Ua Na’o Tusiga Faatekinolosi
Avea ma “Se E Taliaina Lelei” Auaunaga
Ua ou masani lava i le avea ai ma se tasi e auauna atu i isi. Ae ina ua maua e se fomai ni patupatui lo’u fatafata, sa ou iloa ai le taua o le taliaina o le auauna mai o isi.
A o ou i ai i le kolisi, sa faalua ona ou auauna atu o se peresitene o le Aualofa ma sa umia isi valaauga i a’u uarota eseese lea na mafai ai ona ou fesoasoani soo atu i isi. Sa faapitoa la’u aoga i le tulaga o gasegase o le mafaufau, ma sa faaaluina le tele o lo’u taimi e fesoasoani ai ia i latou o e sa tauivi ma gasegase eseese faalemafaufau ma manaoga faapitoa foi.
Sa ou masani i le auauna atu, ae le o le taliaina o le auauna mai o nisi ia te a’u.
Ona oo lea i se tasi po sa ou maua ai se patu faapei o le telē o se mapu i lo’u fatafata. Sa ou le amanaiaina mo ni nai vaiaso seia oo i se tasi afiafi ina ua toe foi mai Rasela, o lē sa ma potu faatasi, ma o lē sa avea foi ma a’u soa i le misiona. Sa nofo o ia i luga o lona moega faafesagai mai ia te au, ma sa ou manatuaina ua maliu lona tinamatua mai le kanesa o le susu.
Talu mai le mauaina o le patupatu, sa ou i ai i le faafitia pea o le manatu o loo i ai se mea ua faaletonu; e leai se tasi o lo’u aiga na i ai ni faafitauli tau le soifua maloloina, aemaise lava le kanesa. E tusa lava pe na ou manao ou te alu ina ia siaki lenei patupatu, sa ou le iloa po o fea e amata ai i falemai ma fomai. Ae o lenei afiafi patino, sa ou lagona ai e tatau ona ou fai atu se tala ia Rasela.
Sa vave ona ia fusiina a’u ma ma fetagisi faatasi. Ona ia fesoasoani lea ia te a’u e sue se fomai e mafai ona tilotilo i le patupatu. Ae e lei muta ai iina—sa sau foi o ia faatasi ma au i o’u taimi faatulagaina (ma le fomai) ina ia le tuua na o a’u. Sa ia faamamaluina ana feagaiga e ala i le faataitaia o le fautuaga o i le Mosaeae 18:9 e “faanoanoa faatasi ma e e faanoanoa; ioe, ma faamafanafana atu ia te i latou o e e manaomia le faamafanafanaga.”
E ala i asiasiga faalausoso’o i le fomai, sa ou iloa ai o le patupatu sa ou lagonaina o se tasi o patupatu e fa i lo’u fatafata. Ma o le patupatu laititi lava lea. O se tasi lenei o aafiaga sili ona faateia o lo’u olaga, ma sa sili ona faigata auā sa ou taumafai foi e faapaleni le aoga ma valaauga i le Ekalesia.
E Taiala e le Atua Tagata e Faamanuia i Tatou
E ui ina sa ou iloaina mulimuli ane o nei patupatu o le a le tupu ai se kanesa, ae sa ou mafaufau tele i lena aafiaga ma le tele o auala na faamanuiaina ai a’u e la’u uo. Sa ia faapupula o’u mata i le taua o le faatagaina o isi e auauna mai ia te a’u.
Na aoao mai Elder Dieter F. Uchtdorf o le Korama a Aposetolo e Toasefululua:
“Ua tatou iloa uma lava ‘e sili ona manuia le foai nai lo le na te talia’ [Galuega 20:35], ae ou te mafaufau pe o nisi taimi tatou te le ano ai pe le amanaiaina ai foi le taua o le avea ma se e taliaina lelei. …
“… O nisi taimi e oo atu ai tagata i le tulaga e le mafai ai ona latou taliainase meaalofa pe, mo lena mataupu, e oo lava i se faamalo e aunoa ma le maasiasi po o lagona o le nofo aitalafu. Latou te mafaufau sese e na o le pau lava le auala e tali atu ai i le taliaina o se meaalofa o le toe tuuina atu lea o se mea e sili atu ona taua.”1
I le taimi o o’u valaauga i le Ekalesia ma a’u suesuega i mataupu faalemafaufau, sa mafai ai ona ou tuputupu ae i se tulaga maoae ona sa faatagaina a’u e isi tagata e auauna atu ia i latou. Pe ana faafitia lena avanoa mo a’u, e se tasi o tagata sa talosagaina a’u e auauna atu i ai, semanu e le faatagaina foi a’u e na aafiaga ia avea atili e faapei o lo’u Faaola e ala i le auauna atu i Lona suafa.
