Fakaʻilekitulōnika Pē
Ko ha kiʻi Tohi mo ha Ongo ʻi Hoku Lotó
Ne kamata ke liliu ʻa e meʻa kotoa kiate au ʻo fakafou mai ʻi ha tokotaha ne teʻeki ai ke ma fetaulaki.
ʻOku nofo ʻa e tokotaha naʻá ne faʻú ʻi ʻAitahō, USA.
ʻI heʻeku kei ngāue fakafaifekaú, naʻá ku kau ʻi ha fakatuʻutāmaki ʻi he halá ne kafo ai hoku tuʻá pea mole mo ʻeku manatú. ʻI heʻeku foki pē ki ʻapí, naʻá ku hū ki he akó ka naʻá ku faingataʻaʻia. Naʻe ʻikai ke u manatuʻi ʻa e ngaahi meʻa faingofuá, pea makatuʻunga ʻi he mamahi hoku tuʻá, naʻe ʻikai ai ke u lava ʻo faʻo ha meʻa ʻi heʻeku kato naunaú tukukehe pē ha pepa ako ʻe taha mo ha peni.
Naʻá ku ʻita. Ne u fakaʻaongaʻi ha māhina ʻe 18 ʻi he ngāue maʻá e ʻOtuá pea foaki kotoa ʻeku moʻuí Maʻana. Ko e hā nai naʻe ʻikai ke Ne fakamoʻui ai aú? Naʻá Ne ʻi fē nai?
ʻI he hokohoko atu ke fakalalahi ʻa e langá, naʻe kamata ke u ongoʻi he ʻikai ke u lava ʻo tafoki ki he ʻOtuá. Naʻe kamata ke u veiveiua—pe te Ne lava ʻo—tokoniʻi au. Naʻá ku fakakaukau, kapau he ʻikai ke Ne lava ʻo tokoniʻi au, tā he ʻikai hano ʻaonga ʻa e ako folofolá ia mo e ʻalu ki he temipalé. Naʻá ku tafoki mei he ʻOtuá he naʻe fuʻu faingataʻa ʻa e moʻuí, pea naʻe ʻikai ke u lava ʻo sio ki ha founga te u hao ai.
ʻI ha ʻaho mātuʻaki faingataʻa moʻoni, ne u tō ai ʻi ha sivi ʻe taha hili ʻa ʻeku ako ʻi ha ngaahi houa lahi pea naʻe toe langa lahi ange foki mo hoku tuʻá. Naʻá ku hū ki tuʻa ʻo tangutu ki lalo peá u tangi.
Ne hili ha ngaahi miniti siʻi mei ai, naʻe lue mai ha taʻahine mo malimai mai pē. Naʻá ne mono mai ha kiʻi tohi naʻe pehē, “Ko ia ke ʻoua naʻa mou tokanga ki he ʻapongipongí: koeʻuhí ʻe tokanga ʻa e ʻapongipongí ki heʻene ngaahi meʻa ʻaʻaná.’ [Mātiu 6:34]. ʻOku leʻohi koe ʻe he Tamai Hēvaní. Naʻá ku kole kiate Ia. ʻOkú Ne ʻofeina koe.”
Naʻe nofoʻia au ʻe he Laumālié. Ne fuoloa ha ʻikai ke u toe ongoʻi ʻa e ʻofa ʻa e ʻOtuá ʻiate aú. Ka naʻe fakatupu ʻe he taʻahine naʻá ne ʻomi ʻa e kiʻi tohí kiate aú ha ngaahi ongo ʻi hoku lotó, peá ne ʻomi au ki he kamataʻanga ʻo ʻeku tuí, ʻo fakamanatu mai kiate au ʻa ʻeku ngaahi aʻusia kimuʻa mo e Laumālié.
Naʻe kamata ke u tafoki tuʻolahi ki he Tamai Hēvaní ʻi he faʻa lotu. Tatau ai pē kapau naʻe ʻikai ke u lava ʻo sio ki he ngataʻanga ʻo ʻeku mamahí, ka naʻá ku kole kiate Ia ke fakafiemālieʻi ʻeku mamahí pe ʻomi kiate au ha mālohi ke u lavaʻi ʻa e ʻahó. Naʻá ku tokanga lahi ange ki hono ako ʻo e folofolá mo e ʻalu ki he temipalé.
Neongo ʻoku teʻeki ke sai lelei ʻeku manatú mo ʻeku felangākí, kuó u ako ke nofo ofi ki he ʻEikí. Naʻa mo e taimi ʻoku ʻikai ke u lava ai ʻo mamata ki he kotoa ʻo e ngaahi meʻa ʻoku toka mei muʻá, ka ʻoku ou ʻiloʻi ʻokú Ne ʻi ai. ʻE lava ke u ʻamanaki atu ki he kahaʻú ʻi he tui kiate Iá.