E Na’o Tusiga Faatekinolosi
O Poloaiga—o se Faatanoa Matagofie o Valaaulia ma Faamanuiaga
Sa ou manao e faia mea uma e finagalo ai le Alii, ae sa ou mafaufau pe mafai faapefea ona ou faaofiina uma i la’u faatulagaga.
I Lana galuega atoa i le olaga nei, sa valaaulia ai e le Alii ia tagata e lafoai mea uma sa tatau ona latou lafoai ina ia mulimuli ai ia te Ia (tagai, mo se faataitaiga, Mataio 8:18–22; Mareko 3:31–35; Mareko 10:17–22).
E ui atonu e le talosagaina i tatou e tuua vaa fagota po o a tatou oa uma, ae lua ni auala atonu e talosagaina ai i tatou e avatu ia te Ia a tatou mea uma, e ala lea i o tatou taimi ma le usiusitai.1
Faatasi ai ma gaoioiga uma i a tatou lisi o mea e fai i aso taitasi, atonu e lagona ai le lofituina i le faia o mea uma ua valaaulia i tatou e le Alii ma Ana perofeta e fai. Mo se faataitaiga:
-
Ia faia se tatalo anoa, e le faatopetopeina
-
Suesue le Tusi a Mamona i aso taitasi
-
Suesue le Sau, Mulimuli Mai ia te A’u i vaiaso taitasi
-
Auai soo i le malumalu (i nofoaga e mafai ona maua ai)
-
Sailiili ma fausia a tatou gafa o talafaasolopito o aiga ma faatino sauniga mo galuega sui
-
Faasoa atu le talalelei
-
Auauna atu
-
Auai i le afiafi faaleaiga
-
Api Talaaga
-
Auauna atu i valaauga, i o tatou aiga, ma i le nuu
-
Talia valaaulia mo suesuega i autu mai taitai o le Ekalesia (mo se faataitaiga, le valaaulia a Peresitene Nelson e suesue fuaiupu uma o mau e uiga i le Faaola2 pe suesue e uiga i le mana o le perisitua a le Atua3)
-
Ma isi lava mea
A o faapaleniina le aiga, faauoga, tiutetauave i le fale, galuega, fuafuaga faatulagaina a tamaiti, ma isi mea e fiafia i ai, atonu e lagona ai le taufaafefe po o le le mafai ona faia o mea uma o i luga. Sa ou i ai muamua iina, ma o nisi taimi o lena popolega e sau pea lava i lou mafaufau. Ae ua ese nei la’u vaai i lenei manatu ona o uunaiga sa ou mauaina i tausaga ua mavae.
I se tasi taimi ina ua ou tatalo e uiga i le auala e mafai ona ou mulimuli atili ai i le Faaola, sa faamanatu mai ia te a’u e mafai ona ou faia faatinoga o loo i luga atu ma le faamaoni sili atu. E ui ina sa ou matuai faiasooa nisi o ia mea, o isi mea sa foliga mai na faataamilomilo i totonu o avanoa i a’u fuafuaga faatulagaina.
Faatasi ai ma musumusuga e taumafai malosi ia faifaisoo na meauma, sa faamanatu mai ai foi ia te au ni savali faaperofeta se lua:
-
(1 Nifae 3:7: “Ou te alu atu ma fai ia mea ua poloaiina e le Atua, aua ua ou iloa, e le aumai e le Atua ni poloaiga i le fanauga a tagata, sei iloga Na te saunia le ala mo i latou ia mafai ai e latou ona fai le mea ua Ia poloaiina ai i latou.”
