Savali a le Au Peresitene Sili
Konafesi Aoao— E Le o se Faamanuiaga Faatauvaa
Na talanoa se tagata e malosi i le Ekalesia ma se tuaoi e le auai i la tatou ekalesia. Ina ua liliu atu le autu o le talanoaga i le konafesi aoao, na fesili mai le tuaoi, “Na e fai mai e i ai a outou perofeta ma aposetolo? Ma e faalua i le tausaga i se konafesi a le lalolagi atoa ona latou faaalia mai le upu a le Atua?”
“E moni lava,” na tali atu ai ma le lototele le tagata o le ekalesia.
Na mafaufau le tuaoi i lena mea mo sina taimi. Na foliga mai e faamaoni lava lona fia iloa ma na ia fesili mai, “O le a se mea na latou ta’u mai i le konafesi aoao lea ua te’a?”
O le taimi la lea na oo ai le tagata malosi o le Ekalesia mai le lagona fiafia e faasoa atu le talalelei i le lagona matamuli. Na ia taumafai malosi, ae na le mafai ona ia mafaufau i ni faamatalaga o se lauga se tasi.
Na fai sina faaletonu o lana uo i lenei mea ma faapea mai, “O lona uiga o lau tala ia te au e talanoa mai le Atua i le tagata i o tatou aso ae ua le mafai ona e manatuaina mea Na ia fetalai mai ai?”
Na lagona e le uso lea le lotomaualalo i lenei talanoaga. Ma na ia tauto ai o le a ia faia le mea sili e manatua ai upu na saunoa ai auauna a le Alii i le konafesi aoao.
Tatou te iloa uma lava le faigata o le manatuaina o savali uma o le konafesi aoao, ma e ou te mautinoa e le tatau ona tatou matamumuli ai pe afai tatou te le manatuaina mea uma. Ae ui i lea, e i ai savali i konafesi aoao tatasi o loo tuuina mai o se meaalofa ma se faamanuiaga mai le lagi e patino lava mo o tatou olaga faaletagata lava ia.
I le sauniuniga mo le konafesi aoao, sei ou fautuaina atu ni mataupu faavae autu se tolu e ono fesoasoani ia i tatou e maua lelei ai, manatua, ma faaaoga afioga tulei mai auauna a le Alii.
1. E i ai i tagata o le Ekalesia le aia tatau mo faaaliga patino ao latou faalogo atu ma suesue i saunoaga musuia na fofogaina mai i le konafesi aoao.
Ao e sauni mo le konafesi aoao, ou te valaaulia oe e mafaufau i fesili sa e manaomia e taliina. Mo se faataitaiga, atonu e te manao i se taiala ma se taitaiga mai le Alii e faatatau i ni luitau o loo feagai ma oe.
O tali i ni au tatalo patino e ono sau sa’o lava mai se lauga faapitoa pe mai se fasi fuaitau patino. O nisi taimi e ono oo mai ai ni tali i ni upu e foliga e le fesootai, se fasi fuaitau, po o se pese. O se loto ua faatumulia i le agaga faafetai mo faamanuiaga o le olaga ma se naunautaiga faamaoni e faalogo ma mulimuli i upu o le fautuaga o le a saunia ai le ala mo faaaliga patino.
2. Aua le faalēano i se savali ona e masani ona e faalogo i ai.
E masani lava ona aoao mai Perofeta e ala i le faisoo mai; o se tulafono o le aoaoga. O le a e faalogo o faisoo mai ia autu ma aoaoga faavae i konafesi aoao. Sei ou faamautinoa atu ia te oe: e le faapea ona o le le lava o le sogasoga o le mafaufau. E faaauau pea ona tatou faalogo i savali e uiga i mataupu talitutusa aua o loo aoao mai e le Alii ma faamamafaina i o tatou mafaufau ma loto ni mataupu faavae autu faapitoa e maoae le taua faavavau lea e tatau ona malamalama ma faatinoina ae tatou te lei oo atu i isi mea. O se tagata faufale atamai e muamua lava ona faataatia le faavae ao le’i faatuina ia puipui ma le taualuga.
3. O upu o loo laugaina i le konafesi aoao e tatau ona avea ma se faasinoala e faasinoina le ala mo i tatou i masina a sau.
Afai tatou te faalogo ma mulimuli i musumusuga a le Agaga, o le a avea lea ma se Liahona, e taialaina i tatou i mea tatou te le iloa, o vanu ma mauga faigata o loo i luma atu (tagai i le 1 Nifae 16).
Talu ona amata mai le lalolagi, ua faatuina e le Atua ia perofeta o e talanoa mai e uiga i le finagalo o le lagi i tagata o o latou lava taimi. O lo tatou tiutetauave la o le faalogo ma faaaoga ia savali ia na tuuina mai e le Alii mo i tatou.
E le’i tuulafoaiina ma o le a le tuulafaoaia lava e lo tatou Tama Faalelagi alofa mutimutivale ma agaalofa Lana fanau. Ua ia tofia aposetolo ma perofeta i aso nei, faapei o aso ua mavae. E faaauau pea ona Ia faaalia Lona finagalo ia i latou.
O se avanoa ofoofogia le faalogo atu i savali a le Atua mo i tatou taitoatasi i le taimi o le konafesi aoao! Sei o tatou tapena lelei mo lenei faamanuiaga maoae o le taitaiga paia ua tuuina mai e Ana auauna filifilia.
Aua e le o se faamanuiaga faatauvaa.
Taumatau: ata na pueina e Les Nilsson