Mata e Mafai ona Ou Maua se Galuega?

Greg Burgoyne, Aferika i Saute

Sa ou sioa atu i le tupe pepa o loo gaugau i lo’u lima ina ua ou iloaina e manaomia le totogi o le sefuluai o le tupe lea na ou maua i le vaiaso na tea o la’u galuega o le taumafanafana. E 90 tupe Aferika la’u sefuluai e lei totogiina, ae 100 le tupe Aferika lea sa ia te au.

Faatoa amata lava lo’u tausaga faaiu i le aoga faafomai ma e tele mea tautupe o le aoga. Sa ou nofo ai iina ma fefulisai le tupe pepa R100, ma mafaufau e uiga i le totogiina o le sefuluai. Ua maea la’u galuega o le taumafanafana, ma e le mautinoa le maua o sa’u galuega e fetaui ma lo’u taimi pisi faatulagaina. Ae ui o lea, na aoaoina au e ou matua ina ia totogi atoa le sefuluai. O le tupe lenei a le Alii, ma sa ou iloaina. Faatasi ai ma lena manatu, sa ou tuuina le tupe i totonu o le teutusi ma totogi la’u sefuluai.

I aso na sosoo ai, ao su’e sa’u galuega, sa ou tatalo ina ia tatala mo au ia pupuni o le lagi. Sa ou manaomia se galuega e fetaui ma le faagasologa o lou taimi, lelei le totogi mo itula laiti, ma ia faatagaina ai pea au e suesue. I se faapuupuuga, sa ou manaomia se vavega.

Sa fautua mai se uo i le lua vaiaso mulimuli ane ina ia ou apalai mo se galuega i le falemai lea na faatoa tatala ai e lo matou aoga faafomai se fogafale fou mo aoaoga. Sa ou savali agai atu i le ofisa ma tuitui le faitotoa. Sa manatua lelei au e le fafine sa i totonu, o le sa faiaoga i le matou vasega i le lua tausaga ua mavae.

“Ou te fia iloa pe o outou saili e faafaigaluega ni faiaoga fesoasoani mo la outou polokalama fou,” o la’u tala lea. “Afai o lea, ou te manao ia faafaigaluega au.”

“Ioe,” o lana tala mai. “O loo matou saili mo se tagata e faiaoga fesoasoani mo le itula i aoauli i se vaega o tamaiti aoga faafomai e tausaga lua. E fetuutuunai le taimi amata ma o le a manaomia ia tofu le aso ma se tagata ma’i e te suesueina, ona aoao lea o tamaiti aoga. E mafai ona e faia lena mea?” o lana fesili lea.

Na fesoasoani le Alii ina ia ou maua se galuega e fetaui tonu lava ma le mea na ou manaomia! O le tali lea i la’u tatalo.

Ina ua mavae le masina talu ona ou galue, sa ou iloaina le tulaga na faamanuiaina ai a’u. Na faaalia i le siaki o lo’u totogi o loo totogiina au i se totogi o le masina e faatoluina le maualuga nai lo le mea na ou manatu i ai. E le gata i lea, ae sa totogiina foi ou aso malolo.

Na tatalaina e le Alii ia pupuni o le lagi ma sasaa mai ia faamanuiaga ua sili atu nai lo le mea na ou faamoemoeina. O se taunuuga la, na faamalosia lo’u faatuatua i le mataupu faavae o le sefuluai.

Sa ou manaomia se galuega e fetaui ma le faagasologa o lou taimi, lelei le totogi mo itula laiti, ma ia faatagaina ai pea au e suesue. I se faapuupuuga, sa ou manaomia se vavega.