Ua Na’o Tusiga Faatekinolosi

Fesili e 4 ma Tali e uiga i Meaalofa Faaleagaga

Saunia e Becca Wright

Mekasini a le Ekalesia

O a meaalofa faaleagaga o le a fesoasoani ia te oe e ola ma auauna tele atu ai i luga o le ala o feagaiga i le ola e faavavau?

Ua i ai se galuega a le Tama Faalelagi mo i tatou taitoatasi. Ma ua tuuina mai ia i tatou uma se seti tulaga ese o meaalofa lea o loo saunia ai i tatou e fausia le malo o le Alii i se ala e na o i tatou taitoatasi e mafaia!¹ E mafai foi ona faaauau pea ona tatou tuputupu ae ma atiina ae nisi meaalofa faaleagaga ina ia avea atili ai e faapei o Iesu Keriso ma auauna atu ia te Ia.

E mafai faapefea e le atinaeina o a tatou meaalofa ona faia se eseesega?

Na saunoa Peresitene Russell M. Nelson: “Ou te uunaia outou, faatasi ma le faamoemoe uma o lo’u loto, ia tatalo ina ia malamalamai au meaalofa faaleagaga—ia atiae, faaaoga, ma faalautele i latou, ia matua sili atu nai lo se isi lava taimi. O le a e suia le lalolagi a o e faia lea mea.”²

E faapefea e le atinaeina o a tatou meaalofa faaleagaga ona fesoasoani ia i tatou ia maua le mana o Iesu Keriso e fesoasoani ai e suia le lalolagi? Pe a tatou malamalama po o a a tatou meaalofa faaleagaga, o le a amata ona tatou malamalama pe mafai faapefea ona latou faamanuiaina isi ma fesoasoani foi ia i tatou ia avea atili e faapei o Iesu Keriso.

O Le A le Faamoemoega o Meaalofa Faaleagaga?

O meaalofa faaleagaga o se tasi lea o auala e fesoasoani ai le Tama Faalelagi ia i tatou e faataunuu la tatou galuega i le lalolagi ma aumaia i tatou lava ma isi e faalatalata atili atu ia Iesu Keriso. O a tatou taumafaiga ua o gatasi lelei ma le galuega paia a le Tama Faalelagi ia “aumaia le tino ola pea ma le ola faavavau o le tagata” (Mose 1:39). Na te aumaia le tino ola pea ma le ola e faavavau, a o tatou faaaogaina a tatou meaalofa faaleagaga e usitai ai i Ana poloaiga ma faasino atu i tatou lava ma isi agai ia te Ia.³

E tusa ai ma tusitusiga paia, o le faamoemoega tupito o a tatou meaalofa faaleagaga o le faalatalata atu lea o i tatou ia Iesu Keriso ma ia faafaigofie teisi lenei nonofo ai i le olaga faaletino mo o tatou uso ma tuafafine—“mo le manuia o fanau a le Atua” (Mataupu Faavae ma Feagaiga 46:26; tagai foi fuaiupu 8–9) ma mo “le faamafanafanaina o le ekalesia” (1 Korinito 14:12).

O A Meaalofa Faaleagaga E Tatau Ona Ou Sailia?

Na aoao mai Elder Bruce R. McConkie (1915–1985) e faapea “o meaalofa faaleagaga e le mafaitaulia le aofai ma e le masino foi ona ituaiga eseese.”⁴ E mafai e le Atua ona tuuina mai soo se meaalofa tatou te manaomia e faataunuu ai Ona faamoemoega, e faaleleia ai i tatou lava ma fesoasoani ai i isi.

Na aoao mai e Peresitene George Q. Cannon o le Au Peresitene Sili (1827–1901), “Afai e i ai se tasi o i tatou e le atoatoa, o lo tatou tiute le tatalo mo le meaalofa o le a faaatoatoaina ai i tatou.”⁵ O loo i ai ni meaalofa eseese e le iu, e faamalolosia ai i tatou mo luitau eseese po o vaivaiga tatou te ono feagai. E pei ona faasino mai Peresitene Cannon: “E leai se tasi e tatau ona faapea mai, ‘Oi, e le mafai ona ou tuua lenei mea; o lo’u a natura lea.’ E le tauamiotonuina o ia i lena mea.”⁶ E ala ia Iesu Keriso, e mafai ai ona tatou maua meaalofa uma tatou te manaomia e faaleleia ai ma suia ina ia avea atili ai e faapei o Ia.

A o tatou atiina ae uiga faaKeriso, o le a mafai foi ona tatou siitia ma auauna atu i isi i auala faaKeriso. O le a manuia uma o tatou aiga ma nuu pe a mafai ona tatou ofoina atu ia i latou o tatou tagata sili ona lelei.

