Ua Na’o Tusiga Faaeletonika: Autalavou Matutua

O Auala e 3 e Tuu ai le Konafesi Aoao e Suia Lou Olaga

Na saunia e Alison Wood

O Mekasini a le Ekalesia

O ni nai auala nei e savavali ese ai mai le konafesi ma se fuafuaga mautu.

Ata na pueina e le aiga o Kaufusi

Ou te aoaoina i taimi uma ni mataupu faavae fou pe a ou faalogologo i konafesi aoao. Ua faamanatu mai ia te au le alofa o le Atua mo au, ua ou malamalama ai i mea fou e uiga i le Ekalesia ma le Togiola a Iesu Keriso, ma ou te vaai i tusitusiga paia i se malamalama fou. O se avanoa matagofie e faalogo atu ai i perofeta ma aposetolo soifua.

Ae o nisi taimi e faigata ia te au ona liliu atu lena poto fou ma le malamalama i se mea e mafai ona ou faatinoina, ma e pei ona faamalamalama mai e Elder Dale G. Renlund o le Korama a Aposetolo e Toasefululua, “O le tele o faamanuiaga a le Atua e finagalo e foai mai ia i tatou e manaomia ai le faatinoga i la tatou vaega—o faatinoga e fua i lo tatou faatuatua ia Iesu Keriso. O le faatuatua i le Faaola o se mataupu faavae o le faatinoga ma le mana.¹

Talu ai nei sa ou taumafai ai e mulimuli i lena fautuaga ma alu ese mai le konafesi ma le iloaina o auala mausali e faatino ai. O ni fautuaga nei se tolu mo le fatuina o se fuafuaga e mafai ona faatinoina pe a maea le konafesi.

1. Omai ma ni fesili patino.

Tatou te faalogo i lenei mea i taimi uma, ae e moni! O le iloaina o mea o loo e sailia e mafai ona fesoasoani ia te oe e taulai atu ai au suesuega ma sauniuniga ma maua ai se malamalamaaga patino a o e matamata pe faalogologo i le konafesi aoao.

Ma afai o loo e sailia se mea e mafai ona fai, taumafai e faaaofia ai ni veape i au fesili. O nisi nei o faataitaiga:

• E faapefea ona ou suesue ma le mataalia atili a’u tusitusiga paia?

• O le a se mea e mafai ona ou faia ina ia maua ai ni mea se tele mai a’u tapuaiga i le malumalu?

• O le a se mataupu faavae se tasi e mafai ona ou faaopoopo i lo’u olaga lea o le a ou latalata atili atu ai i le Tama Faalelagi ma le Faaola?

2. Mafaufau i isi.

E ui o loo i ai i le konafesi ni savali matagofie e fesoasoani ia i tatou e faaleleia ai o tatou lava olaga, ae ua apoapoai soo foi i tatou ia faaleleia a tatou sootaga ma nofouta i manaoga o i latou o siomia i tatou. O le sau i le konafesi ma se tagata i le mafaufau—o se tagata e potu faatasi, o lou toalua, o se tagata o le aiga, o se uo—e mafai ona fesoasoani ia te oe ia maua se aafiaga ese o le konafesi aoao. Atonu e te lagonaina le uunaiga ia iloa atili i latou o loo e auauna atu i ai, faamalosia se mafutaga tuai, pe saili foi se tagata e te le iloa lelei.

E pei ona sa saunoa mai Sister Sharon Eubank, Fesoasoani Muamua i le Au Peresitene Aoao o le Aualofa: “Uso e ma tuagane, e ala i la outou auaunaga, foai, taimi, ma le alofa, ua avea ai outou ma tali i le tele o tatalo. Ae, e tele na’ua isi mea e fai. I le avea ai ma tagata ua papatisoina o le Ekalesia, ua noatia ai i tatou i se feagaiga e tausi i latou e lē tagolima. O a tatou taumafaiga taitoatasi e lē manaomia ai se tupe po o ni nofoaga mamao; latou te manaomia le taitaiga a le Agaga Paia ma se loto naunautai e fai atu i le Alii, “O A‘u lenei; auina atu a’u.”²

