“Filifili ia Loto i La Le Agaga,” Liahona, Sete. 2022.
Filifili ia Loto i La Le Agaga
O le faatumauina o lo tatou alualu i luma faaleagaga i le ala o le talalelei e pei lava o le viliina o se uila vilivae—e manaomia uma ai taumafaiga maelega.
Ata na tusia e Dilleen Marsh
O le taulimaina o suiga ma le iloaina o le mea e fai i taimi faigata o se tasi lea o faamanuiaga tulaga ese o le avea ma se tagata faamaoni o le Ekalesia a le Alii. O le meaalofa o le Agaga Paia o le avanoa lea e maua ai le taitaiga ma musumusuga faifai pea a o tatou tumau faamaoni.
Ola, Filemu, Taitaiga, ma le Puipuiga
Fai mai le Aposetolo o Paulo, “A o le loto i la le Agaga o le ola lea ma le manuia” (Roma 8:6; tagai foi fuaiupu 5).
O le filifili e loto i la le agaga e ala i le ola i se olaga e agavaa ai mo faatauanauga mālū a le Agaga Paia o le a tuuina atu ai ia te oe le taitaiga i au faaiuga ma le puipuiga mai tulaga matautia faaletino ma faaleagaga. E ala i le Agaga Paia, e mafai ai ona e maua meaalofa o le Agaga mo lou manuia ma le manuia o i latou e te alofa ma auauna i ai. O lana fesootaiga i lou agaga e aumaia se faamautinoaga e sili atu nai lo soo se fesootaiga e mafai ona e mauaina e ala i ou sane faanatura.
E faapefea ona e ola i se olaga e loto i la le agaga ma maua le taitaiga sili atu mai le Agaga Paia?
1. Ia ogatasi ma lo tatou Tama Faalelagi ma le Faaola.
Pe a tatou ogatasi ma le Tama Faalelagi, ua tatou maua le mafutaga a Lona Agaga. A o tatou faia ia faamuamua lena mafutaga i o tatou olaga, tatou te faalatalata atu ia te Ia ma Lona Alo, “O Iesu Keriso, o lē na auina mai e ia” (Mataupu Faavae ma Feagaiga 132:24).
2. Alofa i le Atua.
O le alofa i lo tatou Tama Faalelagi ma le atiina ae o se sootaga ma Ia i le tatalo o le a faatumauina ai o Ia i o tatou mafaufau ma loto.
O le Aposetolo o Ioane, faatasi ma lana molimau i le alofa o le Atua mo i tatou ma faatasi ai ma lana molimau patino ia Iesu Keriso, na teenaina le talitonuga sese e faapea e mafai ona ausia le faaolataga i isi auala e ese mai i le faatuatua ia Iesu Keriso. Na valaaulia e Ioane lana aufaitau ia lagonaina le olioli o le ogatasi ma le Tama ma le Alo (tagai 1 Ioane 1:3). Sa ia faaopoopo mai:
“Aua tou te mananao i le lalolagi, po o mea o i ai i le lalolagi. Pe afai e manao se tasi i le lalolagi, e le o ia te ia le alofa i le Tama. …
“O le a mavae atu foi le lalolagi, atoa ma lona tuinanau, a o lē fai le finagalo o le Atua, e tumau lea e faavavau” (1 Ioane 2:15, 17).
E mafai ona tatou lagonaina le alofa o le Atua i lenei olaga e ala i le mafutaga a Lona Agaga. A tatou faia le finagalo o lo tatou Tama o i le Lagi ma taumafai e tumau i luga o le ala lea e taitai atu ai i tatou ia te Ia, e mafai e le Agaga Paia ona taialaina i tatou.1
3. Manatua le mea na faia e le Faaola mo i tatou.
O le folafolaga i tatalo uma o le faamanatuga o le “ina ia latou [e o tagofia] … maua pea lona agaga e faatasi ma i latou” (Mataupu Faavae ma Feagaiga 20:77, 79). Tatou te aai ma feinu i le faamanatuga i vaiaso taitasi ona tatou te mananao e faatumau ma faafailele lo tatou faaleagaga.
