“Founga Naʻe Tokoni Ai ʻEku Faingataʻá ke Toe Langa Foʻou ʻEku Fakavaʻe ʻo e Tuí,” Liahona, Sepitema 2024.
Kakai Lalahi Kei Talavoú
Founga Naʻe Tokoni Ai ʻEku Faingataʻá ke Toe Langa Foʻou ʻEku Fakavaʻe ʻo e Tuí
Hili haʻaku fehangahangai mo ha ngaahi faingataʻa fakaeʻatamai, fakatuʻasino, mo fakalaumālie mamafa, naʻá ku ʻiloʻi ʻa e ʻuhinga ʻo e maʻu ʻa e fakamoʻuí ʻi hotau Fakamoʻui ko Sīsū Kalaisí.
Naʻá ku ngāue fakafaifekau ʻi Falanisē ʻi he taimi naʻe liliu ai e tūkunga ʻo e māmaní pea hanga ʻe he COVID-19 ʻo fakatupunga hano fakataputapui mamafa ʻa e feʻaluʻakí ʻi he fonuá kotoa. Kuó u fefaʻuhi mo e loto-mafasiá ʻi he kotoa ʻo ʻeku moʻuí, ko ia naʻá ku hohaʻa naʻa fakatupu ʻe he ngaahi tūkunga fakataputapuí ha toe kovi ange ʻa ʻeku ongoʻi loto-mafasiá. Ka ko e ʻuluaki uike ʻo e nofo kolonitiní—ʻa e uike ʻo e konifelenisi lahi fakahisitōlia ʻo ʻEpeleli 2020—ko e taha ia ʻo e ngaahi uike fakalaumālie taha ʻo ʻeku moʻuí.
ʻI heʻeku manatu ki aí, naʻe hangē naʻe hoko e ngaahi aʻusia he uike ko iá ko hano fakamālohia ia au ʻe he ʻEikí ki ha ngaahi faingataʻa lahí.
Naʻe fai ʻe ʻEletā Keuli E. Sitīvenisoni ʻo e Kōlomu ʻo e Kau ʻAposetolo ʻe Toko Hongofulu Mā Uá ha lea ʻi he konifelenisi ko iá fekauʻaki mo e ngaahi monomono ʻe fai ki he fakavaʻe ʻo e Temipale Sōlekí. Naʻá ne fakatatau ʻa hono fakaleleiʻí ki heʻetau moʻuí peá ne kole mai ke tau fakakaukau ki he foʻi fehuʻi ko ʻení:
“Ko e hā ʻa e konga mahuʻinga ʻo hoku ʻulungaanga fakalaumālié mo fakaelotó te ne fakaʻatā au mo hoku fāmilí ke mau kei tuʻu mālohi mo taʻeueʻia, ʻo aʻu ki hono matuʻuaki e ngaahi faingataʻa lahi kuo pau ke hoko ʻi heʻetau moʻuí?”
ʻI heʻeku fanongo ki heʻene leá, naʻe ʻomi ʻe he Laumālié ha ongo te u foua ha ngaahi pole mamafa lolotonga ʻeku moʻuí ʻi ha ngaahi founga pau, ʻo hangē pē ko e temipalé. Ka naʻá ku toe ongoʻi foki kapau te u tafoki ki he ʻEikí lolotonga e ngaahi faingataʻa ko ʻení, te Ne tokoniʻi au ke fakamālohia ʻeku fakavaʻe ʻo e tuí.
Ko e Ongoʻi Faingataʻaʻiá
Hangē pē ko e meʻa ne u ʻamanaki ki aí, naʻe vave ʻeku ongoʻi loto-mafasiá, pea naʻe ʻikai fuoloa kuó u ongoʻi ʻoku ou fihia ʻi ha siakale taʻe-fakangatangata ʻo e fakakaukau ke taonakitá. Naʻá ku ongoʻi faingataʻaʻia fakaeʻatamai, fakaeloto, mo fakalaumālie.
Hili ha māhina ʻe ua ʻo e nofo kolonitiní, naʻe fakaʻau ke toe lelei ange e meʻa kotoa. Mālō mo e ngaahi liliu ʻi hoku tūkungá, hangē ko e faitoʻo ke fakafepakiʻi ʻa e loto-mafasiá pea mo e fakangata ʻo e fakataputapuí, naʻe kamata ke u ongoʻi moʻui lelei fakaeʻatamai. Ka naʻe ʻikai fuoloa mei ai, ne kamata ke u ongoʻi puke peá u fakatokangaʻi ha foʻi pupula lalahi ʻe tolu ʻi hoku lalo mongá.
