Fakaʻilekitulōnika Pē: Ngaahi Akonaki ʻa e Kau Taki ʻo e Siasí mei he Mītia Fakasōsialé
Ngaahi Founga Te Tau Lava Kotoa Ai ʻo Fai Ha Lelei ʻi Hotau Tukui Koló
Vakai ki he meʻa kuo akoʻi kimuí ni ʻe he kau palōfita moʻuí mo e kau taki kehe ʻo e Siasí ʻi he mītia fakasōsialé fekauʻaki mo e founga ke fakahoko ai ha liliu ʻi heʻetau hoko ko ha ākonga ʻa Sīsū Kalaisí.
Naʻe akoʻi ʻe Palesiteni Lāsolo M. Nalesoni, “ʻOku tau fehokotaki kotoa, pea ʻoku ʻi ai hotau fatongia kuo foaki mai ʻe he ʻOtuá ke tokoniʻi ke lelei ange ʻa e moʻui ʻa kinautolu ʻoku tau feohí.” Naʻá ne toe pehē, “ʻOku ʻikai fiemaʻu ia ke tau faitatau pe fōtunga tatau ka tau toki feʻofaʻaki. ʻOku ʻikai fiemaʻu ia ke tau felotoi ki ha meʻa ka tau toki feʻofaʻaki. Kapau ʻoku tau maʻu ha ʻamanaki lelei ke toe maʻu ʻa e loto lelei mo e ongoʻi ʻa e faʻahinga ʻo e tangatá ʻa ia ʻoku tau fakaʻamuá, kuo pau ke kamata ia ʻiate kitautolu takitaha, fakafoʻituitui.”1
Kuo lea ʻa e kau taki ʻo e Siasí ʻi he konifelenisi lahí fekauʻaki mo e founga te tau lava ai ʻi heʻetau hoko ko e kau ākonga ʻa Sīsū Kalaisí, ʻo fai ha lelei ki hotau kaungāʻapí, kaungāmeʻá, mo e tukui koló ʻo fakafou ʻi he uouangatahá, ngāue tokoní, mo e ʻofá. Kuo nau vahevahe foki ha ngaahi pōpoaki fekauʻaki mo e ngaahi tefito ko ʻení ʻi he mītia fakasōsialé, kau ai ʻa e ngaahi meʻa ko ʻeni:
Fakaafeʻi ʻa e Fānaú ke Fakahoko ha Lelei ʻi he Māmaní
“Mahalo te ke fakakaukau koeʻuhí ʻokú ke kei siʻi, he ʻikai ke ke lava ai ʻo fai ha ngaahi meʻa maʻongoʻonga. Mahalo ʻokú ke pehē ko e ngāue ʻa e Tamai Hēvaní ʻoku maʻá e kakai lalahí pē. Ka ʻoku ou loto ke ke ʻiloʻi ʻoku kehe ʻa e ʻafio mai ʻa e Tamai Hēvaní mei he meʻa ʻoku tau faí. ʻOku kehe ʻaupito ʻEne ngaahi foungá mei haʻatautolú. Kuó Ne folofola, ‘ʻOku fakahoko ʻe he fanga kiʻi meʻa iiki mo faingofuá ʻa e ngaahi fuʻu meʻa lalahi.’ ʻE lava ke fakaʻaongaʻi koe ʻe he ʻEikí—ʻio, ʻa kimoutolu takitaha—ke fai ʻEne ngāue fakaofo mo mahuʻingá.
Ko ia, ko e hā ha niʻihi ʻo e ʻfanga kiʻi meʻa iiki mo faingofua’ te ke lava ʻo fai ke fakahoko ai ha faikehekehe lahi ʻi he māmaní? Te ke lava ʻo tokoni ki ha taha ʻoku faingataʻaʻia. Te ke lava ʻo ako ʻa e ngaahi akonaki ʻa Sīsū Kalaisí pea talangofua ki ai. Te ke lava ʻo vahevahe ʻa e meʻa ʻokú ke ʻilo fekauʻaki mo e Fakamoʻuí. Te ke lava ʻo tauhi ʻEne ngaahi fekaú pea teuteu he taimí ni ke ʻalu ki he temipalé ʻo papitaiso maʻa hoʻo ngaahi kuí. ʻI hoʻo fai ha taha ʻo e ngaahi meʻa ko ʻení, ʻokú ke tokoni ai ki he Tamai Hēvaní ke tānaki fakafoki ʻEne fānaú kiate Ia.”
