O Le Taaloga i le ‘Aiga o le Afiafi
“Ua tofitofi foi le areto i lea fale ma lea fale, ua [latou] aai a latou mea e ai ma le fiafia ma le loto faamaoni” (Galuega 2:46).
Na sasala solo le manogi o le sosi o le supoketi ao saofafai Iosefa ma lona aiga mo le toonai i le afiafi o le Aso Sa. Na fai e Tama le lotu, ma amata loa ona faasolo meaai i luga o le laulau.
“Tatou taaalo i Upusii mai Ata Tifaga!” o le fai mai lea a Iosefa.
O Movie Quotes o lana taaloga lava lea e fiafia e taalo ai i luga o le laulau ‘ai. E fiafia foi i ai lona tina, tama, ma ona tuafafine e toalua o Jill ma Julia. E sii mai e se tasi se mea mai se ata na matamata i ai le aiga. Ona taumafai lea o isi tagata e vaai po o ai e muamua ona mate maia le ata e sau ai lea fuaiupu.
“Masalo e tatau ona tatou taaalo i se isi taaloga,” na fai mai ai Tina. “Talu ai ona o le Aso Sa, atonu e tatau ona tatou taaalo i Upusii mai Tusitusiga Paia.”
“O le a lena mea?” na fesili mai ai Iosefa.
“O le a ou mafaufau i se upusii mai tusitusiga paia, ae taumafai outou uma e mate mai po o ai na fai mai ai,” o le tala lea a Tina.
“E le manaia lena mea,” o le tala lea a Iosefa. “Aemaise, ou te le iloa ni upusii mai tusitusiga paia.”
“O le a ou alu muamua la!” o le tala lea a Jill. “‘Ou te alu ma fai ia mea ua poloaiina e le Atua.’”
Na lele i luga le lima o Julia. “O le tala lena a Nifae!”
“Ua e matea, Julia. O oe la lea o le a mafaufau i se mea se tasi,” o le tala lea a Jill.
“Faatali la sei ou vaai. … Ia ua lelei, mate mai le tasi lea pe tou te mafaia: ‘O Lo’u Atalii Pele Lenei. Faalogo ia te Ia!’”
O le taimi la lea na sii i luga le lima o Tama. “O le mea lena na saunoa mai ai le Tama Faalelagi ia Iosefa Samita i le Vao Paia.”
“E sa’o,” o le tala lea a Julia. “Malo, Tama!”
Na amata lemu ona nofo sa’o ia Iosefa i lona nofoa.
“Ou te fia manao e tau atu se mea matuai faigata lava,” na fai mai ai Tama. “Ae a la lea: ‘Ia tuuina mai lo’u nuu ia latou o.’”
Na oso ae i luga le lima o Iosefa. “E, o Mose na faia le tala lena. Matuai faigofie tele lena mea.”
“E sa’o lelei. Ia mafaufau la oe i se mea se tasi,” na fai mai ai Tama.
Na aluga le auvae o Iosefa i ona lima. Ona oo ae lea o se ataata i ona foliga ao ia manatuaina lana lesona o le Peraimeri mai aso ua mavae. Sa talanoa mai Sister Morris e uiga i le taimi na taumafai ai soo o Iesu e taofi tamaiti mai le oo atu ia te Ia. “Ina tuu mai ia o tama iti e o mai ia te au,’” na fai mai ai Iosefa.
Toe sii foi i luga le lima o Julia. “Iesu na faia le tala lena.”
“Ua e mateina!”
Sa latou taaalo seia maea ona aai tagata uma.
I se taimi mulimuli ane i lena po, ao tuu e Tina ia Iosefa i lona moega, na ia fai mai, “Ou te matea e manaia lava lena taaloga.”
“Na e aumaia se upusii e sili ona lelei i le aso,” o le tala lea a Tina.
“Faafetai. E mafai ona tatou taaalo ai i le Aso Sa a sau?”
“Ou te iloa o se manatu lelei tele,” na fai mai ai Tina. Na ia opoina mai ma kisi atu ia te ia ma aluese mai lona potu.
Na faapupuu Iosefa i lona ie afu ma ataata. Ua faatoa amatalia se aga masani fou o le Aso Sa.
Ata na tusia e Natalie Malan