O lo’u aafiaga i le maua ai o patupatu (i lo’u fatafata) na fesoasoani ou te iloa o le isi itu pe a liliu mai, e moni: o le faafitia o isi tagata e auauna mai ia te a’u, sa ou lē faatagaina foi i latou e tuputupu ae i auala na ou maua ina ua faatagaina a’u e isi e auauna atu ia i latou. Sa ou misia foi avanoa paia e faalatalata atili atu ai ia i latou ma Keriso. E pei ona saunoa mai Elder Uchtdorf: “Pe a avea i tatou ma tagata e taliaina lelei ma le lotofaafetai, ua tatou tatalaina se faitotoa e faaloloto ai la tatou sootaga ma le tagata foai o le meaalofa. Ae a tatou le talisapaiaina pe teena foi se meaalofa, e le gata ina tatou faatiga ia i latou o e tuuina mai i latou lava ia i tatou, ae i se isi itu tatou te faatiga foi ia i tatou lava.”2
O Le Olaga E Le o se Taumafaiga Faaletagata Lava Ia
E lei faamoemoe le Atua mo i tatou e savavali na o i tatou i le ala o feagaiga, e pei lava ona sa Ia le’i mafaufauina mo a’u ia ou fuafuaina na o a’u le tulaga o o’u patupatu. O nisi taimi o i tatou o ē foai atu, ae ua faamoemoe foi le Atua mo i tatou ia avea ma tagata e mauaina le alofa ma le auauna atu. Na faatuina e le Faaola lava Ia le faataitaiga mo i tatou i lenei mea (tagai, mo se faataitaiga, Mareko 14:3–9).
Ou te le o toe fai atu atu leai i tagata pe a latou mananao e fai mai ni kuki mo a’u i le taimi o se suega lea e tele ai le atuatuvale pe latou te ofo mai e faatau mai se ‘aiga o le aoauli pe afai ua le sologa lelei se aso mo a’u. Ou te le o toe fai atu foi i o’u uso ma tuagane o auaunaga ou te le manaomia se mea mai ia i latou; ou te faatagaina i latou e tau lava ina faaaofia a’u i a latou tatalo pe afai e leai se isi mea ou te manaomia i lena taimi.
Ou te le o toe talituālimaina tagata pe a latou ofo mai e fesoasoani. Ma o le taui, ua ou aoaoina ai e ala i le faatagaina o isi e fesoasoani mai ia te a’u, ua silisili atu ai foi lo’u naunau e faataga Iesu Keriso e fesoasoani mai ia te a’u. Ma o le faatagaina atili o Ia i lo’u olaga ua aumaia ai ia te a’u le malosi tele.
E pei ona aoao mai Elder Uchtdorf, “O meaalofa uma ua ofoina mai ia i tatou—aemaise lava o se meaalofa e sau mai le loto—o se avanoa e fausia ai pe faamalosia ai se sootaga o le alofa.”3 E moni lena mea i ē pele ia i tatou (ma e oo lava ia i latou tatou te le iloa lelei), ma e moni foi i le Tama Faalelagi ma Iesu Keriso.
Ua matua faamanuiaina lava a’u mo lenei suiga i se vaaiga e uiga i le faatagaina o isi e auauna mai ia te a’u. Nai lo le teenaina o taumafaiga a isi e tausia a’u, ua mafai ona ou valaaulia ni faigauo fou i lo’u olaga—e aofia ai se sootaga loloto atu ma lo’u Faaola—a o o’u faatagaina ai a’u lava e avea ma se tagata e taliaina le auaunaga ae le na o se tagata foai.