Na aoao mai Peresitene Dallin H. Oaks, Fesoasoani Muamua i le Au Peresitene Sili: “A o tatou mamao ese mai mea faalelalolagi, tatou te lagona le latalata atili atu i lo tatou Tama o i le Lagi ma sili atu ona mafai ona taialaina e lona Agaga. Tatou te ta’ua lenei uiga auaumamā o le ola faaleagaga.” Na faaopoopo mai Peresitene Oaks: “O le auala tatou te faauigaina ai o tatou aafiaga o se matafaioi foi o lo tatou tulaga faaleagaga. … O i tatou o e ua i ai se molimau o le talalelei a Iesu Keriso e tatau ona faauigaina o tatou aafiaga e tusa ai ma lo tatou malamalama i le faamoemoega o le olaga, o le misiona a lo tatou Faaola, ma le taunuuga e faavavau o fanau a le Atua.”2
4. Iloa mea faaleagaga.
Ou te tautino atu o le faaleagaga o se faamanuiaga o taumafaiga faifai pea i la tatou vaega. A o tatou saili e aoao ma mulimuli i uunaiga a le Agaga, o le a faigofie atu ona tatou iloa le eseesega o mea a le Atua mai mea o le lalolagi.
Na saunoa Mai Elder Quentin L. Cook o le Korama a Aposetolo e Toasefululua, “E pei lava o taumafaiga faifai soo ma le tumau e manaomia ina ia maua ai le malosi faaletino pe faalemafaufau, e faapena foi lona moni i mataupu faaleagaga.”3
Atiina A’e Lou Olaga Faaleagaga
Faafetai i le vaaiga mamao a taitai o le Ekalesia, ua ia i tatou le tele o meafaigaluega silisili e fesoasoani tatou te faamalosia ai lo tatou faaleagaga. Mafaufau i le atinaega o le polokalama o le Gospel Library lea e faatagaina ai le mana o tusitusiga paia ma le suesueina o le talalelei ina ia i ai moni lava i lau taga i taimi uma. Mafaufau i suiga e fesootai ma le auaunaga lea e uunaia ai le faaaogaina o tekinolosi a o tatou aapa atu i isi. Mafaufau i le auala o le aoaoina lea e faatotonugalemu i le aiga, e lagolagoina e le Ekalesia ma mataupu aoaoina o le Sau, Mulimuli Mai ia te A‘u , lea e mafai ona siitia ai lo tatou faaleagaga i soo se mea tatou te i ai.
E lē manaomia ona tatou faanofoesea faaleagaga ma nei punaoa uma o loo maua! E mafai ona tatou galulue faatasi, filifili avanoa uma e mafaufau ai faaleagaga, faamalosiauina le olaga ma le filemu, ma faia ia avea le faaleagaga o se vaega tāua o o tatou olaga. Na aoao mai tusitusiga paia, “A o le fua o le Agaga o le alofa, o le olioli, o le filemu, o le onosai, o le mataalofa, o le agalelei, o le faamaoni, o le agamalu, [ma le] le gaoiā” (Kalatia 5:22–23).
Faia ma Tausia Sini Faaleagaga
O se tagata e loto i la le agaga e taumafai e faamalosia lona ola faaleagaga ma, pe a faatutūina ni sini, e fesili atu, “Pe o taulai atu ea a‘u sini i o’u manaoga faaleagaga?”
O se tagata e loto i la le agaga e saili ia iloa le auala e mulimuli ai i uunaiga faaleagaga ona faatino lea o na uunaiga. O le mea lea, o le setiina o sini mo le tuputupu ae faaleagaga e tāua.
