Ua Na’o Tusiga Faatekinolosi: Autalavou Matutua
Ae Faapefea Pe Afai o Mea Uma Sa Ou Faia Na Faaosofia i le Alofa mo le Atua?
Sa ou faatuina se sini faigofie: “Fai se mea se tasi i aso taitasi e alofa ai i le Atua, alofa i isi, ma alofa ia te a’u lava ia.”
O nisi taimi, o le avea ma se tagata lelei e pei o se galuega tele.
Sa masani ona ou mafaufau i le avea faapei o Keriso o se lisi telē o mea e tatau ona ou faia ma avea ai. Pe a ou taumafai e faatu ni sini, e ia te a’u se mafaufau lofituina pe a manatu i le mamao sa ou i ai mai le mea e tatau ona ou i ai. Sa ou lagonaina e pei ua ou toilalo i le tele o auala sa ou le iloa po o fea e amata ai—e pei o le taimi e matuai gaogaosa ai lou potu ma e lē mautonu ai po o le a le mea e tapena muamua.
I se taimi na ou lagona ai le matuā le atoatoa ona lelei, sa o’o mai pea se mau i lo’u mafaufau:
“Ona fetalai atu ai lea o Iesu ia te ia, E te alofa atu i le Alii lou Atua ma lou loto atoa, ma lou agaga atoa, ma lou manatu atoa. O le poloaiga muamua lena ma le sili. E faapena foi lona lua, E te alofa atu i le lua te tuaoi, ia pei o oe lava ia te oe” (Mataio 22:37–39).
Sa ou iloaina sa sili atu ona ou taulai atu i le “faia” o le talalelei nai lo le avea e faapei o le Faaola. I se isi itu, e faatasi ai ma le tele o mea faalavefau, na leiloa ai le alofa a’o i ai i le ala. Ae pe le o le alofa ea sa tatau ona avea ma autu? I le taimi o Lana auaunaga, sa aoao ai e Iesu Keriso tagata i se tulafono e maualuga atu ma paia atu e alolofa ai i le Atua ma o latou loto atoa ma ia alolofa atu i isi e pei ona latou alolofa ia i latou lava. Soo se taimi lava sa ou lagona ai le lotovaivai, ou te manatua upu a Iesu ma mafaufau e faapea, “Pau lava le mea a ou faia filifiliga ona o le alofa mo le Atua ma isi, o le a ou i ai i le ala sa’o.”
O Se Sini Faigofie
Sa ou filifili e faatu se sini faigofie: “Fai se mea se tasi i aso taitasi e alofa ai i le Atua, o isi, ma a’u lava.”
Sa ou tusia i le itulau muamua o se api talaaga fou. Ou te lei avea lava ma se tausi talafaamaumau maoae, ae sa ou manatu o le a taua le tusifaamaumauina o mea sa ou faia.
O le aso muamua o se Aso Sa anapogi. Ae ou te lei moe, sa ou tusia i lalo mea sa ou faia e galue ai i la’u sini.
Sa ou tusia e faapea, sa ou faaalia le alofa mo le Atua e ala i le alu i le lotu ma nofo ai mo itula uma e lua, e ui lava ou te lei lagonaina le fiafia i ai. Sa tuuina atu la’u molimau i le lotu faamanatuga. Ma ina ua ou faitauina a’u tusitusiga paia, sa ou tusia i lalo o’u mafaufauga mo se suesuega e sili atu ona anoa ma taulai atu i ai.
Sa ou tusia sa ou alofa i isi e ala i le auai i se talanoaga faaleaiga (i le telefoni) ma o’u matua e ui lava ina sa ou lelava. Sa ou anapogi mo se uo sa ou iloaina o loo tauivi ma auina atu ia te ia se savali faamalosiau. Sa ou faaaluina sina taimi ma lo’u tuagane.
Sa ou alofa ia te a’u lava e ala i le faia o sina moe laititi ma faatagaina a’u lava e malolo. Ma sa ou vave moe nai lo le mea masani ai ina ia mafai ona ou maua se malologa sili mo le galuega i le aso e sosoo ai.
E leai se mea o nei mea na tetele, ae ina ua ou vaai atu i mea sa ou tusia, sa ou lagonaina le toafilemu. Sa tumu lo’u aso i le alofa, ma o le mea lena na finagalo ai le Tama Faalelagi mo a’u.
