Fakakomipiuta Pē: Ngaahi Akonaki ʻa e Kau Taki ʻo e Siasí mei he Mītia Fakasōsialé
Ko e Fakamoʻui ʻo fakafou ʻi he Fakalelei ʻa Sīsū Kalaisí
Vakai ki he meʻa kuo akoʻi mai kimuí ni ʻe he kau palōfita moʻuí mo e kau taki kehe ʻo e Siasí ʻi he mītia fakasōsialé fekauʻaki mo e fakamoʻuí.
Neongo te tau fehangahangai mo ha ngaahi faingataʻa lahi ʻi he moʻui fakamatelié, ka ʻe lava ke ʻomi ʻe he talaʻofa ʻo e fakamoʻui ʻa e Fakamoʻuí ʻa e fiemālie, nonga, mo e fiefia ʻoku tau fiemaʻu ke ikunaʻi ʻaki e ngaahi faingataʻa ko iá. ʻE lava ke fakamoʻui kitautolu mei hotau ngaahi kafo fakalaumālie, fakaʻatamai, fakaeloto, mo fakatuʻasinó ʻi heʻetau tali ʻa e fakaafe ʻa Sīsū Kalaisi ke haʻu kiate Iá.
Kuo akoʻi mai ʻe Palesiteni Nalesoni ʻo pehē:
“Toe ako ʻa e fakamatala ʻo e hā ʻa e Fakamoʻuí ki he kakai Nīfaí ʻi he ongo ʻAmeliká, ʻo hangē ko ia ʻoku lekooti ʻi he 3 Nīfaí. ʻI ha taimi nounou kimuʻa ʻi Heʻene hā ko iá, naʻe ongona Hono leʻó ʻi he lotolotonga ʻo e kakaí, kau ai ʻa e ngaahi lea tautapa ko ʻení:
“‘He ʻikai koā te mou tafoki mai ʻeni kiate au, pea fakatomala mei hoʻomou ngaahi angahalá, ʻo liliu, koeʻuhi ke u fakamoʻui ʻa kimoutolu?
“‘… Vakai, ʻoku mafao atu hoku nima ʻo e ʻaloʻofá kiate kimoutolu, pea ko ia ia ʻe haʻú, te u maʻu iaʼ [3 Nīfai 9:13–14].
“ʻE kāinga, ʻoku fakahoko mai ʻe Sīsū Kalaisi ʻa e fakaafe tatau kiate kimoutolu ʻi he ʻahó ni. ʻOku ou kōlenga atu ke mou haʻu kiate Ia ke Ne lava ʻo fakamoʻui ʻa kimoutolu! Te Ne fakamoʻui ʻa kimoutolu mei he angahalá ʻi hoʻomou fakatomalá. Te Ne fakamoʻui ʻa kimoutolu mei he loto-mamahí mo e ilifiá. Te Ne fakamoʻui ʻa kimoutolu mei he ngaahi kafo ʻo e māmani ko ʻení.”
Kuo lea ʻa e kau taki ʻo e Siasí ʻi he konifelenisi lahí fekauʻaki mo e fakamoʻuí. Kuo nau vahevahe foki ha ngaahi pōpoaki fekauʻaki mo e tefito ko ʻení ʻi he mītia fakasōsialé, kau ai e ngaahi meʻá ni:
Ko Hono Maʻu ʻo ha Fakafiemālie ʻi he Fakalelei ʻa Sīsū Kalaisí
“Lolotonga ʻeku fakataha kimuí ni mo ha kau mēmipa kei talavou ʻo Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, naʻe kole faleʻi ha finemui fekauʻaki mo e fehangahangai mo e ngaahi pole fakaelotó lolotonga ʻene femoʻuekina ʻi he ngāue ʻa e ʻEikí.
“ʻOku ou houngaʻia ʻi hoku kaungāmeʻa foʻou ko Kaló, ʻa ia naʻá ne vahevahe ʻa e founga kuo fakafiemālieʻi ai ia ʻe heʻene mahino ki he Fakalelei ʻa Sīsū Kalaisí ʻi heʻene foua e loto-hohaʻá.”
