Buhat sa Family History: Usa ka Tinubdan sa Gahom
Adunay daghan kaayong gahom nga kita makaangkon gikan sa pagkat-on mahitungod sa atong mga katigulangan.
Detalye gikan sa Pagpabalik sa mga Kasingkasing, ni Annie Henrie Nader
Ang akong apohan nga babaye nga bahin sa akong inahan mipuyo sa lawak sa bisita sa akong balay sa katapusang mga bulan sa iyang kinabuhi. Hangtod karon, 18 ka tuig human siya mamatay, among gitawag kana nga lawak sa bisita og “Lawak ni Lola.”
Ako dihay ilabi ka tin-aw nga damgo mga usa ka tuig na ang milabay nga ako miagi sa lawak ni Lola ug ang akong lola diha sa sulod. Migula siya sa paggakos nako og maayo, ug uban sa mga luha nga diha sa iyang mga mata ug usa ka pahiyom diha sa nawong, miingon siya ngari kanako, “Salamat alang sa paghigugma sa imong mga katigulangan. Dili ako makasulti kanimo kon unsa kini ka importante ngari kanamo.”
Sukad niini nga damgo, dili na gyod ako mao gihapon.
Nganong Kinahanglan nga Atong Mahibaloan ang mga Istorya sa Atong mga Katigulangan?
Sa tibuok kalibotan nga debosyonal ni Presidente Russell M. Nelson ngadto sa mga young adult kaniadtong Mayo 2022, siya mipahayag:
“Ang matag matarong nga pagpili nga inyong himoon dinhi mobayad og dakong kaayohan karon. Apan ang matarong nga mga pagpili sa mortalidad mohatag og mas dakong kaayohan sa kahangtoran. Kon kamo mopili nga mohimo og mga pakigsaad uban sa Dios ug magmatinud-anon ngadto niadto nga mga pakigsaad, kamo adunay saad sa ‘himaya nga idugang diha sa [inyong ulo] hangtod sa kahangtoran’ [Abraham 3:26].
“Kini nga mga kamatuoran kinahanglang moaghat sa inyong kataposang pagbati sa KNM––o kahadlok nga mapakyas. Kamo adunay potensiyal nga makaabot sa celestial nga gingharian. Ang kataposan nga KNM mao ang dili makaabot sa celestial nga gingharian, mopuyo sa usa ka mas ubos nga gingharian tungod kay dinhi sa yuta ikaw mipili lamang sa pagpuyo sa mga balaod sa usa ka mas ubos nga gingharian.”1
Hunahunaa kon unsa kaha gayod ang gibati sa inyong mga katigulangan nga mahinumdoman diha sa balay sa Ginoo kon ang ilang mga kaliwatan mobarog isip usa ka puli ngadto sa mapainubsanong tanyag kanila og usa ka saad sa himaya ug kalingkawasan gikan sa KNM nga gihulagway ni Presidente Nelson. Mahimo kitang mga manluluwas sa Bukid sa Zion samtang nagpahigayon kita og pagpuli nga mga ordinansa alang sa atong namatay nga mga katigulangan (tan-awa sa Abdias 1:21; tan-awa usab saDoktrina ug mga Pakigsaad 103:9).
Ako gustong mosugyot nga sa laing paagi, ang atong mga katigulangan nagtabang kanato nga maluwas. Ang atong mga katigulangan, uban sa Dios, nakatabang sa paghatag niini nga mga kinabuhi nga atong gipuy-an karon.
Nahibalo ba kamo sa mga sakripisyo nga gihimo sa inyong mga katigulangan nga nakaapekto kon hain kamo karon? Nakagahin ba kamo og panahon sa pag-ila sa inyong mga katigulangan? Nakahibalo ba kamo kon unsa nga mga kinaiya o mga kasinatian nga sagad kanila? Sa unsang paagi nga ang pagkahibalo niini nga impormasyon naghatag og kaayohan sa inyong kinabuhi?
