Paggamit sa Daang Tugon nganha sa Imong Kinabuhi
Ang Propetikanhon ba nga Pagpadayag para Usab Nako sa Personal?
Ang propetikanhon nga pagpadayag nga gihatag ngadto sa Simbahan magamit alang sa tanan, samtang ang personal nga pagpadayag makatabang kanato nga makahibalo unsaon paggamit niadto nga mga panudlo.
Gilitratohan ni Tiffany Myloan Tong
Daghan kita og makat-onan kabahin sa propetikanhon ug personal nga pagpadayag gikan ni Moises. Sa dihang ang Israel miduol ni Moises alang sa tabang, nagbagulbol nga sila adunay mana lamang nga kaonon, si Moises nangamuyo ngadto sa Ginoo, nag-ingon: “Kon ako lamay pasagdan dili ako makahimo sa pagdumala niining mga tawhana kay bug-at ra kaayo kini alang kanako” (Numeros 11:14).
Agig tubag, ang Ginoo nagtawag og kapitoan ka elder sa Israel aron sa pagtabang og alsa sa iyang palas-onon, nag-ingon ngadto ni Moises: “Bahinan ko sila sa Espiritu nga akong gihatag kanimo aron motabang sila kanimo sa pagpas-an sa mga palas-anon nga dili nimo madaog kon mag-inusara ka” (Numeros 11:17).
Apan si Moises gusto og mas dugang pa; siya nangandoy nga “hinaut unta nga ang tibuok nga katawhan sa Ginoo mga manalagna, nga igabutang sa Ginoo ang iyang Espiritu sa ibabaw nila!” (Numeros 11:29). Sa laing pagkasulti, si Moises nangandoy nga ang katawhan mahimong takos sa pagdawat sa Espiritu Santo aron modumala kanila.
Karon ang atong mga lider kanunay nga nag-awhag kanato sa pagtinguha og personal nga pagpadayag, agig dugang sa atong nakat-onan gikan sa mga propeta. Sama sa gipasabot ni Presidente Russell M. Nelson, “Dili na posible ang espirituhanong pagsugakod kon wala ang giya, direksiyon, ug makahupay nga impluwensya sa Espiritu Santo.”1 Kinahanglan kita nga makahibalo unsaon sa pagsunod sa tambag sa propeta samtang nagtinguha usab og tambag alang sa atong kaugalingon nga mga kinabuhi.
Kinsay Makadawat og Propetikanhong Pagpadayag?
Ang uban nga mga miyembro sa Simbahan nanlimbasog sa pag-ila tali sa propetikanhon ug personal nga pagpadayag. Apan ang Ginoo mihimo niini nga klaro kaayo kon kinsa ang gitugotan ug ang wala tugoti sa pagadawat og pagpadayag alang sa tibuok Simbahan, sama sa gihulagway sa Numeros 12.
Si Aaron ug Miriam nagsugod sa pagduhaduha sa tahas ni Moises isip propeta, nangutana: “Si Moises ba lamang ang gipakigsultihan sa Ginoo? Dili ba nakigsulti man usab siya kanato?” (Numeros 12:2).
Ang Ginoo mitubag:
“Si Moises … ang gipiyalan ko sa pagbantay sa tibuok kong katawhan.
“Mag-atubangay kami kon kami magsulti” (Numbers 12:7–8).
Ang Ginoo miklaro niini nga baroganan daghang tuig human niana diha sa Doktrina ug mga Pakigsaad 28, nagtudlo nga ang pagpadayag alang sa tibuok Simbahan moabot lamang ngadto sa gitudlo nga propeta: “Apan, tan-awa, sa pagkatinuod, sa pagkatinuod, Ako moingon nganha kanimo, walay usa nga itudlo sa pagdawat og mga sugo ug mga pagpadayag niini nga simbahan gawas sa akong sulugoon nga si Joseph Smith, Jun., kay siya modawat kanila gani sama kang Moises” (bersikulo 2).