Palesiteni Russell M. Nelson, Facebook, Feb. 21, 2021 (vitiō), facebook.com/russell.m.nelson.
Fakaʻapaʻapa ki he Fānau Kotoa ʻa e ʻOtuá
“Lolotonga ʻeku ngāue maʻuʻanga moʻui kimuʻa ko ha toketā tafa mafú, naʻe tuʻo lauiafe ʻeku tuʻu ʻi ha loki tafa. Naʻe aʻu ʻo u tokangaʻi ha kau sōtia ne kafo ʻi he ngaahi ʻiuniti faitoʻo fakavavevave (MASH) ʻi he lolotonga ʻo e Tau ʻi Kōleá. Kuó u ala moʻoni ki he mafu ʻo ha kakai tangata mo fafine tokolahi ʻo ha ngaahi matakali lahi mo ha ngaahi fonua kehekehe ʻi he funga ʻo e māmaní. Ko ʻeku ngaahi lotu ki he ʻOtuá ʻi Heʻene tokoni fakahinohinó, pea mo e tataki fakalaumālie naʻá ku maʻu meiate Ia, naʻe mātuʻaki mahuʻinga ʻi he meʻa kotoa pē. ʻI he ngaahi loki tafa ko iá—ʻa ē naʻe tuʻu taʻepau ai ʻa e moʻuí—naʻá ku ʻiloʻi ai ʻoku tokanga moʻoni ʻetau Tamai Hēvaní ki he taha kotoa ʻo ʻEne fānaú. Ko hono ʻuhingá he ko ʻEne fānau kitautolu.
ʻOku ʻikai liliu ʻe he ngaahi faikehekehe ʻi he tangataʻifonuá, lanú, mo e anga fakafonuá ʻa e foʻi moʻoni ko e ngaahi foha mo e ngaahi ʻofefine moʻoni kitautolu ʻo e ʻOtuá. Pea ʻi heʻeku hoko ko ha muimui mo e fakamoʻoni kia Sīsū Kalaisí, ʻoku mahino lahi ange ai kiate au ʻa e foʻi moʻoni fakalangi ko iá. ʻOku tau talaki fakataha ʻa e fakaʻeiʻeiki ʻo e foha mo e ʻofefine pelepelengesi kotoa ʻo e ʻOtuá. Kuó u ʻosi fakamatalaʻi kimuʻa pea toe fakamatalaʻi pē he ʻahó ni, ko e lau lanú, fakamamafaʻi kehekehe ʻa e tuʻunga tangata pe fefiné, ʻoku fakaemāmani lahi mo ne fakangatangata ʻi ha faʻahinga founga ʻa ʻetau fefakaʻapaʻapaʻi ʻakí. Ko ha faʻahinga ngaohikovia pē pe fetaaufehiʻa ʻaki tuʻunga ʻi he matakalí, tuʻunga tangata pe fefiné, anga fakafonuá, pea ko ha toe faʻahinga meʻa, ʻoku fakahouhau ia ki hotau Tupuʻangá mo fakafepaki ki he fekau lahi ʻuluakí mo e uá——ʻa ia ʻoku totonu ke tau ʻofa ki he ʻOtuá ʻaki hotau lotó kotoa mo hotau kaungāʻapí ʻo hangē pē ko kitautolú.
“ʻOku tau tui moʻoni ki he tuʻunga fakaetamai ʻo e ʻOtuá pea mo e tuʻunga fakatokoua ʻo e tangatá. ʻOku ʻikai fiemaʻu ia ke tau tōʻonga tatau pe fōtunga tatau ka tau toki feʻofaʻaki. ʻE lava pē ʻo tau taʻe-femahinoʻaki ʻi ha meʻa kae ʻikai ke tau loto taʻe-ʻunua. Kapau ʻoku ʻi ai haʻatau ʻamanaki ke faʻu ha loto lelei mo e ongoʻi ʻofa fakaetangata ʻa ia ʻoku tau fakaʻamuá, kuo pau ke kamata ia ʻiate kitautolu takitaha, ʻo taki taha pea pea mo taha taha.