ʻI he kamataʻangá naʻá ku tukunoaʻi pē ʻa e ngaahi foʻi fakafefeká, ka ʻi he fakaʻau ke kovi ange hoku ngaahi fakaʻilongá, naʻe mahino he ʻikai ke u toe lava ʻo hoko atu ʻi he malaʻe ʻo e ngāue fakafaifekaú. Naʻá ku foki ki ʻapi, ʻa ia naʻe ʻiloʻi vave ai ʻoku ou puke ʻi he kanisā totó—ko e ngungu Hotikiní (Hodgkin’s lymphoma).
Koeʻuhí ko e nunuʻa fakaongonoa ʻo e faitoʻo ke fakafepakiʻi ʻa e loto-mafasiá, naʻá ku taʻetokanga ʻi he kamata ʻa e māhina ʻe ono ʻo hoku faitoʻo kimó.
Ka neongo iá, naʻe kamata ke u fakaʻauʻauhifo fakatuʻasino.
Ko e Toe Langa Foʻou Hoku Fakavaʻe Fakalaumālié
Hili ha taʻu ʻe taha mei he ʻosi hoku faitoʻo kimó, ne kamata ke u ongoʻi moʻui lelei ange fakatuʻasino. Naʻá ku foki ki he akó mo faʻu ha ngaahi palani. Ka kuo liliu ʻeni ʻa e uhu ʻo e mamahi mo e ongonoa fakalaumālie ne u ongoʻi ʻi heʻeku ngāue fakafaifekaú pea mo e lolotonga ʻo e faitoʻo kimó ki ha ongo angamaheni ʻo e taʻe-mahuʻingaʻia ʻi he Tamai Hēvaní mo Sīsū Kalaisi.
Naʻá ku fefaʻuhi mo ʻeku ngaahi ongo fekauʻaki mo e meʻa ne u fouá peá u ongoʻi ʻo hangē kuó Na liʻaki au ʻi he taimi naʻá ku faingataʻaʻia taha aí.
Ka naʻe ʻafioʻi ʻe he Tamai Hēvaní ʻa e ngaahi hala naʻe fiemaʻu ke u foua kae lava ke u moʻui aí.
Naʻá ku ongoʻi ʻo hangē ʻoku ou fāinga mo e toetoenga ʻo e tui mālohi mo e ʻulungaanga longomoʻui naʻá ku maʻu kimuʻá. Naʻá ku ongoʻi ʻoku ʻikai ke u toe lava ʻo mapuleʻi pē au. Naʻe kamata ke fakavaivai hoku lotó ki he feinga ʻa e ʻEikí ke tokoniʻi aú, ka naʻá ku ongoʻi halaia, hohaʻa, mo taʻefeʻunga fakalaumālie koeʻuhí ko ʻeku taʻe-mahuʻingaʻia ʻi he ongoongoleleí.
Hili ʻeku fakalaulauloto ki heʻeku moʻui fakalaumālié ʻi ha ngaahi māhina siʻí, naʻe ueʻi au ke u fai ha fanga kiʻi liliu fakalaumālie iiki ʻi heʻeku moʻuí. Ne u tukunoaʻi pē ʻa e mamahí ʻi ha kiʻi taimi siʻi, ka naʻá ku fakaʻamu ke faitoʻo ʻa e mamahi naʻá ku ongoʻi ʻi hoku laumālié koeʻuhí ko e ngaahi faingataʻa ne u fouá.
Naʻe ʻikai fuoloa kuó u mātā ʻa e toʻukupu ʻo e Tamai Hēvaní ʻi heʻeku moʻuí. Naʻe ʻohake ʻe he ngaahi kaungāmeʻá mo e ngaahi ʻofaʻangá ʻa e kaveinga ʻo e fakamoʻuí, taʻe te nau ʻiloʻi ʻa e ongonoa fakalaumālie naʻá ku ongoʻí. Naʻe vahevahe foki ʻe ha taha ʻiate kinautolu ha lea naʻe fai ʻe ʻIleini S. Māsolo ʻi ha fakataha lotu.
