nai otootoga o le lalolagi

Ua Faamanatu e Tagata o le Ekalesia le 50 Tausaga o le Ekalesia i Filipaina

O le faamanatuina o le 50 tausaga o le toe faapaiaina o Filipaina mo le talaiga o le talalelei, na faapotopoto ai le faitau afe o le Au Paia i le Aai o Quezon e auai i se Iupeli o faaaliga faaleaganuu i le aso 30 o Aperila, ma se konafesi faale-eria i le aso 1 o Me.

E sefuluiva siteki na faatasitasi i le Aso Toonai e faamanatu le talatuu matagofie faaleaganuu ma le tuputupu ae o le Ekalesia i Filipaina e ala i pese ma siva. I le Aso Sa, 8 o Me, na faapotopoto ai le au paia mo se konafesi faaleatunuu faatasi ma taitai o le lotoifale ma le Au Pulega Aoao e ala i le satelite.

Ua Ofo Atu e le USNS Comfort le Fesoasoani i Nofoaga e 12

O Aperila, na tuuvaa atu ai le USNS Comfort, o se manuao o se tautua atoa faafomai, mo ni nofoaga e 12 i le Atu Keripeane, Amerika Tutotonu, ma Amerika i Saute e tuuina atu ni tausiga faafomai ma fai ni aoaoga faamasani i tagata faigaluega faafomai.

O le a tuuina atu e volenitia mai le Ekalesia, le Neivi a le Iunaite Setete, ma isi faalapotopotoga fesoasoani alofa ia auaunaga fesoasoani ma aoao atu tomai o le a fesoasoani ai i tagata e fesoasoani ia i latou lava pe a tuuvaa ese le manuao.

Ua Tatala Faitotoa o le Malumalu o Atlanta ina ua maea Faafiafiaga, ma le Toefaapaiaga

Ina ua maea faafiafiaga faaleaganuu i le faaiuga o le vaiaso ma ni sauniga se lua o le toefaapaiaga i le Aso Sa e Peresitene Thomas S. Monson, na tatalaina loa faitotoa o le Malumalu o Atlanta Georgia i le aso 3 o Me, 2011, mo le toe amatalia aloaia o galuega i le malumalu. O i latou na auai i le toefaapaiaga o Peresitene Monson, Elder M. Russell Ballard o le Korama a Aposetolo e Toasefululua ma Elder Walter F. González ma William R. Walker.

O le malumalu, lea na muai faapaiaina i le 1983, na tapunia i le aso 1 o Iuni, 2009, mo se toe faafouga tele.

O Le Malumalu o Atlanta Georgia