Unsaon Nato sa Pagtugot sa mga Hagit nga Mopalambo, Dili Makapaguba, sa Atong Hugot nga Pagtuo?

Ni Irene Inemesit Ekord

Makahimo kita pagpili nga mas mapaduol ni Kristo latas sa atong mga pakigbisog.

Bag-ohay lang, nagbangotan ang akong ward sa pagtaliwan sa usa ka buotan nga young single adult. Sa akong pagpadulong sa pagbisita sa iyang inahan uban sa kapangulohan sa akong Relief Society, ako naghunahuna kon unsa ang posible nakong masulti kaniya. Ako nag-ampo nga ang Ginoo modasig kanako sa pagpakigbahin og makapabayaw nga mensahe nga makatabang niya nga mobati sa Iyang paghupay.

Sa among pag-abot, akong nakita unsa siya kasubo. Siya kanunay nga malipayon ug matinuoron, apan karon, morag naluya ang iyang pagpamatuod.

Imbis nga mopakigbahin og mensahe, akong gibati nga kinahanglan ako siyang gakson og dugay ug init nga gakos. Ang akong kasingkasing mibati kaniya, ug gusto nako nga mabati niya nga ang Langitnong Amahan nahigugma ug nasayod sa iyang kaguol.

Kini nga kasinatian nagpahinumdom nako sa mga panahon sa kinabuhi nga ang atong mga hagit makapahimo natong magduda kon anaa ba gayod ang Langitnong Amahan alang kanato. Kon lahi ang Iyang pagbuot gikan sa atong gitinguha nga resulta, mahimong makapauyog kini sa atong hugot nga pagtuo ug pagsalig Kaniya, ilabi na atol sa mga panahon sa kaguol o kasakit.

Nagkinahanglan og hugot nga pagtuo ug kaisog ang pagdawat sa kabubut-on sa Langitnong Amahan kaysa sa atong kaugalingong kabubut-on, ilabi na kon ang resulta makapsakit sa atong mga kasingkasing. Apan samtang naglakaw ako pauli gikan sa pagbisita niining nagmasulob-on nga inahan, akong nahinumdoman kini nga mga pulong gikan ni Presidente Russel M. Nelson:

“Pag-ako sa responsibilidad sa inyong pagpamatuod. Trabahoa kini. Angkona kini. Atimana kini. Amumaha kini aron motubo kini. …

“… Bantayi ang mga milagro nga mahitabo sa inyong kinabuhi.”¹

Sa kataposan nasabtan nako nga ang pagpalambo sa akong pagpamatuod mao ang magtugot kanako nga makaangkon og paglaom sa gugma sa Dios kon magsagubang og mga hagit. Ako nasayod nga anaa sa Iyang hunahuna ang labing maayo para nako ug motabang nako sa panahon sa kalisod.

Apan unsaon nato sa pagbuhat niini samtang adunay gibati nga tumang kasakit?

Pagpalig-on sa Akong Pagtuo

Samtang naghunahuna sa mga kasinatian sa akong kinabuhi ug sa unsang paagi ang akong pagpamatuod mitubo pinaagi sa akong mga hagit, akong naamgohan nga adunay pipila ka mga butang nga akong nabansay kon mag-atubang og kalisod:

