Fakaʻilekitulōnika Pē
Founga Faingofua ʻe 7 ke Fakaʻaongaʻi ai e Tekinolosiá ʻi he Ngāue ʻa e ʻOtuá ki he Fakamoʻuí mo e Hākeakiʻí
Te ke lava ʻi ha ʻaho ʻe fitu, ʻo tokoni ke liliu koe mo liliu ʻa māmani.1
“Te ke fie hoko ko ha konga ʻo e pole lahi tahá, taumuʻa māʻongoʻonga tahá, mo e ngāue māʻongoʻonga taha ʻi māmani he ʻaho ní?”2
ʻI he ʻaho 3 ʻo Sune 2018, naʻe fai ai ʻe Palesiteni Lāsolo M. Nalesoni ʻa e fehuʻi ko ʻení ʻi ha fakataha lotu, ʻo fakaafeʻi ʻa e fakafoʻituituí ke nau kau ʻi he kongakau ʻa e ʻEikí, pe ko hono fakalea ʻe tahá, ke tānaki fakataha ʻa ʻIsileli.
Naʻe pehē ʻe Palesiteni Nalesoni, “Naʻe ʻomai kimoutolu ki māmani ʻi he taimi ko ʻení, ko e taimi mahuʻinga taha ʻi he hisitōlia ʻo e māmaní, ke tokoni ʻi he tānaki fakataha ʻo ʻIsilelí. ʻOku ʻikai ha meʻa ʻoku hoko ʻi māmani he taimí ni ʻe toe mahuʻinga ange ai. … Ko e misiona ʻeni naʻe fekauʻi mai ai koe ki māmaní.”3
Kuó ke fakakaukau nai ki he founga kuo faitāpuekina ai kitautolu ʻe he ʻOtuá ʻaki ʻa e tekinolosiá ke tokoniʻi kitautolu ʻi he ngāue ko ʻení?4 Neongo ʻoku lahi ha ngaahi founga ke fakahoko ai ʻeni, ka ko ha fakakaukau ʻeni ʻe fitu te ke lava ʻo ʻahiʻahiʻi ʻi he uiké ni ke ke kamata ai ʻo kau hoʻo moʻuí kotoa ʻi he ngāue ʻa e ʻOtuá ki he fakamoʻuí mo hākeakiʻí. Manatuʻi ko ha ngaahi fakakaukau faingofua pē ʻeni ke tokoni atu ke ke akoako ai. Fakakaukau ʻi he faʻa lotu pe ko e fē ʻi he ngaahi fakakaukau mo e ngaahi taumuʻa ko ʻení—mo e ngaahi fakakaukau foʻou ʻoku hoko mai kiate koe ʻi he fakahaá—ʻe ʻaonga taha kiate koé.
ʻAho 1: Kumi ha Ngaahi Faingamālie ke Tokoni
ʻOku tau feinga ke tokoni ki he niʻihi kehé ʻo hangē ko Sīsū Kalaisí.
Te tau lava ʻo fanongo ʻi ha ngaahi fakamatala ngutu ki ha ngaahi faingamālie ngāue kehekehe ke tokoni ki ha ngaahi kaungāmeʻa, fāmili mo ha ngaahi kaungāʻapi. ʻI he tokoni ʻa e tekinolosiá, te tau lava ai ʻo maʻu ha ngaahi faingamālie lahi ange ke tokoni ki hotau koló pe kakai ʻi he funga ʻo e māmaní.
Feinga ʻi he ʻahó ni ke kumi ha ngaahi founga ke vahevahe ai ʻa e ʻofa faka-Kalaisí ʻo fakafou ʻi he ngāue tokoní. Kapau ʻe lava, kumi ha ʻekitivitī ngāue tokoni ke fai he ʻahó ni pe kau ki ha ngāue ʻoku ʻamanaki ke fakahoko. Fakaafeʻi ʻa e ngaahi kaungāmeʻá, fāmilí, mo homou uōtí pe koló ke nau kau mai!
Kapau ʻoku ʻikai ke ke fakapapauʻi ʻa e feituʻu ke kamata aí, ʻe lava ke maʻu ʻi he JustServe.org ha ngaahi faingamālie ngāue tokoni ʻi homou feituʻú.
