Pipiimau i La’u Faaiuga

Elena Ogneva Anderson, Iuta, ISA

Ina ua atoa lo’u 21, na amata ona ou lagonaina ni uunaiga ina ia auauna atu i se misiona. Ou te le’i fuafua lava mo se misiona, ma o nei mafaufauga e lei faamoemoeina. Sa uunaia au e lo’u taitai perisitua ina ia ou tatalo i ai, ma sa ou faia.

Na matuai manino lava le oo mai o la’u tali: Sa ou iloa e finagalo le Atua ina ia ou auauna atu i se misiona. Sa amata ona ou lagona le fiafia e uiga i le auauna atu, ae o le alu i se misiona na sili atu foi le luitauina nai lo le mea na ou mafaufauina.

E le’i malamalama lo’u pule pe aisea o le a ou alu ai mo le 18 masina, ma e na te le’i manao e faataga so’u taimi malolo e sauni ai mo le malaga. Na tuu mai e ia ia te au se lu’i: “Galue pe aua le galue. O lau filifiliga lena.” Sa taufaafefe le leai o se galuega i vaiaso mulimuli ao le’i alu la’u misiona, ae sa ou filifili lava e tuua lena galuega.

Sa faigata foi le faamaeaina o mea e manaomia mo le siakiina i le falemai. E le’i vaai muamua lava lo’u fomai i lou atunuu moni o Rusia, i se pepa e siaki ai le fomai a faifeautalai a le Ekalesia ma sa musu e saini.

O tulaga faigata faapenei na ou mafaufau ai pe o se filifiliga sa’o lea na ou faia. O nisi o taimi na toeitiiti ai lava a suia lo’u mafaufau. Ae peitai o taimi na o le le mautonu, ou te manatua ai le tali na ou maua o la’u tatalo ma mafai ai ona ou pipiimau i la’u faaiuga ina ia auauna atu. Na iu lava ina ou maua ni tali i nei luitau ma isi foi na ma fetaia’i.

Sa valaauina a’u e auauna atu i le Misiona a Rusia St. Petersburg. O nai masina muamua i le galuega e le’i faigofie. Ae ona o mea sa ou aoaoina i le taulimaina o faafitauli lea na feagai ma au i le taimi ao ou sauni i le galuega, sa mafai ai ona ou foia ia luitau o la’u misiona. O la’u misiona —ma faafitauli na feagai ma a’u i le taimi na ou sauniuni ai—na aoaoina ai a’u e mafai ona ou faia mea faigata i le fesoasoani mai o le Alii.