“ʻI heʻetau hoko ko e ngaahi foha mo e ngaahi ʻofefine ʻo e ʻOtuá, ko e ngaahi tokoua mo e tuofāfine taʻengatá, ʻofa ke tau fai e meʻa kotoa pē te tau lava ʻi hotau mālohí ke felangakihakeʻaki, feakoʻaki, mo fakahaaʻi ʻetau fakaʻapaʻapa ki he fānau kotoa ʻa e ʻOtuá. ʻOfa ke tau fekoekoeʻi ʻi he ʻofa mo e ongo fakatokoua.”
Palesiteni Russell M. Nelson, Facebook, Apr. 13, 2023 (vitō), facebook.com/russell.m.nelson.
Fakaulo Atu ʻa e Maama ʻo Hoʻomou ʻAmanaki Lelei ki he Māmaní
“Fehangahangai mo e ngaahi tūkunga fakaemāmani lahí pea mo homou ngaahi faingataʻaʻia fakatāutahá ʻi he ʻamanaki lelei. Fakafisi ke tali ʻa māmani ʻi hono fōtungá. Fakaulo atu e maama ʻo hoʻomou ʻamanaki leleí ki ai pea tanumaki ia ki he tuʻunga ʻoku totonu ke ʻi aí. Hoko ko e maama naʻe ʻomai ai koe ki māmani ke ke aʻusiá, ke ʻoua naʻa teitei tāmateʻi.”
Palesiteni Jeffrey R. Holland, Facebook, Jan. 11, 2023, facebook.com/jeffreyr.holland.
ʻIloʻi ʻOku ʻI ai Maʻu Pē Ha Taha ʻOkú Ne Siʻi Fiemaʻu Ha Kaungāmeʻa
“ʻOku totonu ke hoko ʻa e Siasí ko ha feituʻu ʻo e feohi. Neongo ʻoku tau kehekehe, ka ko ha fāmili pē kitautolu ʻe taha. ʻOku tau kau kotoa ki he ngāué ni. ʻE lava ʻe he fanga kiʻi meʻa īkí—hangē ko ha ʻeva taimi siʻi ʻo kai ʻaisikilimi, maʻu meʻatokoni fakataha, pe ʻeveʻeva takai ʻi he kiʻi anovai ʻo e koló—ʻo fakahoko ha liliu pehē ʻi he moʻui siʻa taha naʻe ʻikai ke ne mei maʻu ʻa e ongoʻi fakakaungāmeʻa mo e ongoʻi ko ia ʻoku kaú. Naʻe hoko moʻoni ia kiate au.
“Ko hotau fatongia ko e ngaahi tokoua mo e tuofāfine ʻi he ongoongoleleí ke ʻiloʻi ʻoku ʻi ai maʻu pē ha taha ʻokú ne siʻi fiemaʻu ha kaungāmeʻa. ʻOku ʻikai faʻa fakatokangaʻi ʻi he taimi ʻe niʻihi ʻa e tokoni ʻo e anga fakakaumeʻá mo e ongoʻi ʻoku talitali leleí. ʻOku ʻikai fiemaʻu ia ke ke taʻelata ka ke toki fakahoungaʻi ʻa e anga fakakaungāmeʻá. ʻOku hanga ʻe heʻetau tokanga ki he ʻtokotaháʻ ʻo ʻai ke tau kakato ko ha kolo ʻo ha Kāingalotu—pea mo ha fānau ʻi he fāmili ʻo ʻetau Tamai Hēvaní.”
ʻEletā Dieter F. Uchtdorf, Facebook, July 30, 2021, facebook.com/dieterf.uchtdorf.
Hiki Hake ʻa Kinautolu ʻOku Mou Feohí
ʻI heʻetau hoko ko ha kau ākonga ʻa Sīsū Kalaisí, ʻoku tau maʻu ai ha fatongia mahuʻinga ke ‘tokoni‘i ʻa e vaivaí, hiki hake ʻa e ngaahi nima ‘oku tautau ki laló, pea fakamālohia ʻa e ngaahi tui ‘oku vaivaí’ [Tokāteline mo e Ngaahi Fuakava 81:5).
