Toe Faatuina e le Ekalesia le Nofoaga na Toefuatai Mai ai le Perisitua

Ua fofogaina e le Au Peresitene Sili ni fuafuaga e toe fauina ai se nofoaga lauiloa sa ta’ua muamua o Haremoni (lea e latalata i Susquehanna i le vaitaimi lenei), Penisilevania, ISA, lea na faaliliuina ai e le Perofeta o Iosefa Samita se vaega tele o le Tusi a Mamona, ma o le nofoaga foi na toefuatai mai ai e Ioane le Papatiso le Perisitua Arona i le 1829.

O le galuega o le a aofia ai le fauina o fale iloga o le talafaasolopito ma le tulaga o le faatoaga i Haremoni faapea foi ma maa faamanatu e faamanatu ai le toefuataiga mai o le Perisitua Arona ma le Mekisateko i le 1829. Ua faamoemoe e faataunuu le suatiaina o le eleele i le 2012, ma o le galuega faatino ua fuafua e mae’a i le lua tausaga.

O Haremoni, Penisilevania, o le nofoaga lea sa faaliliuina ai e Iosefa Samita se vaega tele o le Tusi a Mamona i le va o le 1827 ma le 1830. O iina na maua ai e le perofeta ia uluai faaaliga e 15 o loo i le Mataupu Faavae ma Feagaiga.

I le nofoaga lava lea, e pei ona tusia i le Iosefa Samita—Talafaasolopito 2:66–75, na maua ai e Iosefa Samita ma Oliva Kaotui le Perisitua Arona mai ia Ioane le Papatiso i le 1829. Na faaee atu e Peteru, Iakopo, ma Ioane le Perisitua Mekisateko i o laua luga i se nofoaga na lata ane i ai i se taimi e le’i mamao mulimuli ane.

Fai mai Mark Staker, o le tagata suesue sinia o le vaega o nofoaga anamua o le Matagaluega o Talafaasolopito o le Ekalesia, ua amataina nei e le matagaluega ni suesuega o elieliga o mea anamua, ia iloa ai mea na uluai fausia ai ni fale i lena eria.

Fai mai a ia, “O loo matou vaavaai e toe fau le maota na nonofo ai Iosefa ma Ema i Haremoni, faapea foi ma le nuu na fanau ai Ema Samita ma le maota o lona aiga.”

O loo ua i ai i le fanua e 90-eka (36 ha) se faatagata o le Perofeta o Iosefa Samita ma Oliva Kaotui a o la taliaina le Perisitua Arona. O loo ua mamanuina foi ni maa faamanatu fou. O loo i ai foi se fuafuaga e fausia se nofoaga autu mo tagata e asiasi atu i lea lava nofoaga.

Ua valaaulia e taitai o le Ekalesia le au paia o ē fia tuuina atu se saofaga itiiti, e tasi lava le taimi e fai ai, i lenei galuega faatino. E mafai ona faia lenei mea i le tusia o le “Nofoaga o le Toefuataiga o le Perisitua” i le vaega o le “Isi” i le lisiti sefuluai e maua atu i epikopo ma peresitene o paranesi.

Faatumauina o Talafaasolopito o le Ekalesia i le Lalolagi

E i ai ni matagaluega a le Ekalesia o loo galulue faatasi ma tagata tusi talafaasolopito, enisinia tusiata, tagata suesue o toega anamua, loia, tagata tomai faapitoa i galuega taulima, konekarate, ma teufanua e faasao nofoaga e taua i le talafaasolopito o le Ekalesia atoa. O nei nofoaga e tolu ni vaega ua vaevae i ai:

• Nofoaga iloga o nofoaga na tutupu ai ni mea e sili ona taua i le talafaasolopito o le Ekalesia, e pei o le faatoaga a Iosefa Samita po o Katelani anamua. E tusa ma le luasefulufa nofoaga taua o loo i ai i le Iunaite Setete, ma le nofoaga e tasi e i fafo atu o le Iunaite Setete, o le—Falesa i Worcestershire Gadfield Elm, o le falesa muamua lava lea o Le Ekalesia a Iesu Keriso o le Au Paia o Aso e Gata Ai i Egelani.

• Vaaiga iloga, lea e tusa ma le fasefuluvalu, e aofia ai malumalu, tapeneko, ma falelotu e tulaga ese fausaga pe tulaga ese i le vaai.

• Ma le mea mulimuli, talu ai ona e le o nofoaga taua uma e mafai ona toe fausiaina, ofaailo iloga—e silia ma le 100 o ia mea—e iloa ai isi nofoaga ua manao le Ekalesia e faasao i loto ma mafaufau o le Au Paia o Aso e Gata Ai. O faailoga e mafai foi ona avea o ni eria atofaina (e pei o le tulaga o le Malumalu o Sisifo Mamao) lea e le o lava ni faamatalaga o i ai e toe fauina sa’o ai lea nofoaga. E tele ia faailoga taua o loo i atunuu i fafo.

O se nofoaga e 90-eka (36 ha) i Penisilevania ua toe fausiaina e faamanatu ai le toefuataiga mai o le perisitua ma le faaliliuga o le Tusi a Mamona.