Autalavou Matutua
O Ni Fautuaga mo le Feagai ai ma se Lumanai Taufaafefe ma le Lē Mautonu
I lo’u olaga patino ma faalegaluega, sa ou feagai ai ma le tele o le lē mautonu ma aoaoina le auala e mafai ai e le Tama Faalelagi ona fesoasoani ia i tatou i lena mea.
A o o’u laitiiti, sa malaga mai lo’u aiga mai Toga i le Iunaite Setete. O lo’u tamā o se tagata fusu i le taimi sa matou nonofo ai i Toga, ma sa amata ona ia aoaoina a’u e fusu ina ua matou taunuu i Amerika. O lana fuafuaga autu o le a avea a’u ma siamupini o paga mamafa o le lalolagi i se aso. Sa ia aoaoina a’u ia aua ne’i o’u fefe. E lē tatau ona e fefe i totonu o le maea fusu pe afai e te manao ia manuia. Atonu e le’i toaga lo’u tamā i le Lotu i lena taimi, ae sa ia aoaoina a’u i le tele o mea e uiga i le feagai ai ma faigata ma le i ai o le lototele i le feagai ai ma le fefe.
O le aoaoina e fusu na saunia tulagaese ai a’u mo la’u galuega. Sa ou alu i le Iunivesite o Polika Iaga i se sikolasipi lakapi. Ma e oo lava i le faatinoina o mea e manatu i ai le toatele o tagata atonu o se mea e sili ona taufaafefe e fai i se malae lakapi—sapoina o se polo—sa ou faia i taimi uma ma le toafimalie. Ou te le’i fefe lava. O le mea moni, sa ou fiafia i le luitau o le lakapi.
Sa faamoemoe lo’u tamā o le a i ai sa’u matata faapolofesa i taaloga—na i’u ina i ai i le lakapi, ae lē o le fusu. Ae ou te manatu o la’u aoaoga faamasani na fesoasoani ia te a’u e maua ai le faatuatua ma ia tulimatai atu i luma ma le faatuatua ma le faamoemoe i le lē mautonu.
Ua patipatia e le tamā o Vai le sikoa a lona atalii i luga o le malae.
Ata na pu’eina e Mark Philbrick / BYU BYU © Photo
I le avea ai ma talavou matutua, tou te feagai ma le tele o mea faigata ma taufaafefe—faafitauli faaletagata lava ia e pei o faaiuga e uiga i aoaoga, galuega, faaipoipoga, ma aiga. Ma e te feagai foi ma faafitauli lautele, e pei o faafitauli tau i le tamaoaiga, faaosoosoga faaagafesootai, vevesi faaupufai, ma e oo lava i taua. Ae mai lo’u lava aafiaga i le olaga, ou te iloa a tatou filifili e faamuamua le Alii i o tatou olaga, o loo i ai pea o Ia iina e taiala i tatou i nā mea uma.
O Le Faatosinaga a Uo Lelei ma Tagata Lelei
Sa faamanuiaina a’u i le i ai o ni uo lelei ina ua ou taunuu i le fale mai la’u misiona. O se uo sa ou feiloai i ai i le nofoaga autu mo le aoaoina o faifeautalai na faailoa atu a’u i le tamaitai na mulimuli ane avea ma o’u toalua. Ou te le’i mafaufauina lava le moni o lenei mea e faapea e masani ona filimaoti e au uo lou manuia po o le toilalo i le olaga. E mafai e au uo ma faufautua ona fesoasoani ia te oe i le faia o filifiliga o le a taitai atu ai oe ia latalata atili atu po o le mamao ese mai le Atua.
A o o’u i ai i le Lakapi Liki a le Malo, sa ou tepa taulai atu ia Gifford Nielsen, o lē sa taalo foi mo le BYU a o le’i alu i le NFL, na i’u lava ina avea ma se tagata e faasalalauina taaloga ma mulimuli ane avea o se Fitugafulu o le Pulega Aoao. Sa ou fetaui ia te ia i se tasi aso i se malae tapolo, ma sa ia tuuina mai ia te a’u se fautuaga na suia ai le ala o la’u matata faalegaluega.
Sa ma saofafai i se taavale tapolo, na o a’u ma ia, ma ina ua uma ona ou ta’u atu ia te ia e uiga i la’u fuafuaga e faigaluega faasalalau e pei o ia pe a uma a’u taaloga lakapi, sa ia tuuina mai ia te a’u se fautuaga ia aua ne’i faaauauina le sailia o se galuega o le a manaomia ai ona ou i ai i taaloga i Aso Sa. O lena auala, o le a mafai ai lava ona ou maua se valaauga i Aso Sa ma auauna atu i le Ekalesia.