“ʻI heʻeku hoko ko ha taha kumi hūfanga tuʻo ua ki muʻa pea toki hoko hoku taʻu 12, ʻi he ʻAho Kumi Hūfanga ko ʻeni ʻo Māmaní, ʻoku ou fakamanatu atu ke ke hiki hake ʻa kinautolu ʻoku mou feohí.
“Fakamafao atu ha nima talitali lelei. Ki he fānau kotoa ʻa e ʻOtuá, fakahaaʻi atu ha tuʻunga makehe ʻo e angaʻofa fakaetangatá, manavaʻofá, mo e ʻofa faka-Kalaisí koeʻuhí ke nau ongoʻi kuo fāifai pea nau aʻu ki ʻapi.”
ʻEletā Dieter F. Uchtdorf, Facebook, June 20, 2023, facebook.com/dieterf.uchtdorf.
ʻOku Mau Fiemaʻu Hoʻomou Tokoní
“Ko hamou tokolahi ʻoku mou lau ʻeni ko e konga ʻo e Toʻu Tangata Z. Kuo mou tupu hake mo ha ʻilo fakanatula ki he ʻinitanetí, ngaahi nāaunau fakaʻilekitulōnika fakapoto, mītia fakasōsialé, mo e ngaahi tekinolosia kehe ʻe pau ke mau toe feinga ai kimautolu toʻutangata motuʻa angé. Kiate kimoutolu, ko e ʻsaiʻiaʼ (like) ʻvahevahé,ʼ (sharing) mo e ʻfetohiʻaki fakahangatonuʼ (direct messaging) ʻoku tatau tofu pē ia mo ha ui, tukituki, mo e faitohí ʻi he ngaahi toʻu tangata lahi kimuʻa ʻiate kimoutolú. Ka ʻi hoʻo ʻilo lahi ko ia ki he māmani fakaʻilekitulōnika ʻokú ke ʻi aí, ʻokú ke maʻu ha faʻahinga meʻa lelei ange—ʻoku mou maʻu ʻa e fakavaʻe ke hoko ko e toʻu tangata lavameʻa taha ʻi hono paotoloaki e palani ʻo e fiefia ʻa ʻetau Tamai Hēvaní ki hono kotoa ʻo ʻEne fānaú. Pea ʻoku mau fiemaʻu hoʻomou tokoní.”
ʻEletā Quentin L. Cook, Facebook, Jan. 26, 2023, facebook.com/quentin.lcook
Vakai ki Tuʻa pea Tāpuakiʻi ʻa e Niʻihi Kehé
“Ko e Kongakau Māmongá ko ha sīpinga lelei ia ʻo hono fai ha ngaahi meʻa faingataʻa mo fakahoko lelei kinautolú. Naʻa nau fehangahangai mo ha ngaahi faingataʻa ʻoku ʻikai faʻa mahino kiate kitautolu—pau pē ko ha ngaahi faingataʻa fakaesino mo ha ngaahi faingataʻa fakalaumālie. Ka naʻa nau ikunaʻi kinautolu. Naʻe ʻikai ke nau lāunga. Naʻa nau ngāue pē. ʻI heʻenau aʻu ki he feituʻu ʻoku hoko ʻi he taimí ni ko Seni Tiekó, [Kalefōnia, USA,] naʻa nau liliu ʻa e koló ʻaki ʻenau ngāue mālohi ke keli ha ngaahi vaitupu, langa ha ʻapiako, mo fakamālohia ʻa e koló.
ʻOku kei fiemaʻu lahi pē he ʻahó ni ʻa e ngaahi lēsoni naʻe ako ʻi he taimi ko iá. ʻOku tau takitaha maʻu ha ngaahi faingataʻa mo ha ngaahi faingamālie ke fehangahangai mo ia. Ka te tau lava ʻo fai ia ʻi he tui kia Sīsū Kalaisi te tau maʻu ha fakahinohino mo ha tokoni ʻi heʻetau fehangahangai mo kinautolú pea pehē ki ha tui ke vakai atu pea faitāpuekina ʻa e niʻihi kehé. Kiate aú, ko ha meʻa mālie he ʻoku fiemau ha tui kae toki lava ke kamata ha faʻahinga meʻa. Ka ʻi he taimi ʻokú ke ngāue ai ʻi he tuí, ʻokú ne fakatupulaki ʻa e tui naʻá ke kamata ʻakí.”