Motan-aw sa mga hagit inubanan sa mahangtoron nga panglantaw: Kini mahimong lisod buhaton atol sa masakit nga mga emosyon ug mga hagit. Apan pinaagi sa akong mga pakigbisog, ang pagpaningkamot sa pagtan-aw sa mga butang sama sa pagtan-aw sa Dios nakatabang nako nga mapalawman ang akong hugot nga pagtuo kang Jesukristo ug sa Iyang makaabag nga gahom.
Pangitaa Siya sa tanang panahon: Maingon ta nga sa labing lisod nga mga oras sa kinabuhi, akong nalitok ang labing sinsero nga mga pag-ampo, nagtuon og maayo sa mga kamatuoran sa ebanghelyo, ug mas naningkamot pa sa pagpangita ug paggamit sa tambag sa karaan ug moderno nga mga propeta. Apan ang pagbuhat usab niini nga mga butang sa hamugaway nga mga panahon nakatabang nako nga moduol sa Manluluwas kaysa motalikod Kaniya kon magkalisod na. Kitang tanan makahimo nianang pagpili sa pagpangita Kaniya sa mga panahon sa pagpakigbisog ug sa kalinaw—ang pagbuhat sa ingon kanunay nga magpahinumdom kanato sa hingpit nga gugma sa Langitnong Amahan.
Hinumdomi ang mga milagro uban sa pagpasalamat: Labaw sa tanan, ang paghinumdom sa daghang gagmay ug dagko nga mga milagro nga gipanalangin sa Ginoo kanako kanunay nga nagdasig kanako nga mosalig Kaniya ug ipabiling lig-on ang akong hugot nga pagtuo atol sa malisod nga mga panahon. Gani, tungod kini sa mga milagro sa pag-ayo nga Iyang gigasa kanako nga ako gusto nga makigharong aron magpabiling lig-on ang akong hugot nga pagtuo diha ni Jesukristo. Siya daghan kaayo og nahimo kanako ug mihimo og daghang milagro sa akong kinabuhi, ug gusto nakong ipakita ang pasalamat alang sa tanan Niyang gibuhat kanako.

Pag-ako sa Responsibilidad sa Atong Pagpamatuod

Ako walay hingpit nga kaisog o pagpamatuod o pagsalig sa Ginoo, apan ako naningkamot nga makab-ot kana. Ako nasayod nga pinaagi sa malisod nga mga panahon, ang Langitnong Amahan mipanalangin kanako og kalig-on nga magpabiling matinuoron bisan kon ako nagsinati og kasub-anan o kon ang panalangin nga akong giampo wala miabot sa panahon nga akong gusto.

Ako nakahukom nga motugot sa mga hagit ug mga kasakit sa akong kinabuhi nga mopalambo sa akong pagpamatuod ni Jesukristo kaysa mogun-ob niini. Ang kalayo sa magtutunaw lisod atubangon, apan kini tinuod makatabang kanato nga makasabot ug mahimong mas sama sa atong Manluluwas kon mopili kita nga motugot niini.

Ang inahan nga akong gibisita wala mawad-i sa iyang pagpamatuod, apan siya nakigbisog nga makita ang kaluoy sa Dios diha sa iyang kaguol. Akong naamgohan nga ang pagpakita kaniya, pinaagi sa akong gakos, nga siya gihigugma sa Langitnong Amahan ug nako igo na alang kaniya niiana nga higyaon.

Sama sa pahinumdom kanato ni Elder Alan T. Philips sa Seventy: “Kamo anak sa [Langitnong Amahan]. Kon mobati kamo nga nahisalaag, kon kamo dunay mga pangutana o kulang sa kaalam, kon naglisod kamo sa inyong mga kahimtang o nakigbisog sa espirituwal nga mga baroganan, dangop ngadto Kaniya. Pag-ampo Kaniya alang sa kahupayan, gugma, mga tubag, ug direksyon. Bisan unsay gikinahanglan ug bisan asa kamo, ibubo ang inyong kasingkasing ngadto sa inyong Langitnong Amahan.”²

Kanunay nga malisod ang pagbuntog sa atong natural nga kinaiya nga masuko o masagmuyo sa Langitnong Amahan kon dili mahitabo ang atong gusto. Apan ako mopasalig nga samtang kamo mopadayon sa pagtan-aw sa mga butang inubanan sa mahangtoron nga panglantaw, sa pagpangita sa Langitnong Amahan ug ni Jesukristo, ug sa paghinumdom sa mga milagro nga Ilang gihatag alang kaninyo, ang inyong hugot nga pagtuo dili mauyog. Ug ikaw makakita og daghan pa nga milagro, sama sa gisaad ni Presidente Nelson.

Ako adunay personal nga pagpamatuod nga ang pag-atiman sa atong pagpamatuod makatabang nato nga makabuntog latas sa atong labing lisod nga mga panahon.