O a meaalofa faaleagaga e manaomia ona e atiina ae i talaatu o le “tagata natura” (Mosaea 3:19) ma avea ma tagata e finagalo le Atua e avea ai oe?

O a Ni Faataitaiga o Meaalofa Faaleagaga?

O meaalofa faaleagaga e le faatapulaaina i mea o loo lisi atu i le 1 Korinito 12:4–11, 30–31; Moronae 10:8–18; po o le Mataupu Faavae ma Feagaiga 46:7–26. O faataitaiga nei o meaalofa faaopoopo faaleagaga e pei ona tuuina mai e taitai o le Ekalesia:

“Ole atu; …
“Faalogo; …
“Faalogo ma faaaoga se leo itiiti ma le filemu; …
“O le mafai ona tagi; …
“Aloese mai finauga; …
“O le ioeina; …
“Aloese mai le tautu i upu le aoga; …
“Saili i le mea ua amiotonu; …
“E le o le faamasino atu; …
“Vaavaai atu i le Atua mo le taitaiga; …
“Avea ma se soo; …
“Popole mo isi; …
“O le mafai ona mafaufau loloto; …
“Faia o le tatalo; …
“Tuuina atu o se molimau malosi; …
“Mauaina o le Agaga Paia.”⁷
“Agaalofa,
“Faailoa atu le faamoemoe,
“E fegalegaleai lelei o ia ma tagata,
“Faatulagaina lelei,
“Tautala po o le tusitusi faatauanau,
“Aoao atu ma le manino,
“Galue malosi,”⁸ ma
Ma isi lava mea e tele.

E Faapefea Ona Ou Mauaina Meaalofa Faaleagaga?

E faaopoopo atu i meaalofa e fanau mai ma se tasi, e mafai foi ona atiina ae le tele o meaalofa faaleagaga faaopoopo i le olaga atoa o se tagata. Ina ia mauaina soo meaalofa faaleagaga e manaomia ai taumafaiga. Sa aoao mai e Peresitene Dallin H. Oaks, Fesoasoani Muamua i le Au Peresitene Sili e faapea, o meaalofa faaleagaga “e le o’o mai i se tulaga e vaaia, e otometi, ma vave ia i latou uma o e ua mauaina le meaalofa o le Agaga Paia.” Ae, sa ia faaauau, “o le mauaina o meaalofa faaleagaga e faavae i luga o le faatuatua, usiusitai, ma le amiotonu faaletagata lava ia.”⁹

E ui lava ua ta’ua i latou o “meaalofa,” ae atonu o le a tatou le taliaina i latou e aunoa ma se faamoemoe. “E foliga mai o le [Tama Faalelagi] o le a Ia tuuina mai ia i tatou avanoa e atiae ai na meaalofa nai lo le na o le tuuina mai lava o i latou ia i tatou e aunoa ma se taumafaiga faaleagaga ma faaletino,” na aoao mai ai Elder Juan Pablo Villar o le Fitugafulu. “Afai tatou te saili le onosai atili,” na ia fai mai ai, “atonu tatou te iloa ai e manaomia ona tatou faataitaia a o faatalitali mo se tali. Afai tatou te mananao ia i ai le alofa atili mo o tatou tuaoi, e mafai ona tatou faafaileleina e ala i le saofai i autafa o se tagata fou i le lotu.”¹⁰

O Meaalofa Faaleagaga e Faasino Atu ai i Tatou i le Meaalofa Silisili

O meaalofa faaleagaga e fesoasoani ia i tatou e agai ai i luma i luga o le ala o feagaiga—ma fesoasoani ia i tatou e valaaulia isi e savavali faatasi foi ma i tatou. O lenei ala e taialaina ai i tatou i “le meaalofa silisili o meaalofa uma a le Atua”: ola e faavavau (Mataupu Faavae ma Feagaiga 14:7).

E pei ona saunoa mai ai Elder Bruce C. Hafen a o avea o ia ma se tasi o Fitugafulu, “E mafai ona tatou maua le ola e faavavau pe afai tatou te mananao i ai, ae seiloga lava e leai se isi mea e sili atu lo tatou mananao i ai.”¹¹

O le a se mea e sili ona e manao i ai? O a ni meaalofa faaleagaga o le a fesoasoani ia te oe e te oo atu ai iina? Atonu o le a le suia e a tatou meaalofa faaleagaga le lalolagi mo tagata uma, ae o le atinaeina o i latou e auauna atu ai i isi o le a suia ai lo tatou lalolagi ma le lalolagi o i latou tatou te auauna atu i ai.