-
Ina ua saunoa Peresitene Henry B. Eyring, Fesoasoani Lua i le Au Peresitene Sili, i le konafesi aoao e uiga i le tusiaina i lalo o faamaoniga o le aao o le Alii i le olaga o lona aiga i aso taitasi, sa ia saunoa mai: “Sa ou tusia i lalo ni nai laina i aso taitasi mo le tele o tausaga. Ou te lei misia lava se aso tusa lava po o le a lo’u lelavā, po o le a foi le vave ou te usua’i ai i le taeao e sosoo ai.”4
Sa ou filifili e tuu atu lo’u faalagolago i upu a Nifae ma manatua o le a le tuuina mai e le Alii ia te a’u se poloaiga (po o se tuufaatasiga o na poloaiga) o le a Ia le fesoasoani mai ia te a’u e tausia. Ma sa musuia foi a’u i le tautinoga a Peresitene Eyring e usitai ma le faamaoni i le valaaulia e [tusitusi] i se apitalaaga i aso taitasi e tusa lava pe sa ia lagonaina le lelavā tele e faia. Afai, faatasi ai ma ana fuafuaga pisi, e mafai ona ia tumau i le usiusitai pe a lelavā, ona ou iloa lea e mafai foi ona ou faia.
O lea sa ou filifili ai e tuu atili le faatuatua i le tomai o le Alii e fesoasoani mai ia te a’u e faataunuu mea uma ua Ia valaaulia a’u e fai. Sa ou tatalo i le Tama Faalelagi ma sa ou saili foi e “filifili faatasi ma le Alii” (Alema 37:37) ia iloa le taimi talafeagai po o le faisoo e tatau ona ou tuuto atu i valaaulia ma poloaiga taitasi. Sa ou iloa o nisi o le a faigofie ona ausia aua ua avea i latou ma se vaega o lo’u avea ai ma soo i aso taitasi. Ma sa ou faailoa atu foi atonu o le a le mafai ona ou faia ni gaoioiga, e pei o talafaasolopito o aiga, mo le umi e mafai ai e isi tagata. Ae sa ou iloaina e mafai ona oufaia e le aunoa semea. Sa ou talitonuina foi e faapea, i nei tulaga, e pei ona folafola mai e Russell M. Nelson, “e fiafia le Alii i taumafaiga.”5 Sa ou iloa Na te faatauaina foi tupe iti a le fafine ua oti lana tane (tagai Luka 21:1–4) ma soo se mea sa mafai ona ou tuuina atu. Aua, e mafai e i tatou taitoatasi ona tuuina atu ni taulaga eseese i taimi eseese i o tatou olaga po o aso taitasi po o vaiaso.
Ina ua uma ona tuufaatasia ma le agaga tatalo se fuafuaga e uiga i le auala e faataunuu ai mea ou te lei faia e le aunoa i le mea e mafai ona ou faia ai, sa ou tatalo mo le fesoasoani faalelagi ma le malosi e faatino ai lena fuafuaga. Sa ou faalagolago foi i le folafolaga mai ia Peresitene Ezra Taft Benson (1899–1994) ina ua ia fautua mai:
“Pe a tatou faamuamua le Atua, o le a tatitia mea uma i o latou tulaga e tatau ai pe aveesea foi mai o tatou olaga. O lo tatou alofa i le Alii o le a pulea ai mea o loo manaomia mai lo tatou alolofa, o mea o loo manaomia mai ai o tatou taimi, o mea tatou te fiafia i ai o loo tatou tulituliloaina, ma le faatulagaga o a tatou mea e faamuamua.
“E tatau ona tatou tuu le Atua e faamuamua i loisi tagata uma lavai o tatou olaga.”6
Sa ou filifili e faamuamua le Alii i a’u fuafuaga faatulagaina, i a’u faatinoga, ma i lo’u loto ma ia tuua la’u “upega fagota” faafaatusa ma faapaiaina lelei lo’u olaga ia te Ia.
