“Ang Atong Kahayag diha sa Kamingawan,” Liahona, Ene. 2024.
Ang Atong Kahayag diha sa Kamingawan
Kadtong sinsero nga nagbasa sa Basahon ni Mormon, nagsunod sa mga pagtulon-an niini, ug nag-ampo mahitungod sa kamatuoran niini mobati sa Espiritu Santo ug molambo ang ilang pagtuo, ug pagpamatuod, sa Manluluwas.
Hulagway sa igsoong lalaki ni Jared nga nagdala og nagsidlak nga mga bato pinaagi ni Normandy Poulter
Bisan bata pa ko, ako aduna nay pagpamatuod sa Basahon ni Mormon. Ganahan ko labi na sa istorya sa igsoon nga lalaki ni Jared ug sa iyang katawhan sa ilang panaw paingon sa “usa ka yuta nga saad” (Ether 2:9).
Sa dihang nag-atubang og kalagmitan nga mopanaw gamit ang mga kasko nga walay suga, ang igsoon nga lalaki ni Jared nangutana, “Tan-awa, O Ginoo, ikaw motugot ba nga kami motabok niining dako nga tubig diha sa kangitngit?” Sa pagtubag, ang Ginoo miingon, “Unsa ang buot nimo nga Ako kinahanglan mobuhat nga kamo makabaton og kahayag diha sa inyong mga sakayan?” (Ether 2:22, 23).
Ang igsoon nga lalaki ni Jared nasayod nga ang Ginoo gamhanan sa tanan. Siya nasayod nga ang Ginoo mao ang tinubdan sa kahayag. Siya nasayod nga ang Ginoo misugo sa iyang katawhan sa pagtawag Kaniya sa panahon sa panginahanglan. Busa, naggamit sa hugot nga pagtuo diha sa Ginoo, ang igsoon nga lalaki ni Jared miandam og 16 ka gagmayng mga bato. Mahinumdoman ninyo nga siya mihangyo dayon sa Ginoo nga hikapon ang mga bato pinaagi sa Iyang tudlo, “nga sila mahimo nga mohayag diha sa ngitngit” (Ether 3:4).
Ang hulagway sa Ginoo nga naghikap niadto nga mga bato nakasilsil diha sa akong hunahuna sukad sa akong unang pagbasa niana nga istorya. Akong makita kana nga talan-awon nga daw nahitabo kini sa akong atubangan. Tingali tungod kay ang hulagway sa kangitngit nga nahanaw tungod sa kahayag nahitabo usab nako.
Sa higayon nga dili nako bation ang Espiritu Santo, kon morag medyo nalayo ko sa Espiritu sa Ginoo, akong bation ang kangitngit. Apan sa higayon nga mobasa ko sa Basahon ni Mormon, ang kahayag mobalik. Ang Basahon ni Mormon alang nako morag sama sa usa ka nagsidlak nga bato nga gihikap sa Ginoo. Nagdan-ag kini sa akong panaw latas sa kinabuhi.
Usa ka Kahayag sa Kahangtoran
Sama niadtong mga gidala pinaagi sa kamot sa Ginoo ngadto sa karaang Amerika, kitang tanan nag-atubang og mga unos ug ngitngit nga mga adlaw atol sa atong panaw ngadto sa gisaad nga yuta sa kahimayaan. Apan ang Ginoo mohimo alang nato kon unsay Iyang gihimo alang sa mga Jaredite ug sa mga Nephite. Siya mogiya nato ug moiwag sa atong agianan—kon kita mosunod Kaniya, mogamit sa hugot nga pagtuo diha Kaniya, ug mangaliyupo alang sa Iyang tabang.
Ang Ginoo miingon kang Nephi, “Ako usab mao ang inyong kahayag diha sa kamingawan; ug Ako moandam og agianan alang kaninyo, kon kini mao nga kamo mohupot sa akong mga sugo; busa, tungod kay mohupot sa akong mga sugo kamo pagatultolan ngadto sa gisaad nga yuta; ug kamo mahibalo nga pinaagi kanako kamo pagatultolan” (1 Nephi 17:13).
Ang Ginoo miingon sa igsoon ni Nephi nga si Jacob, “Ako ang kahayag ngadto kanila sa kahangtoran, nga namati sa akong mga pulong” (2 Nephi 10:14).