Manatuʻi ʻa e meʻa naʻe akoʻi ʻe Palesiteni Lāsolo M. Nalesoní: “Neongo pe ko e fē feituʻu ʻoku tau nofo aí, ʻoku ongoʻi moʻoni ʻe he kāingalotu ʻo e Siasí ʻa e tuʻunga Fakaetamai ʻo e ʻOtuá mo e tuʻunga fakaetokoua ʻo e tangatá. Ko ia ai, ʻoku maʻu ʻetau fiefia lahi tahá ʻi heʻetau tokoniʻi hotau kāingá, ʻo tatau ai pē pe ko e fē feituʻu ʻoku tau nofo ai ʻi he māmani fakaʻofoʻofá ni.
“Ko e tokoniʻi ʻo e niʻihi kehé—ngāue fakamātoato ke tokangaʻi ʻa e niʻihi kehé ʻo tatau pe lahi ange ʻi heʻetau tokangaʻi kitautolú—ko hotau fiefiaʻangá ia. Te u tānaki atu, ʻo tautautefito, ki he taimi ʻoku ʻikai ke faingamālie aí pea mo e taimi ʻoku tau mavahe ai mei hotau tuʻunga fiemālié. Ko hono moʻui ʻaki ʻa e fekau lahi ko ia hono uá ko e kī ia ke hoko ai ko e ākonga moʻoni ʻa Sīsū Kalaisí.”5
ʻAho 2: Tauhi ke Tolonga ʻa e Hisitōlia Fakafāmilí
ʻI hono fakaʻaongaʻi ʻo e tekinolosia fakaonopōní, te tau lava ʻo tauhi ke tolonga ʻa hotau hisitōliá mo e hisitōlia ʻo ʻetau ngaahi kuí!
Ko e ʻahó ni, fakakaukau ke fai ha taha ʻo e ngaahi meʻa ko ʻení: hiki fakaʻilekitulōnika ha ngaahi ʻīmisi kuo paakí, lekooti mo hiki fakaʻilekitulōnika ha e ngaahi talanoa fakafāmilí, kamata ha tohinoa fakaʻilekitulōnika, pe faitaaʻi mo hiki vitiō ha ngaahi manatu mahuʻinga.
Ko e FamilySearch.org ko ha meʻangāue lelei ia te tau lava ʻo fakaʻaongaʻi ke fakakakato ʻa e ʻekitivitī ko ʻení. Naʻe fakamatalaʻi ʻe ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e uepisaiti FamilySearch “ko ha ngaahi lekooti, ngaahi maʻuʻanga tokoni kuo tānaki, mo e ngaahi tokoni ʻoku faingofua ke maʻu ʻi he komipiutá mo ha ngaahi meʻangāue toʻotoʻo kehekehe; naʻe faʻu ke tokoni ki he kakaí ke nau ʻilo mo lekooti honau hisitōlia fakafāmilí.”6
Te tau lava ʻi he FamilySearch.org, ke ʻilo ʻa e ngāue fakatemipale ʻoku fiemaʻu ke fakahoko maʻa hotau fāmilí pe fakamatala fakahokohoko fakamotuʻalea ke tokoniʻi ha niʻihi kehe ke nau ʻilo ʻa e ngaahi lekooti fekauʻaki mo ʻenau ngaahi kuí.
ʻE lava foki ke tokoniʻi kitautolu ʻe he polokalama FamilySearch Memories mo e FamilySearch Tree ʻi he ngaahi ngāue ko ʻení!
ʻAho 3: Fetuʻutaki ki he Ngaahi Kaungāmeʻá mo e Fāmilí
ʻE lava ke tokoni ʻetau fengāueʻaki mo kinautolu ʻoku tau ʻofa aí ke nau ongoʻi ʻoku nau mahuʻinga mo fiefia. Te tau lava ʻi he tekinolosiá, ke telefoni, text, pe pōpoaki fakahangatonu ki hotau ngaahi kaungāmeʻá mo e fāmilí, ʻo tatau ai pē pe ʻoku nau ofi pe mamaʻo.
Tuku ha kiʻi taimi ʻi he ʻahó ni ke ke telefoni ai pe ʻave ha pōpoaki ki ha taha ʻokú ne fiemaʻu hoʻo angaʻofá, hoʻo houngaʻiá, pe naʻa mo ha kole fakamolemole.
