“Mulimuli i le Faataitaiga a Keriso: Tausiga o i Latou e Lē Tagolima,” Liahona, Mat. 2023.
Mulimuli i le Faataitaiga a Keriso: Tausiga o i Latou e Lē Tagolima
Mai le gaosiga o meaai i le tali atu i faalavelave faafuasei i le auaunaga, e tele auala e mafai ona tatou faaali atu ai le alofa i o tatou tuaoi.
O Le A Ou Talitonu, saunia e Liz Lemon Swindle, e lē mafai ona kopiina
I le avea ai ma soo o Iesu Keriso, o loo taumafai tagata o Le Ekalesia a Iesu Keriso o le Au Paia o Aso e Gata Ai e ola i poloaiga sili e lua: ia alofa i le Atua ma ia alofa i o tatou tuaoi (tagai Mataio 22:37–39). O le mulimuli ai i nei poloaiga sili e lua ma le faataitaiga a Iesu Keriso o le mea lea e taiala ai le Ekalesia ma ona tagata ina ia tausia i latou e lē tagolima.
E faapefea la ona fesoasoani le Ekalesia e tausia i latou e lē tagolima? Ma e faapefea e tagata o le ekalesia ona auai i lenei galuega tele?
Auala e Fesoasoani Atu Ai
I le avea ai ma tagata o le Ekalesia, tatou te taumafai e saili i latou e lē tagolima ma tuuina atu le fesoasoani i fanau uma a le Atua e tusa lava po o a o latou ituaiga, tagatanuu, po o tapuaiga.
Tatou te tausia i latou e lē tagolima i le tele o auala, e aofia ai:
-
Anapogi ma le faaaogaina o taulaga anapogi.
-
Auaunaga i le tasi ma le isi.
-
Polokalama o le ola tutoatasi.
-
Taumafa i le lalolagi atoa, aoaoga, vai mamā, ma polokalama o le tausiga o le soifua maloloina.
-
Tali atu i faalavelave faafuasei.
-
Galuega volenitia i le alalafaga.
E ui o nisi o taumafaiga alofa a le Ekalesia e tetelē naua, e oo lava i taumafaiga laiti e mafai ona faia faatasi ai se aafiaga telē. O nisi nei o faataitaiga o auala e fesoasoani ai tagata o le Ekalesia ia i latou e lē tagolima.
Na amata ia Fepuari 2022 ona fesoasoani le Au Paia o Aso e Gata Ai i Polani i tagata sulufai i femalagaaiga, meaai, ma malutaga.
Auaunaga i le lotolotoi o Feteenaiga
O RaeAnn ma Sterling Jarvis—o tagata o le Ekalesia i Warsaw, Polani—sa lē iloa le mea e faamoemoeina ina ua latou filifili e talimalo i tagata sulufai i lo latou fale. Ae sa latou naunau e fesoasoani i soo se auala latou te mafaia.
E le’i leva ona amata le feteenaiga i Europa, ae taunuu mai se aiga Iukureini e toalima i lo latou faitotoa i le 1:00 i le taeao. Sa latou malaga mo le toeitiiti 500 maila (800 km) ia maua le saogalemu. Sa faafeiloai e le au Jarvises ia Maryna ma Serhii Bovt ma le la fanau e toatolu i lo latou fale. I le āluga o taimi sa latou atiina a’e se alofa moni ma se popolega mo le aiga o Bovt. “Pe a e faasoa atu le alofa, e tuputupu a’e,” o le tala lea a Maryna e uiga i le faataitaiga a le au Jarvises o le auauna atu. “E faalatalata atili ai i tatou i le tasi ma le isi ma i le Alii.”
I le avea ai ma tagata o le Ekalesia, tatou te taumafai e mulimuli i le faataitaiga a le Faaola e ala i le auauna atu ia i latou o siomia i tatou. E lē tau sosola tagata mai taua po o sauaga e manaomia ai se fesoasoani. O faatinoga uma o le agalelei i la tatou vaega—e tusa lava po o le a le laitiiti—e mafai ona aafia ai le olaga o se tasi mo le lelei.
Nuu o le Fefaasoaai
I le Faatoaga o Laau Toto a le Ekalesia i Laie Hawaii, e silia ma le 310 aiga e totoina faatoaga e tausi ai o latou aiga. I o latou fanua e 1.25-eka, o nei aiga e totoina le talo, manioka, pateta suamalie, ulu, kuava, ma isi faatoaga o atumotu.
O le faatoaga e puleaina e se ulugalii faifeautalai ma mauaina le lagolago mai isi faifeautalai ma tagata o le ekalesia. E fesoasoani isi volenitia e faamamā le fanua, saunia le eleele mo le totoina, ma aoao atu ni tomai autu tau faifaatoaga.
Ona o nei faifeautalai, tagata o le ekalesia, ma volenitia, o le toatele o tagata e manaomia meaai i Hawaii e sili atu ona mafai ona lagolagoina i latou lava pe a leai ni galuega. E malosi atu le nuu pe a galulue faatasi tagata e tausia le faatoaga ma faasoa atu mea latou te totoina.
