Fakakomipiuta Pē: Kakai Lalahi kei Talavoú
Ko Hono Maʻu ha Ivi Matuʻuaki Fakaeloto ʻia Kalaisi lolotonga e Ngaahi Pole Tuʻupau ki Heʻeku Moʻui Leleí
ʻOku nofo ʻa e tokotaha naʻá ne faʻú ʻi Silei.
ʻI he taimi naʻe ʻilo ai ʻoku ou puke ʻi ha mahaki naʻe ʻikai lava ke faitoʻó, naʻá ku tafoki kia Kalaisi ke maʻu ha nonga.
Naʻá ku papitaiso ʻi hoku taʻu hongofulu tupú, pea naʻá ku ʻofa ʻi he ongoongolelei ʻo Sīsū Kalaisí. Ka neongo ia, ʻi he fakalau ʻa e taimí, naʻe siʻisiʻi ange ʻeku ongoʻi ʻa e fakaʻaiʻai ke u moʻui ʻaki ʻa e ongoongoleleí koeʻuhí he naʻe ʻikai kau ha taha ʻi hoku fāmilí ki he Siasí pea naʻe faingataʻa ke u tauhi ʻiate au pē ʻa ʻeku ngaahi tōʻonga moʻui fakalaumālié.
Naʻá ku ʻiloʻi maʻu pē ʻoku moʻoni ʻa e Siasí, ka naʻe ʻikai ke u fie foaki kakato hoku lotó ki ai, he koeʻuhí ko ha tukupā kafakafa ia. Naʻe ʻikai ke u maʻulotu maʻu pē. Naʻe kamata leva ke u fakamuʻomuʻa ʻeku moʻui fakasōsialé kae ʻikai moʻui ʻaki ʻa e ongoongoleleí, pea naʻe faifai pē ʻo ʻikai ke u toe moʻui ʻaki ʻa e ngaahi fekaú. Naʻá ku fakatonuhiaʻi ʻeku ngaahi tōʻongá ʻaki ʻeku pehē ʻoku sai pē ke u fai ha meʻa pē te u fiemaʻú, ko e koloá pē ke u feinga ke hoko ko ha tokotaha lelei.
Ka ne hoko ha ngaahi nunuʻa kovi kiate au koeʻuhí ko e fili ko iá.
Hili ha taimi lōloa ʻo ʻeku mavahe mei he Siasí, naʻe sivi au ʻoku ou maʻu ʻa e vailasi ʻeitisí (HIV). Ko e tūkunga ko ʻení ʻoku tuʻuloa, fakaʻau ke kovi ange, pea ʻoku ʻikai hano faitoʻo. Naʻá ku fuʻu loto-mamahi ʻaupito.
Naʻá ku fai ʻa e ngaahi fehuʻi tatau ʻoku ou tui ʻoku ʻeke ʻe ha tokolahi ʻo kitautolu ʻi he taimi ʻoku tau fehangahangai ai mo ha ngaahi mahaki faingataʻá pe ko e ngaahi faingataʻa kehe ʻoku tuʻuloá: ʻE founga fēfē nai haʻaku toe fiefia ʻi he moʻuí? Te u lava fēfē nai ʻo ʻamanaki lelei ki ha faʻahinga meʻa?
Ko e talí?
Sīsū Kalaisi.
Ko ʻEku Tukupā Kakato ki he Ongoongoleleí
ʻI he momeniti ko ia ʻo e faingataʻá8, ʻi he taimi naʻá ku maʻu ai e aofangatuku ki he mahaki ʻoku ou maʻú peá u tautapa ke maʻu ha fakafiemālié, naʻá ku ongoʻi hangē naʻe ʻafioʻi kakato ʻe he Tamai Hēvaní mo Sīsū Kalaisi ʻa e ongo naʻá ku maʻú. Naʻe ʻomi ʻe he Laumālié ha mahino naʻá ne tokoniʻi au ke u fakakaukauloto ki heʻeku ngaahi filí.
Naʻá ku ʻiloʻi naʻe fiemaʻu ke u toe fakaafeʻi mai ʻa e Fakamoʻuí ki heʻeku moʻuí kapau naʻá ku fiemaʻu ha nonga ʻoku tuʻuloá. Ko ia, naʻá ku fokotuʻu ai haʻaku ʻapoinimeni mo ʻeku pīsopé mo e palesiteni fakasiteikí ke kamata ʻa e ngāue ki he fakatomalá.
