Digital Lamang: Mga Young Adult
4 ka Kamatuoran sa Pagtabang Kanimo sa Pagdumala sa Pagka-Young Adult
Ako nakigbisog sa pagka-young adult, apan akong nakat-onan ang upat ka kamatuoran nga mitabang kanako sa pagdumala ngadto niini.
Pagkuha og edukasyon. Pagserbisyo og misyon. Pagminyo. Biyahe sa kalibotan. Pagkuha og karera. Pag-independente sa panalapi. Panganak. Uban sa daghan kaayong importante nga mga desisyon ug mga opinyon sa kinabuhi nga nagtudlo kanato kon sa unsang paagi mahimo nga “hamtong,” [adult] pagkalisod gyud kon unsaon nato pagpakubos ang atong lista sa mga prayoridad?
Uban niining dili maihap nga oportunidad ug ang kasagaran nga kahadlok sa kasamok o mabiyaan, kini masabtan nga daghan kaayong mga young adult ang nakigbisog. Apan ang tubag ngadto sa pagprayoridad sa mga desisyon sa kinabuhi kanunay mao gihapon: duol ngadto ni Jesukristo. Samtang kita nagdumala sa dili matag-an nga mga kausaban sa pagka-young adult, kita makagamit sa mosunod nga upat ka sugyot sa paghupot sa atong mga kinabuhi nga masentro diha ni Kristo.
Pagtuon sa mga Kasulatan kada Adlaw
Adunay kalainan tali sa pagtuon ug sa pagbasa—kana ang naghimo sa tanan nga kalainan! Ngari kanako, ang pagtuon nagpasabot sa mainampuong paagi sa pagbasa nga may katuyoan ug sa pagsisik alang sa paggiya ug sa kaalam.
Si Presidente Thomas S. Monson misentro sa iyang kataposang pakigpulong isip propeta diha sa gahom sa Basahon ni Mormon. Taliwala sa uban nga mga panalangin, misaad siya nga samtang kita nagbasa sa Basahon ni Mormon, maanaa kita “sa posisyon nga makadungog sa tingog sa Espiritu, sa pagbatok sa tintasyon, sa pagbuntog sa pagduhaduha ug kahadlok, ug sa pagdawat sa tabang sa langit sa atong mga kinabuhi.”1
Pinaagi sa pagtuon sa mga kasulatan, ikaw nagpakita sa Dios nga Siya importante. Sama lamang nga kita nagpakaon sa atong mga lawas matag buntag alang sa pisikal nga kalig-on, ang atong mga espiritu nagkinahanglan usab sa inadlaw nga espirituhanong kalig-on. Ang pagbuhat og usa ka batasan sa inadlaw nga pagtuon sa kasulatan mohatag kanato sa espirituhanong sustento nga atong gikinahanglan sa paghupot kanato nga lig-ong nakaangkla diha ni Kristo ug sa pag-abli sa atong mga hunahuna ug mga kasingkasing ngadto sa Espiritu.
Pagbayad sa Ikapulo
Samtang ang sayop nga panan-aw makahimo niini nga kalibotanon, ang kwarta usa ka reyalidad sa kinabuhi. Kini usa ka kaguol alang sa daghang mga young adult. Dili ba nindot kon kita garantiyahan og mga panalangin kon magsakripisyo kita og gamay lamang sa unsay gihatag kanato?
Ah, hulat sa––kita gigarantiyahan!
Si Malaquias diha sa Daang Tugon ug si Jesukristo mismo didto sa Amerika silang duha misaad nga kon kita nagbayad sa atong ikapulo, ang mga bintana sa langit pagaablihan ug ang mga panalangin ibubo (tan-awa sa Malaquias 3:10; tan-awa usab sa 3 Nephi 24:8–10). Ang Dios nahibalo sa atong mga kaguol sa panalapi ug nahibalo nga ang pagpangayo og bahin sa tanan nga atong nadawat ingon og dako. Hinoon, ang bisan unsa pa ang atong mabuhat niana nga 10 porsiyento nga kontribusyon dili maitandi ngadto sa mga panalangin nga ang Dios nag-andam alang kanato, ug kita naglig-on sa atong hugot nga pagtuo sa matag higayon nga atong ihalad ang atong mga ikapulo ngadto sa Ginoo.
