“Faamoemoe ma le Mafanafana ia Keriso,” Liahona, Sete. 2022.
Faamoemoe ma le Mafanafana ia Keriso
Ia tatou taofimau i le folafolaga e manatua ma tauia e le Alii Lana Au Paia faamaoni.
E mafai ona tatou taula lo tatou faamoemoe tupito ia Iesu Keriso ma Lana Togiola.
Ata pue o le lima mai le faatusa o Keriso na saunia e Scott Law
Sa i ai ia Jens ma Ane Cathrine Andersen se molimau loloto ma tumau o le moni o le talalelei toefuataiina a Iesu Keriso. E ui i le feita o tagata faatupu faalavelave ma sauaga i nuu ma aulotu, sa latou auai i Le Ekalesia a Iesu Keriso o le Au Paia o Aso e Gata Ai i le 1861.
E oo atu i le tautotogo o le tausaga na sosoo ai, sa latou ua‘i atu i le valaau a Siona, ma malaga atu i le 5,000 maila (8,000 km) i le Vanu o Sate Leki. O le faapotopotoina i Siona o lona uiga o le tuua lea o lo latou olaga lelei i Tenimaka—e aofia ai uo, aiga lautele, ma se faatoaga matagofie na tuufaasolo mai i augatupulaga mai le tamā i le atalii ulumatua. Sa i ai i le nuu o Veddum, e latalata i Aalborg, i luga o laufanua lafulemu o le penisula o Jutland i Tenimaka i matu, o le faatoaga sa telē ma manuia. Sa faafaigaluega ai le toatele o tagata ma aumaia ai le manuia ma le mau i le aiga o Andersen.
O le faasoaina atu o na mea i o latou uso a tagata liliu mai, na totogi ai e Jens ma Ane Cathrine le tau o femalagaaiga pe tusa ma le 60 o isi Au Paia na agai atu i Siona. I le aso 6 o Aperila, 1862, sa faatasi atu ai le au Andersen, ma lo la atalii e 18 tausaga le matua, o Andrew, i le 400 o isi Au Paia Tenimaka i le tamai vaa karasini o le Albion ma folau atu mo Hamburg i Siamani. I le taunuu ai i Hamburg i le lua aso mulimuli ane, sa latou faatasi atu ai ma le toatele o le Au Paia na faapotopoto i luga o se vaa tele atu e amata ai la latou malaga umi.
Ae peitai, o le olioli i le faapotopotoina i Siona, sa lei pine ae liua i le faanoanoa. O nisi o tamaiti na malaga i le Albion sa latou tauaveina le siama [vairasi] o le misela. A o faasolo pepesi atu le faama‘i i se vaega o tagata malaga, e 40 tamaiti ma le toatele o tagata matutua na maliliu ma sa falelauasi i le sami. Sa i ai faatasi ma i latou Jens Andersen e 49 tausaga le matua, o le tamā o lo‘u tamāmatua.
O le miti a Jens i le aapa atu ma le fausiaina o Siona faatasi ma lona aiga ma uso a le Au Paia Tenimaka na faamutaina i le na o le 10 aso mai Hamburg. Sa tusia e se tasi tusitalafaasolopito, “O se tagata laveai e pei o Mose e lei tu ona lava vae i le nuu folafolaina o Jens Andersen o [Veddum], Aalborg, o lē sa fesoasoani i le lē itiiti ifo ma le onosefulu ona uso a tagata malaga; sa ia feiloai ma le oti i le Sami i Matu i le 1862 ina ua faatoa tuua ai [Siamani].”1
O Le Tofotofoga o le Olaga Faaletino
Pe na aoga ea—le osigataulaga a le aiga o Andersen—na tuua ai la latou faatoaga lelei ma maliu ai lo latou tane ma le tama agaalofa? Ou te talitonu o le a fai mai le lalolagi e leai. Ae o le lalolagi ua leai se faatuatua, vaaiga mamao, ma le “vaaiga e faavavau”2 ua ofoina mai e le talalelei toefuataiina a Iesu Keriso.
O lena vaaiga e fesoasoani tatou te malamalama ai i lo tatou olaga faaletino ma ona tofotofoga e tele. Tatou te feagai ma le fefe, faalataina, faaosoosoga, agasala, leiloa, ma le tuuatoatasi. O faama‘i, faalavelave, faanoanoaga, ma le oti e nutimomoia ai a tatou miti. I nisi taimi, e foliga mai ai e sili atu a tatou avega nai lo le mea e mafai ona tatou tauaveina.