Sa Unsang Paagi nga ang Propetikanhon ug Personal nga Pagpadayag Magdungan sa Paglihok
Busa asa man ang personal nga pagpadayag mahiangay niining tanan? Si Presidente Dallin H. Oaks, Unang Magtatambag sa Unang Kapangulohan, mipasabot:
“[Ang] personal nga linya sa komunikasyon uban sa atong Langitnong Amahan pinaagi sa Iyang Balaang Espiritu mao ang tinubdan sa atong pagpamatuod sa kamatuoran, sa atong kahibalo, ug sa personal nga paggiya kanato gikan sa mahigugmaong Langitnong Amahan. …
“… Sa kinatibuk-an niini ang personal nga linya dili makalihok nga [mag]-inusara.”2
Ang propetikanhong pagpadayag nga gihatag sa Simbahan magamit sa tanan, samtang ang personal nga pagpadayag makatabang nato nga makahibalo kon unsaon sa paggamit niadto nga mga pagtulon-an sa atong mga kinabuhi. Ang personal nga pagpadayag gikan sa Ginoo mokompirmar kon unsa ang gitudlo sa propeta; dili kini mosukwahi sa pagpadayag nga gihatag Niya sa Iyang mga propeta.
Ania ang pipila ka ehemplo sa propetikanhong tambag nga nagdapit og personal nga pagpadayag:
-
Mga kausaban nga gihimo sa home ug visiting teaching. Ang atong mga propeta ug apostoles mitambag kanato kabahin sa kataposan nga mga tumong sa pagpangalagad, nga gihimo agig puli sa home ug visiting teaching niadtong 2018, apan ang sundanan naghatag og kahigayonan sa mga miyembro nga makadesisiyon unsaon nga labing makapangalagad sa piho nga mga indibidwal ug mga pamilya.
-
Dali, Sunod Kanako nga pagtuon. Gipaila-ila sa tibuok Simbahan sa Unang Kapangulohan niadtong 2018, ang manwal naghatag kanato og latid [outline] ug gisugyot nga linya sa pagtuon, apan matag indibidwal ug pamilya modeterminar kon unsaon sa pagpahimutang ang ilang pagtuon nga mahiangay sa ilang piho nga mga panginahanglan.
Ang pagpadayag usa ka gasa, ug pinaagi sa pagtinguha og personal nga pagpadayag, kita makakat-on kon unsaon sa paggamit ang propetikanhong tambag diha sa atong mga kinabuhi.
Pagkat-on Kon Unsaon sa Espiritu Pagsulti Kanato
Ang moderno nga pagpadayag maanindot. Ang pagkaanaa niini nagpasabot nga ang Langitnong Amahan ganahan nga makig-istorya kanato, ug Siya mihatag kanato og daghang pamaagi aron makadawat og pagpadayag gikan Kaniya. Apan magkinahanglan kini og pagbansay aron makakat-on kon unsaon sa Espiritu pag-istorya kanato ug unsa ang gusto sa Langitnong Amahan nga ipadayag kanato.
Ang labing maayo nga butang nga atong mahimo, sa mga pulong ni Presidente Nelson, mao ang pagpangutana ug pagkaandam nga modawat: “Unsa nga kaalam ang kulang nimo? Unsa ang inyong gibati nga kinahanglan gayod mahibaloan o masabtan dayon? … Pangita og mingaw nga dapit diin kamo kanunay makaadto. Ipaubos ang inyong kaugalingon atubangan sa Dios. Ibubo ang inyong kasingkasing ngadto sa inyong Langitnong Amahan. Dangop Kaniya alang sa mga tubag ug alang sa kahupayan.”3
Ang Ginoo gusto gayod nga makig-istorya kanato—sa personal ngadto sa atong mga hunahuna ug mga kasingkasing ug ngadto sa Simbahan sa kinatibuk-an pinaagi sa Iyang propeta. Samtang kita magtinguha sa panalangin sa personal nga pagpadayag, kita magiyahan sa tibuok natong kinabuhi.
Sa usa ka interbiyo sa mga magasin sa Simbahan, ang mga miyembro mipakigbahin kon sa unsang paagi nga ang pagsunod sa propeta mipanalangin sa ilang mga kinabuhi ug midala og kalinaw diha sa gubot kaayo nga mga higayon.