Sa akong kasinatian, ang pagkaila mahitungod sa akong ikatulo nga apohang babaye sa tuhod, si Mary Jane Cutcliff, mipakita kanako kon unsa kadako nga impluwensya ang atong mga katigulangan aduna sa atong mga kinabuhi. Si Mary Jane maoy usa sa akong mga katigulangan nga gibunyagan ngadto sa Simbahan kaniadtong 1857 sa Liverpool, England. Mipasakop siya sa Simbahan human sa usa ka lawom nga espirituhanong kasinatian. Nakahibalo sa iyang naghingapin nga hugot nga pagtuo nagdasig kanako sa paglihok diha sa hugot nga pagtuo ug sa pagsalig diha sa mga kamatuoran nga gipadayag ngari kanako pinaagi sa Espiritu.
Lain nga ehemplo sa gamhanang mga istorya sa mga katigulangan mao si Kapitan Moroni, kinsa migisi sa iyang kupo ug migamit og usa ka piraso isip iyang Bandila sa Kalingkawasan (tan-awa sa Alma 46:11–25). Kini nga piraso sa iyang kupo usa ka simbolo sa ilang managsama nga katigulangan, si Jose, “kansang kupo gigisi sa iyang igsoon nga mga lalaki ngadto sa daghan nga mga piraso” (Alma 46:23) samtang siya gibaligya ngadto sa Ehipto ug gibuntog ang sugilanon nga mga serye sa mga hagit.
Dili lamang nga nahibaloan ni Kapitan Moroni kining gamhanan nga istorya sa iyang katigulangan, apan nakahimo siya sa paggamit niini sa iyang kinabuhi ug nakadasig sa uban sa paghinumdom sa istorya ni Jose ug sa pagbaton og hugot nga pagtuo ug paglaom sa pagbuntog sa ilang kaugalingong mga hagit. Ang pagka-nakahibalo sa mga istorya sa atong mga katigulangan makahimo og sama alang kanato.
Ang Gahom sa Family History
Si Elder Rafael E. Pino sa Kapitoan bag-ohay miingon nga ang “kanunay nga pag-apil sa buhat sa templo ug sa family history … mao ang paagi sa paghiusa ug pagselyo sa mga pamilya alang sa kahangtoran [tan-awa sa Doktrina ug mga Pakigsaad 128:15].”2 Ang atong mga katigulangan makahatag kanato og mga panig-ingnan sa pagsunod ug pagdugang sa atong tinguha nga sa kahangtoran mahiusa uban sa atong mga pamilya.
Akong giangkon nga sukad sa akong damgo sa akong lola, ako dili na gyod mao. Ug kana nga pag-angkon tinuod. Sukad sa akong pagtininuod sa buhat sa family history, dihay kabalhinan sa akong hunahuna. Nahimo akong mas kugihan nga makaila sa mga sakop sa akong pamilya sa duha ka bahin sa tabil.
Mihisgot si Presidente Nelson nga ang kataposang KNM [Kahadlok Nga Mapakyas] mao ang mapakyas nga makasulod didto sa celestial nga gingharian. Ang akong gugma alang sa Dios mao ang kanunay nakong pagpangdasig sa pagbalik sa pagpuyo uban Kaniya didto sa celestial nga gingaharian. Ug pinaagi sa paglig-on sa akong gugma alang sa akong mga katigulangan, ang akong pagpangdasig mitubo. Nasayod ako nga ang Dios nahigugma sa Iyang tanan nga mga anak. Dili Siya gusto nga bisan usa kanato dili mauban sa mahangturong mga pamilya ug ang hingpit nga kalipay sa celestial nga gingharian. Mapasalamaton ako alang sa Iyang plano nga nagtugot kanako sa pagbalik ngadto Kaniya ug sa akong pamilya.
Sa pagka-karon, dili ako makasabot sa tanan nga kahulogan sa akong gugma o akong buhat sa family history ngadto sa akong mga katigulangan (ingon nga gihisgotan sa akong lola diha sa akong damgo), apan ako nahibalo nga ang among relasyon mahangturon ug nga kami adunay paghigugma sa usag usa. Nagkanipis ang tabil ug usa ka adlaw niana dili na mobulag kanato gikan sa atong mga minahal. Dili ako makahulat nga mahimamat sila pag-usab nianang adlawa.