ʻEletā D. Todd Christofferson, Facebook, Feb. 2, 2022, facebook.com/dtodd.christofferson.
Tokoni Foki ke Fakamālohia ʻa e Tui ʻa Kinautolu ʻo e Ngaahi Tui Fakalotu Kehé
“Kuó u fakakaukau ki he Uike Faaitaha ʻo e Tui Fakaemāmani Lahí mo e fakafōtunga ʻo e kakai tuí, ha faʻahinga tui pē, ʻoku nau fai ha tokoni lelei ʻi honau sōsaietí, ʻi māmani. ʻOku nau ngāue tokoni ʻi honau tukui koló. ʻOku meimei ke nau maʻu ha ngaahi fāmili mālohi. ʻOku nau poupouʻi ʻa e akó. ʻOku nau ngāue tokoni. ʻOku nau loto-fiemālie ke fai ha tokoni ki he leleí ʻo makatuʻunga ʻi heʻenau tui fakalotú mo e meʻa ʻoku nau tui ki aí. ʻOku mau loto ke vahevahe mo fakaafeʻi ʻa e taha kotoa ke fanongo ki he ongoongolelei ʻo Sīsū Kalaisi kuo fakafoki maí. Ka ʻi he meʻa kotoa pē, ko e siʻisiʻi tahá, ʻoku tau ʻamanaki ʻe fakamālohia ʻe he kakai kotoa ʻenau lotoʻakí—ʻa ʻenau ngāué—ʻi ha faʻahinga siasi pē pe tui te nau fili ke muimui ki ai.
“Naʻá ku ʻi ha maʻu meʻatokoni hoʻatā mo ʻEletā L. Tomi Peuli ʻi he ngaahi taʻu kuo hilí, ʻa ia naʻá ne fakaafeʻi ai ha kau taki fakalotu ʻi he Teleʻa Sōlekí ke nau fakataha ke fakamālō ange kiate kinautolu pea mo feinga ke nau maheni lelei ange. Ka naʻá ku fuʻu ʻohovale—ʻi he fakaʻosinga ʻo ʻemau maʻu meʻatokoni hoʻataá, naʻá ne meimei tukiʻi e tēpilé, ka naʻá ne pehē mai, ʻʻOku fiemaʻu ke toe mālohi ange homou kakaí. ʻOku fiemaʻu ke mou fakapapauʻi ʻokú mou feingaʻi e tokotaha kotoa pē te mou lavá ke mālohi mo kau mai pea fakamālohia ʻenau tuí mo langaki hake kinautolu ʻi he tuí. ʻE tokoni ia ki he koló. ʻE lelei ia kiate kitautolu kātoa.’ Pea ʻoku ou tui ʻokú ne moʻoni ʻaupito. ʻOku tāpuekina kotoa kitautolu ʻe he faivelenga ʻa e kakai ʻo e tui fakalotu kotoa pē.”
ʻEletā D. Todd Christofferson, Facebook, Feb. 1, 2023 (vitiō), facebook.com/dtodd.christofferson.
Angalelei pea Fai Lelei
ʻI heʻetau hoko ko e kau ākonga ʻa Sīsū Kalaisí, ʻoku fakaafeʻi ai kitautolu ʻe heʻetau fengāueʻaki mo e ʻOtuá ke tau hoko ko ha kakai lelei mo fai ha lelei. Hangē ko ia kuo mou meaʻí, ʻoku fakahoko ʻe hotau Siasí ha tokoni ʻofa fakaetangata ʻo ʻikai makatuʻunga ʻi he matakalí, tui fakalotú pe tangataʻi fonuá. ʻOku tau hoa ngāue mo ha kakai mei he ngaahi tui fakalotu kotoa pē, pe kakai ʻoku ʻikai haʻanau tui fakalotu. ʻOku tau tokoni ki he ngaahi fiemaʻu fakavavevavé mo ia ʻoku taimi lōloá. ʻOku tau ongoʻi ʻa e ngaahi tāpuaki ʻa e langí ʻi heʻetau fakahaaʻi ʻetau ʻofa ki he ʻOtuá ʻi he fakahoko ʻo e ngaahi meʻa kotoa te tau lavá maʻa hotau kāingá, ko Hono ngaahi foha mo e ngaahi ʻofefine, ʻi he feituʻu kotoa pē, ʻi he founga kotoa pē te tau ala lavá.