Vitiō:
Palesiteni ʻOakesi: “ʻI he mālōlō ʻeku tangataʻeikí, naʻe ʻave ʻe heʻeku faʻeé ʻene fānau ʻe toko tolú … ke nofo mo ʻemau ongo kuí koeʻuhí he naʻá ne faingataʻaʻia lahi fakaeʻatamai pea ʻikai ke ne kei lava ʻo tokangaʻi pē ia. Pe, ke toe mahino angé, naʻe ʻikai lava ke ne hoko atu e polokalama mataʻitohi MA naʻá ne kamata ai he taimi ko iá. Pea naʻe pau ke ne maʻu ha tokoni fakafaitoʻo ʻi ha meimei taʻu ʻe ua kae lava ke ne ngāue lelei. ʻA ia, ko ha tūkunga taʻemanonga fakaeʻatamai mafatukituki ia. Pea naʻá ku tupu hake ai koeʻuhí naʻe fakaofo e fakaakeake ʻeku faʻeé mei heʻene fokoutua fakaeʻatamaí peá ne hoko ko ha tokotaha naʻe makehe hono tuʻunga malava fakaeʻatamaí, ʻo ne maʻu ha moʻui fakapalōfesinale ʻa ia naʻá ne tokoni ai ke fokotuʻutuʻu ha ngaahi polokalama fakaako ke tokangaekina e kakai naʻe taʻemanonga fakaeʻatamaí ʻa ia naʻá ne hoko ai ko ha takimuʻa fakapalōfesinale ʻi heʻene moʻuí. Pea ʻoku maʻu ʻe ha kakai ʻe niʻihi ha ngaahi meʻafoaki maʻongoʻonga ange ʻo e nonga fakaeʻatamaí ʻo laka ange ia ʻi ha niʻihi kehe. Mahalo ʻe ʻi ai ha niʻihi te nau fāinga pē ʻi he kotoa ʻo ʻenau moʻuí ʻE ʻi ai ha niʻihi ʻe ala hoko kiate kinautolu ha faingataʻa lahi pea nau ikunaʻi ia, ʻo hangē ko ia ne fai ʻe heʻeku faʻeé. Ka ko e hā ha ngaahi founga ke poupouʻi ai ʻa e tuʻunga nonga fakaeʻatamaí?”
Kalo: “Kuó u aʻusia ha loto-hohaʻa lahi ʻi he kotoa ʻo ʻeku moʻuí. Pea ʻoku ou ongoʻi ai ko ha fehuʻi ʻeni kuó u faʻa fakakaukau ki ai pea kuó u faingataʻaʻia foki ʻi ha ngaahi meʻa kehekehe. Ka ʻi he ngaahi uike ko ʻeni juo maliu atú ʻi he seminelí, kuo mau tokanga taha ki he ako fekauʻaki mo e Fakaleleí. Pea ʻi heʻeku ako fekauʻaki mo Sīsū Kalaisí, pea naʻá ne fuesia e meʻa kotoa pē kuó u ongoʻí, naʻá ku ongoʻi ha fiemālie lahi, ʻi heʻeku ʻiloʻi ko e hā pe ha faʻahinga taʻemanonga fakaeʻatamai te u ongoʻi, ʻi ha faʻahinga ʻuhinga pē, kuó ne ongoʻi foki ia. Pea naʻá ku lava ʻo maʻu ha fiemālie lahi ʻi he meʻa ko iá pea mo ʻeku ʻilo ʻoku ʻikai ke u tuenoá.”
Palesiteni ʻOakesi: “Ko ha fakamatala fakaʻofoʻofa ia ʻo ha konga ʻo e Fakaleleí ʻoku ʻikai fakatokangaʻi ʻe ha kakai tokolahi. Naʻe ʻikai ke Ne mamahi pē koeʻuhí ko ʻetau ngaahi angahalá. Naʻá Ne fuesia hotau ngaahi mamahí, ʻetau taʻefeʻungá, kau ai ʻetau loto-mafasiá mo e loto-hohaʻá. Kuó Ne ongoʻi kotoa ia.”
Palesiteni Dallin H. Oaks, Facebook, Aug. 6, 2023, facebook.com/dallin.h.oaks.
ʻOku ʻOmi ʻe Kalaisi ʻa e Fakamoʻui ki he Laumālié
“Koeʻuhí ko e ngaahi faingataʻaʻia fakaemoʻuilelei ʻa ha taha ʻo e mēmipa ʻofeina homa fāmilí, naʻe toe fakamanatu mai ai kiate au mo Halieta ʻa e fiemaʻu ke falala maʻu pē ki he ʻEikí pea mo e mālohi faifakamoʻui ko Sīsū Kalaisi pē te Ne lava ʻo ʻomí.
