O Ia e Pule i Lo’u Ola

Mahonry Gonzalez, Morelos, Mekisiko

Ina ua atoa lo’u 18, o le toatele ia o tagata o la’u uarota ma le siteki na amata ona fai mai ia te au e tatau ona ou alu i se misiona. E ui ua leva ona ou fuafua e auauna atu i se misiona, ae ou te le’i fiafia nei uunaiga uma.

E le’i leva ae amata loa lo’u tausaga muamua i le kolisi. O se taunuuga o le galue malosi, sa ou manumalo ai i se sikolasipi e faataga ai ona ou suesue i Siamani. O Siamani e matuai ese lava mai lo’u atunuu moni o Mekisiko, ae ua amata ona iloa lelei le aganuu ma vave ona aoaoina le gagana.

Na iu foi ina ofo mai ia te au se galuega tumau i se kamupani tautaua i Europa. Ua faafuasei nei ona lagonaina atili le pei o se tiute le auauna atu i se misiona nai lo se manao. Sa ou mafaufau e mafai ona ou faigaluega i lenei galuega ma fiafia i faamanuiaga faalelalolagi.

I se tasi o aso na toulu ai le kiona na ma o ai ma la’u uo o Melanie i le taulaga o Heidelberg. Ina ua mavae le tele o itula, sa ufiufi e le kiona le auala vave, ma ua amata ona ma tulimomoe. Sa ma o pe tusa o le 65 maila (105 km) i le itula ma na ma pasia se moli mumu ma so’a ai se pasi.

Ina ua ou te’i i luga, sa ou vaai i le leoleo, le taavale falemai, ma Melanie o loo tagi. Na faaleagaina le taavale, ma o sa ou i ai pea i totonu. Na oo mai loimata i ou mata ina ua ou iloaina le faamanuiaina o i maua o loo ma ola pea. Sa amata ona ou tatalo ma faafetai i lo’u Tama Faalelagi mo le faasaoina o i maua, ae na oo mai se popolega fou ia te a’u—ua le mafai ona gaioi o’u vae.

O lo matou agai atu i le falemai, na ou faalogo ai o fai mai le teine tausimai afai na lavea lo’u tuasivi, ailoga e mafai ona ou toe savali. Sa ou tatalo atu i lo’u Tama Faalelagi ma lo’u loto atoa. Sa ou toe faafetai muamua atu ia te Ia mo le faasaoina o a’u, ma iloa ai o lo’u ola e le o a’u e pule ai. Ona ou folafola atu lea ia te Ia, “Afai e LELEI o’u vae ma mafai ona ou savali, o le a ou auauna atu i se misiona ma lo’u loto atoa ma lo’u malosi atoa.”

Ina ua mavae le fa itula i le falemai, sa foliga lelei le taunuuga o le vaaiga o a’u: O le a ou toe savali. Sa le toe i ai se faalotolotolua e uiga i le auauna atu i se misiona. Nai lo lena sa ou lagona se naunautaiga malosi e faasoa atu la’u molimau o loo soifua le Atua, ma o Ia o lo tatou Tama o i le Lagi, ma e mafai ona Ia faataunuuina vavega i o tatou olaga.

Ina ua mavae lena aafiaga sa ou filifili loa ou te le taliaina le galuega na ofo mai. Sa ou iloa o le Alii e pule i lo’u taimi ma mea uma sa ia te au. Aisea ou te le tuuina atu ai ia te Ia sina vaega o lena taimi ma auauna atu mo Ia mo le lua tausaga?

Ina ua uma le faauuga, sa valaauina a’u e auauna atu i Frankfurt, Siamani. O le taimi o la’u misiona sa ou molimau atu ai e uiga i lo’u Tama Faalelagi. Ou te iloa o loo soifua o Ia, o Ia o lo’u Tama, ma e Na te puipuia a’u. Ua Ia tuuina mai ia te a’u lo’u ola, ma o Ia lava e pule ai.