Kapau ʻokú ke fekumi ki ha ngaahi founga ke ke hoko ai ko ha ‘tokotahaʼ lelei ange, fakakaukau ke download ʻa e app JustServe.org ke maʻu ai ha ngaahi faingamālie ʻoku ofi atu kiate koe.”
ʻEletā Gerrit W. Gong, Facebook, Feb. 12, 2021, facebook.com/gerritw.gong.
Falala ki he ʻEikí ke Fakahoko Totonu Hoʻo Ngaahi Ngāué
“ʻI he lea ʻa ʻEletā ʻĀteni ʻi he konifelenisi lahí, naʻá ne vahevahe ai: … ‘Neongo ʻetau ngaahi ngāue kotoa pē, he ʻikai ke ta lava ʻo fakamoʻui ʻa e tokotaha kotoa, ka te tau lava takitaha ʻo fakahoko ha liliu ki he leleí ʻi he moʻui ʻa ha taha. Ko ha kiʻi tamasiʻi siʻisiʻi naʻá ne foaki ʻa e foʻi mā ʻe nimá mo e mataʻi ika ʻe uá ʻa ia naʻe fafanga ʻaki ʻa e toko nima afé. Te tau ala fehuʻia ʻetau foakí, ʻo hangē ko ia naʻe fai ʻe he ākonga ko ʻAniteluú fekauʻaki mo e maá pea mo e iká, ‘Ka ko e hā ia [ki] he fuʻu tokolahí?’ Sione 6:9 ʻOku ou fakapapauʻi atu: ʻoku feʻunga ʻānoa ia ke foaki pē ke fakahoko ʻa e meʻa ʻokú ke malavá pea toki tuku kia Kalaisi ke Ne fakahoko hoʻo ngāué’ (konifelenisi lahi, ʻOkatopa 2023).
“ʻOku ou fakamoʻoni ko ho taimí, ngaahi talēnití, manavaʻofá, ngaahi koloá, mo e ngaahi maʻuʻanga tokoni fakapaʻangá ko ha konga ia ʻo e fale tukuʻanga koloa ʻo e ʻEikí. Neongo ʻe ngali siʻisiʻi, ka ko hoʻo tokoni ʻoku fai ʻi he ʻofá, te ne faitāpuekina ʻEne fānaú ʻi he tuliki kotoa pē ʻo e māmaní. Te Ne fakaivia ʻetau ngaahi ngāué!”
Palesiteni Camille N. Johnson, Facebook, Oct. 9, 2023, facebook.com/RSGeneralPresident
Hoko ko ha Tokotaha ʻOkú Ne Faʻa Fakahoko ha Lelei
“Hoko ko ha tokotaha ʻokú ne faʻa fakahoko ha lelei.
“ʻI he ʻuluaki ʻaho ʻi he semineli ʻi hoku taʻu hono tolú, naʻe fakatukupaaʻi kimautolu ʻe he faiakó ke mau fakamaheni ki ha taha foʻou ʻi he aʻu ki he fakaʻosinga ʻo e semesitaá.
“ʻOku ou saiʻia ʻi ha meʻa faingataʻa, ko ia naʻá ku fili ai ha taha naʻe kehe ʻaupito meiate au.
Naʻá ku mā, mo ʻi ai haku ngaahi kaungāmeʻa tatau, talu mei he lautohi siʻí, pea naʻá ku saiʻia ʻi he seminelí.
Naʻe hivaʻi ʻe Kēvini ʻa e ngaahi hivá ʻi he leʻolahi taha naʻá ne lavá peá ne talaange kia Misa Haueli ʻe haʻu he ʻaho kotoa pē kapau ʻe palōmesi ange te ne ʻoange ha F ʻi heʻene lipooti kātí. (Naʻe ʻikai fakakaukau hono ngaahi kaungāmeʻá ʻoku fakalata ʻa e seminelí.)
