Ua Faataunuuina le Konafesi ma Ua Mae’a Atu. O Le a Le Mea E Tatau Loa Ona Tatou Faia Nei?
E mafai ona faigata ona iloa le ala e faaaoga moni ai aoaoga uma i o tatou olaga.
O le konafesi aoao o se tasi o taimi tatou te fiafia i ai i le tausaga—o se taimi sili lea e siitia ai ma faamanatu mai ai o tatou faamanuiaga ma tiutetauave o ni soo o Keriso. Ae o nisi taimi e mafai ona faigofie ona galo pe mo, le a le faamoemoega o sāvali aemaise lava pe a maea le konafesi!
Sa faamanatu mai e Peresitene Russell M. Nelson ia i tatou le tāua o le konafesi aoao ina ua ia talosagaina i tatou e faia “konafesi o se taimi o le taumamafa i savali mai le Alii e ala mai i Ana auauna. Ia a’oa’o le auala e faaaoga ai i lou olaga.”1
O le konafesi aoao o se taimi e maua ai musumusuga, ae e tāua le manatua o le taitaiga na tuuina mai e le Atua. O le konafesi—o le mea moni lava—o faaaliga ia ma tusitusiga paia i ona po nei.
O lea la ua tatou faatofa atu nei seia oo i le isi konafesi, e faapefea ona tatou faaaogaina moni aoaoga na faatoa tatou faalogo atu nei lava i ai? E faapefea ona faaauau pea ona tatou taumamafa i upu a o tatou taitai agaalofa, e aunoa ma le lagonaina o le vaivai tele mai le taumafai e fai ni mea se tele i le taimi e tasi?
E ui e tulaga ese aafiaga ma tulaga o tagata uma, ae o ni fautuaga faigofie nei e fa e mafai ona fesoasoani ia te oe e maua ai ni vaega lelei se tele mai konafesi aoao:
Toeiloilo lauga
E mafai ona faigata le faatagaina o le 10 itula o faaaliga e tofatumoanaina i lou loto ma lou mafaufau i le taimi e tasi! Ae o le i ai o le ono masina i le va o konafesi tatou te maua ai le taimi e toe asiasi ai i lauga ma faamanatu mai ia i tatou lava ia aoaoga aupito lata mai, mai lo tatou perofeta ma aposetolo.
Na fautuaina mai e Peresitene Ezra Taft Benson (1899–1994), “Mo le isi ono masina e sosoo ai, ua tatau ona tu lau [Liahona] i lona lomiga o le konafesi, i talaane o au galuega masani ma ia tagatagai soo i ai.”2
Atonu e te ofo i upu po o mataupu faavae lea o le a tu mātila mai ia te oe i le taimi lona lua e te taga’i ma faitau i ai. A o e faalogologo pe faitau i savali mai le konafesi i le aluga o masina na e sosoo ai, ole atu i le Tama Faalelagi e fesoasoani ia te oe e faailoa vaega aoga e tatau ona e taulai atu i ai. Tatalo mo le malamalama ma le taitaiga i auala e mafai ona faatatau patino ai ia te oe.
Aua Le Faatalale i Au Faamatalaga
O le toatele o i tatou e tusia i lalo faamatalaga po o uunaiga a o faalogologo atu i le konafesi, ae a mae’a, e mafai ona faigofie ona tuu atu i na faamatalaga e faataatia ma pefua ai lava. O le uiga o le faamaumauina o na faamatalaga o le manatua lea o aafiaga faaleagaga ma uunaiga, ma mafaufau loloto i upumoni e tulaga ese ia te oe.
Tuu ese se taimi e iloilo soo ai faamatalaga na e faia (e fesoasoani le teuina i se nofoaga e mafai ona e mauaina, o le a le galo ia te oe) ma auai i nisi o suesuega loloto atu o na lauga o le konafesi na pa’i atu i lou loto.
Na aoao mai i tatou e Peresitene Henry B. Eyring, Fesoasoani Lua i le Au Peresitene Sili, “Afai e lava lou faatuatuaina o le Atua e faalogo ai mo Ana savali o le faamalosiauga, faasa’oga, ma le taitaiga mai Ana auauna, o le a e mauaina i latou.”3 O au faamatalaga e mafai ona faaalia ai mea e finagalo le Alii e te taulai i ai. (Ma afai e te lei tusia ni faamatalaga, o lo o i ai pea lava le taimi (e le’i tuai)—tusitusi i lalo ni nai mea a o e toe faitauina ia savali!)
Fai se Fuafuaga e Mafai Ona Faia
Ua aoaoina foi i tatou e Peresitene Nelson, “A silafia e le Faaola e te fia manao moni lava e aapa atu ia te Ia—pe a mafai ona Ia lagonaina o le manao silisili o lou loto o le fia mauaina o Lona mana i lou olaga—o le a taitaia oe e le Agaga Paia ia iloa tonu le mea e tatau ona e faia [tagai i le Mataupu Faavae ma Feagaiga 88:63].”4
O le taimi lava e te faailoaina ai savali ua e lagona le uunaia e galue ai, fatu se fuafuaga mo le auala o le a e faaaofia ai lena mataupu faavae po o le amio i lou olaga. Aua le lofituina i le lagona e pei e manaomia ona e faaaogaina uma lauga taitasi i le taimi e tasi. O le setiina o sini patino ma faigofie ona faatino, e mafai ona fesoasoani ia te oe e faia ai ni suiga talafeagai. Tasi le la’a i le taimi! Po o le, e pei ona aoao mai Elder Michael A. Dunn o le Fitugafulu, “Tasi le pasene e sili atu!”5
Ia Onosai ma Tumau
O suiga ma le alualu i luma e tele ina oo mai lemu, ma e le afaina lena mea! Ia onosai ia te oe lava. O le mea tāua o le taumafai pea ma ia faia se talanoaga matala ma le Tama Faalelagi i le tatalo. Ua faamanatu mai foi e Elder Dunn ia i tatou: “Ma e ui atonu tatou te ono lē atoatoa, ae e tatau ona tatou pulunaunau ia tutusa lo tatou tumau ma le onosai. Ia faia lena mea, ma o le taui suamalie o le amiotonu faateleina o le a aumaia ia te oe le olioli ma le filemu o loo e sailia.”6
Afai e te tumau ma onosai, o le a e vaaia le eseesega lena o le a faia i lou olaga, mai i le faaaogaina o aoaoga ua maua mai i konafesi aoao.
O le sini o le konafesi aoao e le na o le faalogo i le afioga a le Atua ae ia fesoasoani foi ia i tatou ia avea ma ni soo sili atu o Keriso. O le faaaogaina o savali i o tatou olaga e taialaina ai i tatou ia latalata atili atu i le Faaola, ma o taumafaiga laiti uma e te faia ina ia faataunuu ai lena mea o se laasaga i le itulagi sa’o. Faaauau pea, ma o le a e vaaia lou faatuatua ia te Ia ma lou malamalama i Lana talalelei ua tuputupu a’e—ma suia lou olaga!