Pagkakat-on og Pagbutang sa Akong Pagsalig diha sa Dios ug sa Iyang Propeta Imbes nga sa Akong Kaugalingon
Usa ka sesyon sa scuba diving nagtudlo nako kon sa unsang paagi nga ang Langitnong Amahan nakahibalo kon unsa ang labing maayo para kanato nga mas labaw kaysa atong nahibaloan.
Samtang nag-eskwela sa Brigham Young University–Hawaii, nakadesisyon ko nga mokuha og sertipikasyon alang sa scuba diving aron nga masuhid nako ang kadagatan nga naglibot sa maanindot nga kampus. Alang sa kataposan nga bahin sa panapos nga kasinatian sa sertipikasyon, ang akong mga kaubanan ug ako mihimo og 20-minutos nga pagsalom padulong sa Kewalo Basin Harbor sa Honolulu.
Ang among tigtudlo og dive miangkon nga kon moabot na kami niini nga punto, nakahibalo na kami unsaon nga mahimong luwas ug malingaw ang among kaugalingon. Kami tataw gihapon nga kinahanglang mosunod sa sukaranan nga mga lagda sama sa magtinagurha [buddy system], apan kami giingnan niya nga mahimong mas motutok sa paglantaw-lantaw kaysa pagpakita og piho nga mga kahanas.
Ang kataposan nga pagsalom nindot kaayo, ug nalingaw ko nga nagtan-aw sa puti og ikog nga mga iho [whitetip shark] ug mga pawikan sa dagat. Walay lain nga nakapadayeg nako niining maanindot nga kalibotan nga gilalang sa Ginoo alang kanato nga sama kadako kaysa makahimo sa paghangad sa ibabaw sa dagat ug makaamgo nga nagginhawa ko sa ilalom sa tubig.
Pagbiya sa Tiggiya
Sa dihang ang among sesyon padulong na nga mahuman, ang tigtudlo sa pagsalom mora og nahingangha kaayo sa usa ka bato nga sama ka dako sa unlan. Makita nga mora og gisulayan niya kini sa pag-alsa, apan nawad-an ko sa pailob. “Naa kami pipila lang ka minuto,” naghunahuna ko sa akong kaugalingon. “Dili ko ganahan mausik ang akong panahon sa pagtan-aw sa bato.“
Mibiya ko aron sa pagtan-aw sa coral sa duol sa dihang kalit lang ko nakadungog og daghan nga hilom, naghinam-hinam nga mga tingog sa ilalom sa tubig. Milingi ko ug nakita ang akong grupo nga nagtutok sa usa ka butang, apan kay duna may regulator sa akong ba-ba, dili ko makapangutana kon unsa ang nahitabo.
Ang among grupo mibalik og langoy padulong sa ibabaw sa dagat ug misakay sa among sakayan. Human namo gitangtang ang among mga gamit, ang tanan naghinam-hinam nga nag-istoryahanay kabahin sa unsay ilang nakita. Ang akong buddy miingon nako, “Naningkamot ko sa pagkuha sa imong atensiyon aron nga makakita ka niini nga milangoy palayo!”
Ang tigtudlo nakakita og kugita sa ilalom sa bato, mao nga iyang giirog ang bato alang sa kaayohan sa klase. Sa matag higayon nga itulod sa tigtudlo ang bato, ang kugita mobalik sa ilalom, hangtod nga gipul-an na kini sa pagtago ug ang kugita mipasirit og tinta ug milangoy palayo.
Naka-snorkel na ko ug nakasalom sa pipila ka higayon ug nakakita og daghan nga wildlife, apan wala pa gayod sa kugita. Ug tungod sa akong pagkawalay pailob, nawala kanako ang usa ka talagsaon nga oportunidad.
Akong gihinuktokan kini nga kasinatian atol sa akong usa ka oras nga pagmaneho pauli sa balay ug naamgohan nga ako adunay nakat-onan nga importante nga leksiyon sa ebanghelyo kabahin sa pagsunod sa mga kasugoan ug pagsunod sa propeta. Misunod ko sa divemaster nga nangulo kanamo. Apan ako dayag nga midesisyon nga ang akong tiggiya wala kaayo maghunahuna sa akong labing dako nga kaayohan.
Mas misalig ko sa akong kaugalingon kaysa akong magtutudlo.
Kita Makasalig sa Propeta sa Dios
Kon misalig pa ko sa akong tiggiya, duna unta akoy mas makahuloganon nga kasinatian. Ug ang sama nga baroganan mahimong magamit ngadto sa pagsalig sa Langitnong Amahan pinaagi sa pagsalig sa Iyang propeta.
Nakahibalo kita nga ang atong katuyoan niini nga kinabuhi mao ang pag-andam sa pagsugat sa Dios pinaagi sa paghimo ug paghupot sa balaan nga mga pakigsaad, apan dili lamang kana ang hinungdan ngano nga anaa kita dinhi. Si Lehi nagtudlo nga anaa kita dinhi aron nga kita “makabaton og hingpit nga kalipay” (2 Nephi 2:25).
Aron matabangan kita nga makasinati niana nga hingpit nga kalipay ug makatuman sa katuyoan sa atong pagkalalang, ang Dios nagtawag og mga propeta ug apostoles, ug sila nagsilbi isip Iyang tigpamaba alang sa atong kaayohan. Siya usab naghatag kanato og mga sugo aron nga kita makadawat ug makapadayon niining walay kataposan nga kalipay.
Sa usa ka paagi, ang mga propeta ug Apostoles makita isip ang atong mga tiggiya sa pag-scuba ug ang mga sugo nagsilbi isip atong “mga lagda sa pag-scuba dive,” tungod kay kini gituyo aron nga kita magpabilin nga luwas ug masiguro ang atong kalipay.
Kon kita maghunahuna nga mas nakahibalo kita, sama sa akong gibuhat uban sa akong tigtudlo sa pagsalom, kita mirisgo sa pagpuyo sa mas ubos nga mortal nga kasinatian ug nagpakita sa atong Amahan sa Langit nga wala kita motuo nga Siya naghunahuna sa atong labing dako nga kaayohan.
Si Elder Neil L. Andersen sa Korum sa Napulog Duha ka Apostoles mitudlo:
“Nganong sundon man nato ang propeta? Tungod kay gitawag siya ni Ginoong Jesukristo ug misangon kaniya isip ang Iyang magbalantay sa tore. …
“… Kon mopili kita sa pagbaliwala sa iyang tambag ug motino nga mas nasay[o]d kita, ang atong pagtuo mag-antos ug ang atong mahangt[o]rong panglantaw dili na klaro. Mosaad ko kaninyo nga kon magpabilin mo nga determinado sa pagsunod sa propeta, ang inyong pagtuo sa Manluluwas molambo.”1
Kita napanalanginan nga mopuyo sa panahon diin ang pulong sa Dios anaa giandam na alang kanato. Imbes nga magduhaduha sa Iyang mga gusto alang kanato nga makasinati og walay kataposan nga kalipay, mahimo kitang maadunay hugot nga pagtuo Kaniya ug “maghunahuna sa bulahan ug sa malipayon nga kahimtang niadto nga naghupot sa mga sugo sa Dios” (Mosiah 2:41).
Nakahibalo ko nga samtang kita mosalig sa Dios pinaagi sa pagsunod sa Iyang propeta ug maadunay hugot nga pagtuo sa gisaad nga mga panalangin sa paghupot sa atong mga pakigsaad ug sa Iyang mga sugo, Siya mogiya kanato padulong sa makapahingangha nga mga kasinatian ug mopuno sa atong mga kinabuhi og hingpit nga kalipay.