E Mafai Faapefea Ona Tatou Faatagaina Luitau e Faaleleia, Ae Le o le Faaleagaina, Lo Tatou Faatuatua?

Saunia e Irene Inemesit Ekord

E mafai ona tatou faia le filifiliga e faalatalata atili atu ai ia Keriso e ala i o tatou tauiviga.

Ata

atatusi o se ata i totonu o le ulu o se tamaitai

Talu ai nei, sa faanoanoa ai la’u uarota i le maliu o se talavou nofofua matua lelei. A o ou agai atu e asiasi i lona tina, faatasi ma la’u au peresitene o le Aualofa, sa ou mafaufau loloto po o le a se mea e mafai ona ou fai atu ai ia te ia. Sa ou tatalo ina ia musuia au e le Alii e faasoa atu se savali faagaeetia lea o le a fesoasoani ia te ia e lagona ai Lona faamafanafanaga.

Ina ua ma taunuu atu, sa ou vaaia le matua nutimomoia o ia. Sa matuai fiafia lava ma faamaoni o ia i taimi uma, ae o le taimi nei, sa foliga mai ua vaivai lava lana molimau.

Nai lo le faasoaina atu o se savali, sa ou lagona e tatau ona ou tuuina atu ia te ia se opo umi ma le mafanafana. Sa aapa atu lo’u loto ia te ia, ma sa ou manao ia ona lagonaina e alofa le Tama Faalelagi ia te ia ma sa silafia lona faavauvau.

O lenei aafiaga na faamanatu mai ai ia te au taimi i le olaga e mafai ai e o tatou luitau ona tatou masalosalo pe o i ai moni lava le Tama Faalelagi iina mo i tatou. Pe a ese Lona finagalo mai lo tatou taunuuga manaomia, e ono luluina ai lo tatou faatuatua ma le faalagolago ia te Ia, aemaise lava i taimi o le faavauvau po o le tiga.

E manaomia ai le tele o le faatuatua ma le lototele e talia ai le finagalo o le Tama Faalelagi mo i tatou lava, aemaise lava pe a tiga o tatou loto i le taunuuga. Ae a o ou savali atu i le fale mai le asiasi atu i lenei tina faanoanoa, sa ou manatuaina upu nei mai ia Peresitene Russell M. Nelson:

“Ia pulea lau molimau. Galue i ai. Pulea. Tausi i ai. Faafailele ina ia tuputupu ae. …

“… Ona matau lea o vavega o le a tutupu i lou olaga.”¹

Na iu lava ina ou manatua o le faamalosia o la’u molimau o le mea lea o le a mafai ai ona ou maua le faamoemoe i le alofa o le Atua pe a feagai ma luitau. Ou te iloa o le mea sili ona lelei mo a’u o se mea lea o lo o Ia mafaufau i ai, ma o le a fesoasoani mai ia te au pe a oo mai taimi faigata.

Ae e mafai faapefea ona tatou faia lenei mea a o tatou lagonaina le tele o le tiga?

Toe Poupouina o Lo’u Faatuatua

I le tomanatu ai i o’u aafiaga i le olaga ma le ala na tuputupu ae ai la’u molimau e ala i o’u luitau, sa ou iloa ai sa i ai ni nai mea patino sa ou faataitaia ina ua feagai ma faigata:

Tagai i luitau ma se vaaiga e faavavau: E mafai ona faigata ona faia lenei mea i taimi o lagona tiga ma luitau. Ae e ala i o’u tauiviga, o le taumafai e vaai i mea e pei ona faia e le Atua na fesoasoani ou te faalolotoina ai lo’u faatuatua ia Iesu Keriso ma Lona mana gafatia.
Saili atu ia te Ia i taimi uma: E foliga mai i taimi sili ona faigata o le olaga, ou te faia ai tatalo faamaoni, suesue atili i upumoni o le talalelei, ma tuu atili ai le malosi i le sailia ma le faaaogaina o fautuaga a perofeta anamua ma aso nei. Ae o le faia o nei mea i taimi lelei foi, ua fesoasoani ou te aapa atu ai mo le Faaola nai lo le liliu ese mai ia te Ia pe a oo ina faigata mea uma. E mafai e i tatou uma ona faia lena filifiliga e saili atu ia te Ia i taimi uma e lua o tauiviga ma le filemu—o le faia o lena mea e mafai ai ona faamanatu mai ai pea ia i tatou le alofa atoatoa o le Tama Faalelagi.
Manatua vavega ma le lotofaafetai: O le mea e sili ai, o le manatuaina o le tele o vavega laiti ma le maoae ua faamanuiaina ai au e le Alii, e uunai ai lava a’u i taimi uma e faalagolago ia te Ia ma faatumauina lo’u faatuatua ia tumau i taimi faigata. O le mea moni, ona o vavega o le faamalologa ua uma ona Ia faamanuiaina ai au, o lea ou te fia tau ai e faatumauina le malosi o lou faatuatua ia Iesu Keriso. E tele mea ua Ia faia mo a’u ma faia le tele o vavega i lo’u olaga, ma ou te manao e faaali atu le lotofaafetai mo mea uma ua Ia faia mo a’u.

Puleaina o a Tatou Molimau

E leai so’u lototele atoatoa po o le faatuatua po o le faalagolago i le Alii, ae o loo ou taumafai pea ina ia oo atu iina. Ou te iloa e ala i taimi faigata, ua faamanuiaina ai a’u e le Tama Faalelagi i le malosi e tumau faamaoni ai e tusa lava pe o ou lagonaina le lototiga po o le lē o’o mai foi o faamanuiaga o lo’o o’u tatalo atu ai, i le taimi oute manaomia ai.

Ua ou filifili e faataga luitau ma tiga i lo’u olaga e fausia la’u molimau ia Iesu Keriso nai lo le solia ai o na vaega. E faigata ona feagai ma le afi a le tufuga, ae e fesoasoani moni lava ia i tatou e malamalama ai ma avea atili e faapei o lo tatou Faaola pe afai tatou te filifili e faatagaina.

O le tina sa ou asia e lei aveesea lana molimau, ae sa tauivi o ia e vaai i le agalelei o le Atua e ala i lona faavauvau. Sa ou iloaina o le faaali atu ia te ia, e ala i lena opo, sa alofagia o ia e le Tama Faalelagi ma a’u, sa lava lena mo ia i lena taimi.

E pei ona faamanatu mai e Elder Alan T. Phillips o le Fitugafulu ia i tatou: “O oe o le atalii/afafine [o le Tama Faalelagi]. Afai o e lagona ua e sē, afai o i ai ni au fesili pe ua le o i ai le poto, afai o e tauivi ma ou tulaga, pe o tauivi ma mataupu faavae faaleagaga, liliu atu ia te Ia. Tatalo ia te Ia mo se faamafanafanaga, alofa, tali, ma se taitaiga. Po o a lava mea e manaomia, ma pe o fea lava foi o e i ai, ia liligi atu lou loto i lou Tama Faalelagi.”²

O se tauiviga i taimi uma le taumafai ia saoloto mai lo tatou uiga faalenatura o le ita po o le le fiafia i le Tama Faalelagi pe a le ogatusa mea ma o tatou ala. Ae ou te folafola atu a o faaauau pea ona e vaai i mea i se vaaiga e faavavau, ina ia saili i le Tama Faalelagi ma Iesu Keriso, ma ia manatua ai vavega ua La saunia mo oe, o le a le vaivai lou faatuatua. Ma o le a e vaai atili ai i isi vavega, e pei ona folafola mai e Peresitene Nelson.

E i ai sa’u molimau patino e faapea o le puleaina o a tatou molimau o le a fesoasoani e lagolagoina i tatou i o tatou taimi sili ona faigata.