Bahin sa Manluluwas, si propeta Abinadi misaksi, “Siya mao ang kahayag ug ang kinabuhi sa kalibotan; oo, usa ka kahayag nga walay kataposan, nga dili gayod mahimo nga mongitngit” (Mosiah 16:9).
Sa Iyang Kaugalingon, ang Manluluwas mipamatuod, “Ako ang kahayag ug ang kinabuhi sa kalibotan.” Siya midugang, “Tan-awa Ako mao ang kahayag; Ako nagpakita og usa ka panig-ingnan alang kaninyo” (3 Nephi 9:18; 18:16).
Pagbati sa Kahayag
Gimahal nako ang atong propeta, si Presidente Russell M. Nelson. Napanalanginan ko nga magserbisyo uban niya. Sa higayon nga mosulod siya diha sa usa ka lawak, kana nga lawak dihadiha dayon morag mas mohayag. Nagdala siya sa Kahayag ni Kristo.
Ang Kahayag ni Kristo tinuod. Kini “mao ang balaan nga kusog, gahom, o impluwensya nga nagagikan sa Dios pinaagi ni Kristo ug naghatag og kinabuhi ug kahayag sa tanan nga mga butang.” Usa kini ka bililhon nga espirituhanong gasa nga makagiya sa mga anak sa Dios ngadto sa Espiritu Santo ug sa ebanghelyo ni Jesukristo.1 Ang pagbasa sa Basahon ni Mormon molig-on niana nga Kahayag.
Usahay kinahanglan kita nga molingi og balik sa atong kinabuhi aron sa paghinumdom kon sa unsang paagi nga kita natabangan sa atong panaw. Kon kita molingi og balik, kita makabati pag-usab sa impluwensya sa Manluluwas. Sa dihang ang kasulatan nag-ingon, “Hinumdomi, hinumdomi” (Helaman 5:12), sa akong hunahuna kini nagsulti nato nga, “Ayaw lang hinumdomi ang unsay imong nasayran o gibati kaniadto; kondili, bation pag-usab kana nga kahayag.”
Alang sa uban, ang pagbati sa espirituhanong kahayag sayon ra nga moabot. Alang sa uban, ang espirituhanong kahayag mahimong lisod tungod sa personal nga mga pakigbisog o kalibotanon nga mga makabalda. Apan kon kita magmatinud-anon, ang kahayag moabot—usahay diha sa mga paagi nga kita wala magdahom.
Si Presidente Nelson, kinsa mitambag nato nga “mainampuon kamo nga magtuon sa Basahon ni Mormon, kada adlaw,”2 mipakigbahin og pipila ka paagi nga ang Basahon ni Mormon makapaduol nato ngadto sa Manluluwas ug makatabang nato nga mobati sa kahayag sa ebanghelyo, makasabot sa mga kamatuoran sa ebanghelyo, ug makasunod sa mga pagtulon-an sa ebanghelyo.
Kon kita mobasa sa Basahon ni Mormon, si Presidente Nelson miingon nga, ang atong pagsabot, ug pagpasalamat, sa Pag-ula ni Jesukristo motubo.
Kita mobati og tinguha nga “matawo pag-usab” (Mosiah 27:25) samtang ang basahon motabang nato nga makasinati og kausaban sa kasingkasing (tan-awa sa Mosiah 5:2).
Kon magbasa ug magtuon kita sa pagtulon-an sa Basahon ni Mormon mahitungod sa pagpundok sa Israel, kita mobati og nagkadako nga tinguha sa pagpangita sa atong katigulangan ug sa pagpahigayon sa mga ordinansa sa kaluwasan ug kahimayaan alang nila diha sa templo.
Kita mobati sa kahayag kon kita makadawat sa mga tubag sa atong mga pangutana, giya sa paghimo og mga desisyon, ug kalig-on aron sa paghinulsol ug pagsugakod sa daotan.
Ug kon kita mobasa sa mga kamatuoran nga makita diha sa Basahon ni Mormon, kita mobati og pagkaayo, pagkahupay, pagpahiuli, pagtabang, kalig-on, pagpakalma, ug pag-abiba sa atong mga kalag.3
“O unya, dili ba kini matuod?” Si Alma nangutana mahitungod sa midako, migitib nga liso sa kamatuoran, kahibalo, ug pagpamatuod. “Ako moingon nganha kaninyo, Oo, tungod kay kini mao ang kahayag; ug kon unsa ang may kahayag, kini maayo, tungod kay kini masabtan, busa kamo kinahanglan masayod nga kini maayo” (Alma 32:35).
