O Le Ala na Musuia ai e Upu Mulimuli a Lo’u Tama Lo’u Liua
E nofo le tusitala i Namibia.
O upu a perofeta, o faifeautalai, ma lo’u tama na fesoasoani ia te a’u e atiina ae lo’u faatuatua ia Iesu Keriso.
Sa ou siitia atu i se aai tele i Namibia mo lo’u tausaga muamua i le iunivesite. O iina, sa ma nonofo ai ma lo’u uso matua, o se sui O Le Ekalesia a Iesu Keriso o le Au Paia o Aso e Gata Ai.
I se tasi Aso Sa, sa ia valaaulia ai a’u ma te o i le lotu, ma sa ou ioe ou te mulimuli atu ia te ia. Sa ou matauina o tagata uma sa ou feiloai i ai i le fale sa foliga mai sa matua fiafia lava.
Sa faafeiloai atu a’u e lo’u uso i faifeautalai, ma faatulagaina ai se taimi mo se talanoaga. O le mea moni, ou te lei gauai tele atu i le taimi o a la lesona, ma e ui sa uunaia pea au e faifeautalai e tatalo e uiga i mea sa la aoaoina ina ia mafai ona ou iloa pe moni, ou te lei popole e fai.
Na iu lava ina ou lelava i lesona. Sa ou lei faitauina tusitusiga paia pe taumafai e sui mea i lo’u olaga, o lea sa amata ai ona ou aloese mai faifeautalai.
Ae sa ou alu pea i le lotu faatasi ma lo’u uso i nisi taimi. Ma afai e maua mai a’u e alii faifeautalai, o le a ou faia ni alofaga pe aisea ua ou le toe feiloai ai ma i la’ua.
O Se Savali Faamavae
I ni nai tausaga mulimuli ane, sa faafuasei ona ma’i lo’u tama, e aunoa ma ni faailoga o le toe fo’i i se lelei. I se taimi latalata i lona maliu, ae ia faasoa mai se savali ia te a’u ma nai o’u tei. I le ta’ua ai o le Mataio 6:33, sa ia fautuaina ai i matou ia “muai saili le malo o le Atua” ma ta’u mai ia i matou afai matou te amiotonu ma mulimuli ia Iesu Keriso, o mea uma i o matou olaga o le a fetaui lelei, ma i ai i le tulaga e tatau ona i ai.
Ae pagā lea, ou te le’i faatagaina lana savali faamavae e tofatumoanaina seia oo ina ua umi se taimi talu ona maliu o ia.
A o lei maliu lo’u tama, sa ou taumafai e talitonu ia Iesu Keriso ma Lana talalelei, ae ina ua mavae lona maliu, o lo’u faatuatua tuputupu a’e, sa se’e malie ese atu.
O le maliu ai o lo’u tama sa matuai tiga lava. Sa ou lagona le pei ua aluese uma atu le malamalama mai lo’u olaga. Sa ou liliu atu i le ava malosi e faafilemu ai lo’u faavauvau ma lo’u tiga. Sa ou le toe faia lava se mea faamaoni, ma na ou lagonaina lou se’e ese atu ma mamao ese atu ai lava.
Ae i se tasi aso, a o ou i ai i le nofoaga aupito maualalo sa ou i ai, sa oo mai upu mulimuli a lo’u tama i lo’u mafaufau:
“Ia outou saili muamua le malo o le Atua.”
“O le a ea la’u mea o fai i lo’u olaga?” Sa ou mafaufau ai. Sa i ai lo’u tama i lona moega o le a maliu ma sa molimau atu pea i lona faatuatua ia Iesu Keriso. “Aisea e le mafai ai ona ou faia lena lava mea e tasi?”
O le mafaufau ai i lo’u tama na ou manatua ai foi le filemu ma le fiafia na ou vaaia i mata o tagata o le ekalesia i taimi uma lava ou te alu ai i le lotu ma lo’u uso. Sa ou manao i lena lava filemu ma le fiafia.
Sa ou iloaina ua iu lava ina oo i le taimi e manatu mamafa ai i le mauaina o se molimau.
O Se Tali sa Le’i Mafaufauina
Na amata ona matou toe feiloai ma faifeautalai. Sa la taliina le tele o a’u fesili, ma sa amata ona ou faitauina tusitusiga paia sa la valaauliaina a’u e faitau. Sa amata ona ou tatalo atili ma taumafai e aoao atili e uiga i le talalelei a Iesu Keriso. Ina ua la valaaulia a’u e tatalo e uiga i mea sa ou aoaoina, sa ou taliaina le valaaulia.
Ina ua tuua na o au, sa ou tootuli ma faia se tatalo sili ona faamaoni mai tatalo uma na ou faia, ma fesili atu pe moni le Ekalesia. A o ou mafaufau loloto i la’u tatalo, sa faafuasei ona ou lagonaina le malosi o le Agaga. O se leo filemu, itititi—ae sa o’oo’oo—sa musumusu mai i lo’u mafaufau, “Eben, sau, mulimuli mai ia te a’u. O a’u nei o le ala, upumoni, ma le ola.”
Sa ou te’i.
Ina ua ou ta’u atu i faifeautalai e uiga i ai mulimuli ane, sa ou faamatala atu faapea, sa ou manatu o le leo sa ou faalogoina atonu o lo’u lava mafaufau lea o loo taumafai e faamafanafana mai ia te a’u. Sa la faamautinoa mai ia te au e leai—o le Agaga Paia, na taitaiina atu au i le upumoni.
Sa maoa’e le iloaina sa silafia a’u e le Tama Faalelagi ma e mafai ona ou maua se tali faapena. Ae sa ou lagonaina pea e pei sa ou manaomia nisi faamautinoaga e uiga i le upumoni o le talalelei.
O Se La’a o le Faatuatua
A o latalata mai le konafesi aoao, sa valaaulia au e faifeautalai e tusi i lalo soo se fesili sa ia te au ma faalogo lelei mo ni tali.
O le lauga a Peresitene Russell M. Nelson na faatoafilemuina ai o’u masalosaloga uma. Ina ua ia valaaulia i tatou “ia o i luga o le ala o feagaiga ma nofo ai iina,”1 sa ou lagonaina e pei na tau mai e le Tama Faalelagi ia te au e papatiso.
O lea, ina ua mae’a le konafesi, sa ou ta’u atu i alii faifeautalai ua ou saunia. Sa ou masalosalo ia te au lava, o lo’u agavaa, ma lo’u gafatia e sui ai ma avea e faapei o Iesu Keriso, ae a o ou talanoa atu i lo’u epikopo, sa ou iloaina le mea e tatau ona ou faia. O le manatuaina o upu a le perofeta, o le Agaga, ma lo’u tama, sa ou tauaveina ai se la’a o le faatuatua ma sa papatisoina ai e lo’u uso matua. Mulimuli ane, i se tulaga faafiafiaina, sa amata ona ou ola atoatoa i le talalelei.
Ua tuuina mai e le talalelei ia te au tali ma le mafanafana ou te manaomia i le olaga. O le malamalama i le ata o le faaolataga ua ou maua ai le faamoemoe o le a ou toe vaai i lo’u tama i se aso. O sauniga faamanatuga uma lava e pei o lena aso Sa muamua ma lou uso—ou te lagonaina pea lena lava filemu ma le olioli.
A o ou sauni e auauna atu i se misiona, ou te tulimatai atu i le faasoaina atu o le talalelei ma la’u molimau i le lalolagi. Ua ou sauni e faasalalau atu le malamalama o le talalelei—le malamalama lava lea e tasi na tuuina mai ia te au ina ua sili ona ou manaomiaina.