Naʻe pehē ʻe Palesiteni Nalesoni: “ʻI he ʻaho ní, ʻoku ou kole atu kiate kitautolu ke tau feohi mo e niʻihi kehé ʻi ha founga māʻolunga mo māʻoniʻoni ange. … ʻKapau ʻoku ʻi ai ha meʻa ʻoku māʻoniʻoni, fakaʻofoʻofa, pe ongoongo lelei pe feʻunga mo hono vīkivikiʻí’ [Ngaahi Tefito ʻo e Tuí 1:13] te tau lava ʻo lea ʻaki ki ha taha … ʻoku totonu ke hoko ia ko ʻetau tuʻunga moʻui ʻo e fetuʻutakí.”7
ʻAho 4: Vahevahe pea Fakaafeʻi
ʻE lava ke hoko ʻa e mītia fakasōsialé ko ha meʻangāue fakaʻofoʻofa ke fetuʻutaki mo vahevahe ai ha ngaahi pōpoaki langaki moʻui pea mo e ongoongoleleí ki he fānau kotoa ʻa e ʻOtuá.
Naʻe pehē ʻEletā Keuli E. Sitīvenisoni ʻo e Kōlomu ʻo e Kau ʻAposetolo ʻe Toko Hongofulu Mā Uá: “ʻOku tuʻu ʻa e kāingalotu ʻo e Siasí ko e kau fakamoʻoni ʻo e ʻOtuá ʻi he taimi kotoa pē, ʻi he meʻa kotoa pē, pea ʻi he feituʻu kotoa pē. ʻOku taʻe-faʻalaua ʻa e ngaahi faingamālie ke fakahoko ai ʻeni ʻi he ʻuniveesi fakakomipiutá ʻo fakaʻaongaʻi haʻatau ngaahi fakamatala fakalaumālie pe vahevahe ʻa e ngaahi meʻa langaki moʻui naʻe teuteu ʻe ha niʻihi kehe. ʻOku tau fakamoʻoni ʻi he taimi ʻoku tau ʻofa, vahevahe, mo fakaafe ai ʻi he ʻinitanetí. ʻE hoko hoʻo ngaahi tweet, pōpoaki fakahangatonú mo hoʻo ngaahi tohí ko ha taumuʻa māʻolunga mo māʻoniʻoni ange ʻi hoʻo fakaʻaongaʻi ʻa e mītia fakasōsialé ke fakahaaʻi ʻa e founga ʻoku liliu ai ʻe he ongoongolelei ʻa Sīsū Kalaisí hoʻo moʻuí.”8
ʻI he ʻahó ni, te tau lava ʻo feinga ke vahevahe ʻetau fakamoʻoni kia Sīsū Kalaisí, ko ha kupuʻi lea langaki moʻui, pe ko ha lea ne toki fai mei he konifelenisi lahí naʻe ongo fakalaumālie. ʻE lava foki ʻa e ngaahi hivá pe tā valivalí ʻo hoko ko ha ngaahi meʻa fakaʻofoʻofa ke vahevahe.
Naʻe vahevahe ʻe ʻEletā Petinā, “ʻOku ou naʻinaʻi kiate kimoutolu ke fakafonu ʻa māmani ʻaki e ngaahi pōpoaki ʻoku fonu ʻi he māʻoniʻoní mo e moʻoní—ko e ngaahi pōpoaki ʻoku moʻoni, langaki moʻui, mo taau mo hono vikivikiʻí—pea ke tafiʻi ʻa māmani ʻo hangē, ʻaki ha lōmakí.”9
ʻAho 5: Fakatupulaki ʻa e Moʻui Fakafalala pē Kiate Kitá
Ke moʻui fakafalala pē kiate kita, te tau fiemaʻu ai he taimi ʻe niʻihi ha tokoni mei he ngaahi maʻuʻanga tokoni mei tuʻá.
