Mga Young Adult
Pagpabiling Lig-on Kon ang mga Minahal Mobiya sa Simbahan
Nakugang ko sa dihang ang akong igsoong lalaki mihukom sa pagbiya sa Simbahan, apan nakakita ko og mga paagi nga makapadayon og mahigugmaong relasyon ug sa pagpabilin sa akong kaugalingong pagpamatuod nga lig-on.
Dili pa lang dugay nga nauli ko gikan sa akong misyon sa dihang ang akong mga ginikanan misulti kanako nga ang akong 19 anyos nga igsoong lalaki dili na gusto mosimba. Nakugang ko—wala gayod ako nakahunahuna nga mobiya sa Simbahan ang akong igsoong lalaki.
Nakahinumdom ko nga nag-email kaniya mahitungod sa mga hilisgotan sa ebanghelyo samtang anaa ko sa akong misyon ug nangutana kaniya kon gusto ba siya nga moserbisyo og misyon. Dili gayod siya sigurado, ug sa pagtan-aw og balik niini nga mga email, nakaamgo ko nga aduna nay mga timailhan nga dili siya sigurado bahin sa ebanghelyo.
Nagsugod ko sa paghunahuna mahitungod sa unsay lahi unta nako nga nahimo. Ug mikuwestiyon ko kon nganong nahitabo kini karon. Nasagmuyo ko tungod kay gusto gayod nakong makabaton siya og pagpamatuod alang sa iyang kaugalingong kaayohan, apan nakaamgo usab ako nga tingali gigusto nako kini alang kanako. Gusto nako nga mosimba siya uban kanako, ingon man usab nga moadto og misyon, aron magkaistoryahanay kami mahitungod sa among mga kasinatian. Mao nga mahagiton kini alang kanako sa dihang dili siya gusto sa bisan unsa niadto nga mga butang.
Bag-o lang ko migahin og duha ka tuig sa akong misyon nga naghisgot mahitungod sa relihiyon ug sa mga tinuohan ngadto sa mga tawo, mao nga wala ko makasabot kon nganong lisod kaayo nga makig-istorya sa akong igsoon mahitungod niini nga mga butang, apan lisod gayod kini. Kini mihagit sa akong hugot nga pagtuo sa usa ka bag-o nga paagi. Sa akong misyon, ang hagit mao ang pagtrabaho nga makugihon, sa pagtagamtam sa matag adlaw, ug sa pagbaton og hugot nga pagtuo nga ang tanan mamaayo ra. Apan sa akong igsoong lalaki, ingon og lahi gayod kaayo kini.
Ang akong misyon mitudlo kanako sa pagpangutana og dinasig nga mga pangutana ug sa pagpangutana alang sa pagsabut. Apan wala ako makaila daan sa mga tawo nga akong gitudloan sa akong misyon. Ang akong bugtong nga relasyon uban kanila mao ang pagtudlo ug pagtabang kanila nga mas mahiduol kang Kristo. Nakaila ko sa akong igsoon nga lalaki sa iyang tibuok kinabuhi, ug wala gayod akoy relasyon sa pagsulay og tabang kaniya nga mas mahiduol ngadto ni Kristo.
Nakahinumdom ko og panag-istoryahanay nga aduna kami usa ka adlaw dihang gipangutana nako siya mahitungod sa Simbahan. Miingon siya nga wala siyay pagpamatuod mahitungod sa pipila sa mga pagtulun-an. Kon kini usa ka tawo nga akong nahimamat sa akong misyon, ang akong tubag unta mao ang pagtahod ug pagdawat nga siya dili pa lang andam niini nga panahon, ug tingali ang ubang mga misyonaryo motudlo kanila unya. Apan tungod sa akong gugma alang sa akong igsoon nga lalaki, mas lisod ang pagpakita sa sama nga ang-ang sa pagsabot. Gusto lang ko nga mahibalo siya sa unsay akong nahibaloan, ug gusto ko nga mabati niya ang sama nga Espiritu ug gugma gikan sa Dios sama sa akong nabati. Lisud alang kanako nga modawat nga siya wala mopili sa ebanghelyo.