ʻI heʻeku ngāue mo e ongo takimuʻa fakaʻofoʻofa ko ʻení, ne u ongoʻi ʻena ʻofá mo e poupoú, pea naʻá ku toe maʻu ʻa e mālohi fakaivia ʻo Sīsū Kalaisí ʻi heʻeku moʻuí. Naʻe tokoniʻi au heʻeku kau takí ke fokotuʻu ha ngaahi taumuʻa. Naʻe kamata ke u fakalakalaka ʻi he hala ʻo e fuakavá. Ko e fuofua taimi ia ʻi heʻeku moʻuí ke u fakatukupaaʻi kakato ai au ki he ongoongoleleí, pea naʻá ku lava ʻo sio ki he faikehekehe ʻiate au ʻi he taimi naʻá ku fakamuʻomuʻa ai hoku vā fetuʻutaki mo e Tamai Hēvaní pea mo e Fakamoʻuí.
Naʻe toki akonaki kimuí ni ʻa Sisitā ʻEimi A. Laiti, ko e Tokoni ʻUluaki ʻi he Kau Palesitenisī Lahi ʻo e Palaimelí, fekauʻaki mo e founga ʻe lava ke tokoniʻi ai kitautolu ʻe he Fakamoʻuí ke tau maʻu ʻa e ʻamanaki leleí mo e fiefiá neongo hotau ngaahi tūkunga faingataʻá:
“Ko Sīsū Kalaisi ʻa e ʻʻamanaki lelei ʻi ho ikuʻangá.ʼ ʻOku ʻikai ha meʻa kuo tau fakahoko pe teʻeki fakahoko ʻoku ʻikai aʻu ki ai ʻa ʻEne feilaulau taʻe-fakangatangata mo taʻengatá. Ko Ia ʻa e ʻuhinga ʻoku ʻikai ke teitei ngata ai ʻetau moʻuí. …
“Ko e moʻui taʻengatá ko e fiefia taʻengata. Ko e fiefia ʻi he moʻuí ni, ʻi he taimi ní—ʻo ʻikai koeʻuhí ko e ngaahi faingataʻa ʻo hotau kuongá ka koeʻuhí ko e tokoni ʻa e ʻEikí ke tau ako mei ai pea iku ai pē ʻo ikunaʻi kinautolú—pea mo e fiefia taʻe-hano-tatau ʻi he moʻui ka hoko maí.”
Kuo fakahā ʻa e moʻoni ko ʻeni ʻo e fiefiá ʻi heʻeku moʻuí ʻi he hokohoko atu ʻeku tokanga taha kiate Iá, pea toe piki maʻu ki he vaʻa ukameá—ʻa e folofola ʻa e ʻOtuá—ʻi he ʻaho takitaha (vakai, 1 Nīfai 15:23–24).
Ko Hono Maʻu ʻo e Ivi Matuʻuaki Fakaelotó ʻi he Ngaahi Taimi Faingataʻá
ʻI he hokohoko atu ʻeku fekumi ki he fiemālié mo matuʻuaki ʻeku fokoutuá, naʻe fakahinohinoʻi au ʻe heʻeku pīsopé ki he kalasi moʻui fakafalala pē kiate kita ʻa e Siasí “Ko Hono Maʻu ha Mālohi ʻi he ʻEikí: Ivi Matuʻuaki Fakaelotó.”
ʻOku ou tui ko e kalasi ko ʻení kuo foaki mai ia mei he ʻOtuá, naʻe ueʻi fakalaumālie, pea ʻoku fakaofo ia. Naʻá ku ako ʻa e founga ke liliu ai ʻa e fokoutua ko ʻení, ʻa ia naʻá ne ʻai ke hā ngali fakaloloma ʻa e moʻuí, ke hoko ko ha aʻusia fakaakó. Naʻe akoʻi au ʻe he kalasi ko ʻení ki he founga ke fakatupulaki ai ʻa e tui mālohi ki he Fakamoʻuí, ako ʻa e ngaahi sīpinga fakakaukau ʻoku leleí, mapuleʻi ʻa e loto-mafasiá mo e loto-hohaʻá, pea iku ʻo laka atu ʻi heʻeku moʻuí ʻi he ʻamanaki lelei.
