Faamalolosia o Aiga e ala i le Faateleina o le Tulaga Faaleagaga

Suesue i mea nei, ma pe a talafeagai ai, ia talanoaina faatasi ai ma uso e te asia. Faaaoga fesili e fesoasoani ai ia te oe e faamalosia ai ou uso ma avea ai le Aualofa ma se vaega ola o lou lava olaga.

Faatuatua • Aiga • Toomaga

Na saunoa mai Julie B. Beck, peresitene aoao o le Aualofa: “Ua tupu a’e i totonu ia te au se molimau lofituina o le taua o afafine o le Atua. … e lei i ai lava muamua se tulaga manaomia tele atu o le faateleina o le faatuatua ma le amiotonu faaletagata lava ia. E lei i ai muamua se manaomia tele atu mo ni aiga ma auaiga malolosi.”

E mafai ona fesoasoani tamaitai e fausia ni aiga ma ni auaiga malolosi pe a latou faatinoina se faaaliga faaletagata lava ia. “O le tomai e agavaa ai mo le, mauaina, ma le faatinoina e ala i faaaliga faaletagata lava ia o le tomai aupito taua lea e mafai ona maua i lenei olaga,” na faaauau pea Sister Beck. “O le agavaa ai mo le Agaga o le Alii, e amata i se manao mo lena Agaga ma e manaomia ai se vaega patino ole agavaa. O le tausia o poloaiga, salamo, ma le faafouina o feagaiga na osia i le papatisoga, e tau atu ai i faamanuiaga o le i ai pea lava pea o le Agaga o le Alii e faatasi ma i tatou. O le osia ma le tausia o feagaiga o le malumalu e faaopoopo foi i le malosi faaleagaga ma le mana i le olaga o se tamaitai. E tele tali i fesili faigata e maua i le faitauina o tusitusiga paia, aua o tusitusiga paia o se fesoasoani lea i faaaliga. … E taua foi le tatalo i aso taitasi ia i ai le Agaga o le Alii e faatasi ma i tatou.”¹

Tatou te faamalolosia faaleagaga foi tagata o tatou aiga pe a tatou fesoasoani ia i latou ia malamalama i le fuafuaga e faavavau a le Tama Faalelagi. “O a ni mea e mafai ona tatou faia e saunia lelei ai i le faaleagaga a tatou fanau mo a latou matafaioi faavavau?” o le fesili lea a Elder M. Russell Ballard o le Korama a Aposetolo e Toasefululua. “Atonu o le tali sili ona lautele o le: Aoao atu ia i latou le auala e ola ai i mataupu faavae o le talalelei.” E oo mai lenei aoaoga e ala i le tatalo i aso uma, suesueina o tusitusiga paia, ma taumafataga faaleaiga faapea foi ma afiafi faaleaiga ma le auai i le Lotu. Na faamalamalama mai e Elder Ballard: “Tatou te saunia i aso uma, i le taimi nei, mo le ola e faavavau. Afai tatou te le o sauniuni mo le ola e faavavau, o loo tatou sauniuni mo se mea e itiiti ifo, atonu o se mea e matua itiiti ifo lava le taua.”²

Mai Tusitusiga Paia

Faataoto 22:6; 1 Ioane 3:22; Mataupu Faavae ma Feagaiga 11:13–14; 19:38; 68:25

Mai lo Tatou Talafaasolopito

Na aoaoina e le Perofeta o Iosefa Samita ia tamaitai i se fonotaga a le Aualofa ia Aperila 1842 e i ai so latou lava tiutetauave ina ia sailia lo latou lava faaolataga. Na ia saunoa ai, “A mae’a [la’u] aoaoga, o le a outou tali mo a outou lava agasala; o se mamalu manaomia lo outou savavali ai lea i luma o lo tatou Tama Faalelagi ina ia faaolaina ai outou lava; ua ia i tatou uma lava le tiutetauave i le Atua mo le auala tatou te faaleleia atili ai le malamalama ma le poto ua tuuina mai e lo tatou Alii ina ia mafai ai e i tatou ona faaolaina i tatou lava.”³ Na ia aoaoina i latou ina ia avea ma ni tagata amiotonu, ina ia avea o ni tagata paia, ma ia saunia mo sauniga ma feagaiga o le malumalu.

Ata na tusia e Welden C. Andersen