Tugoti ang Dios nga Makig-istorya Kaninyo sa Iyang Kaugalingong Panahon ug Paagi
Tungod kay ako naglaom nga makadawat og pagpadayag sa usa ka piho nga paagi ug panahon, wala nako mabantayi ang mga higayon diin ang Langitnong Amahan nakig-istorya kanako.
Ako usa ka batang babaye nga ganahan nga makaangkon og mga tubag.
Sa mas bata pa ko, aduna akoy daghang pangutana. Ganahan kong makahibalo ngano nga ang langit kay blue ug asa ang akong nawala nga lunchbox. Sa dihang anaa ko sa hayskul, ang akong mga pangutana nahimong mas komplikado. Unsa ang square root sa 347? Unsay mahitabo kon kita magdamgo?
Pinaagi sa kasinatian, akong nadiskobrehan nga kon ako adunay pangutana, akong makit-an ang tubag pinaagi sa usa ka pormula: usa ka pormula sa math, usa ka siyentipikong pormula. Akong nasabtan ang kalibotan tungod niini nga mga pormula.
Sa dihang ang akong mga pangutana milapas na gikan sa temporal ngadto sa espiritwal, ako adunay mas dugang pa nga mga pangutana: Tinuod ba ang Basahon ni Mormon? Ako ba anak gayod nga babaye sa Dios? Kinahanglan ba akong moserbisyo og misyon?
Sa akong kahingangha, nakat-onan nako nga makakita ako og mga tubag sa akong espiritwal nga mga pangutana pinaagi sa lain nga pormula! Ang pormula nga alang kanako nahisama niini: pag-ampo pun-an og pagtuon sa mga kasulatan pun-an sa pag-adto sa simbahan pun-an sa pagpaminaw sa mga propeta moresulta sa mga tubag.
Ganahan ko niini nga pormula! Sayon kini nga sundon ug—mas labing importante—kini epektibo. Kini nga pormula nagtabang nako nga makahibalo nga ang Dios nahigugma kanako ug nga ang ebanghelyo tinuod, ug sigurado ko nga magamit nako kini aron makadawat og mga tubag. Mao nga sa dihang si Presidente Russell M. Nelson midapit kanato sa “[pagpa]uswag ug [pagpa]lambo sa [atong] abilidad sa pagpaminaw Kaniya,”1 nagtuo ko nga nag-una ko sa dula.
Apan sa importante kaayo nga punto sa akong kinabuhi, ang akong pormula mora og mihunong sa paglihok.
Pagtinguha og Pagpadayag
Mga semana sa wala pa magsugod ang akong misyon, ang COVID-19 nakapugos nako nga mabalhin og assignment, ug gusto ko nga masayod kon ang pagserbisyo mao ba gihapon ang gusto sa Ginoo nga akong buhaton. Nag-ampo ko, nagbasa sa akong mga kasulatan, miadto sa simbahan, nagsiksik sa mga pakigpulong sa komperensiya, ug … wala koy nadawat nga tubag. Hapit na ko mohimo og makapausab sa kinabuhi nga desisyon, ug kinahanglan na nako kining buhaton dayon!
Bisan tuod og ako wala pa gihapon makadawat og tubag, ako milihok uban sa hugot nga pagtuo ug misugod sa akong online nga pagbansay sa MTC. Sa kataposan miadto ko sa misyon apan miuli dayon sa balay tungod sa pipila ka talagsaon nga personal nga mga sirkumstansya ug uban sa mas daghan pa nga mga pangutana. Akong gisulayan pag-usab ang akong pormula, desperado alang sa usa ka pagpasabot, apan—wala gihapon. Mitan-aw ko og kinatibuk-ang komperensiya aron sa pagpangita og tubag sa akong mga pangutana. Gidala usab nako kini sa templo sa dihang miabli na kini og usab. Mibasa ko og mga artikulo sa Liahona. Gisulayan nako ang tanan nga akong nadunggan nga gibuhat sa uban aron makakaplag og mga tubag. Apan mora og sirado ang kalangitan.
