“Mītia Fakasōsialé: Ko e Hā ʻOkú Ke Vahevahé?,” Liahona, ʻEpeleli 2023.
Kakai Lalahi Kei Talavoú
Mītia Fakasōsialé: Ko e Hā ʻOkú Ke Vahevahé?
Te tau lava ʻo fakaʻaongaʻi e mītia fakasōsialé ko ha faingamālie ke fakamoʻoniʻi ai ʻe he niʻihi kehé e fiefia ʻoku maʻu mei he ongoongoleleí.
Ta fakatātaaʻi ʻe David Green
Ko e hā ʻokú ke vahevahe ʻi he mītia fakasōsialé? ʻOkú ke vahevahe nai ʻa e meʻa ʻokú ne ʻomi kiate koe ʻa e fiefiá? ʻOkú ke fakamatala nai ki hoʻo ngaahi aʻusia ʻi he moʻuí? ʻOkú ke fekumi nai ki he manakoá mo e fakahikihikí? Kae mahuʻinga tahá, ʻokú ke fakamatala nai fekauʻaki mo e ongoongolelei ʻo Sīsū Kalaisí?
Naʻe hoko ʻeku vahevahe ʻa e ongoongoleleí ʻi heʻeku ngāue fakafaifekaú ko ha aʻusia fakafiefia moʻoni kiate au pea naʻá ku loto ai ke hokohoko atu ʻeku fai ia hili ʻeku foki ki Peluú. Ka naʻe ʻikai fuoloa kuó u fakatokangaʻi naʻe ʻikai ke u maʻu ʻa e taimi naʻe fiemaʻu ke u tokoni ai ki he kakai kotoa naʻá ku loto ki aí, ʻo hangē ko ia ne u fai ʻi heʻeku ngāue fakafaifekaú.
Ko ia naʻá ku tafoki leva ki he mītia fakasōsialé.
Naʻá ku faʻu ha blog ke vahevahe ʻeku aʻusia ʻi he ngāue fakafaifekaú, ko ʻeku ngaahi fakakaukau mei heʻeku ako fakauike ʻo e Haʻu, ʻo Muimui ʻIate Aú, mo e ngaahi ʻilo kehe fekauʻaki mo e ongoongoleleí mo e niʻihi kehé. Pea ʻi heʻeku vahevahe ʻeku blog, naʻe kamata ke u maʻu ha ngaahi pōpoaki fakaʻofoʻofa mei hoku ngaahi kaungāmeʻá ʻo fakamālō mai ʻi heʻeku vahevahé. Naʻe ʻikai ke u ʻamanaki ki ai! Peá u fakakaukau leva: “Ko e hā ʻoku ʻikai ke u fai ai ha meʻa lahi ange ʻi he mītia fakasōsialé?” Pea ko e founga ia ne kamata ai hoku hala ki hono faʻu ha feituʻu vahevahe ʻo e ongoongoleleí ʻi he Instagram mo e YouTube.
Ko e Fakapulipuli ki he Ngāue Fakafaifekau ʻi he Mītia Fakasōsialé
ʻOku ʻikai fiemaʻu ke faingataʻa hono vahevahe hoʻo tuí ʻi he mītia fakasōsialé, ka ko e taimi ʻe niʻihi ʻoku tau ongoʻi manavasiʻi koeʻuhí ʻe lava ke fakafonu ʻa e mītia fakasōsialé ʻaki ʻa e loto-fakamāú, ngaahi fakakaukau fakamāmaní, mo e ngaahi fakamatala fakangalingalí. Ko e taimi ʻe niʻihi ʻoku tau ongoʻi ko e feituʻu fakamuimuitaha ia ke tau vahevahe ai ʻetau tuí. Ka ko hono moʻoní, ʻoku tuʻunga ʻi he fonu ʻa e mītia fakasōsialé ʻi he ngaahi talanoa faʻufaʻu mo loi lahí ʻa e fiemaʻu ko ia ke tau vahevahe ʻa e fiefia mo e nonga mo e moʻoni ʻoku tau maʻú ʻi heʻetau hoko ko e kau ākonga ʻo Sīsū Kalaisí.
ʻOku faʻa fehuʻi mai kiate au: “ʻʻAli, ko e hā ʻokú ne fakaʻaiʻai koe ke vahevahe e ongoongoleleí ʻi he mītia fakasōsialé? Ko e hā ʻa e fakapulipuli ki hono vahevahe fiemālie ia mo fakafekauʻaki ki he moʻui fakaʻahó?” Pea ʻoku tatau maʻu pē ʻeku talí: “ʻOku ʻikai ha fakapulipuli! Ko e meʻa mahuʻingá ko e moʻui ʻaki e ongoongoleleí pea ʻai ia ke hoko ko ha konga ʻo ʻeku moʻui fakaʻahó.”