Nagkinahanglan kini og panahon alang kanako aron maanad sa sitwasyon, apan karon, hapit duha ka tuig human ako nauli gikan sa akong misyon, ang akong relasyon sa akong igsoon nga lalaki maayo gihapon. Dili kaayo kami mag-istorya kabahin sa ebanghelyo, apan mag-istorya kami kabahin sa ubang mga butang. Nangandoy gihapon ko nga mahimong komon ang ebanghelyo kanamo, apan kami adunay daghang ubang mga butang nga komon. Magkauban gihapon kaming manuroy ug mobuhat sa mga butang, ug gihigugma nako siya kon si kinsa siya, tungod kay siya usa ka maayo gayod nga tawo.
Mga Butang nga Akong Nakat-onan
Sa tibuok niini nga panahon, adunay pipila ka butang nga akong nakat-onan nga mahimong makatabang kon kamo nanglimbasog sa usa ka minahal nga mibiya sa Simbahan, aron sa pagtabang kaninyo nga dili lamang makapadayon og maayong relasyon uban kanila apan usab nga mapabiling lig-on ang inyong pagpamatuod atol sa tingali espirituhanong mahagiton nga panahon alang kaninyo.
-
Hinumdomi nga ang tanan adunay ilang kabubut-on ug nga kini dili inyong sayop kon ang usa ka tawo mobiya sa Simbahan.
-
Palig-ona ang inyong relasyon uban kanila. Kanunay ipakita kanila ang gugma. Paningkamoti nga dili itugot ang ilang relasyon sa Simbahan nga makaapekto sa inyong relasyon kanila.
-
Paggahin og panahon nga magkaubang magbuhat sa mga butang nga kamong duha malingaw.
-
Bisan og dili kamo makahimo sa mga pagpili sa ubang mga tawo, kamo pwedeng mahimo nga usa ka ehemplo ug mosuporta kanila.
-
Pag-ampo mahitungod sa sitwasyon. Ang Langitnong Amahan nakaila sa Iyang mga anak, busa makasiguro kamo nga Siya masayod sa labing maayo kon unsaon sa pagtabang kaninyo nga makasugakod niini.
-
Siksika ang mga kasulatan. Ang mga ehemplo gikan sa mga kasulatan nakatabang nako og maayo, ug nakaamgo ko nga ang akong sitwasyon kasagaran nga komon. Bisan sa mga kasulatan, daghang pamilya adunay usa o daghan pang mga tawo kinsa wala motuo o gani batok sa Simbahan, apan ang ilang pamilya nagpakita gihapon og gugma ngadto kanila.
-
Bukas nga moistorya sa unsay inyong gibati sa inyong mga sakop sa pamilya kinsa aktibo sa ebanghelyo. Tingali sila adunay susama nga mga hunahuna, ug tingali nagkinahanglan sila og usa ka tawo nga mapaambitan usab. Pagtinabangay.
-
Sa kataposan, ayaw ibaliwala ang inyong kaugalingong espiritwalidad.
Pagpabilin sa Inyong Pagpamatuod nga Lig-on
Kon ang mga tawo nga suod kaninyo mobiya sa Simbahan, mahimong mahagiton kini alang sa inyong kaugalingong pagtuo, ilabi na kon ang tawo nga mibiya usa ka tawo nga inyong gitan-aw nga maayo nga ehemplo diha sa ebanghelyo. Mahimong mosugod kamo sa pagkuwestiyon sa piho nga mga aspeto sa inyong pagpamatuod. Tinuod nga nanglimbasog ko og gamay uban sa mga pangutana sa dihang mibiya ang akong igsoong lalaki. Apan mao kana nganong importante kaayo ang pag-atiman sa inyong kaugalingon ug sa inyong pagpamatuod. Kon kamo mopalig-on ug moalima sa inyong kaugalingong pagpamatuod, dili kamo kinahanglang mahadlok sa unsay mga pagpili nga himoon sa uban.
