas nga atong mapalambo. Adunay mga pakigsaad usab nga gikinahanglan natong himuon ug tumanon.5
Si Elder Dale G. Renlund sa Korum sa Napulog Duha Ka mga Apostoles mipasabut sa kaimportante sa atong pag-uswag niining paagiha: “Dili interesado ang Dios nga ang Iyang mga anak mahimo lang nga disiplinado ug masulundon nga mga ‘binuhi’ nga dili mokitkit sa Iyang tsinelas diha sa celestial nga sala. Dili, gusto sa Dios nga ang Iyang mga anak mohingkod sa espirituhanong paagi ug moapil Kaniya sa buluhaton sa pamilya.”6
Pangandam alang sa inyong mahangturong padulngan pinaagi sa pagkahimong labing maayo nga pagka-ikaw. Tinoa ang mga kahanas nga gusto ninyong palambuon ug ang espirituhanong mga gasa nga inyong gikinahanglan aron mahimong mas mahisama sa Dios.7 Dayon paghimo og plano sa pagpalambo niadtong mga butanga! Lig-ona ang inyong “espiritwal nga mga kaunoran” pinaagi sa pagbansay.8
Kon ang kinabuhi sa umaabut murag makahahadlok, hinumdumi nga wala pa kini sa punto nga dili na ninyo madumala. Wala kamo mag-inusara. Gamhanan ka. Ug uban ni Jesukristo, kamo dili mapugngan. Siya motabang kaninyo nga mamahimong tanan nga kamo gipakatawo nga mamahimo.