Ua Na’o Tusiga Faaeletonika
Ae Faapefea Pe Afai Ou Te Le Lagonaina le Agaga?
Mafaufau i manatu nei e tolu e aoao atili ai e uiga i le ala e talanoa mai ai le Agaga ia te oe.
Ata na pueina e Catherine Frost
A uma ona papatisoina i tatou, e faamauina i tatou o ni tagata O Le Ekalesia a Iesu Keriso o le Au Paia o Aso e Gata Ai ma ua valaauliaina e maua le meaalofa o le Agaga Paia e ala i le faaee atu o lima o se tasi o loo umiaina le pule o le perisitua. O lenei meaalofa tatou te maua ai le aia tatau i le mafutaga faifai pea a le Agaga Paia pe afai tatou te tausia poloaiga.
O lo tatou sootaga i le Agaga Paia e fesoasoani ia i tatou e mulimuli ai i le valaaulia a Peresitene Russell M. Nelson e “Faalogo ia te Ia.”1 A o fautua mai Peresitene Nelson, “E leai lava se isi taimi ua sili ona matua taua ai le iloa o le auala e fetalai mai ai le Agaga ia te oe nai lo le taimi nei.”2 O le a se mea e mafai ona tatou faia pe afai tatou te manatu e le mafai pe tatou te le lagonaina le Agaga? O nisi nei o mea e tele e mafai ona fai.
1. Malamalama i matafaioi a le Agaga Paia ma le ala e fetalai mai ai o Ia i le tele o auala.
Pe a tatou taumafai e lagona le Agaga, e taua lo tatou amata i se malamalamaaga po o ai le Agaga Paia ma pe faapefea ona Ia fetalai mai ia i tatou. E eseese auala e maua ai e tagata taitoatasi faaaliga; mo se faataitaiga, o nisi tagata e masani ona lagonaina le mafanafana a o isi e masani ona lagonaina le filemu. O na uunaiga ma lagona e mafai ona oo mai ia i tatou taitoatasi i ni auala eseese i taimi eseese. Toe mafaufau i tua i ni taimi ua mavae na e lagona ai le Agaga Paia. Mafaufau e tusi i lalo ou lagona i na taimi. O le faia o lena mea e mafai ona fesoasoani ia te oe e iloa ai le ala e talanoa mai ai le Agaga ia te oe ma fesoasoani ia oe ia iloa pe a e lagonaina lena ala i le taimi nei—o se faamaoniga lea o le Agaga Paia i lou olaga. O se faataitaiga lenei o mea na aoao mai e nisi o perofeta ma aposetolo e uiga i le natura o le Agaga Paia:
-
Peresitene Nelson: “I le Aiga Atua, o le Agaga Paia o le avefeau. O le a Ia aumaia mafaufauga i lou mafaufau ia e finagalo le Tama ma le Alo e te mauaina. O Ia o Lē Faamafanafana. O le a Ia aumaia se lagona o le filemu i lou loto. E molimau mai o Ia i le upumoni ma o le a faamautu mai mea e moni a o e faalogo ma faitau i le afioga a le Alii.”3
-
Peresitene Henry B. Eyring, Fesoasoani Lua i le Au Peresitene Sili: “O le i ai pea o le Agaga e faatasi ma i tatou, o le i ai lea o le taiala ma le taitaiga a le Agaga Paia i o tatou olaga i aso taitasi. Mo se faataitaiga, e mafai ona lapataiina e le Agaga i tatou ia tetee atu i faaosoosoga o le faia o le leaga. … Afai tatou te taumamafa i le faamanatuga i le faatuatua, o le a mafai la e le Agaga Paia ona puipuia i tatou ma i latou tatou te alolofa i ai mai faaosoosoga e oo mai ma le malolosi tele ma le faisoo. O le mafutaga a le Agaga Paia e faia mea lelei ia sili ona faatosina ae faaitiitia le faatauanau o faaosoosoga. E tatau ona lava lea mafuaaga ia tatou naunau ai e agavaa mo le Agaga ina ia faatasi pea ma i tatou. “E pei lava ona faamalosia i tatou e le Agaga e tetee atu i le leaga, Na te aumaia foi ia i tatou le mana e iloa tino ai le mea moni mai le mea sese.”4