Hinumdumi nga kitang tanan peligro nga mahuyang ang atong pagtuo kon kita dili maningkamot sa paglig-on niini. Kadaghanan sa mga tawo dili mahimo nga lig-on usa ka adlaw unya kalit nga mobiya sa Simbahan pagkasunod adlaw. Apan kon kamo makalimot sa pagbuhat sa ginagmay nga mga butang aron sa paglig-on sa inyong pagpamatuod matag adlaw, lagmit makaplagan ninyo ang inyong kaugalingon nga nagkaanam og kalayo gikan sa ebanghelyo nga wala gani makahibalo niini. Ang pagbalik ngadto sa mga sukaranan sama sa pagtuon sa inyong mga kasulatan, pag-ampo kada adlaw, ug pagpahigayon sa tanang ginagmay nga mga buhat sa pagtuo ug pagsimba mahimong adunay gamhanan nga impluwensya sa inyong pagpamatuod.
Labaw sa tanan, kon ang inyong minahal nga mibiya sa Simbahan nakaapekto sa inyong kaugalingong pagpamatuod ug maoy hinungdan sa mga pagduha-duha o mga pangutana diha sa inyong hunahuna, hinumdumi ang maalamon nga tambag nga “duhaduhai una ang inyong pagduhaduha sa dili pa mo magduhaduha sa inyong pagtuo”1 ug sa “panggunit og hugot sa unsay inyo nang nahibaloan.”2
Pagtinguha Kanunay sa Pagpaminaw Kaniya
Nagtuo ako nga importante sa mga young adult nga magbaton og plano alang sa ilang kinabuhi, sama sa pagkasayod kon asa sila gusto nga moadto ug unsay gusto nilang buhaton. Apan kinahanglan natong mamalandong ug apilon ang Ginoo niadto nga mga plano ug sa atong inadlaw-adlaw nga kinabuhi. Mahimong lisod kini buhaton kon kita adunay daghan pang mga responsibilidad sa matag adlaw, apan kanunay kitang makagahin og panahon alang sa Langitnong Amahan ug ni Jesukristo. Ug kon ato kanang buhaton, kita kanunay nga makasugakod sa mga unos sa kinabuhi. Naghunahuna ko sa kasulatan sa Mga Taga-Roma 8:31: “Kon dapig kanato ang Dios, kinsay makigbatok kanato?”
Si Presidente Russell M. Nelson mitudlo kon sa unsang paagi sa umaabot nga mga adlaw, kita dili makasugakod sa espirituhanong paagi kon wala ang Espiritu ug pagdawat og personal nga pagpadayag sa atong kaugalingong kinabuhi.3 Kanunay nakong nahibaloan nga ang pagdawat og personal nga pagpadayag importante, apan dili ako maayo kanunay sa pagtinguha niini. Nasayod ko nga pwede ko nga mahimong mas maayo sa pagdapit sa Espiritu sa akong kinabuhi matag adlaw.
Ang personal nga pagpadayag sama lang sa paghulagway niini—personal kini. Ug makasugod kita sa pagkat-on kon sa unsang paagi ang Ginoo makigsulti kanato pinaagi sa pagpangayo Kaniya og tabang sa pag-ila sa Iyang tingog ug sa Iyang impluwensiya sa atong mga kinabuhi. Siya ang labing maayong magtutudlo.
Dili kita kanunayng makakontrolar sa mga aksiyon sa uban, ilabi na kon kini kalabot sa mga butang sa paglig-on sa atong pagtuo o pagsunod sa ebanghelyo. Apan nasayod ko nga bisan kadtong atong labing gihigugma sa kalibotan adunay mga hagit sa pagtuo, kon atong unahon ang Dios ug mosunod sa Iyang kabubut-on ug maningkamot sa pagpaminaw Kaniya, kanunay kitang mapanalanginan og mga tubag, uban sa lig-on nga pagpamatuod, ug uban sa espirituhanon nga pagpadayag nga atong gikinahanglan aron makapadayon sa pagsunod Kaniya.