Naʻá ku lau taʻe-fie-lau pē ia
ʻI he hoko ʻa ʻIleini ko ha nēsí, naʻá ne fakahoa ai ʻa e fakamoʻui fakatuʻasinó mo e fakamoʻui fakalaumālié, ʻo ne pehē: “Ko e fakamoʻuí ʻoku ʻikai ko ha faitoʻo ia. Ko e faitoʻó ʻoku maʻa, vave, pea fakahoko ia—he taimi lahi ʻaki ʻa e faitoʻo fakamohé. … Ko e fakamoʻuí … ko ha ngāue ia ʻoku faʻa fakahoko ʻi he moʻuí kotoa ke fakaakeake mo tupulaki neongo ʻa e, pea mahalo koeʻuhí ko e, kātekina ʻa e fakamamahi fakatuʻasinó, fakaelotó, pe fakalaumālié. ʻOku fiemaʻu ki ai ʻa e taimí.”
ʻOku ʻikai ke u tui naʻe hokonoa pē ʻa e fiemaʻu ke faitoʻo kimo hoku kanisaá ʻi ha māhina ʻe onó. Ko e ngaahi nunuʻa ʻo e kimó ʻoku fakalilifu, fakaofo, mo faingataʻa. Ko e meʻa mālié, he naʻe akoʻi mai ʻe heʻeku ako ke tuku ke fakaakeake fakatuʻasino hoku sinó ha tefitoʻi moʻoni mahuʻinga ʻo e fakamoʻui fakalaumālié—ʻa e founga ke fakaʻaongaʻi ai e ʻaloʻofa ʻa Sīsū Kalaisí pea fakaʻatā ha taimi ke fakamoʻui hoku vā fetuʻutaki mo Ia mo e Tamai Hēvaní.
Ko Hono Maʻu e ʻAloʻofa ʻa e Fakamoʻuí
Ko e ʻaloʻofá ko ha tokoni fakalangi, mālohi fakaivia mo fakamālohia, pea mo ha fakamoʻui fakalaumālie ia. Ko ha meʻaʻofa ia mei heʻetau Tamai Hēvaní, naʻe “foaki tuʻunga ʻi he Fakalelei ʻa e ʻEiki ko Sīsū Kalaisí.”
Ko e sīpinga ʻoku ou manako taha ai ʻo hono maʻu ʻe ha taha ʻa e mālohi faifakamoʻui ʻo Sīsū Kalaisí ʻo fakafou ʻi Heʻene Fakaleleí ko ʻAlamā ko e Siʻi. ʻI heʻene tokoto ʻo ʻikai toe ake ʻi ha ʻaho ʻe tolú, ʻo ne fonu ʻi he “ngaahi mamahi ʻo ha laumālie kuo fakamalaʻiaʻí,” naʻá ne manatuʻi ʻa e ngaahi akonaki ʻa ʻene tamaí fekauʻaki mo Sīsū Kalaisí (vakai, ʻAlamā 36:16–17). Naʻá ne ʻuluaki fiemaʻu ha tokoni peá ne tafoki kia Kalaisi, ʻa ia naʻe liliu ai ʻene hala fonongá pea fakaʻatā ai ia ke ne fakaakeake fakalaumālie (vakai, ʻAlamā 36:18–22).
Ko e ʻuluaki sitepu naʻá ku fakahoko ki he fakamoʻui fakalaumālié ko e fekumi ki ha loto-holi ke fetuʻutaki mo e ʻOtuá. Naʻe akoʻi mai ʻe ʻAlamā ʻa e founga ke u kamata aí ʻi heʻene pehē, “Ngāue ʻaki ha kihiʻi konga siʻi ʻo e tuí, ʻio, kapau foki ʻoku ʻikai te mou lava ʻo fai ha meʻa lahi ange ʻi he holi pē ke tuí, tuku ʻa e holí ni ke ngāue ʻiate kimoutolu, kae ʻoua ke mou tui ʻi he anga te mou lava ai ʻo fakaʻatā ha potu ki ha konga ʻo ʻeku ngaahi leá” (ʻAlamā 32:27).
ʻOku ou fakamoʻoni mei heʻeku aʻusia fakatāutahá ʻoku moʻoni ʻa e akonaki ko ʻení.
