Valaauina o La’u Korama

Saunia e Mark Tensmeyer

Sa ou auauna atu i se aiga i la’u uarota, ma sa ou manaomia se fesoasoani e faataunuu ai mea uma.

Sa ou mauaina se valaau mai le telefoni i le aoauli o se tasi Aso Toonai mai se tama o se aiga ou te faiaoga asiasi ai. “Sa ou mafaufau pe mafai ona e vaaia le ma fanau ae sei ma o ma Cindy e asi lona tinamatua,” o le fesili mai lea a Brother Stevens (ua suia igoa). “E le o malosi o ia, ma e ma te manatu atonu o le ma avanoa mulimuli lea e vaai ai ia te ia.”

Sa ou faamautinoa atu ia Brother Stevens ou te fiafia e fesoasoani atu. “Matuai lelei!” na ia fai mai ai. “Ma afai e te mafaia, e matuai lelei lava pe a mafai ona e faasa’osa’oina mea i totonu o le fale, leaga o nei e faamanatu ai le ma faaipoipoga.”:

Ina ua ou taunuu atu, na tuu e Brother ma Sister Stevens ni saimini e faavevela i le microwave mo au ma se lisi o feau e fai i totonu o le fale. Ona la malaga lea. Sa ou maua se uunaiga malosi e tatau ona ou faia se mea sili atu nai lo le vaai o le la fanau. O se aso faigata lea mo i laua, ma sa ou manao ina ia taumafai e faaleleia. Sa filifili e fai uma feau lea sa i le lisi ma isi mea, e aofia ai le fufuluina o ipu ma le moaina ma le veleina o le vao.

Na mautinoa lava, e le mafai ona ou faia na mea uma ma tausi le la fanau e toatolu i le na o le tolu itula, o lea sa ou mafaufau ai e tatau ona valaau i nisi o tagata o la’u korama o aoao. Na i ai se faafitauli se tasi: e le lelei tele se matou faauoga ma alii o la’u korama. E lelei lava la matou faifaiga, ae a tuuese la le Ekalesia, e le tele ni mea matou te tutusa ai. E eseese a matou aoga, ma e seasea ona ou vaai ia i latou i fafo atu o gaoioiga a le Ekalesia. Sa ou lagona le faaletonu e valaau i latou i se mea faapenei.

Sa ou valaau i le peresitene o Alii Talavou ma fesili atu pe mafai ona ia tuufaatasia nisi o alii e fesoasoani. Na ia tali mai ma le agalelei ua na o ia o se faufautua ma e tatau ona ou valaau ia Peteru, o le fesoasoani muamua i le epikopo, lea e i ai le valaauga e fesoasoani ia te au i ou tiutetauave faaleperisitua. O le mea tonu lava lena sa ou fefe i ai o le a ia fai mai ai.

O le popole ma le le mautonu, sa ou valaau ia Peteru ma fesili atu pe mafai ona ia sau. “Ioe, o lana fai mai lea. “O lea matou te iinei ma Scott ma Kevin, ma o le a matou o atu uma.”

Na matou moaina faatasi ma vele le vao, fufulu ia ipu, ma faasa’osa’o uma mea o i le fale. Na toe foi mai ia Brother ma Sister Stevens ae faatoa mae’a lava.

Na aoaoina au e lena aafiaga o le korama a le au perisitua ua tuufaatasia e ala i le faatuatua ia Iesu Keriso ma i auaunaga, e ui lava i le eseesega o mea e fiafia i ai, o uiga faaletagata, po o talaaga.

Ata na saunia e Robert Casey