“ʻI heʻema fuofua fanongo ʻi he ongoongo fekauʻaki mo e mahakí, naʻá ma loto-mamahi—ka naʻá ma fakatuʻamelie. Naʻe fakapapauʻi mai kiate kimaua ʻe fai ʻe he kau ngāue falemahakí ʻa e meʻa kotoa pē ʻe ala lavá ke faitoʻo ʻa e mahaki fakatuʻasinó. Pea naʻá ma ʻiloʻi ko e ʻaloʻofa ʻa e Fakamoʻuí ko e mālohi ia te ne ʻomi ʻa e fakamoʻui fakalangí ki he laumālié.
“ʻE lava ke tau maʻu kotoa ha fiemālie ʻi hono ʻiloʻi ko e meʻaʻofa ʻa e ʻOtuá ki he faʻahinga kotoa ʻo e tangatá, naʻa mo Hono ʻAlo ko Sīsū Kalaisí, ko ha mālohi faifakamoʻui ʻi he taʻú kakato, kae ʻikai ʻi he Kilisimasí pē mo e Toetuʻú.
“ʻOku ou houngaʻia moʻoni mo Halieta ʻi he hoko ʻa e pōpoaki ʻo e Kilisimasí ko ha pōpoaki ʻo e fiefia mo e fakamoʻui. Te tau lava ʻo falala kia Sīsū Kalaisi ʻi he faʻahitaʻu Kilisimasi ko ʻení, mo e faʻahitaʻu kotoa pē ʻo e taʻú. Te Ne ʻomi ha ʻamanaki lelei mo ha fakamoʻui ki heʻetau moʻuí.
“Ke mou maʻu ha Kilisimasi Fiefia! ʻOfa ke tāpuekina kimoutolu kotoa ʻe he ʻOtuá.”
ʻEletā Dieter F. Uchtdorf, Facebook, Dec. 20, 2023, facebook.com/dieterf.uchtdorf.
Ko e Ngaahi Ola ʻo e Fakatomala Moʻoní ko e Nonga, Fiemālie, Fakamoʻui Fakalaumālie, mo e Fiefia
“ʻOku fiemaʻu ʻe he fakatomalá ʻa e Huhuʻí. ʻOku ʻikai ʻomi ʻe he tafoki mei he koví ha fakamoʻui fakalaumālie kae ʻikai ke tafoki kiate Ia.
“Naʻe akonaki ʻa ʻEselā Tafu Penisoni (1899–1994), ko e palesiteni ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ko e moʻoni ʻoku ʻomi ʻe he fakatomalá ʻa e ngaahi liliu ʻi he tōʻonga fakakaukaú mo e ʻulungāngá, ka ko e liliu pē ʻo e tōʻonga fakakaukaú mo e ʻulungāngá ʻoku ʻikai ko e fakatomalá ia.
“Naʻe pehē ʻe Palesiteni Penisoni, ‘Ko e tui ki he ʻEiki ko Sīsū Kalaisí ko e fakavaʻe ia kuo pau ke kamata ai ʻa e fakatomala fakamātoato mo moʻoní. Kapau ʻoku tau feinga moʻoni ke siʻaki ʻa e angahalá, kuo pau ke tau ʻuluaki tafoki kiate Ia ko e Tupuʻanga ʻo hotau fakamoʻuí.’”
Vitiō:
“ʻI hono ʻiloʻi mo siʻaki ʻo e angahalá, ongoʻi loto-mamahi mo fai ha totongi huhuʻi ki he angahalá, mo vete ʻa e ngaahi angahalá ki he ʻOtuá, pea mo hotau kau taki lakanga fakataulaʻeikí, ʻi he taimi ʻe fiemaʻu aí, ko e ngaahi ʻelemēniti ʻaonga mo mahuʻinga kotoa ia ki he hala ʻo e fakatomalá. Ka neongo ia, ʻoku ʻikai hoko ʻa e ngaahi sitepu mahuʻinga ko ʻení ko ha lisi vakaiʻi pē ʻo e ʻulungāngá te tau lava ʻo fakakakato fakamakēnika, fakavavevave, pea mo fakavaʻivaʻinga pē. Kapau te tau fai e ngaahi meʻá ni pea ʻikai ke tau ʻiloʻi mo fakafalala ki he Huhuʻí mo ʻEne feilaulau fakaleleí, ta ʻoku taʻeʻaonga leva ʻetau ngaahi feinga fakafoʻituitui lelei tahá. Ko e ola ʻo e fakatomala moʻoní ko e nonga, fiemālie, fakamoʻui mo e fakafoʻou fakalaumālie, mo e fiefia.”