Ko e lahi ange ʻeku feinga ke moʻui ʻaki e ongoongoleleí mo fakaloloto ʻeku tuí, ko e lahi ange ia ʻeku fakaʻamu ke vahevahe ia mo e niʻihi kehé. Ko e meʻa ʻokú ne fakaʻaiʻai au ke tuku ha taimi ke vahevahe ʻeku fakamoʻoní mo e niʻihi kehé ʻoku maʻu mei he ngaahi aʻusia fakalaumālie ʻoku ou maʻu mei heʻeku Tamai Hēvaní.
Kuó u ako mei heʻeku ngaahi aʻusiá, kuó u ako ʻoku faingofua tatau pē hono vahevahe ʻo e ongoongoleleí mo hono vahevahe ʻetau ngaahi aʻusia fakaʻaho ʻi heʻetau kau ʻi he tākanga ʻa e Fakamoʻuí. ʻOku ʻikai te u ʻiloʻi maʻu pē pe ʻoku tokoni ki ha taha e meʻa ʻoku ou vahevahé, ka ʻoku ou ʻilo “ʻoku fakahoko ʻe he fanga kiʻi meʻa iiki mo faingofuá ʻa e ngaahi fuʻu meʻa lalahi” (ʻAlamā 37:6).
Ko e Fakaafe ʻa e Fakamoʻuí ke Vahevahe ʻEtau Tuí
ʻOku ʻi ai ha kakai ʻi he māmaní ʻoku nau fekumi ki ha ngaahi fakamanatu pe ko hai kinautolu pea mo e ʻuhinga ʻoku totonu ke nau laka atu ai ki muʻa ʻi he ʻamanaki leleí. Pea ko hai ia te ne lava ʻo vahevahe lelei ange ʻa e ngaahi moʻoni ko ʻení ʻo laka ange ʻiate kitautolú? ʻI heʻetau hoko ko e kau muimui ʻo Kalaisí, ʻoku tau ʻilo ai ki he ngaahi talaʻofa ʻa e ʻOtuá mo e palani fakaʻofoʻofa kuó Ne teuteu maʻa ʻEne fānaú. Manatuʻi, ko e kakai ʻe niʻihi ʻoku “taʻofi ʻa kinautolu mei he moʻoní koeʻuhí he ʻoku ʻikai pē te nau ʻilo ʻa e feituʻu ke ʻiloʻi ai iá” (Tokāteline mo e Ngaahi Fuakava 123:12)—pea te tau lava ʻo tokoni ke nau ʻilo ia.
Hangē ko e lea ʻa ʻEletā Tieta F. ʻUkitofa ʻo e Kōlomu ʻo e Kau ʻAposetolo ʻe Toko Hongofulu Mā Uá:
“Vahevahe tonu hoʻo aʻusiá, ʻi he mītia fakasōsialé, ʻi he ngaahi kulupú, mo e feituʻu kotoa pē.
“Ko e taha ʻo e ngaahi meʻa fakaʻosi naʻe folofola ʻaki ʻe Sīsū ki Heʻene kau ākongá, ko e pau ke nau ō atu ki he funga ʻo e māmaní ʻo vahevahe e talanoa ʻo e Kalaisi kuo toe tuʻú. ʻOku tau tali fiefia foki ʻi he kuongá ni ʻa e fekau maʻongoʻonga ko iá.”1
ʻOku totonu ke fālute ʻe heʻetau hoko ko e kau ākonga ʻa Sīsū Kalaisí hotau ʻulungāngá, ʻo ʻikai ʻi he moʻuí pē ka ʻi he mītia fakasōsialé foki. ʻI heʻetau hiki hake hotau leʻó ke fakahā ʻa e ngaahi moʻoni ʻo e ongoongoleleí, te tau lava ʻo fakahoko ʻa e fatongia maʻongoʻonga kuo fakafalala mai ʻe Sīsū Kalaisi kiate kitautolú.
Tau fakaʻaliʻali ki māmani e founga ʻoku tau tuku ai ha taimi maʻá e ʻEikí he ʻaho takitaha, founga ʻoku tau fehangahangai ai mo hotau ngaahi faingataʻá mo e mamahí, mo e founga ʻoku tau maʻu ai e nongá. ʻOku ou ʻiloʻi ʻi heʻetau vahevahe ʻa e ngaahi meʻa ʻoku mahuʻingá, te tau hoko ai ko ha ngaahi meʻangāue maʻongoʻonga ʻi he toʻukupu ʻo e ʻOtuá ke tānaki ʻa ʻIsilelí.
ʻOku fiemaʻu kitautolu ʻe he Tamai Hēvaní. ʻOua te tau toitoi ʻi hono fakaʻaongaʻi ʻo e naahi meʻangāue fakaʻīlekituloniká ka tau fakaʻaongaʻi ia ke fakafehokotaki mo e niʻihi kehé. Tau hoko ko ha konga ʻo ʻEne ngāué pea tuku atu e fakamatala kiate Ia ʻoku maʻu mei ai e fiefiá—hotau Fakamoʻui, ko Sīsū Kalaisi.