Digital Lamang

Usa ka Yano nga Plano alang sa Atong Panaw paingon sa Pagbarog pinaagi sa Kinaugalingong Paningkamot

Ni Alyssa Bradford

Mga Magasin sa Simbahan

“Ang pagbarog pinaagi sa kinaugalingong paningkamot usa ka doktrina sa ebanghelyo ni Jesukristo, ug dili usa ka programa.”¹

usa ka tawo nga nagtabang sa laing tawo sa pagsaka sa bukid

Kanus-a ang kataposang higayon nga kamo mainampoong nagtinguha kon unsaon pag-ugmad sa inyong pagbarog pinaagi sa kinaugalingong paningkamot?

Ang pagbarog pinaagi sa kinaugalingong paningkamot mao “ang abilidad, pasalig, ug paningkamot sa pagsangkap sa espirituwal ug temporal nga mga kinahanglanon sa kinabuhi alang sa kaugalingon ug sa pamilya.”² Importante kini sa plano sa Langitnong Amahan alang nato tungod kay aduna kini dakong epekto sa atong kinabuhi. Sama sa giingon ni Presidente Dallin H. Oaks, Unang Magtatambag sa Unang Kapangulohan, “Bisan unsa pay hinungdan sa atong pagsalig sa uban para sa mga desisyon o mga kapanguhaan nga atong mahimo sa atong mga kaugalingon kini makapaluya kanato sa esprituhanong paagi ug makapahinay sa atong pag-uswag sa unsay gitinguha sa plano sa ebanghelyo kanato.”³ Wala kana magpasabot nga kita dili gayod magkinahanglan og tabang, tungod kay ang pagkahimong makabarog pinaagi sa kinaugalingong paningkamot naglakip sa pagdangop ngadto sa uban samtang kita naglambo. Apan naglakip kini sa paghimo og padayon nga pag-uswag paingon sa pagsangkap sa atong kaugalingon niadtong mga butang nga atong mahimo.

Ang pagkahimong makabarog pinaagi sa kinaugalingong paningkamot mahitabo pagtulon-an human sa usa ka pagtulon-an (tan-awa sa 2 Nephi 28:30). Ania ang pipila ka yano nga mga ideya sa pagtabang nga mapalig-on ang atong pagbarog pinaagi sa kinaugalingong paningkamot.

Sugdi ang Panaw

Kitang tanan kinahanglang magsugod (o magpadayon sa unahan!) gikan sa bisan asa, ug karon mao ang labing maayo nga higayon. Si Presidente Dieter F. Uchtdorf, kanhi Ikaduhang Magtatambag sa Unang Kapangulohan, mitudlo:

“Usa ka karaang proverbio miingon, ‘Ang labing maayo nga panahon sa pagtanom og kahoy mao ang 20 ka tuig kaniadto. Ang ikaduhang labing maayo nga panahon mao karon.’

“Adunay usa ka butang nga talagsaon ug malaumon sa pulong karon. Adunay usa ka butang nga naghatag og gahom sa kamatuoran nga kon kita mopili sa pagdesisyon karon, kita makapadayon sa unahan karon mismong higayona.

“Karon mao ang pinakamaayo nga panahon sa pagsugod nga mahimong tawo nga gusto natong mamahimo—dili lang 20 ka tuig gikan karon apan hangtod sa kahangtoran.”⁴

Kinahanglang iapil nato ang Ginoo ug ang uban nga makagiya nato sa atong panaw. Kita makatinguha sa mainampoon nga paagi aron masayod kon unsay kinahanglang buhaton sa pag-ugmad sa atong pagbarog pinaagi sa kinaugalingong paningkamot. Pananglitan, kita mahimong mobuhat sa mga butang sama sa:

“Pag-ako sa responsibilidad sa [atong] pagpamatuod ni Jesukristo ug sa Iyang ebanghelyo,”⁵ sama sa gitudlo ni Presidente Russell M. Nelson.
Pagkat-on sa pagtahi sa butones diha sa sinina.
Paghimo og badyet ug sunda kini.
Pagkat-on og kahanas alang sa usa ka trabaho.
Pagluto og lami nga pagkaon.
Pagkat-on sa pag-ilis og ligid sa biseklita o sa sakyanan.

