Bag-ohay lang Milabay ang Komperensiya. Unsay Atong Buhaton Karon?
Mahimong lisod ang pagkahibalo kon unsaon gayod paggamit ang tanang pagtulun-an sa atong kinabuhi.
Ang kinatibuk-ang komperensiya mao ang usa sa atong paborito nga mga panahon sa tuig—kini usa ka labing nindot nga panahon nga mabayaw ug mapahinumdoman sa atong mga panalangin ug mga responsibilidad isip mga disipulo ni Jesukristo. Apan usahay mahimong sayon ang pagkalimot kon para sa unsa, ang mga mensahe ilabi na pagkahuman sa komperensiya!
Si Presidente Russell M. Nelson mipahinumdom kanato sa kaimportante sa kinatibuk-ang komperensiya sa dihang mihangyo siya kanato nga mohimo sa “komperensiya nga panahon sa pagbusog sa mga mensahe gikan sa Ginoo pinaagi sa Iyang mga sulugoon. Pagkat-on unsaon ninyo sa paggamit niini sa inyong kinabuhi.”1
Ang kinatibuk-ang komperensiya mao ang usa ka panahon aron makadawat og inspirasyon, apan importante ang paghinumdom nga kini hinatag sa Dios nga giya. Ang komperensiya mao—gayod ang literal nga—modernong panahon nga pagpadayag ug kasulatan.
Samtang nanamilit kita sa pagkakaron hangtod sa sunod nga komperensiya, unsaon gayod nato sa paggamit ang mga pagtulun-an nga karon lang nato nadungog? Unsaon nato sa pagpadayon sa pagbusog sa mga pulong sa atong minahal nga mga lider, nga dili makapoyan gikan sa pagpaningkamot nga makahimo og sobra ka daghan sa usa lang ka higayon?
Bisan tuod managlahi ang mga kasinatian ug mga kahimtang sa matag usa, ania ang upat ka mga yano nga mga sugyot nga labing mapahimoslan nimo ang kinatibuk-ang komperensiya:
Tun-i Pagbalik ang mga Pakigpulong
Mahimong lisod ang pagpatuhop sa 10 ka oras nga pagpadayag ngadto sa imong kasingkasing ug hunahuna sa usa lang ka higayon! Apan ang unom ka bulan nga gintang sa mga komperensiya naghatag nato og oras aron balikan ang mga pakigpulong ug pagpahinumdom kanato sa labing bag-o nga mga pagtulun-an sa atong propeta ug mga apostol.
Si Presidente Ezra Taft Benson (1899–1994) misugyot, “Sa mosunod nga unom ka bulan, ang inyong komperensiya nga edisyon sa [Liahona] angay nga ibutang tapad sa inyong sumbanan nga mga basahon ug gamiton kanunay.”2
Seguro masurprisa ka sa mga pulong o mga baruganan nga mopatigbabaw alang kanimo sa ikaduhang higayon. Samtang maminaw o magbasa ka sa mga mensahe gikan sa komperensiya sa mosunod nga mga bulan, hangyoa ang Langitnong Amahan nga tabangan ka nga mailhan ang mga leksiyon nga kinahanglan nimong tutokan. Pag-ampo alang sa pagsabot ug giya kon unsaon niini sa paggamit alang gayod kanimo.
Ayaw Ibaliwala ang Imong Mubo nga mga Sulat
Daghan kanato nga magsulat og mubo nga mga sulat o mga impresyon samtang naminaw sa komperensiya, apan pagkahuman, yano kining tugotan nga matabunan ra sa abog. Ang katuyoan nianang mubo nga mga sulat mao ang paghinumdom sa espirituhanong mga kasinatian ug mga impresyon ug pagpamalandong sa mga kamatuoran nga importante alang kanimo.
Paggahin og oras aron regular nga magrebiyo sa mubo nga mga sulat nga imong gihimo (makatabang ang pagtipig niini sa daling makita nga lugar nga dili nimo malimtan) ug pagbuhat sa pipila ka lalom nga pagtuon niana nga mga pakigpulong sa komperensiya nga mohikap sa imong kasingkasing.
Si Presidente Henry B. Eyring, Ikaduhang Magtatambag sa Unang Kapangulohan, mitudlo kanato, ”kon kamo igo nga mosalig sa Dios sa pagpaminaw sa Iyang pagdasig nga mga mensahe, pagkoriher, ug direksiyon gikan sa Iyang mga sulugoon, makaplagan ninyo kini.”3 Ang imong mubo nga mga sulat mahimong magpakita unsa ang gusto sa Ginoo nga imong tutokan. (Ug kon wala pa ikaw magsulat, dili pa ulahi—pagsulat og pipila samtang imong balikan ang mga mensahe!)
Maghimog Plano nga Resonable
Si Presidente Nelson mitudlo kanato, “Kon ang Manluluwas masayod nga gusto gayod ninyong modangop Kaniya—kon Iyang mabati nga ang inyong labing dakong tinguha mao ang pagdawat sa Iyang gahom nganha sa inyong kinabuhi—magiyahan kamo sa Espiritu Santo aron masayod kon unsa gayud ang kinahanglan ninyong buhaton [tan-awa sa Doktrina ug mga Pakigsaad 88:63].”4
Human nimo maila ang mga mensahe nga gibati nimong nagiyahan ka nga trabahoon, paghimo og plano kon unsaon nimo sa paglakip niana nga baroganan o kinaiya diha sa imong kinabuhi. Ayaw palabi pinaagi sa pagbati nga kinahanglan nimong i-apply ang tanan nga mga leksiyon nga nakat-onan sa matag pakigpulong dihadiha dayon. Ang padtakda og piho, makab-ot nga tumong makatabang nimo nga makahimo og makaya nga mga kausaban. Usa ka lakang matag higayon! O, sama sa gitudlo ni Elder Michael A. Dunn sa Seventy “Mas Maayo og Usa ka Porsento!”5
Pagmapailobon ug Pagmakanunayon
Ang kausaban ug pag-uswag kasagaran hinay nga moabot, ug OK ra na! Pagmapailobon sa imong kaugalingon. Ang importanting butang mao ang padayon nga pagsulay ug padayong bukas nga pagkigsulti sa Langitnong Amahan diha sa pag-ampo. Si Elder Dunn mipahinumdom kanato: “Bisan lagmit dili kita mahimong hingpit, kinahanglang determinado kita nga [tugbangan] ang atong pagkamalahutayon sa pagpailob. Buhata kana, ug ang matam-is nga mga ganti sa giusbawan nga pagkamatarong maghatag kaninyo sa hingpit nga kalipay ug kalinaw nga inyong gitinguha.”6
Kon ikaw malahutayon ug mapailobon, imong makita ang kalahian nga mahimo pinaagi sa paggamit sa mga pagtulun-an sa kinatibuk-ang komperensiya sa imong kinabuhi.
Ang tumong sa kinatibuk-ang komperensiya dili lamang ang pagpamati sa pulong sa Dios apan usab sa pagtabang kanato nga mahimong mas maayo nga mga disipulo ni Kristo. Ang paggamit sa mga mensahe diha sa atong kinabuhi mogiya kanato paduol sa Manluluwas, ug ang matag gagmay nga paningkamot nga imong himoon aron sa pagbuhat niana mao ang lakang ngadto sa sakto nga direksiyon. Padayon, ug imong makita nga ang imong hugot nga pagtuo ngadto Kaniya ug ang imong pagsabot sa Iyang ebanghelyo motubo—ug ang imong kinabuhi mausab!