O le faigofie lena, ae o se fautuaga sa ou lē manatu i ai. Ma o lena mea na suia ai le ala o lo’u olaga.
Tu Atu mo le Mea ua e Talitonu i Ai
O le tele o le taimi o la’u galuega i le NFL sa taufaafefe ma lē mautonu. E na o le 2 pasene o tagata taaalo lakapi a le kolisi e oo atu i le NFL, ma e tusa lava pe na ou au i le ‘au, sa mafai lava ona faamalolo a’u i soo se taimi. I le i ai pea iina i le umi na ou mafaia ona i ai ile ’au o se faamanuiaga maoae, ae o le ola ai e aunoa ma se isi fuafuaga e toe tua i ai sa faigata. Sa manaomia ai le tele o le faatuatua.
I le NFL, e te sau mai lea ‘au i lea ‘au, i lea tausaga i lea tausaga, femalagaai solo i le atunuu. E foliga manaia, ae o le toatele o tagata e lē o iloa vaega e lē manaia. O se ala faigata e ola ai. Ma o se auala faigata mo ulugalii e ola ai foi; o se tasi lena o mafuaaga ua maualuga ai le faitau aofai o faaipoipoga ua tatala i le va o tagata afeleti faapolofesa.
O le mea na fesoasoani o lo’u iloa lea o le mea sa ou tu ai. Sa i ai so’u faavae mautu ia Keriso, ma sa ou faia pea na mea uma na o’u latalata atu ai ia te Ia ma le Tama Faalelagi.
Atonu e te lē o feagai ma se galuega lea e tumu i le tele o uunaiga ma faaosoosoga, ae i lo’u tulaga, o le avea ai ma se tagata taalo faapolofesa na ou iloa ai se olaga e matuā ese lava nai lo le mea sa ou masani ai. Mo se faataitaiga, ina ua matou taunuu i aai tetele ma malaga atu i le amataga, sa vave lava ona mananao tagata o la’u au e o atu ma auai i gaoioiga eseese sa le’i ōgatusa ma tulaga faatonuina o le talalelei, ma sa ou iloaina i lena lava taimi e lē mafai ona ou ola i aganuu uma e lua a Siona ma Papelonia. Sa lē mafai ona ou tali atu “se’i o’u mafaufau i ai” ina ia faamalieina i latou. Nai lo lena, sa manaomia ona ou mausali i lo’u faatuatua ma faamatala pe aisea na lē mafai ai ona ou auai faatasi ma i latou.
Vai ma lona faletua, o Keala, i le aso o le la faaipoipoga
Ata o le aiga mai faaaloaloga a le tusitala
Sa faamanuiaina a’u ona sa ou faaipoipo a o o’u i ai i le kolisi. Ina ua ou alu i le NFL, sa matou faatasi ma lo’u toalua ma le ma pepe e ono masina le matua. Sa ma faaipoipo i le malumalu, ma sa ou iloa le uiga o nā feagaiga ia te a’u ma mea latou te manaomia mai ia te a’u. O lea ou te fai atu ai i tagata o la’u ‘au, “Leai, ou te lē faia lena mea.” Ma pe a latou tauanau mai, ou te faapea atu, “Sa ma faaipoipo ma lo’u toalua i le maota o le Alii lea na ma osia ai feagaiga paia. O na feagaiga e sili atu ona tāua ia te a’u nai lo se isi lava mea.”
Ma o le mea e ese ai, o le taimi na latou fesili mai ai ia te a’u na fesili ma sa latou matua’i mautinoa lava e uiga i le ituaiga tagata sa ou i ai, sa amata e na lava tagata o le ‘au ona puipuia a’u ma faaaloalogia o’u tulaga faatonuina ma feagaiga. E manaomia le lototele e tu atu ai mo mea ua e talitonu ma faapelepele i ai.
O le feagai ai ma le tele o faaosoosoga sa taufaafefe i le amataga, ae o le faalagolago i le Tama Faalelagi ma le manatuaina o le paia ma le uiga o a’u feagaiga i le faafesaga’i ai ma uunaiga sa fesoasoani pea ia te a’u e tu mausali ai i luga o le ala o feagaiga i la’u galuega. E mafai ona e faia lea lava mea e tasi i soo se tulaga e te oo i ai i le āluga o lau malaga.
