Aumaia o le Peraimeri i le Fale
O Le a Talai Atu Le Talalelei i le Lalolagi Uma
“O le a talaiina atu foi lenei tala lelei i atunuu uma, ma ituaiga, ma gagana, ma nuu” (MFF 133:37).
E mafai ona e faaaogaina le lesona ma le gaoioiga lenei e aoao atili ai e uiga i le autu o le Peraimeri i le masina lenei.
Na e iloaina ea e toalaiti lava tagata i le lalolagi e maua faamanuiaga ia e te maua ona e te auai i le Ekalesia moni a Iesu Keriso? O le toatele o tagata e le iloa o i latou o ni fanau a le Tama Faalelagi ma e mafai ona latou tatalo atu ia te Ia ma e Na te taliina mai. Latou te le iloa e uiga i faamanuiaga e mafai ona latou maua ona o le talalelei. E finagalo le Tama Faalelagi ina ia tatou faasoa atu le talalelei i tagata uma.
Ona o le matuai toatele lava o tagata o e manaomia e faalogo i le talalelei, o lea ua valaauina ai faifeautalai e auauna atu i vaega eseese o le lalolagi. E aoao atu e faifeautalai ia tagata i mea latou te manaomia ona iloa ma faia ina ia toe foi atu ma nonofo faatasi ma le Tama Faalelagi ma Iesu.
Na saunoa mai Peresitene Thomas S. Monson e mafai ona e saunia e avea nei ma se faifeautalai, e tusa lava po o e laitiiti. E mafai ona e valaaulia au uo i le lotu, gaoioiga, po o afiafi faaleaiga. O le auala sili lava e mafai ona avea ai oe ma se faifeautalai i le taimi nei o le faaali atu lea o le alofa ma avea ma faataitaiga lelei i au uo.
Gaoioiga
Faapipii le itulau 65 i pepa mafiafia ma tipi ese ia kata e 16. Faapipii ia kata e faasaga i lalo o se mea mafolafola. Ia auauai e fuli ni kata se lua i le taimi, ma taumafai e saili ia kata o upu ma se kata o ata o loo tutusa. A o outou taaalo, mafaufau i mea e mafai ona e faia e avea ai ma se faifeautalai i le taimi nei.
Ave se uo i le Peraimeri
“O le a talai atu lenei talalelei i atunuu uma.”
Tamaitai faifeautalai
Tusitusiga Paia
Filifili le mea sa’o
Alii faifeautalai
Papatisoga
Nofoaga Autu mo Aoaoga a Faifeautalai
Ata na tusia e Dilleen Marsh