Makagahin kita og panahon sa pagsiksik ug pagsabot kon unsa ang atong gustong buhaton ug sa pagtinguha sa unsay gusto sa Langitnong Amahan nga atong buhaton diha sa Iyang kaalam nga nasayod unsay labing maayo alang sa matag usa nato. Ang pagtakda og maalamong mga tumong motabang nato niini nga proseso.

Mopadayon uban sa Pailob, ug Molahutay

Ang mga padulngan dili dayon moabot human sa sinugdanan nga linya. Ang panaw nagkinahanglan og panahon. Ayaw pagpakawala sa kadasig kon ang dalan sa pagbarog pinaagi sa kinaugalingong paningkamot taas o kapoy kaayo.

Si Elder Jeffrey R. Holland sa Korum sa Napulog Duha ka Apostoles miingon: “Kini ang yano ug ang ugdang kaayo nga kamatuoran nga sa dili pa ang importanting mga higayon, sa tinuod sa dili pa ang dagkong espirituhanong mga higayon, adunay mahimong moabot nga kalisdanan, oposisyon, ug kangitngit. Ang kinabuhi adunay pipila niadtong mga higayon alang kanato, ug usahay sila moabot samtang kita nagsingabot og importanting desisyon o importanting lakang sa atong kinabuhi.”⁶

Kon kita nanglimbasog sa pagkawalay kadasig, mahimo kitang mohunong og kadali. Imbes mosulay sa pagkab-ot sa usa ka dakong tumong, unsa kaha kon kita motutok og usa ka butang sa usa ka higayon? Tingali ang usa ka paagi nga mouswag ngadto sa atong kataposang tumong mao ang pag-ugmad sa emosyonal nga kalig-on; pagkat-on kon unsaon pagdumala ang tumang kakapoy o pag-ugmad og maayong relasyon sa atong kaugalingon mopalambo lamang sa atong mga panaw sa pagbarog pinaagi sa kinaugalingong paningkamot. O tingali ang atong tumong mao ang pagkat-on nga mas makahinabi sa uban kinsa makatabang nato.

Si Presidente Russell M. Nelson miingon: “Dili kita kinahanglang madismaya kon ang atong pinakamaayong paningkamot sa pagkahimong hingpit karon ingon og hilabihan kalisod ug walay kahumanan. Ang pagkahingpit naghulat. Moabot lamang kini sa hingpit human sa Pagkabanhaw ug pinaagi lamang sa Ginoo.”⁷ Busa padayon. Posible ang kalamboan!

Magsaulog sa Kalamposan

Makakompleto man kita sa taas og termino nga tumong o makabaton og gamayng kadaogan, usa kini ka rason nga magmaya. Kita magmapagarbohon sa atong pag-uswag ug mga kalamposan. Panahon kini sa pagsaulog!

Kinahanglan nga atong hinumdoman nga magpasalamat sa Langitnong Amahan (tan-awa sa 1 Mga Taga-Tesalonica 5:18; Mosiah 26:39) ug sa uban nga mitabang nato nga mahimong makabarog pinaagi sa kinaugalingong paningkamot.

Padayon sa Paglambo

Human magmalamposon, unsay sunod?

Si Elder Hugo E. Martinez sa Seventy miingon:

“Ang pagbarog pinaagi sa kinaugalingong paningkamot usa ka doktrina sa ebanghelyo ni Jesukristo, ug dili usa ka programa. Usa kini ka tibuok kinabuhi nga proseso, ug dili usa lang ka hitabo.

“Kita mamahimo nga makabarog pinaagi sa kinaugalingong paningkamot sa tibuok natong kinabuhi pinaagi sa pagpalambo sa atong pisikal ug emosyonal nga kahimsog, pagpadayon sa atong edukasyon ug panarbaho, ug pagkaandam sa temporal nga paagi [tan-awa sa Kinatibuk-ang Tamdanan nga Basahon, 22.1]. Kini nga tahas matapos ba gayod dinhi sa atong kinabuhi? Dili, tibuok kinabuhi nga proseso kini sa pagkat-on, paglambo, ug pagbuhat. Dili gayod kini matapos, usa kini ka padayon, inadlaw nga proseso.”⁸

Samtang nagpadayon kita sa paglambo, kita ug ang mga sakop sa atong pamilya mapanalanginan og mas dakong pagtuo, kalig-on, ug pagtahod sa kaugalingon. Dayon, sa atong sobra sa pagbarog pinaagi sa kinaugalingong paningkamot, makatabang kita sa uban sa paghimo sa sama.