Naʻa mo e ngaahi naunau pehení, ʻoku ʻi ai ha ngaahi ʻaho ʻe niʻihi ʻoku faingataʻa mo fakaongosia ia. ʻOku fakamamahi ʻa e loto-hohaʻa mo e loto-mamahi ʻoku faʻa feʻao fakataha mo e ngaahi momeniti ko iá. Ka kuo tokoniʻi au ʻe he muimui ki he faleʻi ʻa e palōfitá ke u ʻilo hoku halá ʻi he ngaahi taimi faingataʻa ko ʻení.
Naʻe fakamatalaʻi ʻe Palesiteni Lāsolo M. Nalesoni ʻa e mahuʻinga ʻo e “fakakaukau fakasilesitialé” ʻi he taimi ʻoku fehangahangai ai mo e ngaahi faingataʻá, ʻo ne pehē: “Fakakaukau ki he tali ʻa e ʻEikí kia Siosefa Sāmita ʻi he taimi naʻá ne lotua ai ha fakanonga ʻi he Fale Pōpula Lipetií. Naʻe akoʻi ʻe he ʻEiki ʻa e Palōfitá, ko hono ngaohikoviʻí, te ne maʻu ai ha poto mo lelei kiate ia [vakai, Tokāteline mo e Ngaahi Fuakava 122:7]. Naʻe talaʻofa ʻe he ʻEikí, ʻʻE toki hakeakiʻi koe ʻe he ʻOtuá ʻi ʻolunga ʻo kapau te ke kātakiʻi ia ʻo leleiʼ [Tokāteline mo e Ngaahi Fuakava 121:8]. Naʻe akoʻi ʻe he ʻEikí ʻa Siosefa ke fakakaukau fakasilesitiale pea mo sioloto ki ha pale taʻengata kae ʻoua ʻe nofotaha pē ʻi he ngaahi faingataʻa fakamamahi ʻo e ʻahó.”
Ko ia, ʻi heʻeku muimui ki he faleʻi ʻa Palesiteni Nalesoní, ko e meʻa ʻeni ʻoku ou fai ke tokoniʻi ʻeku moʻui lelei fakaeʻatamaí—ʻoku ou tokanga taha ki he leleí. ʻOku ou fai hoku lelei tahá ke tokangaekina ʻeku moʻui lelei fakaeʻatamaí ʻo fakafou ʻi he ngaahi maʻuʻanga tokoni fakalaumālié mo fakatuʻasinó fakatouʻosi. ʻOku ou maʻu ha fakakaukau ʻoku toe lahi angé—ʻa e fakakaukau ʻoku taʻengatá. ʻOku ou manatuʻi mo tauhi ʻeku ngaahi fuakavá.
Kae hiliō aí, ʻoku ou hanga ki hoku Fakamoʻui ko Sīsū Kalaisí, ke maʻu ha ʻamanaki lelei mo ha mālohi.
Kapau ʻokú ke fefaʻuhi mo ha faingataʻa ʻoku tuʻu pau, ʻo tatau ai pē pe ʻoku tupu ia mei he ngaahi fili ʻo e kuohilí, ngaahi fili ʻa e niʻihi kehé, pe ko e foʻi moʻoni ko ia ʻoku tau moʻui ʻi ha māmani ʻoku ʻikai haohaoá, manatuʻi ʻa e ngaahi talaʻofa ʻo e melinó, fiemālié, mo e fiefia ʻoku ʻomi ʻe heʻetau Tamai Hēvaní mo Sīsū Kalaisi ʻi heʻetau tafoki kiate Kinauá.
ʻOku ou fakamālō ki he Tamai Hēvaní he ʻaho kotoa pē ʻi hono tokoniʻi au ke u loto-vilitaki ange ʻi hoku ngaahi faingataʻaʻia fakaemoʻui leleí. Naʻe ʻikai ke u teitei fakakaukau te u fai ha fakamālō koeʻuhí ko ha pole peheni, ka ʻoku ou houngaʻia ne tokoniʻi au ʻe he faingataʻa ko ʻení ke u ʻiloʻi ʻa e lahi ʻo ʻeku fiemaʻu ʻeku Fakamoʻuí ʻi heʻeku moʻuí. ʻOku ou ongoʻi ʻoku fenāpasi ange hoku lotó mo Hono finangaló he ʻaho kotoa pē.