“E ui o le a eseese ia faamatalaga, o faalavelave, o tofotofoga ma suega e lei faamoemoeina, i le faaletino ma le faaleagaga, e oo mai ia i tatou taitoatasi ona o le olaga faaletino lenei,” na saunoa ai Elder Neil L. Andersen o le Korama a Aposetolo e Toasefululua. Sa ia faaopoopo mai: “Tatou te saili mo le fiafia. Tatou te moomoo mo le filemu. Tatou te faamoemoe mo le alofa. Ma e faamanuia i tatou e le Alii i le anoanoai o faamanuiaga ofoofogia. Ae faatasi ai ma le olioli ma le fiafia, e tasi le mea e mautinoa: o le a i ai taimi, itula, aso, o nisi taimi o tausaga o le a faamanu’aliaina ai lou agaga.”3
Tatou te lonosaia le oona ina ia tatou tofo i le suamalie (tagai Mataupu Faavae ma Feagaiga 29:39). I upu a le perofeta o Isaia, ua faamamāina uma ai i tatou—ma filifilia—“i le ogaumu o i ai le puapuaga” (Isaia 48:10).
O Le Folafolaga o le Togiola
Ata pue o le faatusa o Keriso na saunia e Alan Brent Harder
O puapuaga o se vaega o le “fuafuaga tele o le fiafia” a le Tama (Alema 42:8; tagai foi 2 Nifae 2:11). Ae e totonugalemu i lena fuafuaga le mafanafana ma le faamoemoe lea e sau mai “le Togiola sili ma le mamalu.”4 E ala i Lana Togiola, na afio mai ai Iesu Keriso e laveai i tatou. (Tagai i le Alema 36:3.)
O le Faaola sa “afio ifo … i lalo o mea uma” (Mataupu Faavae ma Feagaiga 88:6) ina ia mafai ona Ia tauaveina i Ona lava luga o tatou faigata ma mea sese. Na te silafia le auala e auauna mai ai ia i tatou ma le malamalama atoatoa i le mea tonu ma le pogai e tiga ai.
“Talu ai na puapuagatia le Faaola i soo se mea ma mea uma e mafai ona tatou lagonaina pe oo i ai, e mafai ona Ia fesoasoani e faamalolosi e ua vaivai,” na saunoa ai Peresitene James E. Faust (1920–2007), Fesoasoani Lua i le Au Peresitene Sili. “Na Ia oo lava i nei mea uma. E malamalama o Ia i o tatou tigā ma o le a savali faatasi ma i tatou e oo lava i o tatou taimi sili ona pogisa.”5
O le mafuaaga lena e mafai ai ona tatou taula lo tatou faamoemoe tupito ia te Ia ma Lana Togiola.
“O lo tatou lalolagi lē mautonu ma faatauemu—o se lalolagi, i se tulaga maoae, e leai sona faamoemoe ia Iesu Keriso po o le fuafuaga a le Atua mo le fiafia o le tagata,” na saunoa ai Peresitene Russell M. Nelson. “Aisea e tupu ai na finauga ma faanoanoaga i le lalolagi atoa? E manino lava le mafuaaga. Afai e leai se faamoemoe ia Keriso, e leai se faailoaga o se fuafuaga paia mo le togiolaina o tagata. A aunoa ma lena malamalamaaga, e talitonu sesē tagata o le i ai i le asō e sosoo ma le faatamaiaga taeao—o le fiafia ma fegalegaleaiga faaleaiga ua na o sina taimi.”6
Ou te maua le faamoemoe ma le faamalologa ia Iesu Keriso pe a ou auai i le malumalu ma faalogo i upu a perofeta soifua. Ou te maua le mafanafana pe a ou suesue i tusitusiga paia lea e molimau mai ia te Ia ma Lana Togiola. Pe a faamata‘uina e le olaga nei lou “filemu e faaumatia,”7 liliu atu i le mea ua ou ta’ua o “mau mo le puipuiga.” O nisi nei o mau ou te fiafia i ai:
Feagaiga Tuai
-
“E faaumatia e ia le oti e faavavau, e soloiesea foi e le Alii o Ieova o loimata i mata uma lava” (Isaia 25:8).
-
“E moni, ua na tauave o tatou tiga, ma na tauave o tatou faanoanoa. … A ua manuʼa o ia ona o a tatou solitulafono, ua momomo o ia ona o a tatou amio leaga; o le aoaiga e filemu ai tatou sa i ona luga lea, o ona faalavalava foi ua malolo ai tatou” (Isaia 53:4–5).
Feagaiga Fou
-
“Ia outou o mai ia te au, o outou uma o e tigaina ma mafatia i avega, o a’u foi e malolo ai outou” (Mataio 11:28).
-
“E maua foi outou e le puapuaga i le lalolagi: a ia outou loto tetele; ua ou manumalo i le lalolagi” (Ioane 16:33).
Tusi a Mamona
-
“Ma o le a ia ave i ona luga le oti, ina ia mafai ona ia tatalaina fusi o le oti ia ua noatia ai ona tagata; ma o le a ia ave i ona luga o latou vaivaiga, ina ia mafai ona faatumuina ona loto i le alofa mutimutivale, e tusa ai ma la le tino, ina ia mafai ona ia silafia e tusa ai ma la le tino, le ala e fesoasoani ai i ona tagata, e tusa ma o latou vaivaiga.” (Alema 7:12).