“Naʻá ku pehē leva ke u lue mo Kēvini ki he seminelí pea mo foki, ʻi he ʻaho kotoa pē. Ki he tafaʻaki pē ʻo e tauʻanga meʻalelé. Naʻe ngali faingofua pē. Naʻe faʻa luelue tokotaha maʻu pē. Ko e taimi pē naʻá ma aʻu ai ki he fale akó, naʻá ma takitaha maʻana leva.
“Naʻe ʻikai ke fuoloa ʻa ʻeku fakatokangaʻi ʻa e ʻikai tokolahi ʻa e ngaahi kaungāmeʻa ʻo Kēviní. Ko hono moʻoní, naʻá ku fakatokangaʻi ʻi he ngaahi māhina siʻi hono hokó naʻe toko ua pē. Naʻá ne maʻu meʻatokoni hoʻatā mo kinaua, luelue mo kinaua ʻi he ngaahi holó. Pea hola fakataha mo kinaua ʻi he kalasí. Kae ʻikai ki he seminelí.
“ʻI ha ʻaho ʻe taha, naʻe lue mai ʻa Kēvini mo hono ongo kaungāmeʻá kiate au ʻi heʻeku loká. Naʻe talamai ʻe Kēvini ʻoku fai ʻenau kumi koloa fufū pea naʻá nau fiemaʻu ha hoa ʻe taha ʻo hoku suú. Naʻá ku tui senitolo. Naʻe fepaki mo e ngaahi tuʻutuʻuní ke lue laʻivaʻe holo ʻi he akó. Ka ko Kēviní naʻe ʻikai ko ha faʻahinga tamasiʻi tauhi tuʻutuʻuni. Naʻá ku fakakaukau ki ai ʻi ha ngaahi miniti siʻi peá u ala hifo leva ke vete hoku senitoló. Naʻá ku talaange leva kuo pau ke fakafoki mai hoku sū ko iá ʻi he fakaʻosinga ʻo e kalasi hono uá, ʻo tatau ai pē pe ko e hā.
He ʻikai teitei ngalo ʻiate au ʻa e meʻa hoko naʻe hoko aí. Kuo laka hake ʻeni he taʻu ʻe tolungofulu, mo ʻeku kei manatuʻi pē ʻo hangē naʻe hoko pē ʻaneafí.
Naʻá ne pehē mai, ʻSai pē ia, ʻoku ʻikai ke u fuʻu fiemaʻu ʻe au ho suú.’ Naʻá ne tafoki leva ki hono ongo kaungāmeʻá ʻo talaange ha ngaahi lea he ʻikai toe ngalo ʻiate au: ʻNaʻá ku talaatu ʻoku ʻi ai ha tokotaha ʻi he ʻapiakó ni ʻoku tui mai kiate au.’
“He ko hai ʻokú ne fiemaʻu koe ke ke tui ange kiate kinautolu he ʻaho ni?
“He ko hai ʻokú ne toe fiemaʻu ha kaungāmeʻa?
“Ke toe kolosi mo ia ʻi he tauʻanga meʻalelé?
“Ko e taimi ʻe niʻihi, ʻoku ʻuhinga ʻa e tuʻu ko ha fakamoʻoni ʻo Kalaisí ke maʻu meʻatokoni hoʻatā mo ha taha ʻokú ne fiemaʻu ha kaungāmeʻa, tuʻu ʻo talanoa mo ha taha foʻou, feʻiloaki mo ha taha ʻi he feituʻu ʻoku nofo aí, mo fakahaaʻi ange hoʻo ʻofá kiate kinautolu.
“Hoko ko ha tokotaha ʻokú ne faʻa fakahoko ha lelei.
“ʻOku fiemaʻu koe ʻe he ʻEikí.
“Peá ka ʻokú ke ka fiemaʻu ʻa e fakamanatu ko ʻení he ʻahó ni, te u tui kiate koe.”
Palesiteni Emily Belle Freeman, Facebook, Aug. 22, 2023, facebook.com/youngwomenworldwide.