ʻEletā David A. Bednar, Facebook, Sept. 8, 2023, facebook.com/davida.bednar.
ʻOku ʻI Ai ʻa Kalaisi—ke Fakafiemālieʻi, Fakamoʻui mo Tokoniʻi Kitautolu ke Tau Hoko ʻo Hangē ko Iá
“ʻI heʻetau feinga ke fakatupulaki ʻa e ngaahi ʻulungaanga faka-Kalaisí mo ohi mai ʻa e ʻofa haohaoa ʻa Kalaisí ke ne tataki ʻetau taumuʻá, ʻoku totonu ke tau fakatokangaʻi ʻoku hoko mai ʻa e fakalakalaká mo e fakaleleiʻí ʻi he fakalau ʻa e taimí pea mo e tokoni fakalangí—ʻi he ʻaloʻofa ki he ʻaloʻofa, mo e ʻaloʻofa maʻá e ʻaloʻofa.
“Ko hono moʻoní, ʻoku tau nimenimavale kotoa ʻi hono fakafehoanaki kia Sīsū Kalaisí. Ka ʻokú Ne kei finangalo pē ʻoku tau taau mo ʻEne tokangá, ʻofá, mo e tokoní, pea ʻi he tokoni ko iá, ʻoku tupulaki leva ʻetau lavameʻá. ʻOku fakaofo ʻa e mahuʻingaʻia fakataautaha ʻa Kalaisi ʻiate kitautolú, ʻo hangē pē ko Hono ngaahi kaungāmeʻá ʻi he ngaahi ʻaho ʻo ʻEne ngāue fakafaifekau ʻi he māmaní.
“ʻOkú Ne kei ʻiate kitautolu neongo ʻoku ʻikai ke tau mamata kiate Ia. Te Ne kei lava pē ʻo tangi fakataha mo fakafiemālieʻi ʻa e houʻeiki fafine kuo mole honau ngaahi tuongaʻané, tokouá, mātuʻá, malí, pe fānaú. ʻOku kei lava pē ke tafe meiate Ia ʻa e mālohi ke fakamoʻui ʻa e houʻeiki fafine mo tangata ʻoku mafao atu ke ala ki he tapa ʻo Hono kofú. ʻOku ʻikai ilifia ʻa Sīsū ia ke feohi vāofi fakakaungāmeʻa.”
ʻEletā D. Todd Christofferson, Facebook, Dec. 10, 2023, facebook.com/dtodd.christofferson.
Fakamoʻui Hili ʻa e Mole ha ʻOfaʻangá
“Ko ʻemau ʻaʻahi ʻi he uiké ni [ʻi Palāsila] mo Kōvana Lesieli Laila ʻo Penamapukó [Siteiti] ko ha aʻusia makehe ia te ma manatuʻimo Kefi ʻo tuʻuloa.
“Naʻe anga fakaʻapaʻapa mo angaʻofa ʻa Kōvana Laila. Naʻá ma fiefia ʻi he kau mai foki ki ai mo ʻEletā mo Sisitā Soni Kosi mei he kau palesitenisī fakaʻēlia ʻo Palāsilá.
“Ka neongo ia, naʻe vave ʻa e hoko ʻa e ʻaʻahi nounou mo anga fakakaumeʻá ko ha meʻa ne mahuʻingamālie ange kiate kimautolu takitaha.
“Ko e meʻa fakamamahí, he naʻe mālōlō ʻa e husepāniti ʻo Kōvana Lailá ʻi he ngaahi mahina siʻi kimuʻá hili ha tuʻu fakafokifā ʻa e tā hono mafú ʻi ʻOkatopa ʻo e 2022. Hangē ko ia naʻe ʻamanaki ʻe hokó, kuo hoko e mālōlō ʻa e husepāniti ʻa Kōvana Lailá ke ne ongoʻi ai mo ʻene fānau iiki ʻe toko uá ha mole lahi mo e loto-mamahi fakaʻulia.