-
Elder David A. Bednar o le Korama a Aposetolo e Toasefululua: “O le Agaga Paia o le sui auai lona tolu o le aigaAtua; O Ia o se peresona agaga ma Na te tuuina atu le molimau o upumoni uma. I tusitusiga paia o loo ta’ua ai le Agaga Paia o le Fesoasoani (tagai Ioane 14:16–27; Moronae 8:26), o se faiaoga (tagai Ioane 14:26; M&FF 50:14), ma se talifaaaliga (tagai 2 Nifae 32:5). O faaaliga mai le Tama ma le Alo e momoli mai e ala i le Agaga Paia. O ia o le avefeau ma le molimau a le Tama ma le Alo.”5
-
Elder Ronald A. Rasband o le Korama a Aposetolo e Toasefululua: “Manatua le folafolaga a le Alii: ‘O le a Ou faaali atu ia te oe ai lo’u Agaga, lea o le a faapupula ai lou mafaufau, lea o le a faatumulia ai lou agaga i le olioli’ (Mataupu Faavae ma Feagaiga 11:13). Ou te fiafia i lena faamautinoaga. O le olioli lea e faatumulia ai o tatou agaga e aumaia faatasi ai ma se vaaiga e faavavau e faatusatusa lea i le olaga o aso taitasi. O lena olioli e oo mai o se filemu i le lotolotoi o faigata po o le lototiga. E aumaia le mafanafana ma le lototele, e faaalia mai upumoni o le talalelei, ma faalautele atu lo tatou alolofa mo le Alii ma fanau uma a le Atua.”6
-
Elder Gary E. Stevenson o le Korama a Aposetolo e Toasefululua: “O upumoni faaalia se tolu lea e aumaia ia i tatou se malamalama o le Agaga Paia … o le Agaga Paia o le sui lona tolu o le aigaAtua, o le Agaga Paia o se peresona o agaga, ma o le meaalofa o le Agaga Paia e oo mai e ala i le faaee atu o lima. … E tolu tali i le fesili ‘E faapefea ona fesoasoani le Agaga Paia ia te oe?’ [o le] E lapatai mai le Agaga Paia, e faamafanafana mai le Agaga Paia, ma e molimau mai le Agaga Paia.”7
-
Peresitene Boyd K. Packer (1924–2015): “O nei fesootaiga faaleagaga maaleale, ma lelei e le vaaia i o tatou mata pe faalogoina foi i o tatou taliga; o se leo elagonae se tasi e sili atu nai lo lefaalogoina. … O le siufofoga o le Agaga o loo faamatalaina i tusitusiga paia e faapea e le leotele pe saua, e le o se leo o se faititili, po o se leo o le vavao tele, ae nai lo lena, e filemu ma itiiti, o le fifilemu atoatoa, e peiseai o se musumusu, ma e mafai ona ati e oo lava i le agaga lava ma afua ai ona mu o le loto.8
E mafai ona e aoao atili e uiga i le ala e talanoa mai ai le Agaga Paia i tusiga o autu o le “Agaga Paia” i konafesi aoao ma Autu o le Talalelei.
Mafaufau: Na faapefea ona ou lagonaina le talanoa mai o le Agaga Paia ia te au?
2. Tausi au feagaiga.
O le mauaina o le meaalofa o le Agaga Paia e fesootai e le mavavaeeseina ma a tatou feagaiga o le papatisoga, ma o feagaiga e manaomia ai taumafaiga i la tatou vaega ia maua faamanuiaga folafolaina. Ua faamanatu mai ia i tatou mea ua folafola mai tatou te faia ma mea ua folafola mai ia i tatou i vaiaso taitasi ao tatou tagofia le faamanatuga: tatou te folafola atu e tauave i o tatou luga le suafa o Keriso, ia manatua pea o Ia, ma tausi Ana poloaiga, ma ua folafolaina mai ia i tatou ia maua pea Lona Agaga e faatasi ma i tatou a o tatou faia (tagai Mataupu Faavae ma Feagaiga 20:77, 79).
