Fakakomipiuta Pē: Kakai Lalahi Kei Talavoú
Ko Hono Toe Langa Hake ʻEku Tuí hili ʻa e Veiveiuá
Ko e taimi naʻe mavahe ai ha taha naʻá ku ʻofa ai mei he Siasí, naʻe ʻikai ke u toe tokanga ki heʻeku fakamoʻoní.
Laʻitā ne maʻu ʻi he angalelei ʻa e tokotaha naʻá ne faʻú
Naʻe teʻeki ke faingataʻa ʻeku tui ki he ongoongolelei ʻo Sīsū Kalaisí kae tālunga mo hono toki talanoa mai ʻe hoku taʻoketé fekauʻaki mo e founga kuo liliu ai ʻene ngaahi fakakaukaú. Naʻá ne maʻu maʻu pē ha tui mālohi, ko ia ʻi heʻeku fanongo ki heʻene ngaahi leá mo vakai naʻe ʻi ai foki mo ha ngaahi kaungāmeʻa kehe naʻa nau mavahé, naʻe kamata ke u fifili pe naʻe moʻoni koā ʻa e ongoongoleleí.
Ko e fuofua taimi ʻeni ke u kamata veiveiua ai ʻi he meʻa naʻá ku tui maʻu pē ki aí, pea naʻá ku ilifia. Naʻe ʻikai ke u fakapapauʻi ʻa e feituʻu ke u tafoki ki aí. Naʻá ku lotu, lau ʻeku folofolá, pea fekumi ki ha fakahinohino, ka naʻá ku ongoʻi naʻe vaivai moʻoni ʻeku tuí.
Ko ha Ui Taʻeʻamanekina
Ne ʻikai fuoloa kuo ʻikai ke u toe maʻu ʻa e ivi tākiekina ʻo e Laumālié. Naʻá ku ongoʻi mamaʻo ʻaupito mei he Fakamoʻuí.
Kae hangē naʻe taʻeʻamanekiná, ne kole mai ke u fokotuʻutuʻu ha konifelenisi YSA maʻá e kakai lalahi kei talavou ʻi he fakahahake ʻo ʻIulopé pea ke u hoko ko ha tokoni ki he KFT.
Naʻá ku fakapapauʻi naʻe fili ʻe heʻeku palesiteni fakasiteikí ʻa e tokotaha hala—naʻá ku ongoʻi taʻefeʻunga fakalaumālie. Te u lava fēfē nai ʻo langaki hake ʻa e niʻihi kehé kae hili ko iá ʻoku ʻikai ke u meimei lava ʻo tokangaekina haʻakú?
Naʻe ʻikai ke u loto ki ai, ka naʻá ku tali noa pē ʻa e uiuiʻí.
Ko e Toe Fakafehokotaki mo ʻEku Tuí
Ne u ako ha meʻa lahi ʻi heʻeku fokotuʻutuʻu ʻa e polokalama langaki ʻo e tui ko ʻení. Ko e meʻa naʻá ku saiʻia taha aí ko e toe fakafehokotaki mo e ngaahi kaungāmeʻa lalahi kei talavou ne nau tokoniʻi au ke u manatuʻi ʻa e tui naʻá ku maʻú kimuʻa peá u faingataʻaʻia ke tuí.
Naʻe fanongo ha ngaahi kaungāmeʻa tokolahi ki heʻeku ngaahi hohaʻá pea nau fakafehuʻia au ʻi he manavaʻofa. Naʻa nau vahevahe mai foki ʻenau tuí mo fakamanatu mai ʻa e lahi hono fakamālohia kinautolu ʻe heʻeku fakamoʻoní ʻi he kuohilí. Naʻa nau fakamanatu mai ʻa e ongo naʻá ku maʻu kimuʻa fekauʻaki mo e ongoongoleleí, pea naʻá ku manatuʻi ha ngaahi aʻusia fakalaumālie mahuʻinga ʻi he kotoa ʻo ʻeku moʻuí.
Naʻá ku fakatokangaʻi, ko e taimi ne u maʻu ai ha ngaahi fehuʻí, naʻá ku fiemaʻu moʻoni ʻa e tui kia Sīsū Kalaisí. Naʻá ku fiemaʻu ke u moʻui ʻaki ʻa e ngaahi fekaú, ʻalu ki he temipalé, ʻalu ki he lotú, pea fakatupulaki mo vahevahe ʻeku fakamoʻoní.