Pe o lona uiga la o le faia o mea faaleagaga i le 24 itula i le aso? E le o le lagona o le faaaluina o minute uma e faitau ai tusitusiga paia po o le faia o talafaasolopito o aiga. Ae o lona uiga o le valaaulia ma le loto i ai o le Tama Faalelagi ma Iesu Keriso i vaega taitasi o lo’u aso. I le liliu atu o lo’u loto ia i La’ua i lena ala, sa faamanatu mai ai ia te a’u o mea uma faaletino e faaleagaga foi (tagai Mataupu Faavae ma Feagaiga 29:34–35) ma e mafai ona avea le Alii ma a’u taulaiga i a’u galuega uma (tagai Alema 34:17–27). Ma o lona uiga o le tumau i le taulai atu i mea e sili ona taua a o ou taumafai ia avea atili ma se soo faamoemoeina.
O suiga laiti na amata ona faia se eseesega ma maua ai se ala i le faaleleia atili o le usiusitai. Afai sa ou i ai i la’u telefoni mo ni nai minute i le taeao, e mafai ona ou faaaogaina lena taimi i le polokalama o le Gafa o le Aiga a le FamilySearch nai lo le faasolo soo i luga o ala o faasalalauga faaagafesootai. A o ou faatalitali i se laina, e mafai ona ou faia se valaau faatopetope, auina atu se tesi e auauna atu ai i se uo, pe talanoa i se tasi e latalata mai ia te a’u.7 Sa ou faaiuina le aso i la’u api talaaga nai lo faafiafiaga. Sa ou ala a’e ma se taulaiga sili atu ma se faasologa o aso taitasi e faamuamua ai suesuega faaleagaga a o lei tulai mai isi mea faalavefau o le aso. Sa ou mulimuli i le fautuaga a Peresitene Nelson ia “faia e le aunoa se taimi faatulagaina ma le Alii—ia i ai i totonu o Lona maota paia—ona tausia lea o lena taimi faatulagaina ma le atoatoa ma le olioli.”8 Sa oo ina ou nofouta i taimi o le a masani ona faalavelaveina ai a’u i mea lelei ae taumafai e faaaoga lena taimi mo mea e sili ona lelei.9
Ma e te silafia oe? Sa mafai ona ou ofi mea uma i la’u faatulagaga ma maua pea le taimi e olioli ai i isi mea. O le matematika o lo’u taimi na foliga mai o se mea faavalevalea, ae sa ou iloaina o se tasi lea o auala e faatino ai e le Alii ia vavega i o matou olaga e le mafai ona matou faamatalaina.
E pei ona aoao mai Sister Michelle D. Craig, Fesoasoani Lua i le Au Peresitene Aoao o Tamaitai Talavou: “E mafai e oe ma a’u ona tuuina atu mea ua tatou maua ia Keriso, ma o le a Ia faateleina a tatou taumafaiga. O mea e te ofoina atu ua lava ma totoe—e tusa po o a ou faaletonu ma vaivaiga faaletagata—pe afai e te faalagolago i le alofa tunoa o le Atua.”10 Sa ou lagonaina (ma faaauau pea ona lagona) ua faataunuuina lena folafolaga i lo’u olaga, ma ua ou iloa o la’u fuafuaga faatulagaina e moni lava etau lefaigata, e le sili atu, pe a ou saili e faia mea uma e poloai mai ai le Alii. Ua ou iloa o poloaiga ma valaaulia a le Alii e aumaia le oa sili atu i lo’u olaga nai lo se isi lava mea.
E ui sa le tatau ona ou ofo i le mea na amata ona tupu a o o’u faatinoina ma le faatuatua faafouina ma oo i vavega ia na mafai ai ona faia mea uma ua poloai mai ai le Alii, ae o loo ou maofa pea i le ala na fesoasoani mai ai le Tama Faalelagi ma Iesu Keriso ia te a’u e faataunuu mea sa foliga mai muamua e le mafai ona ou faia (tagai Luka 1:37). Sa le gata ina “saunia e le Alii se ala mo [a’u] ina ia mafai ai e [a’u] ona faataunuuina o le mea ua ia poloaiina ai a’u” ae o le olioli faateleina ma le faamalieina na oo mai i lo’u olaga sa sili atu nai lo le mea sa mafai ona ou faamoemoeina. Ma sa amata ona ou iloaina o nei taumafaiga e sili atu ona faatatau i le po o ai ua avea ai a’u nai lo le mea o loo ou faia.11 O se vaega tele o lenaaveainana taitai atu ai a’u e vaai ua faalatalata atili atu lo’u loto i le Tama Faalelagi ma Iesu Keriso ma fesoasoani ia te a’u ia avea atili e faapei o i La’ua.