I le vaiaso atoa sa ou manatua ai la’u sini ma tusia le auala na ou faaalia ai le alofa. Sa ou alu atu i le malumalu. Sa ou faalogo i tagata o talanoa e uiga i o latou faafitauli. Sa ou tautala atu ni upu agalelei i isi. Sa ou faia mea na ou maua ai le fiafia. Sa ou tausia lelei a’u lava. Sa tele ni avanoa na ou faia mo tagata i lo’u olaga. Sa ou faaaluina se taimi e manatunatu ma fesootai ai ma le Atua.
Suia e le Alofa o le Atua
Ina ua mavae ni nai aso, sa ou maofa i le eseesega. I le avea ai o le faaalia o le alofa faaKeriso ma a’u sini, o mea na masani lava ona lagonaina e pei o se feau (galuega) na avea o ni faailoaga o le alofa mo le Atua, o isi, ma a’u lava ia. Sa amata ona ou saili mo ni avanoa fou e faaali atu ai le alofa, pe o le aumaia o se ipu vai mo lo’u uso, faia o lo’u moega, po o le mapu ane teisi e fai se tatalo o le lotofaafetai.
Sa ou lagona e pei sa ou vaai i le lalolagi i ni mata fou, ma a o ou saili mo ni auala e alofa ai, sa ou matauina foi le alofa sa siomia ai a’u i aso uma. Sa ou faaopoopoina se vaega fou i la’u tusiga i le api talaaga: “O le ala ua ou vaai ai i le alofa o le Atua i le asō.” Sa ou tusia i lalo mea mafaufauina lelei na faia e tagata mo a’u ma upu agalelei na latou ofoina mai. Sa ou tusia i lalo ni mea lelei sa ou vaaia o faia e tagata mo isi. Sa ou tusia i lalo vaega laiti ma agamalu o le alofa mutimutivale mai le Atua sa ou matauina i aso taitasi. Sa ou tusia i lalo auala uma na ou lagonaina ai le siitiaina, o mea uma na aumaia ia te a’u le faamoemoe.
Na aoao mai Sister Susan H. Porter, Peresitene Aoao o le Peraimeri: “Pe a e iloa ma malamalama i le atoatoa o le alofagia o oe o se atalii/afafine o le Atua, e suia ai mea uma. E suia ai ou lagona e uiga ia te oe lava pe a e faia ni mea sese. E suia ai ou lagona pe a tutupu mea faigata. E suia ai lau vaai i poloaiga a le Atua. E suia ai lau vaaiga i isi ma lou gafatia e faia ai se eseesega.”1
A o faaauau pea la’u sini, sa ou iloa ai le moni o lenei mea. Sa mafai ona ou lagonaina le suia atoa o lo’u loto, ma sa ou malamalama i le mana o le alofa o le Atua i se tulaga e sili atu nai lo se isi lava taimi muamua.
Ina ua mavae se masina, sa ou tusia lenei mea i la’u api talaaga:
“Ua ou lagona le faamoemoe nai lo le atuatuvale. Ua ou iloa o’u vaivaiga, ae ou te lagona afai ou te tuuina atu pea lou loto i le Atua, o le a lelei mea uma, e tusa lava pe le mafai ona ou faaleleia vaega vaivai ma nutimomoia o a’u lava ia. O lo’u loto o le mea e sili ona taua, ma o se loto e alofa i le Atua ma isi ma taumafai e auauna atu ma siitia isi o se loto lelei.”
O se Loto Lelei Atu
Maimau pe ana mafai ona ou faapea atu ou te lei misia lava se aso i lau api talaaga. O le mea moni, sa ou alu ese mai i nei mausa i nisi taimi, e oo lava mo masina i lea taimi ma lea taimi. Ae soo se taimi lava ou te toe amata ai, ou te lagonaina lava le eseesega. E toe faapupula atu pea ou mata e vaai i le alofa o le Faaola o siomia ai a’u—ma auala uma e mafai ona ou faaopoopo i ai.
Ua ou malamalama atili i le upumoni faapea “e le uma le alofa mama” (Moronae 7:46) aua ina ua ou lagonaina uaoutoilalo, o le alofa o Iesu Keriso o le mea lea na toe siitia maia a’u i luga. Pe a ou lagonaina le alofa o le Faaola, ou te manao ia toe faasusulu atu i le lalolagi, ma ou te iloa a o ou taumafai e faia lenei mea, o le a Ia faamanuiaina au i se loto e sili atu ona lelei ma malosi atu—se loto ia mafai ona alofa e pei ona Ia faia.