Imahe ni Kristo, ni Heinrich Hofmann
Pangitaa ang Manluluwas diha sa Kangitngit
Sa dihang ang akong higala nga si Kamryn 10 anyos pa, natakboyan siya og talagsaon apan permanente nga sakit sa mata nga naka-impeksiyon sa cornea sa iyang tuong mata.4 Usahay, kon ang kasakit nga nag-uban niini magpirme ug dili na makaya, si Kamryn dili makasugakod sa bisan unsang kahayag. Ang iyang mga ginikanan, kay nabalaka nga basin mabuta siya, mopangitngit sa mga bintana sa iyang lawak-katulganan aron makomportable siya. Ang inahan ni Kamryn, si Janna, mihinumdom:
“Mga upat ka bulan human sa iyang diagnosis, misulod ko sa iyang ngitngit nga lawak. Samtang ang akong mga mata nag-adjust, akong makita si Kamryn nga nagtikongkong sa iyang higdaanan. Hilabihan kasakit ang iyang gibati nga wala siya maglihok o gani mohilak sa dihang nakadungog siya nako nga misulod. Naghigda lang siya didto nga ang duha ka mata nagpiyong nga hubag kaayo.
“Miluhod ko sa kilid sa iyang higdaanan, migunit sa iyang kamot, ug gipislit og tulo ka higayon—among sekreto nga timailhan alang sa ‘Gimahal ka nako.’ Kasagaran mobalos siya sa pagpislit og upat ka higayon alang sa ‘Mas gimahal ka nako,’ apan wala siya mobalos. Nasakitan gayod kaayo siya. Nagdagayday ang mga luha sa akong mga aping, nagtan-aw ko sa akong kanhi lagsik nga 10 anyos nga nagtikongkong. Hilabihan ang akong kaguol.”
Si Janna nag-ampo sa hilom, kinasingkasing nga pag-ampo.
“Miingon ko sa Langitnong Amahan nga ako nasayod nga Siya ang labing nasayod, apan ako nag-ampo, ‘Palihog tabangi siya.’ Samtang naglingkod ko didto nga nag-ampo, mibati ko og kainit ug kahupayan. Mibati ko og kakalma samtang naghunahuna ko mahitungod sa Manluluwas nga si Jesukristo: ‘Siya ang kahayag. Pangitaa Siya diha sa kangitngit.’”
Si Janna mihangad ug mihunghong sa dunggan ni Kamryn: “Kinahanglan nimong pangitaon ang Manluluwas diha sa kangitngit.”
Human niana, nakatulog si Kamryn nga naminaw sa mga himno ug sa mga kasulatan diha sa library nga app sa Simbahan.
Sa higayon nga ang impeksiyon sa iyang mata mograbe, si Kamryn mangita sa Manluluwas diha sa kangitngit.
Litrato pinaagi sa maayong kabubut-on sa pamilya ni Kamryn
Ang sakit ni Kamryn dili ra motukar kasagaran, apan kon mograbe kini, si Janna ug ang iyang bana, si Darrin, mohupay niya ug usab mobutang og mga habol sa mga bintana sa ibabaw sa iyang higdaanan. Atol niadtong mga panahon sa kasakit, si Kamryn moingon, “Mangita lang ko sa Manluluwas diha sa kangitngit.”5
Kon ang kinabuhi morag anaa sa “usa ka mangitngit ug awaaw nga kamingawan” (1 Nephi 8:4), kita usab tingali kinahanglan nga mangita sa Manluluwas diha sa kangitngit. Ako mopamatuod nga ang Basahon ni Mormon, uban sa pagsaksi niini “nga si Jesus mao ang Kristo, ang Dios sa Kahangtoran,”6 mogiya nato ngadto Kaniya. Ako nasayod nga kadtong sinsero nga magbasa sa Basahon ni Mormon, magsunod sa mga pagtulon-an niini, ug mag-ampo mahitungod sa kamatuoran niini mobati sa Espiritu Santo ug molambo ang ilang hugot nga pagtuo, ug pagpamatuod, sa Manluluwas.
Hinaot nga atong ipakita ang atong pasalamat alang niining “labing tukma” nga basahon7 pinaagi sa pagbasa niini, paghatag og bili niini, ug paggamit niini aron sa pagpalig-on sa atong hugot nga pagtuo ug sa hugot nga pagtuo sa uban diha sa Kahayag sa Kalibotan.