Ko e Mālohi ʻo e Fakahā Fakatāutahá
Founga ke maʻu ai ha fakahā ki hono paotoloaki ʻo e moʻuí, ʻa ia ʻoku fakapatonu kiate koé.
Tā fakatātā ʻa Allen Garns
“Lotu ʻi he huafa ʻo Sīsū Kalaisí fekauʻaki mo hoʻo ngaahi hohaʻá, manavasiʻí, mo ho ngaahi vaivaí—ʻio, ʻa e ngaahi fakaʻānaua ʻo ho lotó. Peá ke fakafanongo leva! Tohi e ngaahi fakakaukau ʻoku haʻu ki ho ʻatamaí. Hiki e ngaahi meʻa ʻokú ke ongoʻí pea fakahoko ʻa e meʻa naʻe ueʻi koe ke ke faí. ʻI hoʻo toutou fai ʻeni ʻi he ʻaho ki he ʻaho, māhina ki he māhina, taʻu ki he taʻú, te ke ‘tupulaki ʻi he tefitoʻi moʻoni ʻo e fakahaá.’
“ʻOku fie maʻu koā ʻe he ʻOtuá ke folofola atu kiate koe? ʻIo!”
Palesiteni Russell M. Nelson, Palesiteni ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, “Fakahā maʻá e Siasí, Fakahā ki Heʻetau Moʻuí,” Liahona, Mē 2018, 95.
“Te ke lava ʻo maʻu ha tataki fakafoʻituitui mo ha fakahā ʻoku fenāpasi mo ʻEne ngaahi fekau ʻoku fakapatonu kiate koé. ʻOku ʻi ai hamou ngaahi misiona mo e tufakanga makehe ke fai ʻi he moʻuí pea ʻe ʻoatu ha fakahinohino makehe ke mou fakahoko ai kinautolu.
“Naʻe ʻi ai ha tahi ke kolosi ai ʻa Nīfai, tokoua ʻo Sēletí, pea naʻa mo Mōsese—pea naʻe kehekehe pē ʻenau takitaha fakahoko iá. Naʻe ngaohi ʻe Nīfai e ‘ngaahi ʻakaú ʻi ha founga fakatufunga fakaʻofoʻofa.’ Naʻe foʻu ʻe he tokoua ʻo Sēletí ha ngaahi vaka fakalafalafa naʻe ‘malu ʻo hangē ko ha ngaahi ipú.’ Naʻe ‘ʻalu pē [ʻa Mōsese] ʻi he mōmoá ʻi loto tahi.’
“Naʻa nau takitaha maʻu ha fakahinohino fakafoʻituitui, fakapatonu kiate kinautolu, pea naʻa nau takitaha maʻu ha loto-falala pea nau ngāue.”
Michelle Craig, Tokoni ʻUluaki ʻi he Kau Palesitenisī Lahi ʻo e Kau Finemuí, “Ivi Fakalaumālié,” Liahona, Nōv. 2019, 21.
“Ko e keinangá ʻoku ope atu ia ʻi ha maʻu meʻatokoni lelei. Ko ha ongo ia ʻo e fiefia, maʻu meʻatokoni, kātoangaʻi, fevahevaheʻaki, fakahaaʻi ʻo e ʻofa ki he fāmilí mo e ngaahi ʻofaʻangá, fakahaaʻi ʻetau houngaʻia ki he ʻOtuá, pea fokotuʻu ha vā fetuʻutaki mo fiefia ʻi ha meʻatokoni lahi mo ifo ʻaupito. ʻOku ou tui ko e taimi ko ia ʻoku tau keinanga ai he folofola ʻa Kalaisí, ʻoku totonu ke tau fakakaukau ki ha aʻusia tatau. …
“… ʻOku lava ke ʻomi ʻe he keinanga he folofolá ha fakahā ke tokoni ki he moʻuí, fakapapauʻi mai hotau tuʻunga totonú mo hotau mahuʻinga ki he ʻOtuá ko ʻEne fānau, pea tataki ai hotau kaungāmeʻá kia Kalaisi mo e moʻui taʻe ngatá.”
ʻEletā Takashi Wada ʻo e Kau Fitungofulú, “Keinanga ʻi he Folofola ʻa Kalaisí,” Liahona, Mē 2019, 38–39, 40.
“Ko e sākalamēnití ko ha taimi foki ia ke akoʻi ai kitautolu ʻe he Tamai Hēvaní fekauʻaki mo e Fakalelei ʻa Hono ʻAlo ʻOfaʻangá—ʻa hotau Fakamoʻui ko Sīsū Kalaisí—pea ke tau maʻu ha fakahā ki ai. Ko ha taimi ia ke ‘tukituki, pea ʻe toʻo kiate kimoutolu,’ ke kole pea maʻu ʻa e ʻilo ko ʻení. Ko e taimi ia ke tau kole ʻi he loto-ʻapasia ki he ʻOtuá ʻa e ʻilo ko ʻení. Pea kapau te tau fai ia, ʻoku ʻikai haʻaku veiveiua te tau maʻu ʻa e ʻilo ko ʻení, ʻa ia te ne faitāpuekina fau ʻetau moʻuí.”
ʻEletā Claudio R. M. Costa ʻo e Kau Fitungofulú, “ʻOku Nau Manatu Maʻu Ai Pē Kiate Ia,” Liahona, Nōv. 2015, 103.
“Talangofua, manatuʻi ʻa e taimi naʻá ke ongoʻi ai ʻa e Laumālié ʻi he kuohilí, mo kole ʻi he tuí. Te ke maʻu hoʻo talí, pea te ke ongoʻi ʻa e ʻofa mo e melino ʻa e Fakamoʻuí. Mahalo pē ʻe ʻikai hoko vave mai pe ʻi he founga ʻokú ke fie maʻú, ka ʻe hoko mai pē ʻa e talí. ʻOua naʻá ke foʻi! ʻOua naʻá ke teitei foʻi!”
ʻEletā James B. Martino ʻo e Kau Fitungofulú, “Tafoki kiate Ia pea ʻe Maʻu e Ngaahi Talí,” Liahona, Nōv. 2015, 59.
“Kuo toutou fakahā mai ʻe he ʻEikí kiate kitautolu ke tau ‘fekumi ki he ʻiló, ʻio, ʻi he ako pea ʻi he tui foki.’ Te tau lava ʻo maʻu e māmá mo e mahinó ʻo ʻikai ngata pē ʻi he fakakaukau fakapotopoto ʻoku tau maʻú, kae fakafou foki ʻi he fakahinohino mo e ueʻi ʻa e Laumālie Māʻoniʻoní. …
“ʻI hono fakatahaʻi e ongo ʻata ko iá ʻi hotau laumālié, ʻoku kakato leva e foʻi ʻīmisí ʻo hā mai leva ia ʻi honau tuʻunga totonú.”
ʻEletā Mathias Held ʻo e Kau Fitungofulú, “Fekumi ki he ʻIló ʻi he Laumālié,” Liahona, Mē 2019, 31, 33.