Sa faatu e Annie, le tama teine a le ma tama e lima tausaga, se sini e aoao e tietie i se uila vilivae. Sa ia faataitai ma vave ona maua, o lea na ave ai o ia e ona matua i se tietiega uila faaleaiga.
A o latou tietie, sa faaalia e le tina o Annie le maofa i le lelei o le tietie a Annie i luga o se maupuepue ma sopoia ai se alalaupapa. Sa faasoa mai e Annie le mealilo o lona manuia: “Na o lo’u pipiimau lava, Tina, ma faaauau pea ona vili.”
E tatau ona tatou faia foi faapea. O le viliina e faatumauina ai lo tatou paleni. O faatinoga faigofie, i aso taitasi o le tatalo, suesue i tusitusiga paia, ma le mulimuli i fautuaga faaperofeta e faatumauina ai lo tatou agai i luma faaleagaga e ui lava i maupuepue, faama‘i oti, ma suiga o le olaga.
Na saunoa Peresitene Russell M. Nelson: Afai o lou manao silisili o le faamuamua o le Atua, avea ma se vaega o Isaraelu, e tele faaiuga o le a faigofie atu ona fai. E tele naua ni faafitauli o le a lē avea ma ni fafitauli! … E te iloa le mea e te manao e ausia. E te iloa le ituaiga o tagata e te manao moni lava e avea ai.”4
A o e taulai atu i mea e sili ona tāua, o le a e vaaia ai o le faagasologa o le faamalosia o lou faaleagaga ma le avea ma lē e loto i la le agaga e mafai ona faigofie, e ui e manaomia ai taumafaiga ma le filigā. O lea, pipiimau ma faaauau pea ona vili!
Faafailele Lau Liahona Faaleagaga
O loo tuleia, eu, ma toso atu oe i le tele o itu e le tele o leo o lenei lalolagi lea e i ai taimi e te ono lagona ai le faalotolotolua e uiga i le ala e tatau ona e ui ai. Manatua o lau Liahona faaleagaga e sili ona aogā pe a e iloa le siufofoga o le Agaga mai leo o le lalolagi.
O le Agaga Paia e toafimalie, manino, ma mafanafana. Na te tuuina mai le taitaiga patino e aumaia ai ia te oe le filemu ma le faamoemoe. E galue i le lotogatasi atoatoa ma le Tama Faalelagi ma Iesu Keriso, i le faataunuuina o le tele o matafaioi e fesoasoani ai ia te oe e ola amiotonu ma maua faamanuiaga o le talalelei.
“O le punāvai autu o le mana faaleagaga o le Atua lo tatou Tama,” na saunoa ai Peresitene Nelson. “O le avefeau o lenei mana o le Agaga Paia lea. O lenei mana e ese mai le malosiaga faaeletise. O se masini eletise e faaaogaina le malosiaga. O le faaaogaina o Lona mana faaleagaga e toe faatumuina lo tatou mana. E ui o le malosiaga faaeletise e na o ni nai taimi e faaaoga ai, ae o le mana faaleagaga e faaaogaina mo le olaga nei ma le faavavau!”5
Ina ia avea ma le loto i la le agaga, ia pipiimau, faaauau pea ona vili, ma faatutū ni sini faaleagaga. Faaaoga le tele o punaoa o loo avanoa ia te oe e faamalosia ai lou agaga.
Ou te molimau atu o le loto i la le agaga o le ola moni lea ma le filemu (tagai i le 2 Nifae 9:39), e faapea o lo tatou tulaga lelei o le olaga e faaleleia pe a tatou mafuta ma le Tama ma le Alo, ma e alofa le Atua ia i tatou ma e mafaufau mai ia i tatou ma o tatou manaoga.
Mai se saunoaga i le faigalotu, “To Be Spiritually Minded Is Life and Peace,” na tuuina atu i le Iunivesite o Polika Iaga i le aso 9 Fepuari, 2021. Mo le saunoaga atoa, alu i le speeches.byu.edu.