“ʻI hono vahevahe mai ʻe Kōvana Laila ʻene ngaahi ongo ʻo e ʻofá mo e mamahí kiate kimauá, naʻá ma lava ʻo fakapapauʻi ange kiate ia fekauʻaki mo e natula taʻengata ʻo hotau laumālié pea ʻoku kei moʻui pē hono husepānití.
“Naʻá ma vahevahe mo ia ha Tohi ʻa Molomona, pea naʻá ne lau ʻa e ʻAlamā 40:11–12 ʻa ia ʻoku fakamatalaʻi fakaʻofoʻofa ai ʻa e moʻui ʻoku hoko mai kiate kinautolu ʻoku tui kia Sīsū Kalaisi mo muimui kiate Iá. Naʻá ku vahevahe mo ia ʻeku fakamoʻoni fakataautaha ki he Fakamoʻuí.
“ʻI hono fakahaaʻi ʻo e ʻofá mo e fefakaʻapaʻapaʻakí, hili ʻemau fakatahá, naʻe fakafeʻao kimaua ‘e Kōvana Laila ʻi heʻemau lue hifo ʻi he sitepu maka fakaʻofoʻofá ʻo lea māvae mai ʻi muʻa ʻi he Palasi ʻa e Kōvaná.
“ʻOku moʻoni mo fakataautaha ʻaupito ʻa e ongo ‘oku tau maʻu ʻi he taimi ʻo e maté—ka ʻoku pehē pē ʻa e ʻamanaki lelei mo e fakamoʻui ʻoku hoko mai kiate kitautolu koeʻuhí ko Sīsū Kalaisí.
“ʻʻE mate, [ko fēʻia] haʻo huhu? ʻE faʻitoka, [ko fēʻia] ho mālohí?ʼ
“‘Fakafetaʻi ki he ʻOtuá, ʻa ia ʻokú ne foaki ke tau mālohi ʻi hotau ʻEiki ko Sīsū Kalaisí’ (1 Kolinitō 15:55, 57).”
ʻEletā Neil L. Andersen, Facebook, Mar. 9, 2023, facebook.com/neill.andersen.
ʻOku Fakafonu Kitautolu ʻe he Mālohi Faifakamoʻui ʻo e Fakamoʻuí ʻaki ʻa e Melinó, Māmá, Mahinó, Fiefiá, mo e ʻOfá
“Naʻá ku fiefia mo hoku uaifi ko Lōsaná ʻi he fakataha kimuí ni mai mo e fānau ako ʻi BYU–Hauaiʻí. Ne mau fealēleaʻaki ki hono maʻu ʻo e tui kia Sīsū Kalaisí, ʻa e mālohi maʻongoʻonga taha ʻoku malava ke tau maʻu ʻi he moʻui ní.
“ʻOku hanga ʻe he fili ke tui mo fakatupulaki ʻa e tui kia Sīsū Kalaisí, ʻo fakalahi ʻetau malava ke maʻu ʻa e mālohi faka-ʻOtuá, ʻo tatau ai pē ʻa e siva e ngaahi ‘amanakí mo e ngaahi meʻa taʻepau ʻo e moʻuí. Ko e maʻuʻanga ivi ia ʻo e moʻui ʻaki e taumuʻa fakalangí mo e fakakaukau ʻoku taʻengatá.
“ʻI hono tukutaha ʻetau moʻuí ʻi he Fakamoʻuí, te tau maʻu ai ʻa e ngaahi tali ki he ngaahi meʻa loloto mo mahuʻinga ʻoku hohaʻa ki ai hotau laumālié. ʻOku ou fakapapauʻi atu ʻe fakamālohia kitautolu ʻe heʻetau falala mo e tui ki hotau Fakamoʻui ko Sīsū Kalaisí, ke tau laka atu ki muʻa neongo hotau ngaahi faingataʻaʻiá. ʻOkú ne ʻomi ha ʻuhinga ke ʻamanaki lelei mo ʻomi ha fakamaʻunga mālohi ki hotau laumālié, ʻo ʻomi ai ha nonga tuʻuloa ʻi hotau lotó ʻa ia ʻoku fiemaʻu ke tau moʻui ai ʻi he ngaahi ʻahó ni mo maʻu ha mālōlō ʻiate Ia.
