O Faamanuiaga o le Malumalu i le Taimi Nei ma le Faavavau

Saunia e Stacy Vickery

Ua tuputupu ae lo’u malamalama e uiga i faamanuiaga o le malumalu a o faateleina lo’u manaomiaina o ia faamanuiaga.

Ou te manatua le vaai i nei ata o le malumalu mai le taimi sa ou laitiiti ai lava. E ui sa ou laitiiti tele e malamalama i faamanuiaga o le malumalu, ae na ou iloa lo’u fia alu i ai iina i se aso. I Tamaitai Talavou, ua amata ona ou malamalama i faamanuiaga lea o le a oo mai mai le malumalu. I le taimi la lena, sa lei toaaga lo’u aiga, ma sa ou tatalo i aso taitasi ina ia faamauina i matou e avea ma se aiga e faavavau.

I le tautoulu o le 1993, toe lua vaiaso ae atoa loa lo’u 18 tausaga, sa o ai lo’u aiga i le malumalu. Ou te manatua le lagona sa i ai i le Malumalu o Provo Iuta, i le avea ai o se aiga e faavavau faatasi ai ma ou matua ma nai ou tei. Ao ou tuua le malumalu i lena aso, sa ou manatu ua ou malamalama i faamanuiaga na aumaia ia te au.

E lua tausaga mulimuli ane, i le taumafanafana o le 1995, sa ma faamau ai o le a ma faaipoipo, ma o lea sa ou alu ai i le malumalu ina ia maua so’u lava faaeega paia. Oka se matagofie o le mauaina o se isi faamanuiaga o le malumalu! E tolu aso talu ona maua o’u faaeega paia, ae ou faamau atu loa i lo’u toalua mo le taimi nei ma le faavavau atoa i le Malumalu o Manti Iuta. Sa ou iloaina se isi faamanuiaga ou te lei lagonaina muamua—ua mafai ona avea i ma’ua ma lo’u toalua o se aiga e faavavau. Na ou toe manatu foi ua ou tofo i faamanuiaga uma o le malumalu.

I le ono tausaga talu ona ma faaipoipo, sa ma iloa ai ua faateleina lo ma aiga. Sa ma fiafia lava e faafailele le ma tama tama ma aoao o ia i le talalelei. Peitai na oo i le vaiaso 24 o lo’u maitaga, ua fanau le ma pepe tama ma o loo tauivi pe ola. Na o le valu vaiaso, ae toe foi atu o ia i le Tama Faalelagi. Ao ou afisiina o ia mo le taimi mulimuli, sa ou iloaina ai se isi faamanuiaga matagofie o le malumalu: na fanauina le ma tama tama i totonu o le feagaiga ma o le a avea o ia ma a ma’ua tama mo le faavavau.

E sefuluvalu masina talu ona mavae atu le aveeseina atu o le ma tama, ae o ma maua se valaau mai le Tautua a le AAG mo Aiga fai mai o loo i ai se tamaitai talavou ua ia filifili e tuu lana pepe ma te tausia. I le iloaina e le mafai ona ma toe mauaina sa maua lava fanau, na le mafai ai ona tatalia lo ma fiafia.

Ina ua atoa le ono masina o le ma pepe teine, faatoa mafai ai ona ma vaetamaina o ia ma ave o ia i le malumalu ina ia faamauina ia i maua. E fa tausaga talu ona avea le ma tama teine ma se vaega o lo ma aiga, ae filifili foi se isi tamaitai talavou ia avea i ma’ua ma matua o se pepe tama agamalu. Na ma toe maua foi le faamanuiaga o le ave o se pepe e ono masina i le malumalu. O le a le galo lava ia te au lo’u lagona ina ua ou vaai i la’u fanau, o ofu papae uma, i le malumalu faatasi ai ma lo’u toalua ma a’u ina ia faamauina ia i maua mo le faavavau.

Ua ou iloa nei ou te lei malamalama atoa i faamanuiaga uma na mafai ona aumai e le malumalu ao ou i ai i Tamaitai Talavou pe ina ua faamauina au i lou toalua po o le taimi na toesea ai le ma tama tama. Ma e ui lava ua ou iloaina le tele o isi faamanuiaga ua ou maua i tausaga ua mavae, ae ua ou iloa nei o le malumalu o se nofoaga o faamanuiaga e faavavau, faamanuiaga o le a tatou maua i lenei olaga ma le faavavau. O nisi ua faigofie ona tatou iloaina i le aso, ao isi o le a aoaoina ai i tatou, faamalolosia ai a tatou molimau, ma fesoasoani ia i tatou i se aso ina ia ausia lo tatou aiga e faavavau.

O le malumalu o se nofoaga o le filemu ma le mafanafana, olioli ma le toe faafouina. Ua sili atu lo’u faafetai mo le malumalu nai lo se isi lava taimi ma ou te tatalo pe a ou toe foi atu iina, o le a mafai ai pea ona ou aoao ma talisapaia ia faamanuiaga o le malumalu.