Ko e ʻaho ní, te tau lava ʻo fai ha meʻa ʻe taha ke fakatupulaki ai ʻetau moʻui fakafalala pē kiate kitautolú. Hangē ko ʻení, te tau lava ʻo fakakaukau ke fakamālohia ʻetau fakamoʻoní ki ha tefito pau pe ako ha founga ke fakaleleiʻi ai ha kiʻi mama ʻi ha foʻi vaʻe meʻalele. Te tau lava ʻo fili ke fakakaukauʻi e founga ke feimeʻatokoni ai ki ha kulupu pe ngāueʻi ha ngaahi taukei ʻoku fiemaʻu ki ha ngāue ʻokú ke fakaʻānaua ki ai. Tatau ai pē pe ko e hā te ke filí, palani ke kamata ngāue ki ai, pea fakakaukau ki he founga ʻe lava ke tokoni atu ai e tekinolosiá.
ʻE lava ke hoko ʻa e ngaahi kaungāmeʻá mo e kau mēmipa ʻo e fāmilí ko ha maʻuʻanga tokoni lelei ke ako ha meʻa foʻou. Ka neongo ia, ʻoku ʻi ai e taimi ʻe niʻihi ʻoku ʻikai ke tau maʻu ai ha taha ke tau maʻu ha tokoni mei ai. Neongo ʻoku mahuʻinga ke vakaiʻi pe ʻoku falalaʻanga ha uepisaiti, ka te tau lava ʻo maʻu ha ngaahi vitiō founga ngāue pe ko ha fakahinohino fakahokohoko ʻi ha kiʻi fekumi vave pē.
ʻI heʻetau feinga ko ia ke fakatupulaki ʻa e moʻui fakafalala pē kiate kitá ʻi he ongoongolelei ʻo Sīsū Kalaisí, te tau lava ʻo lau ʻa e folofolá; ngaahi lea mo ha ngaahi fakataha lotu; ngaahi tohi lēsoni Haʻu, ʻo Muimui ʻIate Aú; ngaahi makasini ʻa e Siasí; mo ha ngaahi meʻa lahi ange. ʻOku maʻu kotoa ʻeni ʻi he ChurchofJesusChrist.org pea mo e polokalama Gospel Library. ʻOku ʻi ai foki mo ha ngaahi meʻangāue ki hono hiki ha ngaahi fakamatala, fakaʻilongaʻi (highlight), pe maakaʻi (bookmark) ʻa e ngaahi kupuʻi leá mo ha ngaahi peesi ke tokoniʻi kitautolu. Hili ia, pea te tau lava ʻo lotu fakamātoato ke fakamoʻoniʻi ʻe he Laumālié ʻa hono moʻoni ʻo e meʻa naʻa tau laú pea mo ha fakahā fakafoʻituitui mei he ʻOtuá.
Naʻe pehē ʻe ʻEletā Hiuko E. Mātinesi ʻo e Kau Fitungofulú: “Ko e feinga ke moʻui fakafalala pē kiate kitá ko e konga ia ʻo ʻetau ngāue ʻi he hala ʻo e fuakavá te ne taki ai kitautolu ke tau toe nofo mo e Tamai Hēvaní mo Hono ʻAlo, ko Sīsū Kalaisí. Te ne fakamālohia ai ʻetau tui kia Sīsū Kalaisí pea haʻi fiefia kitautolu kiate Ia ʻi he ngaahi fuakava mo e ngaahi ouau ʻo e fakamoʻuí mo e hākeakiʻí. Ko e moʻui fakafalala pē kiate kitá ko ha tokāteline ia ʻo e ongoongolelei ʻo Sīsū Kalaisí, kae ʻikai ko ha polokalama. Ko ha founga ngāue ia ʻoku tuʻuloa, ʻikai ke fakahoko tuʻo taha pē.”10 Ko e taimi ʻoku fakaʻaongaʻi fakapotopoto ai ʻa e tekinolosiá, ʻe lava ke tokoni ia ʻi heʻetau tulifua he toenga ʻo ʻetau moʻuí ke fakatupulaki ʻa e moʻui fakafalala pē kiate kitá.
ʻAho 6: Hoko Atu ʻEtau Akó
Te tau lava ʻi he ʻahó ni ʻo feinga ke ako ha meʻa foʻou. Fili ha tefito ʻoku makehe pea lau ha fakamatala, sio ʻi ha foʻi vitiō, pe fanongo ki ha podcast. Vakai pe ʻoku ʻi ai ha ngaahi pōpoaki kimuí ni mei he kau palōfitá mo e kau ʻaposetoló fekauʻaki mo e tefito ko iá. Fakakaukau ke vahevahe ʻa e fakamatala foʻou ko ʻení mo ha taha kehe!