Te tau lava ʻo fakatupulaki ha holi, tō ha tengaʻi ʻakau (ʻa e folofola ʻa e ʻOtuá), pea fafanga ʻa e tengaʻi ʻakau ko iá kae ʻoua kuo hoko ia ko ha meʻa ʻoku moʻoni mo pau. ʻE faifai pē pea fakatupu e ngaahi fua ʻo ʻetau tui kia Sīsū Kalaisí ʻi he taimi ʻoku tau mātā ai ʻa e ngaahi liliu ʻi heʻetau angafaí, fakakaukaú, tuí, lotó, ʻatamaí, pea mo hotau laumālié. ʻOku hoko leva ʻo langa hotau fakavaʻé ʻiate Ia (vakai, Hilamani 5:12).
Hangē ko e meʻa ne aʻusia ʻe ʻAlamaá, naʻe hoko ʻeku holi ke toe ongoʻi e Laumālié pea mo e fiefia ʻo e ongoongoleleí ke kamata ai ke liliu ʻeku hala fonongá peá u foua ʻa e fakamoʻuí. Talu mei ai, kuo tokoniʻi au ʻe he Fakamoʻuí ke fakaleleiʻi ʻeku ngaahi ongo he kuohilí ʻi heʻeku ako ke tukuange ʻeku ngaahi ongoʻi ʻita ki he ʻOtuá, kiate Ia, pea mo hoku ngaahi vaivaí.
Koeʻuhí ko Ia, kuo toe fakafoki mai ai kiate au ʻa e ngaahi konga ʻo ʻeku moʻuí ne u fakakaukau kuo mole lolotonga ʻeku foua e ngaahi faingataʻá—hangē ko hoku ʻulungāngá, ko ʻeku ngaahi fakaʻamú, pea mo ʻeku ʻofa ʻi he ongoongoleleí—pea kuó u ongoʻi kuo fakamoʻui, fakafoʻou, pea toe fakakakato au.
Ko Ha Fakavaʻe Mālohi Ange
Naʻe hoko ʻa e mamahí mo e ngaahi faingataʻá ke liliu ai au, ka ʻi heʻeku ʻilo ʻa e fakamoʻuí ʻia Sīsū Kalaisí, naʻá ku toe langa foʻou moʻoni ʻa e fakavaʻe ʻo ʻeku tui kiate Iá. ʻI he fakalau ʻa e taimí peá u moʻuí, ʻoku ou ʻiloʻi ʻoku tuʻunga ʻia Sīsū Kalaisi ʻa ʻeku lava ʻo ako ke fiefia neongo ʻeku ngaahi faingataʻá. ʻOku mahino kiate au he taimí ni ko e konga mahuʻinga taha ʻo e foua ha faingataʻá ʻoku ʻikai ko e meʻa ʻokú ne uesia kitautolú pe ko e mamahi ʻoku tau ongoʻí—ka ko e meʻa ʻoku muiaki mai ʻi heʻetau aʻusia ʻa e fakamoʻuí pea mo e toe kamata foʻoú ʻo fakafou ʻi he ʻaloʻofa ʻa e Fakamoʻuí.
Naʻe akoʻi ʻe ʻEletā Petuliki Kealoni ʻo e Kōlomu ʻo e Kau ʻAposetolo ʻe Toko Hongofulu Mā Uá: “Siʻi ngaahi kaungāmeʻa kuo … foua e ngaahi fakamaau taʻetotonu ʻo e moʻuí—te ke lava ʻo kamata foʻou. Naʻe toʻo ʻe Sīsū ʻi Ketisemani mo Kalevale ʻkiate Ia … [ʻa e] loto mamahi mo e faingataʻaʻia kotoa pē kuo faifai angé peá ta fouá’ [Russell M. Nelson, “Ko e Hingoa Totonu ʻo e Siasí,” Liahona, Nōvema 2018, 88], pea kuó Ne ikunaʻi kotoa ia!”
Ko ia ai, ko kimoutolu ʻoku mou ongoʻi loto-mamahí, ʻoku ou kōlenga atu ke mou loto-toʻa, tuʻu maʻu, pea falala ki he ʻEikí mo Hono mālohi faifakamoʻuí. ʻI he fakalau ʻa e taimí, kātakí, pea naʻa mo e kihiʻi loto-holi siʻisiʻi tahá, ʻe lava Heʻene ʻaloʻofá ʻo liliu koe, toe langa foʻou ho fakavaʻé, pea tokoniʻi koe ke ke ongoʻi ʻokú ke toe moʻui.
Ko e meʻaʻofa ia ʻokú Ne foaki kiate kitautolu kotoá.
Ko e tokotaha naʻá ne faʻú ʻoku haʻu mei Kalolaina Tokelau, USA.