Na saunoa Elder D. Todd Christofferson o le Korama a Aposetolo e Toasefululua i se tasi taimi, “E i ai taimi e fenumiai ai nisi tagata, ma manatu o poloaiga o ni tapulaa po o ni tapulaa e faafaigata ai le olaga, lea e aveesea ai avanoa po o le fiafia po o fiafiaga o le olaga. O le mea moni, o poloaiga e puipuia i tatou ma taialaina i tatou i le fiafia. E le tatau ona faatapulaaina ae ia mafai ona faia—ia faatagaina i tatou e ausia i lenei olaga ma le olaga a sau—o mea tatou te mananao moni i ai ma mea e finagalo ai lo tatou Tama Faalelagi, o le e alofa ia i tatou, mo i tatou.
“… O lea … faamolemole aua le faitio e uiga i poloaiga. Aua le fai atu, ‘Ou te le toe manao i ni isi poloaiaga,’ ae nai lo lena ia fai atu, ‘Ioe, toe aumai, ma aumai. Ou te fia alualu i luma. Ou te fia maua le fiafia. Ou te manao ia avea e pei o lo’u Tama Faalelagi. Ma ua faaali mai e poloaiga ia te a‘u le ala e faia ai. Latou te tatalaina le ala i o’u luma.’”12
A o o’u faia ma le faamaoni le mea sili ou te mafaia e usitaia ai valaaulia faaperofeta taitasi, o le fesoasoani lea ia te a’u e ola atili ai i luga o le ala o feagaiga ma avea atili ai e faapei o lo’u Faaola, o le ua tuuina mai la tatou faataitaiga atoatoa o le usiusitai i mea uma e poloai mai ai le Tama ia te Ia. I le aluga o le ala, ua ou iloa ai o le faamuamuaina o nei poloaiga ma valaaulia faaperofeta e le faatatau i le ausiaina o aitema i luga o se lisi o mea e fai ae e uiga i se auala e ola ai e fesoasoani ia te a’u ia tuputupu a’e. Ou te vaai atu ia i latou o ni avanoa e faamamalu ai a’u feagaiga o le malumalu a o o’u faapaiaina lo’u lotoma la’u faatulagagai le Alii o se faailoga o lo’u alofa mo Ia ma le manao ia avea e faapei o Ia. A o o’u saili e faamamalu na feagaiga, sa ou lagonaina le moni o le mauaina o le “mana e faia ai mea uma e finagalo le Atua [ou te] faia.”13
Ou te fia vaai faalemafaufau nei i valaaulia taitasi mai le Atua o se faatanoa o le olioli ma faamanuiaga o loo faatalitali mai mo i tatou pe afai tatou te filifili e ulu atu i vai. E finagalo le Tama Faalelagi e faamanuia i tatou i talaatu o lo tatou malamalama, ma Ua Ia tuuina mai ia i tatou poloaiga ia e mafai ai ona oo mai na faamanuiaga e ala i lo tatou usiusitai (tagai Mataupu Faavae ma Feagaiga 130:20–21). Tau lava o lo tatou filifili e faalagolago ia te Ia ma Lona tomai e fesoasoani ai ia i tatou e tausia Ana poloaiga uma. Pe a tuuina atu o tatou loto, lima, ma taimi ia te Ia, o le a tatou vaai ia te Ia o faia vavega i o tatou olaga.