O galuega alofa a le Ekalesia e fesoasoani e saunia ai le saogalemu o meaai, aoaoga, vai mamā, ma auaunaga tau soifua maloloina mo le faitau miliona o tagata i le lalolagi atoa. Ua ofoina mai foi e le Ekalesia le tele o punaoa e faaleleia ai le ola tutoatasi, e aofia ai faleteuoloa a le epikopo, nofoaga autu mo galuega, faleoloa o le Deseret Industries, auaunaga faafaufautua a le Tautua mo Aiga, kosi o le ola tutoatasi, ma faatoaga ma togalaau a le Ekalesia e pei o le Faatoaga o Laau Toto i Laie Hawaii. O nei galuega faatino e masani ona lagolagoina e tagata o le ekalesia ma faifeautalai, o a latou foai lē manatu faapito o taimi, taleni, ma isi punaoa e faia ai se eseesega tele ia i latou e lē tagolima.
O Se Faatinoga o le Faauoga
I le 2021, e tusa ma le 200 tagata o le Ekalesia na taliina se valaau mo se fesoasoani. Sa latou o atu i nofoaga tutotonu i Siamani, le Iunaite Setete, ma isi nofoaga e fesoasoani ai i le faagasologa o le tusa ma le 55,000 tagata sulufai mai Afakanisitana.
E toatele volenitia sa auauna atu i nei nofoaga autu mo le lua pe tolu vaiaso, ma o nisi sa nonofo i se taimi umi atu. Sa taulima e tagata o le Ekalesia manaoga vave o i latou o loo sailia le sulufaiga e ala i le tuuina atu o meaai, lavalava, ma isi sapalai.
Sa mātauina e nisi o uso o le Aualofa i Siamani le toatele o tamaitai Afakani sa faaaogaina ofutino o a latou tane e ufiufi ai o latou ulu nai lo o a latou ufi ulu masani, ua leiloloa pe faaleagaina i le vevesi i le malaevaalele. Sa potopoto nei tuafafine o le Aualofa e sui ni ofu Mosalemi masani mo nei tamaitai e lē tagolima—ua faaalia ai le agalelei ma le faaaloalo mo isi, ae tuuese o latou eseesega i talitonuga.
Na saunoa Sister Sharon Eubank, le faatonu o Auaunaga alofa a le Au Paia o Aso e Gata Ai, “O a tatou taumafaiga taitoatasi e lē manaomia ai se tupe po o ni nofoaga mamao; latou te manaomia le taitaiga a le Agaga Paia ma se loto naunautai e fai atu i le Alii, ‘O A‘u lenei; auina atu a’u’ [Isaia 6:8].”1
O le manao e auauna atu pe a oo mai faalavelave faafuasei o le mafuaaga lea e masani ai ona avea le Ekalesia ma se tasi o vaega muamua e tali atu—e lē gata mo se toomaga lē tumau ae faapena foi le fesoasoani atu mo se taimi umi. O le galuega a tagata o le Ekalesia ma faifeautalai e fesoasoani ia i latou e le tagolima e lagonaina le saogalemu, maua le tausiga faaletino ma faalemafaufau, ma lagona le alofa o le Atua e ala i le agalelei o isi.
A O I Fea Le Toaiva? saunia e Liz Lemon Swindle, e lē mafai ona kopiina
Valaauina i le Galuega
O loo faapea mai leMataupu Faavae ma Feagaiga 4:3 , “Afai ua ia te outou le manao e auauna atu i le Atua ua valaaulia outou i le galuega.” Faatasi ai ma mea uma e faia e le Ekalesia, e tele auala e auauna atu ai.
O le tele o taumafaiga faatulagaina a le Ekalesia e fesoasoani ai ia i latou e lē tagolima e na o le auaunaga lava a faifeautalai ma tagata o le ekalesia e mafai ai. E lē o tagata uma e mafai ona tausia se aiga sulufai, tuuina atu mea e manaomia faaletino e isi, pe tuu mea uma e fesoasoani ai i se faalavelave. Ae e tofu tagata uma ma se vaega e faatino, ma o saofaga a tagata uma e lagonaina ma faatāuaina.
O se tasi o auala sili ona tāua e tuuina atu e tagata o le ekalesia i lenei galuega e ala lea i taulaga anapogi ma foai agaalofa. O nei foai paia e faaaoga e fesoasoani ai ia i latou e sili ona manaomia le fesoasoani ma faia ai se aafiaga loloto i olaga o i latou o ē o loo fesoasoani i ai. E mafai e tagata o le Ekalesia ona auauna atu i misiona fesoasoani alofa, faatautaia kosi o le ola tutoatasi, ma volenitia i se faleteuoloa a epikopo ma faleoloa o le Deseret Industries. E mafai foi ona e tausia i latou e lē tagolima e ala i auaunaga i le lotoifale, foai o le toto, tofiga faaleauaunaga, tatalo, ma isi.
Ua valaauina i tatou uma i le galuega. Ua valaauina i tatou e mulimuli i le faataitaiga a Iesu Keriso ma ia alolofa i le Atua ma alolofa i o tatou tuaoi. Pau lava le mea tatou te manaomia o se loto naunautai.