-
“Ma o le a le mea tou te faamoemoe i ai? Faauta ou te fai atu ia te outou, tou te faamoemoe, e ala i le togiola a Keriso ma le mana o lona toetu, ia faatutu mai outou i le ola faavavau, ma o le pogai ona o lo outou faatuatua ia te ia e tusa ma le folafolaga” (Moronae 7:41).
Mataupu Faavae ma Feagaiga
-
“O le mea lea, ia fiafia, ma aua le fefefe, aua o A’u o le Alii ua Ou faatasi ma outou, ma o le a tu i tafatafa o outou; ma o le a outou molimau atu A’u, o Iesu Keriso lava, o A’u o le atalii o le Atua soifua, ma sa ou i ai ma o loo Ou i ai, ma o le a Ou alu atu” (Mataupu Faavae ma Feagaiga 68:6).
-
“O le mea lea, aua le fefefe e oo lava i le oti; ona e lē atoatoa lo outou olioli i le lalolagi lenei, ae o aʼu e atoatoa ai lo outou olioli” (Mataupu Faavae ma Feagaiga 101: 36).
Ua molimau mai nei fuaiupu ma vaega o isi fuaiupu, i upu a Peresitene Boyd K. Packer (1924–2015), Peresitene o le Korama a Aposetolo e Toasefululua, o le “folafolaga o le togiola a Keriso.”8
O Aioiga a se Perofeta
A tatou malamalama i le matafaioi taua o loo faia e le Faaola i lo tatou fiafia i le taimi nei ma i le lalolagi a sau, ua tatou malamalama i le mafuaaga ua aioi mai ai Peresitene Nelson ia i tatou ia avea o Ia ma faavae faaleagaga o o tatou olaga:
“Ou te aioi atu ia te outou ia faaavanoa se taimi mo le Alii! Ia fai lou oe lava ia faavae faaleagaga ia mausali ma mafai ona tumau i taimi o tofotofoga e ala i le faia o mea na e faatagaina le Agaga Paia e faatasi ma oe i taimi uma.” O le faaavanoaina o le taimi mo le Alii, na faaopoopo mai ai Peresitene Nelson, e aofia ai le faia o le “taimi mo le Alii i Lona maota paia” e ala i auaunaga ma tapuaiga i le malumalu.9
“Ma ia te outou taitoatasi ua osia feagaiga o le malumalu, ou te aioi atu ia te outou ia saili—ma le agaga tatalo ma faifai pea—ia malamalama i feagaiga ma sauniga o le malumalu. …
“… Soo se taimi lava e tupu ai soo se ituaiga o faalavelave i lou olaga, o le nofoaga sili ona saogalemu e i ai faaleagaga o le ola lea i totonu o au feagaiga o le malumalu!
“Faamolemole talitonu mai ia te a’u pe a ou fai atu, a atiae lou faavae faaleagaga ma le mausali i luga o Iesu Keriso, e lē tatau la ona e fefe.”10
Taia i luga o Ona Alofilima
Anetelea ma tagata o lona aiga
O le a le mea na tupu ia Ane Katerina ma lana tama tama, o Anetelea? Pe na la faanoanoa ma toe foi atu i Tenimaka ina ua mavae le la malaga faanoanoa i le ono vaiaso i le Aai o Niu Ioka? Leai. O le faalagolago i la laua molimau i le Faaola ma le fuafuaga o le faaolataga, ma le faalagolago i le Atua, sa la malaga atu ai ma le lototoa i le nofoaafi, vaasitima, ma taavale solofanua. Sa la taunuu i le Vanu o Sate Leki i le aso 3 o Setema, 1862, ma auai i le fausiaina o Siona.
Sa la nonofo i Efaraima, Iutā, lea na faaipoipo ai Anetelea ma amata ai se aiga. Mulimuli ane, sa siitia atu e Anetelea lona aiga, e aofia ai lona tina, i Liae, Iutā, lea na avea ai o ia ma se faifaatoaga faamanuiaina, tagata e teutupe, ma se pulenuu. Sa ia auauna atu i se misiona e tolu tausaga i lona lava atunuu, e silia ma le luasefulu tausaga i au epikopo, ma le silia ma le tolusefulu tausaga i fautua maualuga po o le korama a faitaulaga sili. E toatolu ona atalii na auauna atu i ni misiona i Tenimaka ma Nouei.
I o tatou mata faaletino, e lē mafai ona tatou vaaia se taunuuga mamalu mai se amataga o loimata maligi. Ae faatasi ai ma le faatuatua ia Keriso, e mafai ai ona tatou tepa atu i le lumanai ma le faamoemoe. Ma e mafai ona tatou taofimau i le folafolaga e faapea e manatua ma tauia e le Alii Lana Au Paia faamaoni, e aofia ai Jens, Ane Katerina, ma Anetelea. Sa manatuaina i latou e le Alii, ma Na te manatuaina i tatou. Ua Ia folafola mai:
“E lē galo lava oe ia te au.
“Ua ou taia lou faatusa i ou alofilima” (Isaia 49:15-16).