“ʻOku fakafou ʻi he Fakamoʻui ko Sīsū Kalaisí mo ʻEne feilaulau fakalelei faifakamoʻuí ʻa ʻetau malava ke tuʻu ʻaliʻaliaki mo mālohí, ʻo aʻu ki heʻetau fehangahangai mo e faingataʻá. ʻOku fakafonu ʻe he mālohi faifakamoʻui ʻo e Fakamoʻuí hotau laumālié ʻaki ʻa e melinó, māmá, mahinó, fiefiá, mo e ʻofá.”
ʻEletā Ulisses Soares, Facebook, Mar. 21, 2023, facebook.com/soares.u.
ʻOku ʻOmi ʻe he Fakamoʻuí ʻa e Fiemālie Fakaelotó ʻi Heʻene hoko ko e ʻEiki Faifakamoʻuí
“Naʻe maʻu ʻe heʻemau kau palesitenisií ʻi he māhina kuo ʻosí ha faingamālie ke lea ʻi he Konifelenisi ʻa e Kakai Fefiné ʻi BYU ʻi he tefito ko e ʻKo Sīsū Kalaisi ʻa e Fakafiemālié.ʼ Naʻá ku tokanga taha ki he tokoni fakaeloto ʻoku ʻomi ʻe he Fakamoʻuí ʻi Heʻene hoko ko e ʻEiki Faifakamoʻuí. Naʻá ku vahevahe ʻa e aʻusia hoku ʻofefine siʻisiʻi tahá mo e ngaahi faingataʻa ki hono tuʻunga moʻui lelei fakaelotó ʻa ia naʻe kamata ʻi heʻene kei siʻí. ʻI he taʻu ʻe nima kuó ne fonongaʻia ai ʻa e fakaakeaké, kuo mahino kiate ia ʻa e founga kuó ne tākaua ai mo e Fakamoʻuí ʻi he kotoa ʻo ʻene moʻuí, ʻo aʻu pē ki he ngaahi taimi naʻá ne ongoʻi ai kuo liʻaki ia ʻe he Fakamoʻuí pea ʻikai ke ne lava ʻo ongoʻi ʻa e Laumālié. Naʻá ne fakatokangaʻi naʻe ʻi ai ʻa Sīsū Kalaisi ʻi he meʻa lelei kotoa pē naʻe hoko ʻi heʻene moʻuí pea ʻi he tokotaha lelei kotoa pē naʻá ne foaki ha nima fietokoní.
“ʻOku lau miliona ʻa e kakai ʻoku nau fekuki mo e ngaahi pole fakaeʻatamaí mo fakaelotó. Ko e taha ʻo e ngaahi konga faingataʻa ʻaupito ʻo e ngaahi pole ko ʻení ko e tuʻunga manuki ʻokú ne ʻākilotoa kinautolú pea mo e loto-fakamaau fefeka mei ha niʻihi ʻo pehē ko ha fehalaaki fakaeʻulungaanga ia pe ko ha fakaʻilonga ʻo e vaivai pe fakapikopiko. ʻOku moʻoni mo fakamamahi tatau pē ʻa e ngaahi nunuʻa ʻo e fokoutua fakaeʻatamaí mo fakaelotó pea mo e fokoutua pe lavea fakatuʻasinó, ka ʻe lava ke siʻisiʻi ange ʻa e hā ki tuʻa ʻa e ngaahi nunuʻá ʻi ha vaʻe naʻe fasi pe kanisā. ʻOku faʻa hoko ʻa e ngaahi uesia ʻo e fokoutua fakaeʻatamaí mo fakaelotó ke faingataʻa ai ki ha taha ke ngāue lelei pe ongoʻi fiefia. ʻOku tala ʻe ha kakai ʻe niʻihi kiate kinautolu ʻoku faingataʻaʻia fakaeʻatamaí ke ʻikunaʻi iaʼ mo ʻfeinga mālohi angeʼ pe ʻmoʻui faivelenga ange.ʼ He ʻikai ke tau lea ʻaki ia ki ha taha ʻoku maʻu he kanisaá pe fasi hono vaʻé.