ʻE lava ke kau ʻi he ngaahi fakakaukaú hano ako ha lea fakafonua foʻou pe fakaloloto ʻa e mahino ʻi ha tefito fakalaumālie pe fakaako.
Naʻe pehē ʻe Palesiteni Nalesoni, “Ko hoʻomou akó ʻoku fuʻu mahuʻinga fau—kiate kimautolu, kiate kimoutolu, pea ki he ʻOtuá.”11
ʻE lava ke kau ʻi he ngaahi faingamālie kehe ke hoko atu ai ʻetau akó ha lesisita ki ha ako ʻoku māʻolunga ange. ʻOku lahi ha ngaahi kolisi mo ha ngaahi ʻunivēsiti ʻoku nau tuku mai ha ngaahi kalasi ʻi he ʻinitanetí ki ha ngaahi mataʻitohi fakaako. (Ko ha maʻuʻanga tokoni fakaʻofoʻofa ʻa e BYU–Pathway Worldwide ke maʻu ai ha mataʻitohi ʻi he ʻinitanetí ʻi ha totongi fakaʻatuʻi!) ʻOku ʻi ai ha ngaahi uepisaiti ʻe niʻihi ʻoku nau fakaʻatā mai ha ngaahi kalasi taʻetotongi. Ka ʻi hono fakatupulaki ʻetau moʻui fakafalala pē kiate kitautolú, te tau lava fakaʻaongaʻi ʻa e ngaahi uepisaiti falalaʻangá ke tokoni ke tau ako ha meʻa foʻou ke kau ʻi he ako he toenga ʻo ʻetau moʻuí.
ʻAho 7: Fakakaukauloto
ʻI he ʻaho fakaʻosi ʻo e palani ʻaho ʻe fitu ko ʻení, kiʻi tuʻu hifo ʻo fakakaukauloto. Kuó ke tupulaki mo liliu fēfē ʻi hoʻo tokanga taha ki hono fakaʻaongaʻi ʻo e tekinolosiá ko ha konga ʻo e ngāue ʻa e ʻOtuá ki he fakamoʻuí mo e hākeakiʻí? Ko e hā kuó ke ako fekauʻaki mo e tekinolosiá? Lolotonga ʻa e ngaahi taimi ʻokú ke fakaʻaongaʻi ai e tekinolosiá, ʻe tokoni fēfē ia ki hoʻo tānaki fakataha ʻo ʻIsilelí?
Hiki hoʻo ngaahi fakakaukaú ʻi ha pepa pe ʻi he ʻinitanetí ke ke manatuʻi ʻa e meʻa naʻá ke akó.
ʻI heʻetau fakatupulaki ʻetau malava ke fakaʻaongaʻi e mītiá ke paotoloaki e ngāue ʻa e ʻOtuá, ʻe lava ke tau hoko ko ha sīpinga ke muimui ki ai ʻa e niʻihi kehé.
ʻOku pehē ʻe he Mātiu 5:14–16:
“Ko e maama ʻo māmaní ʻa kimoutolu. Ko e kolo ʻoku tuʻu ʻi ha moʻunga, ʻoku ʻikai faʻa fakapuli ia.
“Pea ʻoku ʻikai tutu ha maama, mo tuku ia ʻi he lalo puha fuá, ka ki he tuʻunga māmá; pea ʻoku ulo ia kiate kinautolu kotoa pē ʻoku ʻi he falé.
“Tuku ke ulo pehē hoʻomou māmá ʻi he ʻao ʻo e kakaí, koeʻuhí ke nau mamata ki hoʻomou ngāue leleí, pea fakamālōʻia ʻa hoʻomou Tamai ʻa ia ʻoku ʻi he langí.”
Ko hono vahevahe ʻo e maama ʻo Sīsū Kalaisí ko ha meʻa ia te tau lava ʻo fai ʻi he toenga ʻo ʻetau moʻuí. Ko e hā ʻoku ʻikai ke tau fakaʻaongaʻi ai ʻa e ngaahi maʻuʻanga tokoni kuo foaki mai ʻe he ʻOtuá ke paotoloaki ʻaki ʻEne ngāué?