Pagbansay og Pasalamat
Ang pagbansay og pasalamat sa tanang maayo ug sa daotan usa ka kahanas nga nagkinahanglan og paningkamot ug pagbansay. Hinoon, ang pasalamat adunay potensyal sa paghimo sa kinabuhi nga walay kataposan nga mas mamaayo! Ang pagpahayag og pasalamat dili lamang nagbale-wala sa tanang negatibo nga bahin sa kinabuhi ug pagpakaaron ingnon nga ang tanan maayo ug hapsay. Hinoon, kini naglakip sa pagkaplag sa mga butang nga pasalamatan bisan pa sa tanan nga negatibo.
Ang mga pagtuon nagpakita nga pipila sa positibo nga mga epekto sa pasalamat naglakip sa kaayohan, lig-on nga mga relasyon, nagtubo nga pagkamalaumon ug kamalipayon, mas lig-on nga pagpugong sa kaugalingon, nagkakunhod nga kaugtas [stress], mas maayong pisikal ug mental nga kahimsog, ug sa kinatibuk-an maayong kinabuhi! Si Presidente Nelson miingon nga ang pagpasalamat “naghatag kanato og mas dakong panglantaw diha sa katuyoan ug kalipay gayod sa kinabuhi.”2
Sa sunod higayon nga kamo adunay pipila ka minuto, pilia ang paghunahuna og lawom kabahin sa unsa kamo kamapasalamaton. Mapinaagi man sa pag-ampo o pagpalandong, ang pasalamat makahatag og kaayohan sa inyong kinabuhi ug magpabilin kanimo nga nakapunting diha sa Manluluwas.
Pagkat-on Pa og Dugang mahitungod ni Jesukristo
Ang akong kataposan nga hunahuna adunay kalabotan uban sa labing epektibo ug mahangturong kausaban nga hitabo nga nahinabo: ang Pag-ula ni Jesukristo.
Ako makatudlo og usa ka higayon atol sa akong misyon nga miusab sa paagi sa akong pagtan-aw sa Pag-ula sa Manluluwas. Kini atol sa usa ka buntag nga pagtuon sa kasulatan sa dihang ang pagkakinahanglanon ug kahalangdon sa Pag-ula ni Kristo sa kalit nakapaamgo kanako og maayo. Dili ako makahinumdom kon unsa ang akong gibasa, apan sa kalit akong nasabtan diha sa lawom nga lebel kon unsa ka tinuod nga walay kahulogan ang tanan sa kinabuhi nga wala si Jesukristo ug ang Iyang Pag-ula.
Kamo makasugod karon pinaagi sa pagbasa ug pagpaminaw ngadto sa mga kasulatan ug mga pulong sa mga propeta mahitungod ni Kristo ug sa Iyang maulaong sakripisyo. Sulayi ang pag-ampo alang sa usa ka lawom nga pagsabot. Ang pagdungan sa pagtuon ug pag-ampo nagdala og mga milagro ug modapit og mas dakong gahom nganha sa inyong kinabuhi. Gibalik-balik ni Presidente Nelson ang pagtambag kanato sa pagbuntog sa kalibotan, nga iyang gipasabot isip “nagtubo sa paghigugma sa Dios ug sa Iyang Hinigugmang Anak labaw pa kay ni bisan kinsa o bisan unsa pa nga butang.”3
Ang pagkat-on pa mahitungod sa atong Manluluwas ug sa Iyang mahangturon nga Pag-ula motabang kanato sa pagbuntog sa kalibotan, sa pagpunting og usab sa atong mga prayoridad, ug sa pag-usab sa paagi nga kita naghunahuna ug naglihok sa matag adlaw. Kini modala kanato nga mas maduol ngadto sa Langitnong Amahan ug ni Jesukristo, ug kita mas maandamon og maayo sa pag-atubang sa daghang mga hagit sa kinabuhi.