“Ko hotau Fakamoʻui ko Sīsū Kalaisí, ʻa hotau maʻuʻanga tokoni maʻongoʻonga taha ʻo e fakafiemālié. Ko ha tāpuaki moʻoni ke tau lava ʻo hoa ngāue mo Ia ke ʻomi ha tokoni fakaeloto, fakalaumālie, mo fakatuʻasino ki he niʻihi ʻoku tau feohí. Tau hoko muʻa ko ha meʻangāue ʻo e fakafiemālié ʻi Hono toʻukupú kiate kinautolu ʻoku tau feohí, kau ai ʻa e kau mēmipa hotau fāmilí. ʻOku tokolahi fau ha niʻihi ʻoku nau fiemaʻu e fakafiemālie ʻa e Fakamoʻuí!”
Sisitā J. Annette Dennis, Facebook, June 20, 2023, https://www.facebook.com/RS1stCounselor.
Mālohi Faifakamoʻui ʻo e Loto-houngaʻiá
“Naʻe pehē ʻe Palesiteni Nalesoni, ʻʻOku hala ha faitoʻo ia pe meʻa te ne lava ʻo fakaleleiʻi e ʻū palopalema mo e ngaahi mamahi fakalaumālie lahi ʻoku tau fepaki mo iá.
“ʻNeongo ia, ʻoku ʻi ai ha founga—ko ha meʻa ʻe ngali fakaʻohovale—he ʻoku fehangahangai ia mo hotau natulá. Ka, ko hono ʻaongá kuo ʻosi fakapapauʻi ʻe he kau saienisí pea pehē ki he kakai tangata mo fafine ʻo e tuí.
“ʻKo ʻeku ʻuhinga ʻeni ki he mālohi faifakamoʻui ʻo e loto-houngaʻiá. …
“‘ʻOku lelei ange ke lau hotau ngaahi tāpuakí ʻi hono toutou fakalau ʻetau ngaahi palopalemá. Tatau ai pē pe ko e hā hotau tūkungá, ko e fakahaaʻi ko ia ʻo e loto-houngaʻia ʻi hotau ngaahi faingamālié, ko ha faitoʻo ngāue vave ia mo tolonga fakalaumālie. …
“‘ʻOku fakahaofi ʻapē kitautolu ʻe he loto-houngaʻiá mei he taʻe-fiemālilé, loto-mamahí, mo e mamahí? ʻIkai, ka ʻokú ne fakanonga hotau lotó. ʻOkú ne ʻomi kiate kitautolu ha fakakaukau lahi ange ki he taumuʻa mo e fiefia ʻo e moʻuíʼ (Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, “Palesiteni Russell M. Nelson ʻi he Mālohi Faifakamoʻui ʻo e Loto-houngaʻiá,” 20 Nōvema 2020, vitiō YouTube).
“Hangē ko e lea ʻa Palesiteni Nalesoní, ʻoku fakamoʻoniʻi ʻe he saienisí ʻene ngaahi leá. ʻOku pehē ʻi he uepisaiti ʻa e Mayo Clinic: ʻʻOku fekauʻaki hono fakahaaʻi ʻo e houngaʻiá mo ha ngaahi lelei fakaeʻatamai mo fakatuʻasino. Kuo fakahaaʻi ʻe he ngaahi fakatotoló ʻe lava ʻe he ongoʻi loto-houngaʻiá ʻo fakaleleiʻi ʻa e mohé, ongó mo e tuʻunga maluʻi ʻo e moʻui leleí. ʻE lava ke holoki ʻe he loto-houngaʻiá ʻa e loto-mafasiá, loto-hohaʻá, ngaahi faingataʻaʻia ʻi he felāngaaki ʻi ha mahaki tauhí mo e fakatuʻutāmaki ʻo e fokoutua ʻi ha mahakíʼ (“Can Expressing Gratitude Improve Your Mental, Physical Health?,” Mayo Clinic Health System, Dec. 6, 2022).
“Pea ʻoku fokotuʻu mai ʻe he fakatotolo ʻa BYU ko e houngaʻia ki he ʻOtuá, mo e moʻua kiate Iá, ʻoku mahuʻingamālie ange mo ongo mālohi ange ia ʻi he loto-houngaʻia ʻataʻatā peé. ʻI hono fakalea ʻe tahá, ʻe lava ke toe mālohi ange ki heʻetau moʻuí hono fakalau ho ngaahi tāpuakí mo hono ʻiloʻi honau tupuʻangá.
“Naʻe ui ʻe Palesiteni Sēmisi E. Fausi ʻa e loto-houngaʻiá ʻko hano fakahaaʻi ʻo e tuíʼ mo ʻha tefitoʻi moʻoni faifakamoʻuiʼ (konifelenisi lahi, ʻEpeleli 1990).