Mulimuli i le Perofeta
Ou te iloa i le avea ai ma talavou matutua i aso nei o loo outou feagai ma le tele o le lē mautonu ma le fefe e uiga i le lumanai. Ma atonu e te mafaufau po o le a le mea e fai ma pe faapefea ona e sao mai ai. O le tali faigofie o le mulimuli lea i le taitaiga a le perofeta, o Peresitene Russell M. Nelson. A saunoa se perofeta a le Atua ma tuuina atu ia te oe se mea patino, e faigofie lava e pei lava o le mulimuli i lena fautuaga.
Ua ou mātauina e fiafia Peresitene Nelson e ofoina atu ni lisi faigofie o mea e mafai ona tatou faia e tutū mausali ai i lo tatou faatuatua. I ni nai tausaga ua mavae atu, sa ia tuuina atu ai i tagata o le Ekalesia ni mea se lima e fai e faateleina ai lo tatou faatuatua, o auala e lima e faateleina ai le maualuga faaleagaga, o mea e tolu e tatau ona e faia a o e amataina le tausaga fou, ma isi mea.
Na te lē tuuina mai se lisi o ni mea se tele. Na o mea faigofie lava. Ma afai e te faia na mea faigofie ma ia mautu, o le a suia lou olaga e ala i le faia o mea aupito faigofie. O lou faavae o le faatuatua o le a tu mausali, e tusa lava pe i ai ni tulaga taufaafefe i le lalolagi. Fai na mea ma o le a lelei mea uma mo oe. O le a puipuia oe.
E faamanatu mai ai ia te a’u le tala i le Feagaiga Tuai o Naamanu, le taitai o vaegaau sa lepela. Sa alu o ia ia Elisaia, le perofeta, lea na fai atu ia te ia e alu e fufui faafitu o ia lava i le Vaitafe o Ioritana. Sa manatu le taitai o le vaegaau o se mea faavalevalea, ae sa faamalosiauina o ia e tagata sa siomia o ia o le taitai au e tau lava o le alu e fai. Ma sa ia te ia le faatuatua e alu ai e fai—o se mea e matuā faigofie lava. Ma sa faamamaina o ia. (Tagai i le 2 Tupu 5:1–15.)
O le aiga o Elder Sikahema
Tuu Lou Lumanai i Aao o le Tama Faalelagi
Ia, atonu ou te le’i avea ma se tagata fusu faapolofesa, ae sa ou aoaoina ni nai mea e uiga i le feagai ai ma le fefe. I faaiuga ma luitau uma o loo feagai ma oe i le taimi nei o se talavou matua, ou te aioi atu ia te outou ia faia mea uma e mafai ona e faia e saili ai ma faatumauina le uunaiga a le Agaga ia te oe i taimi uma. O le ki lena. E pei ona aoao mai talu ai nei e Peresitene Nelson: O le malosiaga faaleagaga lelei o le a faatumauina lo tatou agai i luma i le lotolotoi o le fefe ma le lē mautonu ua mafua mai ona o le faama’i oti, sunami, maugamu, ma fetaua’iga faafitafita. O le malosiaga faaleagaga e mafai ona fesoasoani ia i tatou ia tetee atu i osofaiga leaga ma fouvale a le fili ma taofia ana taumafaiga e faatama’ia lo tatou faavae patino faaleagaga.”1
A o o’u laitiiti ma feagai ma le tulaga moni o le siitia atu i se atunuu fou o se tagata malaga, sa lē mafai ona ou vaai faalemafaufau i se olaga e saoloto mai i le lē mautonu. A o faaauau pea ona ou feagai ma le lē mautonu i lo’u olaga atoa ma la’u galuega, ua ou aoaoina ai o le avea ma soo o Keriso, e mafai ona tatou feagai ma soo se popolega po o faafitauli i o tatou ala.
A o e siomia oe lava i tagata lelei, faatulaga ma tu atu mo ou talitonuga, ma mulimuli i le perofeta, o le a foliga mai e lē taufaafefe le lumanai. Ma o le a mafai ona e agai i luma ma le faatuatua e ui i le fefe po o le lē mautonu. A e tuuina lou lumanai i aao o lo tatou Tama Faalelagi alofa, e mafai ona e faatuatuaina o le a i ai pea o Ia iina mo oe.