Siasi Fakatefito ʻi ʻApi Mavahe mei ʻApí
Te u tokoniʻi fēfē nai ʻeku fānaú ke nau fokotuʻu ha makatuʻunga ʻi he ongoongoleleí ʻi he taimi te u mavahe ai mei ʻapí?
Laʻitā mei he tokotaha faʻu tohí; ngaahi ʻata kehé mei he Getty Images
Ko e taimi naʻe fakamatalaʻi ai ʻe Palesiteni Lāsolo M. Nalesoni ʻa e fakatefito ʻi ʻapi ʻa e Siasí lolotonga e konifelenisi lahi ʻi he 2018, pea mo e taimi naʻe fanongonongo ai ʻa e polokalama Fānaú mo e Toʻu Tupú ʻi he 2019, naʻe vēkeveke homau fāmilí.
Ka neongo ia, ʻi he ofi ki he 2020, ne mau fehangahangai mo ha meʻa fakafeʻātungia lahi. ʻI he kamataʻanga ʻo Sānualí, naʻe pau ke u mavahe mei ʻapi ʻi ha ngāue māhina ʻe ono ʻi he vaʻa fakakautaú. Naʻá ku ʻiloʻi naʻe ʻi ai ha fatongia toputapu ʻoʻoku mo hoku uaifí ke fakatefito e ako ʻo e ongoongoleleí ʻi homau ʻapí maʻa ʻema fānau ʻe toko nimá, ka ne u fifili pe ʻe founga fēfē haʻaku fakahoko ʻeku kongá lolotonga ʻeku mavahe mei ʻapí.
Naʻe kamata ke laku fakakaukau mai ʻema fānaú ki ha ngaahi taumuʻa ʻe tokoni ke tupulaki “ʻa e poto [ʻiate kinautolu] mo e lahi, pea [ke] ʻofeina [kinautolu] ʻe he ʻOtuá mo e tangatá” (Luke 2:52), ʻo hangē ko e Fakamoʻuí. Naʻe talamai ʻe hoku ʻofefine taʻu valú ʻa e taha ʻo ʻene taumuʻá ke ako ke feimeʻatokoni mo Teti. Naʻá ku loto-mamahi he naʻe pau ke u toe liliu ʻene taumuʻá ki ha meʻa te ne lava ʻo fai ʻi ha kiʻi taimi taʻekau ai ʻeku tokoní. Naʻe fie maʻu ʻe hoku ngaahi fohá ke nau hoko ʻo toe lelei ange ʻi he pasiketipoló mo e lelé—ko ha meʻa ia ʻe ua ne mau manako ke fakahoko fakataha. Naʻá ku fakalotolahiʻi kinautolu ʻi heʻenau taumuʻá, ʻi heʻeku ʻilo ʻe mole ʻeku ngaahi faingamālie ke tokoniʻi kinautolú. Ne mau teuteu ko ha fāmili ki he lelei taha te mau lavá.
ʻOku hoko maʻu pē ʻa e mavahevahe e fāmilí ko ha ʻahiʻahi, ka ʻoku hoko ʻa e tekinolosiá fakataha mo e fakahinohino ʻo ha palōfita moʻui ke ne fakaʻatā au ke u kau atu ki heʻemau ako fakafāmili e ongoongoleleí.
Neongo ne mau kehekehe ʻaki ha houa ʻe 10, ka naʻa mau ongoʻi faaitaha ʻi heʻemau ako e Haʻu, ʻo Muimui ʻIate Au. ʻI he taimi ʻataá, ʻoku ou talanoa vitiō pongipongia ai lolotonga e ako folofola ʻa hoku fāmilí ʻi he houa efiafí ʻo talanoa kau ki he ngaahi vahe ʻo e Tohi ʻa Molomoná ne mau akó. Ne u talanoa telefoni mo ʻeku fānaú kau ki he ngaahi vitiō ʻo e Tohi ʻa Molomoná, pea te u aleaʻi mo hoku uaifí ʻa e ngaahi fakakaukau ki he efiafi fakafāmili ʻi ʻapí.
ʻI heʻeku loto ke tokoniʻi ʻeku fānaú ʻi he Fānaú mo e Toʻu Tupú, ʻoku ou fokotuʻu ʻeku ngaahi taumuʻa pē ʻaʻaku peá u ʻave ʻa e ngaahi fakamatala kuó u hikí ki he fānaú ʻi he uike takitaha, ʻo vahevahe ai ʻeku fakalakalaká peá u ʻeke kiate kinautolu fekauʻaki mo ʻenau ngaahi taumuʻá. ʻOku ou lava foki ʻo kau atu ʻi ha ngaahi taimi ki he lotu fakafāmilí ʻo fakafou ʻi ha toutou tā telefoni.
Lolotonga ʻeku mavahe mei hoku fāmilí, naʻe vave ʻeku fakatokangaʻi ʻa e ngaahi tāpuaki ʻo e muimui ki he fakahinohino ʻa e palōfitá. Naʻá ku toe ʻilo foki ʻoku malava pē ʻa hono fokotuʻu ha ʻapi ʻoku ako ai ʻa e ongoongoleleí, neongo ʻeku mamaʻo mei ʻapi!