Tinuod, wala mausik ang akong mga paningkamot. Mas nakapaduol ko sa Dios ug mas mibati sa Espiritu diha sa akong kinabuhi, apan wala nako maangkon ang resulta nga akong gipangandoy. Naghunahuna ko kon ako tinud-anay ba gayod nga nakahibalo unsaon sa pagpaminaw Kaniya.
Dayon usa ka adlaw, nadawat nako ang tubag. Wala kini mahitabo samtang ako nag-ampo, nagbasa sa mga kasulatan, o nagtambong sa simbahan, apan nagtuo ko nga nadawat nako kini nga tubag tungod kay nangita ko Niya niini nga mga pamaagi. Ang tubag dili kompleto nga nakatagbaw sa akong pangutana, apan nakaamgo ko nga kon ako adunay hugot nga pagtuo, ang Dios mohatag kanako “pagtul[o]n-an human sa usa ka pagtul[o]n-an, lagda human sa usa ka lagda” (2 Nephi 28:30), diha sa Iyang kaugalingon nga panahon ug paagi.
Bag-o, wala dahoma nga mga koneksiyon sa langit ang nagsugod sa pag-abot sa mga paagi nga wala gayod nako masinati kaniadto. Samtang milabay ang mga semana, gisulayan nako sa pag-abli ang akong kasingkasing aron sa pagdawat og komunikasyon gikan sa Dios sa bag-o nga mga paagi. Ug kana mao ang higayon sa grabe nga kausaban. Samtang nagpadayon ko sa pagpangita Kaniya pinaagi sa pag-ampo ug pagtuon sa kasulatan, nagsugod ko sa pagkabantay sa nag-awas-awas nga direksiyon gikan sa Dios. Ang akong mga pangutana sa kataposan natubag. Usa kadto ka milagro!
Nakaamgo ko nga tungod kay ako naglaom nga makadawat og pagpadayag sa usa ka piho nga paagi ug panahon, wala nako mabantayi ang mga higayon diin ang Langitnong Amahan nakig-istorya kanako. Ang pagpadayag mahimo nga dili moabot sa sama nga paagi matag higayon. Ang Dios moistorya kanato sa indibidwal nga paagi ug sa Iyang mga paagi.
Ayaw Limitahi ang Imong Abilidad sa Pagpaminaw Kaniya
Si Presidente Henry B. Eyring, Ikaduhang Magtatambag sa Unang Kapangulohan, mitudlo: “Ang paagi sa pagdawat og pagpadayag gikan sa Dios wala mausab gikan sa panahon ni Adan ug Eva. … Gihimo kini kanunay pinaagi sa paggamit sa hugot nga pagtuo.”2
Usahay kinahanglan kita nga mapailobong maghulat alang sa mga tubag sa Ginoo. Apan samtang gibuhat nato kini, mahimo kita nga magpadayon sa pagpangita og mga paagi aron madala ang Espiritu nganha sa atong mga kinabuhi. Sulayi og ampo sa lainlaing oras. Siksika ang mga kasulatan sa paagi nga wala pa ninyo mabuhat kaniadto. Paglakaw-lakaw ug pamalandong. Kanta og mga himno. Tambong sa templo kanunay. Maghimo sa buhat sa family history. Pagserbisyo. Magpuasa. Isulat ang inyong mga hunahuna human sa usa ka pag-ampo. Pagbisita og balaan nga mga dapit. Paghimo og puno sa pagtuo nga mga butang nga makapaduol ninyo ngadto Kaniya. Walay kataposan ang mga paagi nga ang Dios makig-istorya ninyo kay walay kataposan ang Iyang gahom.
Samtang kita mangita og dugang nga mga paagi sa pagdapit og pagpadayag, kita makapadayon sa pagpalig-on sa atong relasyon sa Langitnong Amahan ug sa atong abilidad sa pagpaminaw Kaniya. Kon kamo nagtinguha og pagpadayag, hibaloi nga Siya naghulat aron motabang ninyo ug motanyag ninyo og mga tubag sa Iyang kaugalingon nga panahon ug paagi. Ug kon kamo motan-aw og maayo, tingali makita ninyo nga Siya mitubag na.