ʻI he taimi naʻá ku faingataʻaʻia aí, naʻe kamata ke u tui naʻe ʻikai ke u fiemaʻu ʻa e ʻOtuá. Ka kuo toe maʻamaʻa ange ʻeku kavengá, pea ʻoku fakafiefia ange hoku halá ʻi heʻeku fakafalala kiate Ia mo toe fakaafeʻi mai Ia ki heʻeku moʻuí.
Manatuʻi Hoʻo Ngaahi Aʻusia Fakalaumālié
Naʻe hoko hono tali ʻa e uiuiʻi ko ʻení ko ha tāpuaki koeʻuhí naʻá ku fakatokangaʻi ʻa e lahi ʻo ʻeku fiemaʻu ʻa e Laumālié ʻi heʻeku moʻuí.
Naʻe lea ʻa ʻEletā Niila L. ʻEnitaseni ʻo e Kōlomu ʻo e Kau ʻAposetolo ʻe Toko Hongofulu Mā Uá, kau ki he mālohi ʻo hono fakamanatu ʻo ʻetau ngaahi aʻusia fakalaumālié mo e founga te tau lava ai ʻo tokoniʻi ʻa kinautolu ʻoku tau ʻofa aí ke nau manatuʻi ʻenau ngaahi aʻusiá. Naʻá ne akonaki mai:
“ʻI he taimi ʻoku fakafeʻātungiaʻi ai hotau hala fonongá ʻe he faingataʻa fakatāutahá, veiveiuá, pe loto-foʻí, … ʻoku hoko ʻa e ngaahi manatu melie fakalaumālie fakangalongataʻa [ko ʻení] ko ha ngaahi maka ulo ʻoku nau fakamaama ʻa e halá, ʻo fakapapauʻi mai ʻoku ʻafioʻi mo ʻofaʻi kitautolu ʻe he ʻOtuá, pea kuó Ne tuku mai Hono ʻAlo ko Sīsū Kalaisí ke tokoniʻi kitautolu ke tau foki ki ʻapi. Pea ʻi he taimi ʻoku ngalo ai ʻi ha taha ʻene ngaahi manatu melie fakangalongataʻá pea hē pe puputuʻú, ʻoku tau tataki kinautolu ki he Fakamoʻuí ʻi heʻetau vahevahe mo kinautolu ʻetau tuí mo e ngaahi manatu melié, ʻo tokoniʻi kinautolu ke nau toe manatu ki he ngaahi momeniti fakalaumālie mahuʻinga ko ia ne nau mataʻikoloa ʻakí.”1
Ko e meʻa tofu pē ʻeni naʻe fai ʻe hoku ngaahi kaungāmeʻá maʻakú, ʻa ia naʻá ne tokoniʻi au foki ke u fai ia maʻaku.
ʻOku ʻai ʻe he māmaní ke faingofua ke ngalo ʻetau ngaahi taumuʻa taʻengatá, fakalakalaká, mo e vā fetuʻutaki mo e ʻOtuá. Ka ʻi he ngaahi taimi ʻo e loto-veiveiuá, te tau lava ʻo tokanga taha ki he ʻuhinga naʻa tau fili ai ke muimui ʻia Sīsū Kalaisí pea manatuʻi hotau ngaahi tāpuaki kuo talaʻofa maí mo Hono toʻukupú ʻi heʻetau moʻuí.
Lau hoʻo tohinoá, vakai ki he ngaahi tā motuʻa ʻo e taimi naʻe fonu ai hoʻo moʻuí ʻi he Laumālié, pea talanoa mo ha ngaahi kaungāmeʻa faivelenga fuoloa. Tokoniʻi ʻa e niʻihi kehé, vahevahe hoʻo fakamoʻoní, pea fakaava ho lotó ki he fakamoʻoni ʻa e niʻihi kehé.
ʻOku teʻeki pē ke u maʻu kotoa ʻa e tali ki heʻeku ngaahi fehuʻí, ka ʻi he taimi ʻoku ou tukunoaʻi ai ʻa e ngaahi leʻo ʻo e māmaní ki he tafaʻakí mo fili ʻa e tui kia Sīsū Kalaisi mo e Tamai Hēvaní,ʻ okú Na ʻomi ʻa e meʻa ʻoku ou fiemaʻú mo tataki au ki he fiefiá.
ʻOku ou ʻiloʻi ʻi he hokohoko atu ʻeku fakalaulauloto ki heʻeku ngaahi aʻusia fakalaumālie ʻi he kuohilí mo feinga ke aʻusia ha ngaahi meʻa foʻoú, te u hokohoko atu hono toe langaki tahataha ʻeku tuí.