Ina ia maua le mafutaga faifai pea a le Agaga Paia, e tatau ona tatou faia la tatou vaega. Mafaufau i le fautuaga lenei mai taitai o le Ekalesia e fai ma amataga:
-
Peresitene Nelson: “A o tatou saili e avea ma soo o Iesu Keriso, o a tatou taumafaiga ia faalogo ia te Ia e manaomia ona matua faia ma le faamoemoe sili i ai. E manaomia ai le lotofuatiaifo ma taumafaiga tumau e faatumu o tatou olaga i aso taitasi i Ana afioga, Ana aoaoga, Ana upumoni.”9
-
Peresitene Dallin H. Oaks, Fesoasoani Muamua i le Au Peresitene Sili: ‘O le manaomia ona tausia ia mama o tatou lava malumalu patino ina ia mafai ai ona maua le mafutaga ma le taitaiga a le Agaga Paia ua faamatala mai ai le taua o le poloaiga e tagofia le faamanatuga i le Sapati. … O le faafouina o a tatou feagaiga e ala i le tagofia o le faamanatuga e tatau foi ona muamua atu i le salamo, o lea tatou te o mai ai i lena sauniga paia ma se loto momomo ma le agaga salamo (tagai2 Ni. 2:7; 3 Ni. 12:19; M&FF 59:8). Ma, a o tatou faafouina a tatou feagaiga o le papatisoga ma faamautu atu o le a tatou ‘manatua pea o ia’ (M&FF 20:77), o le a faafouina e le Alii le faamagaloga folafolaina o a tatou agasala, i lalo o tulaga ma i le taimi na te filifilia. O se tasi o faamoemoega autu ma aafiaga o lenei faafouga o feagaiga ma le faamamaina mai agasala o le ‘ina ia [tatou] maua pea lona Agaga e faatasi ma [i tatou]’ (M&FF 20:77).”10
-
Peresitene Eyring: “Mo le tele o mafuaaga, tatou te manaomia ai le mafutaga a le Agaga Paia. Tatou te mananao i ai, ae ua tatou iloa mai aafiaga e le faigofie ona faatumauina. Tatou te taufai mafaufau, tautatala, ma faia mea i o tatou olaga i aso taitasi e mafai ona faatiga ai i le Agaga. Sa aoao i tatou e le Alii o le Agaga Paia o le a avea ma a tatou soa tumau pe afai o o tatou loto e tumu i le alofa mama ma pe a leoleoina o tatou mafaufauga i le mama e le aunoa (tagai M&FF 121:45). … A e faaalia lou naunautaiga ia usiusitai, o le a auina mai e le Agaga nisi uunaiga tele atu ia te oe o mea e finagalo le Atua e te faia mo Ia. A e usitai, o le a atili ona aumaia i taimi uma ia uunaiga mai le Agaga, ma atili ona latalata atu ai pea i le mafutaga faifai pea. O le a faateleina lou mana e filifili ai le mea sao.”11
-
Elder Stevenson: “E taua tele i lo tatou saogalemu faaletino ma le faaleagaga le tatou faatumauina o le meaalofa o le Agaga Paia. Tatou te amata ona faia e ala i le taumafai e tausi ia poloaiga, faia o tatalo faaletagata lava ia ma faaleaiga, faitauina o tusitusiga paia, ma saili sootaga agaalofa ma faamagaloga ma aiga ma e pele. E tatau ona tatou tausia le mamā o ō tatou mafaufauga, amioga, ma le gagana. E tatau ona tatou tapuai i lo tatou Tama Faalelagi i o tatou aiga, i le lotu, ma pe a mafai ai, i le malumalu paia. Faalatalata i le Agaga, ma o le a latalata atu foi le Agaga ia te oe.”12
-
Elder Richard G. Scott (1928–2015) o le Korama a Aposetolo e Toasefululua: “Ua faamoemoe lo tatou Tama ia te oe ia aoao pe faapefea ona maua … fesoasoaniga faalelagi e ala i le faatinoina o le faatuatua ia te Ia ma Lona Alo Paia, o Iesu Keriso. Pe e te maua le taiala musuia i le na ona ole atu, o le a e vaivai ma matua faalagolago atili ia i Laua. La te silafia o le tuputupu ae patino taua o le a oo mai a o e tauivi e aoao pe faapefea ona taitaiina e le Agaga.”13
Mafaufau: O le a se mea e mafai ona ou faia e faamamalu atoatoa ai a’u feagaiga ma le Atua?
