Ua Na’o le Faatekinolosi: Talavou Matutua
O Auala o loo Aoao Ai A’u e Tusitusiga Paia ia Alofa Atu i Isi
O le suesueina o tusitusiga paia e fesoasoani tatou te maua ai lagona sili atu o le alofa mama mo i latou o siomia i tatou.
I le tuputupu ae ai, sa ou iloa e moni le talalelei mai le auai i le seminare, maitau faataitaiga a lou uso matua, ma le faitauina o tusitusiga paia. Ae sa ou feagai ma le tele o mea faafeagai ina ua atoa lo’u 19 tausaga ma amata ona sauniuni e auauna atu i se misiona. Sa ou faatalitali mo se taimi umi atu nai lo le mea sa ou manao i ai, ae na iu lava ina mafai ona ou auauna atu. O le taimi aupito sili ona manatua pea o lo’u olaga.
Ma e ui lava ina sa ou feagai ma le tele o tulaga na tetee i la’u misiona, ae o iina sa ou matua latalata atili atu ai ia Iesu Keriso ma aoao ai e uiga i Lona alofa atoatoa mai tusitusiga paia ma o’u lava aafiaga. Sa mafai ona ou aoao e alofa i tagata sa ou auauna atu i ai i le ala na alofa ai le Faaola ia i latou.
O le atiina ae o le alofa mama na fesoasoani ia te a’u e auauna atu ai i le lua tausaga sili o lo’u olaga, ma a o ou toe tomanatu i lena taimi, ua ou iloa atili ai le auala na taitaiina ai a’u e tusitusiga paia e atiina ae le alofa mama o Keriso.
E Fesoasoani Tusitusiga Paia ia i Tatou ia Alolofa
Pe e te manatu ea o oe o se so’o o Iesu Keriso?
I le Tusi a Mamona, na aoao mai ai Moronae o so’o o Keriso sa i ai ni uiga mama patino. O nei uiga mama e aofia ai le alofa mama po o le, e pei ona ia faaupuina ai, “o le alofa le pona o Keriso” (Moronae 7:47). Ae mo a’u ma mo le toatele o i tatou, e mafai i nisi taimi ona faigata le faaali atu o le alofa mama i tagata uma, aemaise lava i le lalolagi pogisa o loo tatou ola ai.
E masani ona ou fesili ia te a’u lava—ma le Tama Faalelagi:
“E mafai faapefea ona ou mulimuli i le fautuaga e atiina ae lena alofa mama o Keriso pe a ou matuā le atoatoa lava?”
E ala i le tele o manatunatuga ma sailiiliga faaletagata lava ia, ua ou aoao ai i se faiga aoga se tasi lea o loo i ai lava i o tatou lima.
A tatou mananao i tali ma le taitaiga, e le manaomia ona tatou vaavaai mamao atu nai lo tusitusiga paia! Ua tatou iloa “o afioga a Keriso o le a ta’u mai ai ia te [i tatou]mea uma e tatau ona [tatou] faia” (2 Nifae 32:3), ae pe o moni ea lou “talitonu i tusitusiga paia” (Helamana 15:7) ma lo latou mana e fesoasoani ai ia te oe e atiina ae le alofa mama?
E ala i a’u lava suesuega o tusitusiga paia, sa ou maua ai le fesoasoani na ou manaomia e atiina ae ai le alofa mama sili atu. Ou te lagona le suia o lo’u loto a o ou faitau i upumoni a le Faaola. Na saunoa peresitene Spencer W. Kimball (1895–1985), “Afai ou te faatofuina a’u lava i tusitusiga paia, … ua atili ai ona ou alofa ia i latou e tatau ona ou alofa i ai ma lo’u loto atoa ma le mafaufau atoa ma le malosi atoa.”1
Ua ou iloa o le suesueina o tusitusiga paia o se tasi lea o meafaigaluega sili ona mamana e mafai ona fesoasoani ia i tatou e avea ai faapei o Iesu Keriso. A tatou faataatia ese se taimi ma se nofoaga e mafaufau loloto ai i tusitusiga paia, e mafai ona tatou aoao atili e uiga i Lana upumoni, Lona alofa, ma Lona finagalo—aemaise lava i le auala e alolofa atu ai i isi e pei ona Ia faia.
Faataitaia o le Alofa Mama o le Faaola
Na aoao mai talu ai nei Sister J. Annette Dennis, Fesoasoani Muamua i le Au Peresitene Aoao o le Aualofa: “O Le Faaola … o le faatusa lea o le alofa mama, o le alofa moni. A o tatou aoao pea lava pea e fai mea ua Ia poloaiina ai i tatou … O le a tafe mai Lona alofa e ala mai ia i tatou ma o mea uma ua Ia finagalo ai e le gata o le a mafai ona faia ae o le a sili foi ona faigofie ma māmā [tagai i le Mosaea 24:15] ma sili atu ona faafiafiaina ai nai lo le mea ua tatou mafaufauina. O le a moomia ai le faataitai; e ono alu ai ni tausaga, e pei ona tupu ia te a’u, ae a tatou mananao e avea le alofa ma malosiaga e faaosofia ai, e mafai e Ia ona ave lena manao, [tagai i le Alema 32:27], lena fatu, ma i’u ina liua e avea o se laau matagofie, e tumu i fua e sili ona suamalie. [Tagai i le Alema 32:41].”2
O le atiina ae o le alofa mama e manaomia ai le faataitai, ae afai tatou te naunau e aoao mai ma faatino e ala i tusitusiga paia, e mafai ona tatou lelei atili i le faaalia o le alofa faaKeriso. O le a tatou iloa ai o upumoni i tusitusiga paia ma upu a perofeta e fausia moni ai lava i totonu o i tatou se uiga faaKeriso e sili atu. O le a tatou iloa ai e mafai ona atiina ae le alofa mama o Keriso. Ma faatasi ai ma Lona alofa mama lea ua avea nei o se vaega o o tatou lava tagata, o le a mafai ai ona tatou alolofa atili i isi i le ala Na te alofa ai ma lagona atili ai foi Lona alofa mama i o tatou lava olaga.