“ʻOku ou saiʻia ʻi he veesi ko ʻení ʻi he Tokāteline mo e Ngaahi Fuakava 78:19: ʻPea ko ia ia ʻokú ne tali ʻa e ngaahi meʻa kotoa pē ʻi he loto-fakafetaʻí ʻe ngaohi ia ke nāunauʻia; pea ʻe fakalahi atu ʻa e ngaahi meʻa ʻo e māmaní kiate ia, ʻio ʻo liunga teau, ʻio, ʻo lahi ange.ʼ
“ʻOku kau ʻi he ʻngaahi meʻa kotoa pē’ ʻa e ngaahi meʻa faingataʻá.
“Tau fakatokangaʻi muʻa ʻa e tupuʻanga ʻoku taumalingi mei ai hotau ngaahi tāpuaki kotoa pē. Tau tanumaki muʻa ha ʻ[ʻulungaanga ʻo e] loto-fakafetaʻí,ʼ ʻo hangē ko ia naʻe lea ʻaki ʻe Palesiteni Tōmasi S. Monisoní. ʻOku liliu moʻui moʻoni ia!”
Sisitā J. Anette Dennis, Facebook, Nov. 23, 2023, http://facebook.com/RS1stCounselor.
Ko ha Moʻoni Faifakamoʻui: Ko e Fānau Kitautolu ʻa e ʻOtuá
“Kuo fakahaofi fēfē koe ʻe hono ʻiloʻi ko ha fānau koe ʻa e ʻOtuá?
“Ne mau (Palesiteni Camille N. Johnson, Sisitā Tracy Y. Browning, mo Sisitā Andrea Veronica Muñoz Spannaus) toki maʻu kimuí ni ha faingamālie ke ʻaʻahi ai ki Nesivila, Tenesī. Lolotonga ʻemau ʻi aí, naʻa mau maʻu ʻa e faingamālie ke ʻaʻahi ki he Thistle Farms, ko ha feituʻu ʻokú ne ʻomi ha hūfangaʻanga ʻo e faifakamoʻuí mo e huhuʻí. ʻOku fakahaaʻi ʻe he misiona ʻo e Thistle Farms ʻa e mahino loloto ko ia ʻoku ope atu ʻetau moʻoni taʻengatá ʻi he ngaahi tūkunga naʻá ne mei fakamatalaʻi kitautolú.
“Naʻe haʻu ki heʻemau fakakaukaú e ngaahi lea ʻa Palesiteni Lāsolo M. Nalesoní lolotonga ʻemau ʻaʻahí: ʻSiʻoku ngaahi kaungāmeʻa ʻofeina, ko e fānau fakalaumālie moʻoni kimoutolu ʻa e ʻOtuá. Kuo mou hivaʻi ʻa e foʻi moʻoni ko ʻení talu mei hoʻomou ako ʻa e ngaahi lea ʻo e ʻFānau Au ʻa e ʻOtuá.’ Ka ʻoku tohitongi nai e moʻoni taʻengata ko iá ʻi homou lotó? Kuo fakahaofi nai koe ʻe he foʻi moʻoni ko ʻení ʻi hoʻo fehangahangai mo e ʻahiʻahí?’ (“Ngaahi Fili ki he Taʻengatá” [fakataha lotu fakaemāmani lahi maʻá e kakai lalahi kei talavoú, 15 Mē 2022], Gospel Library).
“ʻI he Thistle Farms, ʻoku ʻikai ngata pē ʻi he hao moʻui ʻa e niʻihi fakafoʻituituí ka ʻoku tali lelei kinautolu ko ha kau tokoni moʻui taau mo mahuʻinga ki ha kolo ʻoku mahino ai ʻoku ʻfakamoʻui ʻa e ʻofáʼ, ʻo hangē ko ʻenau kupuʻi lea manakoá. ʻOku hoko ʻa e ʻofa ko ʻení, ʻa ia ʻoku fakavaʻe ʻi he mahino ʻoku ʻofaʻi kitautolu ʻe he ʻOtuá, ko e meʻa ke ne fakatupunga ʻa e liliu fakataautaha ʻoku fakaofó.”
Sisitā Tracy Y. Browning, Facebook, Dec. 3, 2023, http://facebook.com/Primary2ndCounselor.