3. Ia nofouta i uunaiga mai le Agaga.

E le o tali uma o le a oo mai i mea e tautalagia e failauga. Ia nofouta i mea o loo taumafai le Agaga e ta’u atu ia te oe e ala i mafaufauga ma lagona. Na saunoa mai Elder Dieter F. Uchtdorf o le Korama a Aposetolo e Toasefululua: “O tali i ni au tatalo patino e ono sau sa’o lava mai se lauga faapitoa pe mai se fasi fuaitau patino. O nisi taimi e ono oo mai ai ni tali i ni upu e foliga e le fesootai, se fasi fuaitau, po o se pese. O se loto ua faatumulia i le agaga faafetai mo faamanuiaga o le olaga ma se naunautaiga faamaoni e faalogo ma mulimuli i upu o le fautuaga o le a saunia ai le ala mo faaaliga patino.”³

Ma o le taimi lava tatou te maua ai lena faaaliga, e taua le tusi i lalo. E tusa lava pe ua mavae se aafiaga faaleagaga malosi i le konafesi, e ono mou atu o tatou faamoemoega lelei pe afai tatou te le manatua lelei po o a upu po o tala na musuia ai i tatou, po o mea sa tatou mananao e faaleleia atili. Na fautua mai Peresitene Russell M. Nelson ia i tatou ia “Tatalo atu i le suafa o Iesu Keriso e uiga i ou atuatuvalega, ou popolega, ou vaivaiga—ioe, o faanaunauga o lou loto. Ona faalogo lea! Tusi i lalo manatu e oo mai i lou mafaufau. Faamaumau i lalo ou lagona ma tulitatao i faatinoga e uunaia oe e fai. A e faia sooa lenei faagasologa i lea aso ma lea aso, masina ma lea masina, tausaga ma lea tausaga, o le a e “ola ai i le mataupu faavae o faaaliga.’”⁴

O le ole atu i le Alii e fesoasoani ia i tatou e faatino ni suiga fou i o tatou olaga o le a avea ai konafesi aoao ma se aafiaga patino sili atu. E le faapea e tatau ona i ai se mea telē pe faigata—e tusa lava pe o ese atu ma se mea se tasi pe lua e te manao e faaaoga i lou olaga e mafai ona aoga. E pei ona faamalamalama mai e Elder Michael A. Dunn o le Fitugafulu, “Ona o taumafaiga taitasi tatou te faia ia sui ai—po o le a lava le itiiti i la tatou vaai—atonu e ono faia ai se eseesega aupito tele i lou olaga.”⁵ E silafia e le Alii a tatou taumafaiga ma o le a faaauau pea ona taialaina i tatou a o tatou saili atu i Ana fautuaga ma toe iloilo mea sa tatou aoaoina i le konafesi aoao.

OAlison Wood o se faatonu mo le Liahona ma le AM Faalevaiaso. E fiafia o ia i tusi lelei, pikopolo, tata le vaiolini, ma lona toalua. E i ai lona talitonuga loloto i le talalelei ma faamanuiaga na te aumaia.

Suesue Ia Iloa Atili

E mafai ona e maua nisi tusitusiga e uiga i le mauaina o faaaliga i le vaega a le Autalavou Matutua o le Liahonao Setema 2022.

Siaki le AM Faalevaiaso, o loo maua i le Gospel Library i le vaega o Mekasini po o le Au Matutua > Autalavou Matutua, mo nisi anotusi fou, ma musuia mo autalavou matutua i vaiaso taitasi.

E mafai ona e auina mai lau lava tala, manatu, ma manatu faaalia i le liahona.ChurchofJesusChrist.org. Ua le mafai ona tatali lo matou fia faalogo atu ia te oe!

Faamatalaga

1. Dale G. Renlund, “E Tele Mea e Manuia Ai,” Ensign po o le Liahona, Me 2019, 70.

2. Sharon Eubank, “Ou te Tatalo Ia Ona Faaaogaina i Tatou,” Liahona, Nov. 2021, 55.

3. Dieter F. Uchtdorf, “Konafesi Aoao—E Le o se Faamanuiaga Faatauvaa,” Ensign po o le Liahona, Sete. 2011, 4.

4. Russell M. Nelson, “Faaaliga mo le Ekalesia, Faaaliga mo o Tatou Olaga,” Ensign po o le Liahona, Me 2018, 95.

5. Michael A. Dunn, “Tasi Pasene Ia Lelei Atu Ai,” Liahona, Nov. 2021, 108.