Tala ia Iesu
Na Aoao Mai Iesu i le Auala e Taulimaina ai Isi
Mai le Luka 10:25–37.
E le galulue faatasi tagata Iutaia ma tagata Samaria. E le fiafia tagata Iutaia i tagata na nonofo i Samaria. Sa latou mafaufau ua sili atu i latou nai lo tagata Samaria ma taumafai ai e aua nei o latou malaga i o latou laueleele. Afai latou te vaaia se Samaria, latou te le talanoa i ai.
Peitai na aoao atu Iesu e tatau ona latou taulimaina tagata e pei foi ona latou mananao e faia mai e isi ia i latou. Pe o le uiga o lena mea o le taulimaina ma le agalelei o tagata e tusa lava pe e te le iloaina i latou pe o latou o ni Samaria?
Na fetalai mai Iesu e tatau i tagata ona alolofa atu i o latou tuaoi. Peitai o se tuaoi ea ua na o se tasi o loo ola i ou autafa po o se tasi e pei lava o oe? Na faamatala e Iesu se tala ina ia fesoasoani i tagata ina ia malamalama i le auala e tatau ai ona latou taulimaina isi.
Sa i ai i le tala se tagata Iutaia na malaga i le ala mai Ierusalema e agai atu i Ieriko. O se auala faigata e a’e i mauga maualuluga. E tele ina o mai tagata faomea ma lalafi i tua o papa tetele ona taumafai lea e taofi ma gaoi mea a tagata malaga.
Na osofaia e tagata faomea le tagata malaga ma na matuai faatiga ia te ia. Sa latou aveina ona ofu ma tuua na o ia i autafa o le auala e oti ai.
Sa malaga ifo se faitaulaga i le auala ma vaai i le tagata manua. Ae na ia alu faatopetope i le isi itu auala na faaauau lana malaga.
Na sosoo ai ma se tagata sa Levi na ia oo ane ma iloa atu le tagata manua. Na ia ui atu foi i le isi itu ma faaauau pea, e aunoa ma le tu e fesoasoani.
O le tagata mulimuli na oo ane o le Samaria lea. Ina ua ia vaai atu i le tagata Iutaia lea na osofaia, sa ia lagona le alofa ma tu e fesoasoani atu.
Na fufuluina e le Samaria ia manua o le tagata, faatietie i lana asini, ma ave o ia i se faletali malo, lea na mafai ona ia malolo ma ‘ai ai. Sa totogi e le Samaria le tupe i le pule o le faletalimalo e tausi ai le tagata manua seia toe malosi.
Sa faaali atu e le Samaria le agalelei ma le alofa mutimutivale i le tagata na manua. Sa ia tausia o ia e pei o se tuaoi.
E finagalo Iesu ina ia tatou agalelei i isi e pei ona faia e le Samaria agalelei.
Samaria
Vaitafe o Ioritana
Ierusalema
Ieriko
Faamatalaga mai le Keriso ma le Taulealea Mauoa, saunia e Heinrich Hofmann, faaaloaloga a le C. Harrison Conroy Co.; ata na tusia e Dan Burr; ata na tusia e Cody Bell