3. Saili le fesoasoani ma faalagolago i lē Faamafanafana.
E tusa lava pe o tatou ola agavaa mo le Agaga Paia ma faia mea ua poloaiina ai i tatou e le Alii, i le loloto o le faanoanoa ma tofotofoga faapena o le soifua maloloina faalemafaufau, atonu o le a sili ona faigata lo tatou lagonaina o le Agaga Paia. “O le lē gafatia ona lagona le Agaga, po o se lagona lautele o le lē magafagafa po o le gase, e tele lava o se aafiaga o le lē lelei o le soifua maloloina faalemafaufau. E le o tuulafoaiina oe e le Atua.”14 Afai e faatapulaaina e le soifua maloloina faalemafaufau lo tatou gafatia e lagona ai le Agaga, e mafai ona tatou fefautuaai ma e pele faatuatuaina, taitai o le Ekalesia, ma tagata tomai faapitoa o le soifua maloloina faalemafaufau; manatua aafiaga ina ua tatou lagonaina le Agaga i le taimi ua tuanai; ma fai o tatou fale ma nofoaga o le filemu e mafai ona afio ai le Agaga.15
Pe a tatou tauivi e lagona le Agaga, pe lagonaina soo se mea, e mafai ona tatou maua le faatuatua i le alofa o le Tama Faalelagi mo i tatou. E mafai ona tatou faatuatuaina le folafolaga a le Faaola, “Ou te le tuua outou o matuaoti: ou te sau ia te outou” (Ioane 14:18). Ma e mafai ona faaauau pea ona tatou tatalo mo le Agaga Paia, lē Faamafanafana, e aumaia ia i tatou le filemu i le lumanai.
E mafai foi ona tatou manatua ua tuuina mai e le Atua ia i tatou le tele o isi auala e fesoasoani tatou te lagona ai Lona alofa. E pei ona sa saunoa Elder Jeffrey R. Holland o le Korama a Aposetolo e Toasefululua: “Talu ai sa savalia e Iesu se ala umi na o ia lava, o lea ua le toe manaomia ai onatatoufaia lena mea. O Lana malaga toatasi na aumaia ai se ‘au toatele mo la tatou vaega itiiti o lena ala—o le tausiga alofa mutimutivale a lo tatou Tama i le Lagi, le mafutaga e le uma a lenei Alo Pele, o le meaalofa atoatoa o le Agaga Paia, o agelu i le lagi, o tagata o aiga i itu uma o le veli, perofeta ma aposetolo, faiaoga, taitai, ma uo. O nei mea uma ma le tele o isi ua tuuina mai e fai ma a tatou soa i la tatou malaga faaletino ona o le Togiola a Iesu Keriso ma le Toefuataiga o Lana talalelei. O le leo o le pu mai le tumutumu o Kalevaria o le upumoni lea o le a le tuulafoaiina lava i tatou e aunoa ma se fesoasoani, e tusa lava pe i ai nisi taimi tatou te lagona ai ua tuulafoaia i tatou.”16 A oo i taimi e faigata ai ia i tatou ona lagona le Agaga, e mafai ona tatou faatuatuaina ma faalagolago atu i na upumoni.
Mafaufau: O ai e mafai ona ou fefautuaai faatasi e uiga i o’u lagona? O le a se isi auala e mafai ona ou iloa ai le alofa ma faamanuiaga a le Atua i lo’u olaga a o ou faatalitali e toe lagonaina le Agaga?