Nagkat-on sa Pagtuo nga ang Manluluwas Makaayo Kanako
Nahibalo ako nga si Jesukristo makaayo sa tanan, apan ang pagkabig sa Iyang gahom sa pag-ayo sa higayon sa akong panginahanglan mas mahagiton pa kay sa akong gipaabot.
Atol sa usa ka piho nga bahin sa akong misyon, ako nakigbisog sa usa ka problema nga akong gituohan nga walay solusyon. Gipul-an ug nahigawad, akong gisultihan ang akong suod nga higala mahitungod sa sitwasyon. Human ako mipahungaw, kini nga higala––kinsa kanunay nga duol ngadto sa Espiritu––yano kaayo nga mitubag, “Nasulayan ba nimo ang pag-ampo mahitungod niini?”
Ang tubag maingon og oo. Oo, nasulayan ko ang pag-ampo mahitungod niini kaniadto. Apan dili kinasingkasing. Wala ako makaampo uban sa hugot nga pagtuo nga ang Manluluwas makaayo sa tanan nga mga samad. Kana usa ka kamatuoran nga akong gituohan alang sa uban apan dila alang sa akong kaugalingon.
Isip usa ka misyonaryo, akong naandan ang pagtudlo sa mga tawo nga sila makakaplag og pagkaayo diha ni Kristo. Apan bisan unsaon ko sa pagpaninguha sa pagkumbisir sa akong kaugalingon nga ang Iyang gahom sa pag-ayo magamit usab ngari kanako, ako wala gayod sa hingpit mituo niini.
Usa ka adlaw niana ako nabug-atan sa mga pakigbisog nga akong giatubang. Ang mga butang nga kasagaran ako makakita og kahupay diha niana ingon og wala mo-epekto. Akong gikinahanglan ang usa pa ka butang––gikinahanglan ko ang usa ka Manluluwas kinsa makaayo sa tanang mga samad. Nag-ampo ako og mas matinguhaon pa sukad kay sa akong nahimo kaniadto, ug sa unang higayon, gihangyo ko ang Dios sa pagtabang kanako nga motuo diha sa makaayo nga gahom nga nagagikan pinaagi sa Pag-ula ni Jesukristo.
Samtang akong gitun-an ang Pag-ula sa Manluluwas ug gihimo ang tanan sa akong gahom sa pagtuo, ang akong panghunahuna misugod sa pagkausab. Ako “napuno sa kalipay, kalinaw, ug kahupayan,”1 ug nakat-onan ko alang sa akong kaugalingon nga “ang tanang dili makiangayon kabahin sa kinabuhi mahimong mapahusto pinaagi sa Pag-ula ni Jesukristo.”2
Ang ako bang pagkaayo miabot pinaagi sa usa ka pisikal nga milagro sama sa atong madungog diha sa Bag-ong Tugon? Diha bay dili masabtan nga mga milagro sama sa tubig nga nahimong bino o usa ka tawo nga gibuhi gikan sa patay?
Wala.
Apan ang gahom sa pagkaayo nga akong nasaksihan sa akong kinabuhi miabot pinaagi sa matag adlaw nga kahupay ug kalinaw nga akong nadawat. Kini miabot pinaagi sa dili masabtan nga pagkamalaumon nga akong gibati sa kinahiladman sa akong kalag. Kadtong mga butanga mihatag kanako og kalig-on nga akong gikinahanglan nga molahutay og usa pa ka adlaw, usa pa ka semana, ug usa pa ka bulan, tanan adunay usa ka pahiyom diha sa akong nawong.
Sa labing tinuod gayod, wala nako mailhi ang gamhanan nga pag-ayo sa Manluluwas nga naglihok diha sa akong kinabuhi hangtod pipila ka panahon ang milabay ug ang akong pagsulay gibati nakong mas gaan kaayong pas-anon. Sa diha nga akong gipamalandong ang paagi nga ako mibati sa unang mga bulan, sa wala pa ako mangayo og panabang sa Manluluwas, nailhan nako nga akong nasinati ang usa ka milagro. Ako tataw kaayo nga nakakita nga walay paagi nga ako makabuntog sa mga kalisod nga ako nagsinati nga walay usa ka mahigugmaon nga Manluluwas nga nagtunol sa Iyang mga bukton sa kalooy ug pag-ayo ngari kanako.
Ako naghunahuna nga ang kang Kristo nga gahom sa pag-ayo sa kasagaran mapakita pinaagi sa gagmay nga mga milagro nga mahitabo kada adlaw, ug ako wala makakita niana nga kamatuoran sa gihapon. Oo, atong madungog ang mahitungod sa hilabihan kadako, makita nga mga milagro diha sa Biblia ug sa Basahon ni Mormon, apan gusto nakong hunahunaon nga ang pipila sa labing importanting mga milagro nga nahitabo sa dihang si Kristo dinhi niini nga kalibotan tingali gipakita pinaagi sa yano, wala masulat nga mga buhat sa kalooy nga ako nakasiguro Iyang gibuhat sa matag adlaw.
Mapinaagi kana sa panagsinultihanay nga Siya aduna ngadto sa usa ka tawo nga miagi sa dalan nga mibilin kanila og usa ka pagbati sa paglaom o pinaagi lamang sa usa ka yano nga pahiyom nga Iyang gitanyag ngadto sa usa ka tawo kinsa gisalikway gikan sa katilingban, ako nakasiguro, sama kanako, kasagaran nga giayo Niya kini nga mga tawo sa gamay ug sa dako nga mga paagi.
Si Kristo makaayo sa tanang mga samad. Siya nagtanyag sa Iyang makaayo nga kamot ngari kanako pinaagi sa mga paagi nga hapit wala nako nabantayi ug napakyas sa paghatag Kaniya og pasalamat. Ug ako nagtuo nga Siya makabuhat sa sama alang kanatong tanan. Sama ni Sister Amy A. Wright, Unang Magtatambag diha sa Kinatibuk-ang Kapangulohan sa Primary, mitudlo: “Kitang tanan adunay usa ka butang sa atong mga kinabuhi nga naguba nga nagkinahanglan nga tul-iron, tarungon, o ayohon. Samtang kita moduol ngadto sa Manluluwas, samtang kita mopahiangay sa atong mga kasingkasing ug mga hunahuna uban Kaniya, samtang kita maghinulsol, Siya moabut kon hain kita ‘uban ang pagpang-ayo diha sa Iyang mga pako’ [2 Nephi 25:13].”3
Kon kamo dili motuo nga si Jesukristo makaayo kaninyo, nag-awhag ako kaninyo sa pag-ampo alang sa hugot nga pagtuo nga motuo. Pag-ampo nga ang inyong mga mata mabuka nga makakita sa gagmay nga mga milagro nga nahitabo sa matag adlaw tungod Kaniya. Pangita Kaniya. Nagsaad ako nga walay kaguol nga dako kaayo o hagit nga daghan kaayo alang Kaniya nga ayohon––diha sa Iyang kaugalingon nga panahon ug sa Iyang kaugalingon nga paagi. Walay usa nga wala maapil gikan sa gugma sa Manluluwas, ug kana naglakip kaninyo. Kon kamo motugot Kaniya, Siya motabang kaninyo sa pagpangita og pagkaayo gikan sa imong mga samad diha sa Iyang hingpit nga paagi. Siya mihimo niana kanako.